Lookilera’n 1:9 - Nouveau Testament en Gulay 2004

⁹ Man m’ee ngokon si Jean á m’ndang magtub nè. M’um se Jésu nan’t bɔk tite si sei tɔ. Man nga m’ee made ɓee le si ɔje dè konɓee le Nube. Nyantosowur ke ra sei á oréi tà si njak i ndii nginei ndɔ tel ree le Krist nga, man géa ra’m se si tɔ. Man Jean nga d’uwe’m d’aw se’m d’ile’m dè goré loo ke ri’n nè Patmos tede tà le Nube ke ndɔ ke m’ile mber’n a, tede tà le Jésu ke ndɔ ke m’ɔrgo a tɔ.

Lookilera’n 1:9 ပူးပေါင်းရင်းမြစ်များ

Matthieu 20:23

– Nyantosowur ke Nube à ade ra’m nga, à ra sei se’m kuwe. Nè tà ke ɔje dè ndi dè jikonm’t éké dè jigelm’t nga, è tà le’m lé. Loo nè nga, njé ke Bɔ’m uwe dè nja ɔje’n dè de á d’a d’inge.

Marc 10:39

Jacques se Jean ilei Jésu dè’t edi nè: – J’asekum ra nyan nè nga kuwe. Jésu tel ede de ede nè: – Kerɔte kuwe, a an-in nyan ke kêm kal mann’t ke m’a m’an-in a, d’a d’ule sei manné njonm titeke d’a d’ule’m nga a tɔ.

Jean 16:33

Man m’ede sei tàge nè nga titeke bè tede kade ingei kêmlom umi se’m nan’t bɔk. A ingei nyantosowur dè nang nè kuwe, nè oréi tà si njak tede man nga m’tête rɔ njé ke dè nang nè ɓá ta.

Nyanra Njekawkulege 1:15

Ndɔ karé bè, njétaakêm-Kristge kebi nan asi aru se kɔr-joo. Pierre ɔse nang in dɔ dann de’t ede de ede nè:

Nyanra Njekawkulege 14:22

Njétaakêm-Kristge ke ndii kêm ɓee-bòge’t nè nga, Paul se Barnabas ulei dingem kêm de’t a, ndeje de kade awi kum de ke kété dè kundekêm de dè Nube’t le de. Taɓai ei edi de edi nè: – Gar-gar nyantosowurge à ra jèi ngain ɓita j’à j’awi kêm Konɓee’t le Nube ɓai.

Nje Ke Rome 8:17

Ke nè á jèi ngann Nube kerɔte ɓaa, j’ingei nyange ke ndɔ ke Nube unn’n ndu’n le kade dooge le’n se Krist nan’t. Bè ɓaa, ke nè á, j’orèi nan se Krist dè nyantosowurge’t le’n ɓaa, ndɔn’t j’à j’orèi nan se’n dè ndubra’t le’n nga tɔ.

Nje Ke Rome 8:25

Kundekêm tchên dè nyan ke j’an-in se kum jéi lé ɓai nga, è korè tà njak ngine’n nyan nè se kêmkile.

2 Nje Ke Corinthe 1:7

Kêm jé ke j’unde tchên ke dè si’t nga tò njáng. Jè ger mbak, nyankêmkonge ke sei ulei ra si tutu se jé nga, sei ɓei nan se jé dè sɔlkêm’t titeke bè tɔ.

Nje Ke Philippes 1:7

Gir ke m’gir dè si’t malang bè nga, è loon’t kuwe. M’ndige sei dè ɓengrem’t. Kété ndɔ ke m’nain se si ɓai nga, m’an-in ngang Tà ke Maje gar-gar m’ade tò loo toon’t njáng. Ɗarinè ke m’tò dangai’t nè nga géa, sei malang oréi se’m nan dè noje ke Nube uwe sem’t nga.

Nje Ke Philippes 4:14

Nè né è bè géa, sei oréi se’m nan dè nyantosowur’t le’m. E maje ke i rai se’m.

2 Nje Ke Thessalonique 3:5

Maje kade Kuwe-ɓee ade i tári Nube dè ɓengre si’t. Maje kade i ndai njáng dè kum nan’t bɔk se Krist.

2 Timothee 1:8

Ade rai sɔli dè kɔrgo tà le Kuwe-ɓee le jéi nga lé. Ade rai sɔli dè’m man’t ke m’tò dangai’t tede tà le’n nga lé a tɔ. Ule rai se’m nan’t bàj dann nyankem̂kon ke m’ndi tutu tede Tà ke Maje. Dann nyankem̂kon’t nè nga, um kem̂i dè tɔgmong’t le Nube.

Hebreuge 10:36

Sei awi ndoo korè tà njak tede le ra’n nyan ke kem̂ Nube ndige kɔr son’n njêt. Titeke bè á a ingei nyan ke ndɔ ke Nube unn’n ndu’n le kade sei nga.

1 Pierre 5:1

M’ndeje ke ngatɔgege ke dann si’t, tede man géa m’ee ngatɔge made de tɔ. Man nga m’ee njèkɔrgo nyankem̂kon ke ra Krist. Ndɔ ke Krist à tel ree ɓaa, man m’oré se’n nan dè ndubra’t le’n.

