Nyanra Njekawkulege 8:1 - Nouveau Testament en Gulay 2004

¹ Nè Saul ndige se de dè tɔl ke dé tɔl Etienne. Kêm ndɔn’t nè kuwe, d’unn gir kɔr njékebe nange le Nube ke kêm ɓee-bò ke Jérusalem kororoi. Njétaakêm-Kristge malang yali nan karé-karé se kêm ngann ɓeege ke ɓeekonge ke Judée se Samarie a tɔ. Nè njékawkulege kuwe á nain-in kêm ɓee-bò ke Jérusalem.

Nyanra Njekawkulege 8:1 ပူးပေါင်းရင်းမြစ်များ

Matthieu 22:6

Gute njé ke rang tuwei ngann njéndige le’n rai se de nyan ke tur a, tɔli de a tɔ.

Matthieu 23:34

Gir’n ke nè á an-in! m’a m’ule se njéribe-dè-tàge ke tà Nube’t se njékumkunjuge a, se njéndang magtubge a tɔ ra si’t. Nè sei a tɔli njé ke karége a, a i ɓeri njé ke nange kàde kage-ke-dese’t a, a i tundei njé ke nange se ndêin maru kêm kei kebe nan’t le si a, a ɔri njé ke nange kororoi se kêm ɓee-ɓee a tɔ.

Matthieu 5:13

Sei sei kate le dooge ke dè nang nè. Ke nè á kate ke don tel bɔlɔs ɓaa, ké ri á d’a ra’n kade tel don gugu wa? Nyan ke le ra’n ke rang goto, nè d’a kunn kum nata kade dooge njiyei dè’t.

Jean 15:20

Adi kêm si olé dè tà ke kété m’ede sei’t nga: «Ɓer bòi dum dè kuwe’n lé.» Ke nè á dooge rai kum’m ndoo ɓaa, sei géa à rai kum si ndoo tɔ. Ke nè á ei an-in dè tà le’m sêw-sêw ɓaa, sei géa à an-in dè tà le si sêw-sêw tɔ.

Jean 16:2

D’ade rɔ sei kêm kei kebe nange’t. Kàde ke ndɔn’t nè, dooge malang à in-in tami kedi nè: «sei njé mbate Nubege» à ree non. Gir’n ke nè á, ndɔn’t d’a tɔl’n sei ke nyankuje-mese kede nè n’ilei riɓar dè Nube’t.

Nyanra Njekawkulege 1:8

Nè sei a kingei tɔgmong le Ndil-Kêmnda ɓaa, sei a teli k’eei njékɔrgo tàge le’m kêm ɓee-bò ke Jérusalem a, se ɓeekon ke Judée bere mbak a, se ɓeekon ke Samarie a, sár kade ɔri son nang nè njêt a tɔ.

Nyanra Njekawkulege 13:1

Njékebe nange le Nube ke ndii kêm ɓee-bò ke Antioche, ɓeekon ke Syrie nga, njéribe-dè-tàge ke tà Nube’t se njéndó dooge nyan ndii tutu. Dooge nè nga, ri de a tò nè: Barnabas a, Siméon ke dé ɓar’n «Niger» a, Lucius doo ke Cyrène a, Manaen ke ndɔ ke d’oto de nan’t se Hérode Antipas a, se Saul a tɔ. Ɓeekon ke Galilée nga, dé gaje danné loo sɔ. Hérode Antipas on ɓee dè gaje’n karé.

Nyanra Njekawkulege 13:36

Loo ke ndɔ ke David ndi se dè’n dɔ ɓai nga, è ngonn njèndi le Nube. E ra nyan se go kêmndige le Nube. Nè è wei ade dé dubu’n dè ɓade kànnge’t d’ade danra’n jɔri pɔtɔk.

Nyanra Njekawkulege 2:47

Dé pite Nube a, dé taa kum dooge ɗekm a tɔ. Njé ke ingei kaje nga, Kuwe-ɓee ade kɔr de in dè made’t se ndɔge malang dann njékebe nange’t le Nube.

Nyanra Njekawkulege 22:20

Njèkɔrgo tà lei Etienne ke ndɔ ke dé tɔl’n d’ade mese’n ule nang nga, man géa m’ee tutu tɔ. M’ndige se njé tɔlnge dè tɔl ke dé tɔln’t. E man kuwe á ndɔ ke m’ee njè ngonm kubuge le njé tɔl Etienne.»

