Jean 18:20 - Nouveau Testament en Gulay 2004

²⁰ Jésu ile’n dè’t ede nè: – Man m’ede dooge malang ke dè nang nè tà nata mbeng. M’ndó de nyan se ndɔge malang kêm kei kebe nange’t se kêm kei le Nube ke è loo kebe nan le Juipge malang. Nyan ke ndɔ ke m’ndó de nga è se go ngein lé.

Jean 18:20 ပူးပေါင်းရင်းမြစ်များ

Matthieu 24:26

Ke nè á d’ede sei d’ede nè: «An-in! n’ee nga, n’nda kêm dile’t non» ɓaa, i teei awi tutu lé. Loo ke d’ede sei d’ede nè: «An-in! n’ee nga, n’ndi du loo’t kei non» ɓaa, umi kêmi si dè’t lé.

Matthieu 26:55

Kêm kàdenn’t nè nga, Jésu deje kosdoo-bulege ede nè: – Ké man m’ee ngar le njékɔse tà se njékonɓeege á i reei se kuye kaskarge se ɗugur kagege ji si’t kêl-kêl tá le kuwe’m wa? Ndɔ karé-karé malang m’ndi nang dann si’t m’ndó dooge nyan kêm kei’t le Nube a tɔ. Nè sei uwei man lé.

Matthieu 26:65

Ke loon’t nè kuwe maw njèkuje nyan-mese tuwe kubuge ke rann’t til parang-parang ede nè: – N’ee nga n’taje Nube ɓá ta. Ké j’awi ndoo njékɔrgotàge ke rang tede ri ɓai wa? Ɗarinè n’taje Nube ade ooi se mbi si ɓá.

Matthieu 4:23

Jésu aw se loo-loo kêm ɓeekon ke Galilée bere mbak ndó dooge nyan kêm kei kebe nange’t le de ile mber Tà ke Maje ɔje dè konɓee le Nube a, ɔr ratur ke rara ra njératurge dann kosdooge’t a, se njè ke kêl ra de wei tonrin a tɔ.

Matthieu 9:35

Jésu aw se kêm ɓee-bòge se ngann ɓeege malang ndó dooge nyan kêm kei kebe nange’t le de. E ile mber Tà ke Maje ke ɔje dè Konɓee le Nube ade de a, è ɔr ratur ra njératurge’t se njé ke kêl ra de wei tonrin a tɔ.

Marc 8:32

Jésu ede de tà nè nga ndàt. Nè Pierre ɔr’n njɔl aw se’n ede’n ede nè: – I tam tà titeke bè lé.

Tà ke Maje ke Luc ndang 21:37

Jésu ndó dooge nyan se ndɔge malang kêm kei le Nube. Nè loo ke ndɔ il ɓá ɓaa, è unde loo tee aw tò dè mbal ke kage olivierge ndai tutu.

Tà ke Maje ke Luc ndang 4:15

Tà ke Jésu ndó dooge kêm kei kebe nange’t nga, nel de ngain ade dé malang d’ule ndubra dènn’t.

Jean 18:21

Ké bain á i deje’m tà nè titeke bè wa? An! njé ke ndɔ ke ooi tàge ke m’tam nga á ndai nè. I deje de ɓaa, à edi nin tede geri maje.

Jean 6:59

E ke nè á è tàge ke Jésu ndó dooge kêm kei kebe nan’t kêm ɓee-bò ke Capernaum.

Jean 7:14

Loo ke dé ra nan d’aw danné bɔp ɓá ɓaa, Jésu aw kêm kei’t le Nube unn gir ndó dooge nyan.

Jean 7:26

An-in! n’ee nga n’nda kêmé kang n’a n’tam tà nata ndái-ndái, nè doo karé bè géa edé tà lé. Ké njékɔr non jéige geri titeke n’ee nga n’ee Krist kerɔte kuwe wa?

Jean 7:28

Kêm ndɔn’t nè nga, Jésu in ndó dooge nyan kêm kei’t le Nube se ndu’n ke bòi ede nè: – Sei geri man mbak, loo ke m’in tutu nga géa i geri mbak a tɔ. E man kuwe m’in se dè’m m’ree lé. Nè Nube ke è njèkule’m ke get-get nga ɓaa, i geri nin lé mbeng kɔke.

Jean 7:4

Doo ke sang le kade dooge geri nin njung ɓaa à ra nyan se go ngein lé. Ke nè á a i ra nyange titeke bè nga ɓaa, maje kade i kuwe i tɔje rai ke nata tàkum dooge’t malang.

Jean 8:2

Nè loo ke loo à ar ɓai ɓaa, è tel aw kêm kei’t le Nube. Kosdooge malang reei rann’t. E tête ra’n ndi nang unn gir ndó de nyan.

Jean 8:26

M’aw se tàge ngain ke ɔji dè si le tam a, m’aw se tàge ngain le gang dè si’t a tɔ. Nè njèkule’m nga tam ngarankum tà. Tàge ke m’oo tann’t á m’ede dooge ke dè nang nè.

Nyanra Njekawkulege 26:26

Ngar Agrippa nga, d’ede’n tà dè nyange’t nè d’ade oo mbak ɓá ta. Gir’n ke nè á, m’nda m’a m’tam’n tà nonn’t se kêmnda káng. Nyange nè malang nga, karé ke è nal ger goto, tede ei nyange ke teei adi dooge geri se loo malang.