Lookilera’n 1:1

Nyange ke tooi loo ɓɔyɔn’t ke Nube ribe dè ade Jésu-Krist. Jésu-Krist ribe dè nyange ke tooi loo ɓɔyɔn’t nè nga ade ɓer kulege le’n. Nyange ke Nube ade Jésu-Krist ribe dè ade ɓer kulege le’n nga, gar-gar ei nyange ke à reei ngɔr kuwe. Jésu-Krist ule doo le’n ke danrán karé ade ree tɔje Jean ɓer le’n nyange nè nga.

Lookilera’n 1:2

Jean nga ɔrgo nyange malang ke è an se kum’n. E ɔrgo tà le Nube a, le Jésu-Krist a tɔ.

Lookilera’n 1:4

Man Jean, m’ndang magtub m’ade njékebe nange le Nube ke gir ji sejimute ke ndii kem̂ ɓeekon ke Asie. Maje kade Nube ade sei kem̂noje se kem̂lom. E nga ndi tutu kété mari sár ɗarinè. E ndi à ree sei non a tɔ. Maje kade ndilge ke ji sejimute ke ndai non kutu-ngar’t le Nube adi sei kem̂noje se kem̂lom.

Lookilera’n 1:6

Jésu-Krist tel jéi ke dooge ke kem̂ konɓee’t le Nube. E tel jèi ke njékuje nyan-mesege tede ra kule le Bɔ’n Nube. Maje kade riɓar se tɔgmong ei lennge sár-sár se non. Maje kade è titeke bè kuwe.

Lookilera’n 11:7

Loo ke njékɔrgo tàge le’m ke joo nè nga à ɔri son le kule le de njêt ɓá ɓaa, dan-ton à unde loo tee kem̂ bolè ke son’n goto’t, le kile rɔ dè de’t. Dan-ton nè nga à tête de rɔ a, à tɔl de a tɔ.

Lookilera’n 12:11

Ngakon jéige têti rɔ njè kile tà dè de’t nga takul mese Ngonn bate a, takul tà le Krist ke ɔri go edi dooge a tɔ. Ngakon jéige nè nga ndêti ra de adi yo lé.

Lookilera’n 12:17

Wong ra dan-kɔbe ngain dè dinye’t. E in aw ile rɔ dè gute ngannkà dinye’t nè nga. Ngannkà dinye nè nga, ei dooge ke ilei koje dè ndukunnge’t le Nube a, dè ngarankum tà ke ndɔ ke Jésu ede de nga a tɔ.

Lookilera’n 13:10

Doo ke d’uwe dè nja dangai d’ɔje’n dè’n ɓaa, à aw dangai’t kuwe. Doo ke d’ɔje kade wei yo kuye kaskar ɓaa, à kwei yo kuye kaskar kuwe gar-gar. Gir’n ke nè á, maje kade dooge le Nube ke tooi se ninn de oréi tà njak dè kundekem̂ dè Nube’t le de.

Lookilera’n 14:12

Gir’n ke nè á, maje kade dooge le Nube ke ilei koje dè ndukunnge le’n nga oréi tà de njak dè kunde kem̂ de dè Jésu’t.

Lookilera’n 19:10

M’oso nang nja doo ke danrán’t nè nga rap, m’ule dè’m m’ade’n. Nè è tel ede’m nè: «Ebe’t ra titeke bè, tede man nga m’ee made-ɓer kule lei a, le ngakoinge ke njékɔrgo tàge le Jésu a tɔ. Gar-gar, i ɗɔi Nube.» Ngarankum tà ke Jésu ɔrgo nga, è tà ke ndɔ ke Ndil ule tà njéribe-dè-tàge ke tà Nube’t ade tami.

Lookilera’n 20:4

M’an dooge ndii dè kutu-ngar’t. D’inye loo d’ade de le kade gangi tà dè dooge’t; taɓai, m’an dooge ke ndɔ ke dé jeng kɔbe de se kunge dé tɔl de tede kem̂ de ke ndɔ ke undei dè tà’t le Krist a, dè tà’t le Nube a tɔ. Taɓai, m’an dooge ke ndɔ ke ulei dè de nang non dan’t ɗɔyi nin lé éké ke non nyan ke dé ra dé ndaje’n dan nè nga lé a tɔ. Dé nè nga, dé dooge ke ndɔ d’unde nyankorji le dan nat-non de’t éké da ji de’t lé a tɔ. Dé tel dé ndikumgajer a, d’on ɓee nan’t se Krist loge aru dɔg.

Lookilera’n 3:10

Ndɔ ke m’unn ndu’m m’adi kade oré tài njak dè kundekem̂’t. Ɗarinè i an dè ndukunn le’m nga sêw-sêw; ɓaa, man géa, man m’ee der giri ndɔ nyantosowur’t. Kerɔte kuwe, nyantosowur à ree le nan dooge malang ke ndii dè nang nè.

Lookilera’n 6:9

Go’t gugu, Ngonn bate tutu tà nyankorji ke njèkon’t mi. Ke loon’t nè kuwe, m’an ngarankum ra njé ke ndɔ ke dé tuje kɔbe de tede tà le Nube ke kété ɔri go nga tooi gir ɗinger loo nyan-kuje mese’t.

Lookilera’n 7:14

M’tel m’ile ngatɔge nè nga dè’t m’ede nè: «Kuwe’m, i i ger de mbak.» Ngatɔge nè nga ede’m ede nè: «Dé nè nga d’in dann nyantosowur ke bò’t. Dé togo kubuge le de ke bòi yul se mese Ngonn bate d’ade nda káng-káng.