Nyanra Njekawkulege 26:10

E ke nè á è nyanra’m ke ndɔ ke m’ra Jérusalem. E maw njékuje nyan-mesege kuwe á unni ndu de adi man. Titeke bè á ndɔ ke man kuwe m’tuwe njétaakêm-Kristge ngain m’um de dangai’t se loo-loo. Loo ke ndɔ ke d’ade tɔl de géa, m’um se de nan’t bɔk a tɔ.

Nyanra Njekawkulege 5:18

uwei njékawkulege umi de kêm kei dangai’t le njékonɓeege.

Nyanra Njekawkulege 5:20

– Ɔti awi, i ndai kêm kei le Nube ilei mber tà malang ke ɔje dè ndikumgajer nè nga adi kosdooge.

Nyanra Njekawkulege 5:33

Loo ke tà nè oso mbi njégangtàge’t ɓaa, wong ra de ngain ade ndigi le kade d’udu kum njékawkulege.

Nyanra Njekawkulege 5:40

Njégangtàge teli ɓari njékawkulege adi d’unde de se ndêin maru, taɓai ei unni ndu de ade njékawkulege le kade tami tà se ri Jésu nè nga lé njing ɓita inyei de adi awi ɓai.

Nyanra Njekawkulege 7:38

Loo ke ndɔ ke kosdooge ke Israel kebi nan kêm dile’t nga, Moise nè è dann de’t. E è kuwe á ndɔ ke unn tà ke doo ke danrán ede’n dè mbal ke ri’n nè Sinai ede kà jéige. E taa tàge ke le ndii’n kumgajer ra Nube’t ree’n ade jèi.

Nyanra Njekawkulege 7:54

Loo ke njégangtàge ooi tàge nè nga ɓaa, wong ra de ngain ade ton-in tà de vbat-vbat dè Etienne’t.

Nyanra Njekawkulege 7:58

Dé d’ɔr’n ndalang-ndalang d’aw se’n gide ɓee-bò’t nata, dé tile’n se kuberi her mbás-mbás. Njé ke ndai loon’t an-in se kum de nga, ei tɔri kubuge le de umi nang nja basa karé bè ke ri’n nè Saul.

Nyanra Njekawkulege 8:14

Dooge ke kêm ɓeekon ke Samarie taai tà le Nube ke Philippe ile mber’n ade de nga. Loo ke njékawkulege ke ndii kêm ɓee-bò ke Jérusalem ooi tà’n ɓaa, ei ɔri Pierre se Jean ulei de ra de’t.

Nyanra Njekawkulege 8:2

Dooge ke njékile koje dè Nube’t ke nange unni ninn Etienne dubi. Ndoo Etienne ra de ade d’unde kàde de dài-dài dé non’n jik-jik.

Nyanra Njekawkulege 8:4

Njétaakêm-Kristge ke dé yal de karé-karé nga awi se loo-loo ilei mber Tà ke Maje.

Nyanra Njekawkulege 8:5

Nè Philippe aw kêm ɓee-bò karé ke Samarie ile mber tà le Krist tutu ade dooge.

Nyanra Njekawkulege 9:31

Titeke bè á njékebe nange le Nube bere mbak ke ɓeekon ke Judée se Galilée a, se Samarie teli ndii se kêmlom. Njétaakêm-Kristge rai tɔge a, ilei koje dè Kuwe-ɓee a tɔ. Kɔr de in dè made’t ke kété-kété takul nain ke tɔgmong le Ndil-Kêmnda nain se de.

Nje Ke Rome 1:32

Dé ger tà ke Nube à gang dè’t mbak: Dooge ke njé ra nyange ke titeke bè nga, d’ase ndi kumgajer lé. Nè né è bè géa, dé ra nyange nè nga kum de ke kété-kété a, dé ndige se dooge ke rang dè nyanrage ke majelé’t a tɔ.

Nje Ke Philippes 1:12

Ngakonmge, m’ndige le kade i geri titeke nyan ke tee dèm’t nga ade Tà ke Maje aw kum’n ke kété-kété m nda nang lé.

Hebreuge 11:27

Moise unde kem̂’n dè Nube’t á ndɔ ke è inye’n ɓeekon ke Egypte nal ɓel wong ke ayé ra ngar dènn’t. E nda dè njann’t njáng titeke an Nube ke dookunde le’n ase kan’n se kum’n lé nga ɓá bè.