Levi 26:4 - Gourmanchéma Bible

⁴ n baa tuuni yipo ki taaga ki yogunu, ki tinga baa luoni ki bonluonkaala, i koatiidi mo n yaa luoni i bonluonkaala.

U TIENU MAAMA TILI 2013

⁴ n baa tuuni yi po ki taaga ki yogunu, ki tinga baa luoni ki bonluonkaala, i kuani tiidi mo n yaa luoni i bonluonkaala.

Levi 26:4 ပူးပေါင်းရင်းမြစ်များ

1 Bi Badiba 17:1

*Elia, yua n den ñani Tisibe dogu nni ki ye Galaadi diema nni, den yedi Isalele yaaba bado Akabi: «N tie Li Miali Diedo Isalele yaaba Tienu yua n ye ki fo yaa naacemo. Hali U Tienu po, taaga kan go mii, mangu mo kan go luoni yaa bina n tie ne, se n mia.»

Jobi 5:10

Wani n teni ke ki taaga mii u tingbanu po, Ki teni ke mi ñima soangidi i kuani.

Pisomi 104:13

A ye hali tanpoli po, ki teni ke ki taaga mii a juana po, Ki faami ke ki tinga mo ñu ki guodi.

Pisomi 67:6

Bi niba pagi a U Tienu, Bi niba kuli taani ki pagi a.

Pisomi 67:7

Ki tinga luoni ki bonluonkaala, U Tienu, wani ti Tienu seligidi ti.

Pisomi 68:9

Ki tinga den digibi, ti tawadi den nandi a nintuali, Nani lan den tua maama Sinayi po, U Tienu, wani Isalele Tienu nintuali.

Pisomi 85:12

I moamoani pani ki tinga nni U Tienu mo yaa teginma biindi hali tanpoli ki diidi.

Pisomi 85:13

Li Miali Diedo puuni mi yemanma, Ti diema mo go baa luoni mi bonluonkaala.

Esayi 30:23

Lanwani o baa ŋa ki taaga a bonbulikaala po Ki tinga mo n baa luoni yaa bonluonkaala baa yaa yaba ki go mani mo. Laa daali a yangola baa gedi ki ban ŋmani yaa yankpaakaani n yaba nni.

Esayi 5:6

N baa lu ki diani u kuanu yeni. Oba kan coandi coandi i tiidi yeni beni. Oba kan ko ki gaani ki lindi yi. I konkoni leni a kongoaba baa pudi lienni. N baa waani a tawala mo n da go cedi taaga n mii u niinni.

Jeremi 14:22

Naani i nibuoli buyuodi siiga pia yaa bulo n baa fidi ki teni ki taaga n mii? Ti tawadi yaadi n kpendinni ki taaga ye le? Naani laa tie fini Li Miali Diedo ti Tienu kaa? Ti dugi apo, kelima fini n tiendi laa bonla kuli.

Esekieli 36:30

N baa teni yi tiidi bonluonkaala leni i kuani kpaandi n pili ki pugini, ke mi koma n go da fiagidi yi i nilanbuoli siiga.

Joeli 2:22

Yinba ti moayandi, yin da jie, Kelima a yankpaafuana baa bundi, I tiidi baa luoni i bonluonkaala. Bu kankanbu leni duven tibu baa luoni boncianla.

Levi 25:19

Ki tinga baa luoni ki bonluonkaala, yi kuli mo baa di ki guodi, ki yaa go ye leni mi yanduanma.

Levi 25:21

N baa wuli yipo n seli li binluobili, ki tinga baa luoni yaala n baa dagidi bina taa yaa jiema po.

Sakari 8:12

N baa teni mi yanduanma n tieni ki tinga po: Duven tiidi baa luoni, Ki tinga baa teni ti kpaandi n tieni, Ki taaga baa mi boncianla. N baa pa laa bonla kuli n niba yaaba n sieni.

Matie 5:45

Yeni yi baa tie yi Baa yua n ye tanpoli bila, kelima o yen tendi ke o yienu pudi bi nibiadiba leni bi niŋanba kuli po, ki yen tendi ke ki taaga mii bi niteginkaaba leni yaaba n ki tiegi kuli po.

Jesu Tondiba Tuona 14:17

Baa yeni o tiendi siedi o yuli po kaa cedi leni wan ŋanbidi maama ki puuni yi ku siagu leni u jetaagu yogini kuli, ki go puuni yi mi jiema ke li kandi, ki go puuni yi li pamancianli yeni.»

Mi Tiadima 11:13

Yi yaa tuo ki ŋua min teni yi yaa balimaama dinla nne, ki baa yaa bua Li Miali Diedo yi Tienu, ki baa yaa kpiagidi wani, leni yi pala kuli, leni yi yantiana kuli,

Mi Tiadima 11:14

n baa tuuni yi diema po ki taaga ki yogunu, ku siagu cilima taaga leni ku juodima yaa taaga, ke yin baa *ŋalikama, duvenpaano leni mi kpama.

Mi Tiadima 28:12

Li Miali Diedo baa luodi yipo o ŋalimanŋamo, ki yaa tuuni yi diema po ki taaga ki yogunu, ki seligi yi nii tuona kuli. Nibuotoe n baa kpendi ki ledi yi kani, yinba wani, yi kan ledi oba kuli kani.

Jaki 5:7

Lanwani n kpiiba, yin yaa pia li juunli hali o Diedo cuama. Diidi mani, o kpakpaalo yen gu ki tinga bonluonkaala, yaala n pia mayuli hali boncianla, ki juuni lipo hali wan baa baa ki takpiaga leni ki tajuodikaaga kuli.

Mi Doagidima 11:6

Bi pia u paalu ki baa luoni tanpoli ke ki taaga n da mi ban baa pua sawali yaa yogunu. Bi go pia u paalu ki baa teni i kpeni ñima n lebidi ki tua soama, ki go teni o falabiado buoli kuli n baa ki tinga nni ban bua yaa yogunu kuli.