Jeremi 22:15 - Gourmanchéma Bible

¹⁵ Naani a tama ŋan pia sedili tiidi daadi boncianla yeni N baa doagidi ke a tie bado? Naani a baa ki den pia li bonjekaala leni li bonñokaala ke li dagidi? Ama o den bani ki go tiendi yaa bujiaba n tiegi. Lani yaa po li bonla kuli den cuoni opo bonŋanla.

U TIENU MAAMA TILI 2013

¹⁵ Naani a tama ŋan pia sediri daadi Boncianla yeni, N baa doagidi ke a tie bado? Naani a baa ki den pia li bonjekaala Leni li bonñokaala ke li dagidi? Ama o den kubi yaa bujiali n tiegi leni mi teginma. Lani n teni ke li bonla kuli den cuoni o po bonŋanla.

Jeremi 22:15 ပူးပေါင်းရင်းမြစ်များ

2 Samueli 8:15

Dafidi den diedi Isalele yaaba kuli. O den ja ti buudi o niba kuli po ke li tiegi.

1 Bi Badiba 10:9

N jaandi ki kpiagi Li Miali Diedo a Tienu, yua n ŋanbi apo ki teni ke a kali Isalele yaaba bali kalikaanu po. Li tie kelima Li Miali Diedo bua Isalele yaaba hali yaa yogunu kule ke o dini a li bali ke ŋan teni i moamoani leni mi *teginma n yaa ye.»

2 Bi Badiba 22:2

Josiasi den tieni yaala n tiegi Li Miali Diedo po, ki ŋua o yaaja Dafidi fuuli ki naa jadi ganu bi jienu.

2 Bi Badiba 23:25

Yaa batieba n den kpa dini siiga baa yendo ki den kuani o yama leni o pali leni o fidu kuli Li Miali Diedo sanŋoadima nni ke li de leni Musa balimaama n den bili maama nani Josiasi yeni. Yaaba n den ŋoadi o puoli moko baa yendo ki den naani leni o.

1 Bi Badiba Jama 3:15

Josiasi mo yaa bijaba nne: O bijakpelo Yohama, o lielo Yehoyakimi, o taalo Sedesiasi, o naalo Salumi.

2 Bi Badiba Jama 34:2

O den tieni yaala n tiegi Li Miali Diedo po, ki ŋua o yaaja Dafidi fuuli ki naa jadi ganu bi jienu.

2 Bi Badiba Jama 35:22

Baa yeni Josiasi naa den tuo ke o kan koani leni Neko. O den yie kaa cengi o maama yaama n den ña U Tienu ñoabu nni. O den lebidi o tiayiekaadi ki gedi Megido joaloangu nni ki baa tieni bu toabu.

2 Bi Badiba Jama 35:26

Josiasi jama yua n sieni leni wan tieni yaa *teginma nani lan diani Li Miali Diedo bali maama nni maama,

Mi Kpanjama 20:28

Li *ŋanbili leni i moamoani kuli n yen taani ki kubi o bado. O bali baa pa kelima li ŋanbili po.

Mi Kpanjama 21:3

Ki tieni yaala n tiegi ki go dagidi Laa bonla mani Li Miali Diedo po ki cie a pada.

Mi Kpanjama 25:5

Ñani o nibiado o bado nintuali Lani n tie mi *teginma n pugini o gbandi paalu.

Mi Kpanjama 29:4

O bado yaa tiendi yaala n tiegi, O diema baa yaa pia u paalu, Ama o yaa bua li suuli, o baa bolini o diema.

Mi Kpanjama 31:9

Yaadi a ñoabu ki jia ti buudi leni mi *teginma. Maadi ki ga o niñinnilo leni o luodo.»

O Yanfuodaano 10:17

Yinba yaa diema yaaba yaa bado n tie bulicinbiga, yinba yaaba yaa koanbala n di lan pundi ban je yaa yogunu, ki bua ki baa u fidu bebe, kaa ñu ki gaadi, yi baa yaa pia mi yemanma.

O Yanfuodaano 2:24

O nilo yemanma wani tie wan je, ki ño ki baa o tuonli ñuadi. N sua ke U Tienu n puuni laa yemanma,

Esayi 3:10

Yedi mani: «O niteginka taagi u sanŋamu O baa je o tuonli ñuadi.

Esayi 33:16

Landaano baa yaa ye yaa kaani n kpedi, Yaa tanciangu n juagi n baa yaa tie o wuonkaanu, O baa yaa baadi mi jiema, Ñima mo kan poadi o.

Esayi 9:7

O Diedo fu leni Jakobo puoliŋuani Laa fuugu tie Isalele yaaba po.

Jeremi 21:12

Dafidi diegu yaaba, Cengi mani Li Miali Diedo maama! Li Miali Diedo yedi nanda: «Yaa tiendi mani mi *teginma yaa yogunu kuli. Faabi mani ban janbidi yua, Yaa nilo n duoliti o nuu nni. Lani n tie n pali n da ti fii ki be nani mi fantama yeni, Ki cuo maama ke bi kan fidi gbindi ma Kelima yi tuona n bia maama po.»

Jeremi 22:18

Lani n teni ke Li Miali Diedo maadi yaa maama n tie na, Juda bado Yeojakimi, Josiasi bijua po. O kan baa ban ŋanbi o kuuma ki mua ki yedi: ‹Ŋain n kpiiba mi naa yema te? Ŋain mi naa yema te?› O kan baa ban ŋanbi o kuuma ki mua ki yedi: ‹Ŋain n diedo, mi naa yema te?›

Jeremi 22:3

Li Miali Diedo yedi nanda: Yin yaa tiendi mi *teginma leni yaa bujiali n tiegi. Faabi mani ban janbidi yaa nilo yua n duoliti o nuu nni.

Jeremi 23:5

Li Miali Diedo yedi: «Diidi a dana kpendi, N baa teni Dafidi buolu nni n maa ki bimoanga. O baa tie yaa bado n tuuni bonŋanla leni mi yanfuoma. Kelima o baa yaa tiendi yaa bujiali n tiegi Ki go tiegi mi diema nni.

Jeremi 42:6

Lan ŋani bi lan bia, ti baa tuo ki ŋoadi Li Miali Diedo ti Tienu tinba tiba tin soani a yua yaa kani. Yeni ti pala baa yaa mani kelima ti tuo Li Miali Diedo ti Tienu mayedikaama.»

Jeremi 7:5

Li yaa tie ke i moamoani yi lebidi yi tagi leni yi tuada, Yi yaa tieni bi niba kuli po nani lan pundi maama,

Luki 11:41

Pa mani a luoda yaala n ye yi pala tugu nni lani, yaala n sieni kuli baa ŋanbi yipo.

Jesu Tondiba Tuona 2:46

Daali kuli bi den taagi U Tienu diegu nni leni yanyenma kaa cedi, ki caa biyaba deni ki taandi ki taani dupen, ki boagidi bi jiema leni biyaba leni li pamanli leni li padingili,

1 Korenti 10:31

Lani, yi yaa baa je, leni yi yaa baa ño, leni yin baa tieni yaala kuli, tieni mani likuli U Tienu yaa kpiagidi po.

Mi Tiadima 4:40

Yin go kubi o mabilikaama leni o ñoabona min teni yi yaala dinla, ke yin yaa ye leni li pamanli, yinba leni yi bijaba yaaba n baa ŋoadi yi yaa puoli po, ke yi miali dana mo n foagidi Li Miali Diedo yi Tienu n puni yi yaa diema nni yaa yogunu kuli po.»