Jeremi Bubula 2:21 - Gourmanchéma Bible

²¹ Bi jawaaba leni a jakpela Bikuli bili bili tiipo i sani nni. N jafanba leni n jawaaba Bu toabu dini bikuli. A pabienli nni a ku ba ke niñima ki cuo ŋa.

U TIENU MAAMA TILI 2013

²¹ Bi jawaaba leni a jakpela, Bikuli bili bili tiipo i sani nni. N jafanba leni n jawaaba, Bu toabu dini bikuli. A pabienli nni, a kpa ba ke ninñima ki cuo ŋa.

Jeremi Bubula 2:21 ပူးပေါင်းရင်းမြစ်များ

2 Bi Badiba Jama 36:17

Lanwani Li Miali Diedo den teni ke Babilona bado gedi ki ku o leni ki jugisiega o diegu nni, li jawaaba, li jafanba leni li jakpela kuli ki naa ŋa oba kuli.

Esiteri 3:13

Bi den teni a tila yeni a tonda ke bi gedini a o bado diema nni kuli ki tenteni. A tila yeni niinni li den bili ke ban kpa ki bolini Jufinba kuli, bi nipanba leni a nikpela, a bila leni bi puoba, ki go fagi bi bonpiakaala. Ban bolini bikuli dayenli, piiga n cilie, ban yi yua Adadi, yaa piiga n dataali daali.

Esayi 27:11

I beni yaa kuodi bi yen kua i Bi puoba n cua ki taa i ki ban kuuni bi fantama. Li den tie yaa niba n ki pia yanfuoma, Yua n den tagi ba ki den gbadi bi niñima, Yua n den tagi ba ki den juogi ba.

Jeremi 11:22

Lani yaa po yo ke Li Miali Diedo U Paaciamu Kuli Daano maadi mi naa maama: «Diidi mani n baa yie bipo. Ki jugisiega baa je bi jawaaba Mi koma mo n baa je bi bisiaba leni bi bijaba kuli.

Jeremi 13:14

Mini Li Miali Diedo yedi ke n baa taa ki pua ba leni biyaba ban mumudi ki taani bi bidanba leni bi bila kuli. Oba kan cia, o kan gbadi bi niñima. Pu kan teni ke o kan bolini ba.»

Jeremi 18:21

Lani yaa po ŋan teni mi koma n nandi bi bijaba. Ki kodi ba leni ki jugisiega. Teni bi puoba n luo a bila Ban tua kpepuona Mi kuuma n nandi bi ciaba Bi jawaaba mo n kpe bu toabu po.

Jeremi 21:7

Li yaa puoli mini Li Miali Diedo n yedi: ‹N baa taa Juda bado Sedesiasi, o koanbala leni u naa dogu niba kuli bu toabu leni mi koma n dini ki ŋa yaaba, ki ŋa ba Babilona bado Nebukanesa leni yibalinba, leni yaaba n bua ki ñani bi miana nuu nni. Bi baa bolini ba, Nebukanesa kan gbadi bi niñima. Niloba kan cia. O kan juogi ba.› »

Jeremi 4:31

N gba li dunli, nani yaa pua n gbaani Ki bua ki maa yaa dunli yeni, N gba i yanbani ñiindi nani yaa posiaga n da baa kpa maa o cicilimadi yeni, Siyono badisalo yaa nialu yo. O fuo ki jiindi O tandi o nii ki yedi: «N bonla pia mi niñima, Bi nikpaba baa pua ki kpa nni.»

Jeremi 51:22

N teni ke a nugi o ja leni o pua. N teni ke a nugi o jakpelo leni ki biga. N teni ke a nugi o jawaalo leni o jafaano.

Jeremi 6:11

Li Miali Diedo pabiencianli ye leni nni N kubi li ki coagi mo. Li Miali Diedo yedi: «Wuli li yaa biga n puagi i sani nni po, Leni bi nipanba po. Kelima bi baa cuo o ja leni o pua Yaaba n kpeligi leni yaaba n podi bonŋanla kuli.»

Jeremi 9:20

Kelima mi kuuma kua ti diebona kani. Mi kua ti dieŋama nni. Mi di a bila i sani nni, Ki di bi nipanba mu daamu nni.

Jeremi 9:21

Li Miali Diedo ñoabonli nne: Bi niba baa kpe ki wudi nani ti bugidi yeni i kuani nni Nani ban yendi yaa dikala Ki luni yua n yendi puoli po yeni, Oba kuli kan nuadi ba.

Jeremi Bubula 1:15

O Diedo deli ki ñani Yaa jakoanda kuli n den ye n kani. O yini ki tieni toagocianli kelima mini yaa po. Ki baa nugi n jawaaba. O Diedo nugi nni, mini li *powandiali Juda.

Jeremi Bubula 1:18

Li Miali Diedo n tiegi Kelima n den yie o *bali maama. Cengi mani yinba i nibuoli kuli Diidi mani n fala! N jafanba leni n jawaaba gedi ti yonbidi.

