1 Samueli 3:19 - Gourmanchéma Bible

¹⁹ Samueli den fandi ki pugidi, Li Miali Diedo mo den ye leni o, waa den tuo ke Samueli n maadi opo yaa maama baa mayenma n tua fanma.

U TIENU MAAMA TILI 2013

¹⁹ Samueli den fandi ki pugidi, ke o Diedo mo den ye leni o. Wani o Diedo ki den tuo ke Samueli n maadi o po yaa maama kuli, ba mayenma n tua fanma.

1 Samueli 3:19 ပူးပေါင်းရင်းမြစ်များ

Mi cilima 21:22

Laa yogunu, Abimeleka den yegi leni o guudikaaba yudaano Pikola ki gedi ki maadi leni Abalahama yaa maama n tie na: «U Tienu ye leni fini ŋan tiendi yaala kuli yaa niinni.

Mi cilima 28:15

Diidi n ye leni a, n baa ŋua ŋa ŋan caa naani kuli ki guani a mi naa diema nni kelima n kan ŋa ŋa baa waamu hali min baa tieni apo min yedi a yaala kuli ki gbeni yaa yogunu.»

Mi cilima 39:2

Li Miali Diedo den ye leni Josefi ke li bonla kuli den cuoni opo bonŋanla o canbaa Ejipiti yua diegu nni.

Mi cilima 39:3

O canbaa den laa ke Li Miali Diedo den ye leni o ke Li Miali Diedo den teni ke Josefi n moandi ki tiendi yaala kuli cuoni bonŋanla.

1 Bi Badiba 8:56

«N jaandi ki kpiagi Li Miali Diedo yua n puni o niba Isalele yaaba mi yanduanma nani wan den niani maama. Wan den teni ke o naacemo Musa soagini yaa maama kuli, mi siiga baa mayenma naa poadi kaa tieni.

2 Bi Badiba 10:10

Yin bandi mani ke Li Miali Diedo n yedi ke o baa tieni Akabi diegu yaala yeni n tieni, baa mayenma ki bia. Li Miali Diedo den kuani wan den teni ke o naacemo*Elia yedi yaama.»

2 Bi Badiba 15:12

Li den tua nani Li Miali Diedo n den maadi Jehu maama ki yedi: «N baa teni a yaabila n yaa di li bali Isalele nni hali nifiima naa.» Li den tua yeni.

2 Bi Badiba 22:16

«Li Miali Diedo yedi mine: ‹N baa teni o falabiado n baa u dogu na leni yaaba n ye u niinni, nani fini Juda bado n cogi li tili ke li yedi maama.

Esayi 43:2

Yi yaa duodi mi ñincianma, n baa ye leni yi. Yi yaa duodi i kpenciami, i kan milini yi Yi yaa cuoni mi fantama nni, Yi kan juu yiba, U mupienu mo kan juu yi.

Esayi 44:26

N saagi o naacemo maama po moamoani. N tonda n pua sawali yaali yaa po mo, o tiendi la. N yedi Jelusalema dogu po: ‹U baa goa ki baa bi niba,› Ki go yedi Juda diema dogi mo: ‹Bi baa goa ki maa bi diebuona.›

Esayi 55:11

N maama yaama n ñani n ñoabu nni tie yene. Mi kan lebidi ki goa n kani kaa soani liba Kaa tieni n yanbuama, Ki naa go tieni min den soani ma man tieni yaala kuli.

Matie 1:23

«Diidi, li *powandiali baa punbi ki maa bonjaga. Bi baa yini o Emanuweli.» Laa yeli bundima n tie “U Tienu ye leni ti.”

Luki 1:28

Maleki yeni den cua o kani ki yedi o: «N fuondi a, fini yua n baa li *ŋanbili U Tienu kani. O Diedo ye leni a.»

Luki 1:80

Ki biga yeni den kpedi ki go fandi bonŋanla, ki ye li fuali nni hali yaa daali ke o den ti doagidi o yuli Isalele yaaba po.

Luki 2:40

Ki biga den fandi ke o gbanmanu pugidi. O den pia mi yanfuoma boncianla, U Tienu *ŋanbili mo den ye leni o.

Luki 2:52

Jesu den fandi ki go kpedi ke o yanfuoma pugidi. U Tienu pali leni bi niba yaa pala kuli den mani opo ki pugidi.

2 Korenti 13:11

N kpiiba, n majuodikaama tie mine: Yin yaa mangidi mani yi pala. Moandi mani ki ŋanbi ki dagidi cain, baagi mani yiyaba, ki yaa pia mani yantiayenli, ki yaa mani leni yiyaba. Lanwani mi buama leni mi yanduanma Tienu baa ye leni yi.

Mi Tiadima 18:22

O sawalipualo yaa maadi Li Miali Diedo yeli nni ke wan yedi yaala yeni naa tieni, li kan yaa tie Li Miali Diedo n yedi yaa maama. O sawalipualo yeni paagi o pale ki maadi. Yin da jie o mani.

2 Timote 4:22

O Diedo n yaa ye leni a. U Tienu *ŋanbili n yaa ye leni yikuli. Amina.

Josue 21:45

Yeni Li Miali Diedo n den niani Isalele yaaba yaa ñoaniani kuli den kua. Baa yendu ki den tua mafanma.

Bi Bujiaba 13:24

Li yaa puoli Manoa pua den mali bonjaga ki yini o Samisona. Bi biga yeni den fandi, Li Miali Diedo den seligi o.

1 Samueli 10:7

Laa sinankeeninba kuli yaa tieni ki gbeni, ŋan tieni ŋan sua ke li pundi ŋan tieni yaala kelima U Tienu ye leni a.

1 Samueli 12:2

Moala diidi mani, o bado yua baa yaa gobidi yi. Mini wani di kpeligi ke n yudi mo pendi, n bijaba mo ye yi siiga. N den gobidi yi hali n jawaama yogunu ki pundi hali dinla.

1 Samueli 16:18

Bi siiga nni yendo den yedi: «Diidi ki le, n den laa Betelema yua Isayi yaa bijua ke o bani li kogidipuali ki go pia u paalu leni li papaali ki tie jakoando, ki bani mi maama, ki pia mi jawaama. Li Miali Diedo moko ye leni o.»

1 Samueli 18:12

Sayula den jie Dafidi kelima Li Miali Diedo den ŋa wani Sayula ki ye leni Dafidi.

1 Samueli 18:14

Wan den tuogi leni yaaba kuli, o den paadi ba kelima Li Miali Diedo den ye leni o.

1 Samueli 18:5

Sayula yaa den soani Dafidi naankani kuli, o den yen gedi ki paadi. Lani, Sayula den teni ke o diedi bi toatieba. Bi niba kuli pala den mani Dafidi po. Baa Sayula badibaanba yaa pala moko den mani opo.

1 Samueli 2:21

Li Miali Diedo den nuali ki laa Ana po ki puni o ti madi ke o go mali bonjala taa leni bonpola lie. Ki biga Samueli den fandi ki pugidi ki tuuni Li Miali Diedo po.

1 Samueli 2:26

O jawaalo Samueli den fandi ki pugidi. Li Miali Diedo leni bi niba kuli yaa pala den mani opo ki pugidi.

1 Samueli 9:6

O naacemo den yedi o: «Diidi ki le, U Tienu nilo ye u dogu yu tie na niinni. O tie nikpiagili. Wan yedi ke yaala n baa tieni kuli baa tieni. Lanwani tin gedi o kani. Daalinba o baa waani ti tin baa tagini naani ki lingi ki le ba.»