Lookilera’n 2:13 - Nouveau Testament en Gulay 2004

¹³ Loo ke i ndi tutu nga, m’ger mbak, è kutu-ngar le njèkem̂yêr. Kem̂ ndɔn’t ke ndɔ ke dé tɔl’n Antipas, njèkɔrgo tà le’m ke maje kule dann si’t nga géa, ile ri’m nang lé a, i naje se rai dè kem̂i ke unde dèm’t nga lé a tɔ. Loo ke ndɔ ke dé tɔl Antipas tutu nga, njè kem̂ majelé urkei tutu bajaj.

Lookilera’n 2:13 ပူးပေါင်းရင်းမြစ်များ

Matthieu 10:23

Loo ke d’a d’ɔr sei kororoi kêm ɓee-bò ke nè’t ɓaa, an-in awi kêm ɓee-bò karé ke rang’t. Kerɔte kuwe, man m’ede sei ndàt, sei a kɔri son ɓee-bòge le ɓeekon ke Israel lé ɓai kuwe bainléa Ngonn doo à tel ree’n.

Matthieu 24:9

D’a tuwe sei ra kum si ndoo a, d’a tɔl sei a, dooge ke geri Nube lé à ɔri sei njêt a tɔ, tede ri’m man ke m’ee Ngonn doo nga.

Matthieu 4:10

Jésu tel ede sú ede nè: – Ɔte tam’t kɔke tede dé ndang kêm magtub’t d’ede nè: «Kuwe-ɓee Nube lei nga, i a kɔse keji nang nonn’t a, è kuwe karé bere luk-luk á i a ra ɓer le’n a tɔ.»

Tà ke Maje ke Luc ndang 21:17

Dooge malang à ɔri sei njêt tede ri’m man ke m’ee Ngonn doo nga.

Nyanra Njekawkulege 22:20

Njèkɔrgo tà lei Etienne ke ndɔ ke dé tɔl’n d’ade mese’n ule nang nga, man géa m’ee tutu tɔ. M’ndige se njé tɔlnge dè tɔl ke dé tɔln’t. E man kuwe á ndɔ ke m’ee njè ngonm kubuge le njé tɔl Etienne.»

Nyanra Njekawkulege 9:14

Maw njékuje nyan-mesege unni ndu de adii le kade tuwe dooge malang ke ɓari rii le tɔ de. E ke nè á è gir ree le’n.

1 Nje Ke Thessalonique 5:21

I teri nyange malang an-in, i taai è ke maje.

1 Timothee 5:8

Ke nè á doo karé tɔse kum’n dè njénojege’t le’n éké dè njékem̂-keige le’n kuwe mbain sêw-sêw lé ɓaa, è doo ke naje se ra’n dè kundekem̂’t le’n. E tel majelé ngain dum doo ke unde kem̂’n dè Nube’t lé ɓai.

2 Timothee 1:13

Ngarankum tàge ke oo tàm’t se mbii ɓá nga, an de ke nyan-tɔje; i nda njáng dè kundekem̂’t se dè tár nan ke j’ingei takul kum ke j’umi nan’t bɔk se Jésu-Krist.

2 Timothee 2:12

Ke nè á jè ndai dè nja jéi’t njáng se’n ɓaa, j’à j’on-in ɓee se’n nan’t tɔ. Ke nè á jè naji se ra jéi dènn’t ɓaa, è géa à naje se ra’n dè jéi’t tɔ.

Hebreuge 10:23

Kundekem̂ tchên le jéi ke j’ilei mber’n nga, ade j’uwei gan-gan anje kade kem̂ jéi tête mann. Oiyo, Nube à ra nyan ke è unn ndu’n le ra nga kuwe. Adi j’umi kem̂ jéi dènn’t bɔk-bɔk.

Hebreuge 3:6

Nè Krist ɓaa, è Ngonn ke ase; è á Nube ɔr’n unde’n ke njèkan dè loo kem̂ kei le’n. E ra kule le’n se ngonn koje. Ke nè á jè ndai kem̂ jéi káng dè kundekem̂ tchên ke jè ndii jè pitii ra jéi’t nga ɓaa, j’à jè kei le Nube kuwe.

Jacques 2:7

Ké è dé á dé njé nede sei njétaakem̂-Kristge nga lé ɓai wa?

Lookilera’n 1:5

Maje kade Jésu-Krist njèkɔrgo tà ke get-get ade sei kem̂noje se kem̂lom. Jésu-Krist nga è kuwe karé bere á è doo ke desêin sàk-sàk ke unde loo tee dann njé ke koo’t. E nga è ngar ke on ɓee dè ngarge ke dè nang nè. Jésu-Krist nga tár jèi a, ɔr jèi dann kaiya’t le jéi takul mese’n a tɔ.

Lookilera’n 11:3

M’a m’ade tɔgmong njékɔrgo tàge le’m ke joo nè nga kade ilei mber se ri Nube ase ndɔge aru dɔg gidé-joo se kɔr-mute-mute. Njékɔrgo tàge le’m ke joo nè à tulei kubu-sile ra de’t.»

Lookilera’n 12:11

Ngakon jéige têti rɔ njè kile tà dè de’t nga takul mese Ngonn bate a, takul tà le Krist ke ɔri go edi dooge a tɔ. Ngakon jéige nè nga ndêti ra de adi yo lé.

Lookilera’n 13:2

Dan ke m’an’n nga tanan se kak. Nè nja’n ɓaa tanan se nja dan ke ri’n nè «Ours» a, tà’n tanan se tà toboi a tɔ. Dan-kɔbe ade dan nè nga tɔgmong le’n se kutu-ngar le’n a, se dèmong le’n ke bò a tɔ.

Lookilera’n 14:12

Gir’n ke nè á, maje kade dooge le Nube ke ilei koje dè ndukunnge le’n nga oréi tà de njak dè kunde kem̂ de dè Jésu’t.

Lookilera’n 17:14

D’a d’um nan’t bɔk le rɔ se Ngonn bate, nè è à tête de rɔ; tede Ngonn bate nga è Kuwe-ɓee ke on kuwe-ɓeege a, è Ngar ke on ngarge a tɔ. Ngonn bate se njé ke le’n ke è ɓar de, tɔr de a, ke undei kem̂ de dènn’t a tɔ nga, à têti de rɔ.»

Lookilera’n 17:6

Mese dooge le Nube ke tooi se ninn de se mese njé ke dé tɔl de tede kem̂ de ke undei dè Jésu’t ra dinye nè nga tite yibe bè. Loo ke m’an’n bè ɓaa, ndil’m tee an-in soin-soin.

Lookilera’n 2:2

M’ger pa njiyei mbak. M’ger mbak titeke i ra kule ɔr yàl-yàl a, oré tài njak dè nyantosowurge’t a tɔ. M’ger maje titeke ase kile ngire gir njé ra majelége’t lé. Njé ke ei kuwe edi nè n’ei njékawkulege nga, i ger de ke njé lanmge karè.

Lookilera’n 3:11

Man m’ree kalang. Nyan ke tò jii’t nga, uwe mong-mong tede kade doo karé bè géa taa jɔkɔ tête rɔ lei nga aw’n lé.

Lookilera’n 3:3

Ade kem̂i olé dè tà ke i oo a, ke ndɔ ke i taa se kem̂i a tɔ. I ngonm tà nè nga a, i tel i tur hali rang a tɔ. Ke nè á i tel i ndikum lé ɓaa, m’a m’ree kubei nang bus tite njèɓog m a i ger kàde ke m’a m’tee’n dèi’t nga lé.