Jeremi Bubula 1:4

Siyono sani kuli ye leni li pabiidili, Kelima baa go kpendi u badu po. O buliñoana kuli biidi cain, O kopadicianba duni, U dogu badisiaba ye leni li paboanli, O dogu baa ye leni pabiidicianmoanli.

Jeremi Bubula 2:17

Li Miali Diedo tieni wan bi jagi yaala. O tieni wan bi yedi yaala, Wan den maadi yaa maama hali yogu. O bolini ke niñima ki pia o Ki teni ke a yibalinba laa a puoli. O pugini a yibalinba paalu.

Jeremi Bubula 2:2

O Diedo nali Jakobo buoli diedi kuli yenma, Ki naa gbadi bipo niñima. O pabienli nni o pua ki guli Juda dopaali kuli. O pua ki luni bikuli tiipo. O cagini mi diema leni mi badijaba.

Jeremi Bubula 3:43

Li Miali Diedo, a taa a pabienli ki goli nani bu kpalibu yeni, Ki ŋoadi ki deli ti. A den kpaani kaa gba niñima moko.

Esekieli 24:21

Ŋan yedi Isalele buolu yaaba ke mini o Diedo, Li Miali Diedo yedi mi ne: Diidi n baa *joagini n*kaangagidiŋamu, yu n teni ke yi jigini yi yula, ki tie yi nuni pamanli leni yi suginma yeni. Yi bijaba leni yi bisiaba, yin ŋa yaaba Jelusalema po yeni, ki jugisiega n baa kpa ba.

Esekieli 5:11

Li tie lani yaa po mini o Diedo, Li Miali Diedo yua n fo yedi: ‹Nani ŋan *joagini n *kaangagidiŋamu leni a cagindi buoli kuli, leni a biadima buoli kuli yeni, mini moko kan gbadi apo niñima. A kan ŋmadi, n baa bolini a.

Esekieli 7:4

Niñima kan cuo nni yipo Kelima n baa tuni yi yi tagilibiadi kuli, Leni yi cagindi yaadi mo n baa ye yi siiga. Lanwani yi baa bandi ke n tie Li Miali Diedo.»

Esekieli 7:9

Niñima kan cuo nni yipo. N kan ŋa yi fanma. N baa tuni yi yi tagilibiadi Leni yin baa tuuni yaa cagindi kuli. Yeni yi baa bandi ke n tie Li Miali Diedo yua n pua yi.

Esekieli 8:18

Mini moko, n baa tieni ba nani n pali n fii maama. N kan mua bipo, n kan gbadi bipo niñima mo. N kan cengi ba, baa bi yaa kuudi ki mia nni ke min faabi ba.»

Esekieli 9:10

Lanwani mini moko, niñima kan cuo nni bipo, n kan ŋa ba fanma, ama n baa teni bi tuona panpaani n goa ki jiidi bi yula po.»

Amosi 4:10

N den soani yi siiga u yianbiadipuodiko yu n naani leni Ejipiti yu, Ki teni ke bi ku yi nipanba leni mu jugisiemu, Ki fie yi taami mo. N den teni ke yi toanagili kpiema nuulibiadu kua yi. Ama baa leni lani kuli yii den lebidi ki guani n kani. Li Miali Diedo n yedi yeni.

Amosi 8:13

Laa dana nni, bi jafanŋanba leni bi jawaaba baa kpe ñunñuunu.

Sakari 11:6

N kan go gbadi niñima ki tinga niba po, N baa teni bi ŋmiali nni, yua kuli n soani o lielo wan fidi maama. N baa ŋa bi badiba moko n soani ban fidi maama. Bi badiba yeni baa bolini ki tinga niba, N mo kan faabi ba bi nuu nni. Li Miali Diedo n yedi yeni.»

Mi Tiadima 28:50

U baa yaa tie yaa nibuolu yaa nunga n bia, yu n naa fangi jakpelo, ke niñima mo naa pia u bonwaala po.

Mi Tiadima 32:25

Bu toabu baa kpa bi bila yaaba n ye niinpo, Ti jawaanciandi mo n je yaaba n ye deenni. Li baa tua yenma bi jawaaba leni bi jafanba po Yaa bila n da ŋaani leni ti jakpeyukobipiendi po.

Josue 6:21

ki bolini yaala n ye lienni kuli, bi jaba leni bi puoba, a bila leni a nikpela, i ne leni i pe leni i ŋunbi kuli. Bi den ku bikuli leni mu jugisiemu.

1 Samueli 15:3

Lanwani ŋan gedi moala, ki ban baa Amaleki yaaba bu toabu ki bolini ba ki go bolini bi bonpiakaala kuli cain. Ŋan da gbadi bipo niñima, ŋan kpa ba, bi jaba leni bi puoba, leni a bila leni a biŋaanda, leni i ne leni i pe, leni ti yuoyuodi leni i ŋunbi kuli.› »