Jean 5:39 - Nouveau Testament en Gulay 2004

³⁹ Sei teri kêm Magtub ke tò se ninn’n tede sei geri kêm si’t titeke takul de á a ingeii ndikumgajer se non. Nè Magtubge nè nga ei njékɔrgo tàge ke ɔje dè’m.

Jean 5:39 ပူးပေါင်းရင်းမြစ်များ

Matthieu 22:29

Jésu tel ile de dè’t ede nè: – Sei ndemi uri walé ɓá ta, tede sei geri magtubge ke tooi se ninn de nga lé a, tɔgmong le Nube géa sei geri lé a mbak.

Marc 10:3

Nè Jésu deje de ede nè: – Ké ri á Moise unn ndu’n le kade i rai wa?

Marc 12:10

Magtub ke tò se ninn’n tam ede nè: «Kuberi her ke njékunde keige an-in ke nyan lé nga, tel è njè mong kum kei ke get-get.

Tà ke Maje ke Luc ndang 16:29

Abraham tel edé ede nè: «Magtub gute-ndu ke Moise ndang se magtubge le njéribe-dè-tàge ke tà Nube’t tooi tutu. Gar-gar è tà le kade d’ile koje dè tàge’t le de.»

Tà ke Maje ke Luc ndang 16:31

Abraham tel ilé de’t ede nè: «Ke nè á ngakoinge uri mbi de ooi tà ke Moise ndang kêm magtub gute-ndu’t se tà ke njéribe-dè-tàge ke tà Nube tami nga lé ɓaa, né doo karé unde loo tee dann njé ke koo’t aw inge de géa, d’ade tur hal de lé.»

Tà ke Maje ke Luc ndang 24:25

E ede de ede nè: – Sei njé kêm tɔ kuju tà lége tur se si ngain le ger gir tà ke njéribe-dè-tàge ke tà Nube’t tami kété mari nga.

Tà ke Maje ke Luc ndang 24:27

Go’t gugu, Jésu ɔr gir nyange malang ke dé ndang d’ɔje’n dè’n kêm Magtub’t le Nube. E unn gir dè magtubge’t le Moise sár tee’n dè le njéribe-dè-tàge ke tà Nube’t.

Tà ke Maje ke Luc ndang 24:44

Go’t gugu, è ede de ede nè: – An-in! è á è tà le’m ke ndɔ ke m’ede sei kété ke m’nain’n se si ɓai nga: nyange malang ke Moise se njéribe-dè-tàge ke tà Nube’t ndangi ɔji dè’m se tàge malang ke tò kêm Magtub pa’t nga, gar-gar à awi loon’t deĵ kuwe.

Jean 1:45

Philippe aw inge Nathanael ede’n ede nè: – Doo ke magtub gute-ndu le Moise se magtubge le njéribe-dè-tàge ke tà Nube’t tami tà ɔjii dè’n nga, j’inge’n ɓá ta. Doo nè nga è Jésu ke Nazareth ngonn le Joseph.

Jean 5:32

Nè doo karé ke rang ɔrgo tà le’m. M’ger titeke tà ke è ɔrgo ɔje’n dè’m nga, è ngarankum kɔrgo tà kuwe.

Jean 5:36

Nè man m’aw se njèkɔrgo tà ke bòi dum Jean. Tede kule ke Bɔ’m ade m’ra m’ɔr son’n nga ɔrgo tà le’m titeke Bɔ’m kuwe ule’m.

Jean 5:40

Nè sei ndigi reei ram’t le kinge’n ndikumgajer se non nga lé.

Jean 5:46

Ke nè á ndɔ ke umi kêm si dè Moise’t ɓaa, né a umi kêm si dè’m man’t tɔ. Tede è ndang magtub kété ɔje’n dè’m.

Jean 7:52

Dé deje Nicodème d’ede nè: – Ké i kuwe géa i tel rai doo ke Galilée tɔ wa? Ke nè á i nder gir tà kêm Magtub’t le Nube maje an ɓaa, njèribe-dè-tà ke tà Nube’t à in kêm ɓeekon ke Galilée lé. [

Nyanra Njekawkulege 13:27

Tede dooge ke ndii kêm ɓee-bò ke Jérusalem se njékɔr non dege giri titeke Jésu è njèkaje dooge lé. Magtubge le njéribe-dè-tàge ke tà Nube’t ke dé tute se ndɔ taa kebege karé-karé malang nga géa, dé ger gir lé a tɔ. Dé gangtà dè Jésu’t d’ade tàge ke tooi kêm magtubge’t le njéribe-dè-tàge ke tà Nube’t aw loon’t deĵ.

Nyanra Njekawkulege 17:11

Juipge ke Bérée nga uwei Paul se Silas ke ra de’t maje dum njé ke kêm ɓee-bò ke Thessalonique. Dé taa Tà ke Maje kalang, nè se ndɔ karé-karé dé nder gir tà ke kêm magtubge’t le Nube le kan, ké tàge ke Paul ede nga è titeke bè kuwe wa?

Nyanra Njekawkulege 26:27

Ngar Agrippa, tàge ke njéribe-dè-tàge ke tà Nube’t tami nga, ké um kêmi dè’t kuwe wa? Oiyo, m’ger mbak titeke um kêmi dè’t kuwe.

Nje Ke Rome 1:2

Tà ke Maje nè nga Nube unn’n ndu’n kété mari ade njéribe-dè-tàge ke tànn’t titeke dé ndang’n tà’n kêm Magtubge ke tooi se ninn de.

Nje Ke Rome 3:2

Nonkar le doo ke è Juip è ngain ɔje dè nyange bule. E Juipge á Nube ule se tàge le’n ade de kété ke desêin.

Nje Ke Colosses 3:16

Maje kade tà le Krist urkei kem̂ si’t bàj-bàj a, ade sei kumkunju ke deri tede kade i ndóii nan nyan a, i tɔji nan nyan a tɔ. Ɔsi page i rai oiyo se ngarankem̂ si bere mbak. Ɔsi page ke Ndil á ule tà si’t i piti Nube tede kem̂-maje le’n.

Hebreuge 11:16

Nè ɓeekon ke maje ngain dum dè madege ke ngur’n ra de pênn-pênn ɗarinè nga, è ɓeekon ke danrán. Gir’n ke nè á ra Nube sɔl’n dè ɓar ke dé ɓar’n Nube le de nga lé. Kerɔte kuwe, è uwe dè nja ɓee-bò karé tede tà le de ɓá.

Hebreuge 11:35

Dinyege undei kem̂ de dè Nube’t. Titeke bè á ndɔ ke njé ke nange teli ingei dooge le de ke undei loo teei dann njé ke koo’t. Dingemge ke nange ndɔ ke dé ra se de nyantosowurge, nè né è bè géa, ei mbati kade doo taa de inye de dɔ. Ei rai titeke bè tede undei kem̂ de tchên dè kunde loo tee dann njé ke koo’t ke maje ngain gée nga.

Lookilera’n 19:10

M’oso nang nja doo ke danrán’t nè nga rap, m’ule dè’m m’ade’n. Nè è tel ede’m nè: «Ebe’t ra titeke bè, tede man nga m’ee made-ɓer kule lei a, le ngakoinge ke njékɔrgo tàge le Jésu a tɔ. Gar-gar, i ɗɔi Nube.» Ngarankum tà ke Jésu ɔrgo nga, è tà ke ndɔ ke Ndil ule tà njéribe-dè-tàge ke tà Nube’t ade tami.