1 Samue 10:19 - Wanano OT Portions

¹⁹ Tirota jiyumahca mʉsa Cohamacʉ waro. Ã jiro tirota jiyumahca jipihtia mʉsa ñano wahaare mʉsare yʉhdʉ witichʉ yoa mʉjariro. Tiro mʉsare to ã noano yoa mʉjapachʉta, mʉsa sehe mʉsa basita tirore cohãna tana niyuhca. Ã cohãna, pairo pʉhtoro “rey” mʉsa ni pisuhtiro sehere mʉsare to pʉhtoro sõbasachʉ cahmana niyuhca mʉsa. Ã jiro mipʉre tirore mʉsa siniriro cjiro seheta mʉsare yoabasaro taro niyuhca jʉna. Ã jina mʉsa doce curuari macaina jipihtina to ñʉrocaroi cãa curuari macaina soro, soro sʉrʉcʉ sʉ bʉrohtina jiyuhca. Ã yoa Cohamacʉ sehe mʉsare cʉ̃iro mʉsa watoi jiriro, mʉsa coyeirore bese, mʉsare pʉhtoro sõbasahto jiyuhca.” Ã ni, yʉhʉre mari Cohamacʉ Yawe yahu turia dutihre mʉsare —ni yahuha Samue to masare.

1 Samue 10:19 ပူးပေါင်းရင်းမြစ်များ

Miquea 5:2

Cohamacʉ to yare yahu mʉhtariro Miqueare õ sehe ni yahu quihõyu dutiha israe masare: —Mʉsa Judá pohna wiho jiri curua ya yahpai cʉ̃ maca Belẽ Efarata wiho jiri macacã jira. Ã jiri macacã to jipachʉta, tí macaihta cʉ̃iro mʉsa coyeiro waro masa bajuarohca, jipihtina israe masa bui pʉhtoro cjihto. Tiro wihãriro, masa bajuahtiro ñʉchʉno sehe, jipihtina israe masa ti ã wacũnohohtiro jirohca. Tó sehe jirirore ñʉchʉ tirohca tirocã israe masa bui pʉhtoro cjihto sehe —ni yahu quihõyu dutiha Cohamacʉ Miqueare.

1 Samue 10:20

To ã ni yahuchʉ tʉhoa, tina sehe to niriro seheta Yawe to ñʉrocaroi cãa curuari cahmachurʉcʉ sʉ, sʉrʉcʉ sʉ bʉroha. Ti ã cahmachurʉcʉ sʉri baharo, Samue sehe Cohamacʉ to basita tinare ti pʉhtoro cjihtore to ñochʉ cahmano, ti ñʉrocaroi docapeare docape ñʉha. To ã docape ñʉchʉ, “Benjamí cjiro ya curua macariro jirohca mʉsa pʉhtoro cjihto” ni, tinare masichʉ yoaha Cohamacʉ.

1 Samue 8:19

To ã ni yahuchʉ tʉhopahta, tina sehe tirore ne cua pisaro tʉhoera tiha. Ã jia õ sehe niha tina: —Noanocanohca. Sã cʉ̃hʉre rey cjihto sõbasaga.

1 Samue 8:5

à sʉhʉdua sʉa, õ sehe niha tina tirore: —Samue, mʉhʉ sehe bʉcʉro quiro waro jira. à yoa mʉ pohna, mʉ basi mʉ pʉhtoro sõrina cʉ̃hʉ sãre mʉ sʉho ji mʉhtano seheta sʉho ji mʉhtaerara. à jina sã sehe pʉhtoa ti ji namochʉ cahmaeraja jʉna. Paye curuari macaina mehchʉ ti pʉhtoro rey cjʉaina jira. à jina sã cʉ̃hʉ sãre dutihtiro rey cjihto sãre mʉ sõbasachʉ cahmaja —niha tina.