Hebreuge 1:3 - Nouveau Testament en Gulay 2004

³ Ngonn nè nga, è njè kade ndubra le Bɔ’n Nube kile ra’n ke nata a, è kum gute tà Bɔ’n kuwe tcha-tcha a tɔ. Ngonn nè nga gete nyankundege malang se go tà ke tee tànn’t. Loo ke Ngonn nè nga ɔr se-kaiyage tɔl kon’n ɓá ɓaa, è aw ndi dɔ nú dè jikon Nube ke njè dum dè nyange malang.

Hebreuge 1:3 ပူးပေါင်းရင်းမြစ်များ

Lookilera’n 4:11

«Kuwe-ɓee Nube le jé, i asekum kinge ndubra se riɓar a, se tɔgmong a tɔ. E i kuwe á i njèkunde nyange malang. E se go kem̂ndige lei i kuwe á unde’n nyange malang ade tooi tutu.»

Jean 1:14

Tà nè nga, tel è danra doo. E ra ɓee dann jéi’t j’an-in ndubra le’n tite ndubra le Ngonn dagi ke in ra Bɔ dooge’t. Kêmnoje se ngarankum tà taa ra’n pel-pel.

2 Nje Ke Corinthe 4:4

Ke nè á Tà ke Maje le jé tò putru ɓila ɓai ɓaa, tò putru tede le njé kunn mbi dè tàge’t. Dé nè nga, Sú ke njèkonɓee dè nang nè tɔ kum de ɔge de kunde kêm de dè Krist’t. Gir’n ke nè á d’ase kan’n lookar le Tà ke Maje nga lé. E lookar le ndubra le Krist ke è kum gute tà Nube nga.

Hebreuge 12:2

Jésu è njèkunde gir kundekem̂ le jéi a, è njè kade kundekem̂ le jéi maje ɔr njêt a tɔ. Ade j’oréi kum jéi dènn’t sêw-sêw se ndɔge malang. Jésu inye ra’n ade dé tɔl kade kage-ke-dese’t anje kan rasɔl’n ke nyan. Kerɔte kuwe, Jésu oré kum’n dè nyan ranel ke tò nonn’t kété ɓaa, ɗarinè è ndi dè jikon kutu-ngar’t le Nube ta.

Jean 1:4

Takul’n è á nyange malang ndii kumgajer. Ndikumgajer nè nga è lookar le dooge.

Hebreuge 10:12

Nè Krist nga unn danra’n ade ke nyankuje-mese nja karé kuwe njing tede majelé le dooge. Go’t gugu ɓita è aw ndi dè jikon Nube’t sár se non ɓai.

Jude 1:25

Nube le jéi karé bere ke Njèkaje jèi takul Kuwe-ɓee le jéi Jésu-Krist nga, maje kade ndubra se riɓar, se tɔgmong konɓee ei le’n sár se non. Maje kade è titeke bè kuwe.

Hebreuge 9:26

Ke nè á è inye ra’n ade ke nyankuje-mese nja bule ɓaa, né ndɔ ke nyankem̂konge à rai nin nja bule unn gir’n mari loo ke Nube unde’n gir nang nè. Nè ɗarinè Krist tɔje ra’n nata ndái-ndái ke nyankuje-mese nja karé bere luk-luk ke ngang’n kem̂ ndɔge ke ngeinn’t nè tede kudu’n kum majelé le dooge.

1 Jean 1:7

Ke nè á jè njiyei dann lookar’t titeke Nube ndii’n dann lookar’t nga bè ɓaa, j’umi nan’t bɔk a, mese Ngonn’n Jésu-Krist togo kaiya le jéi bere mbak ndát-ndát ɔr kɔke.

Hebreuge 4:14

Ade j’uwei kundekem̂ ke j’ilei mber’n nga mong tede j’awi se njèkuje nyan-mese ke bò. Njèkuje nyan-mese ke bò nè nga è Jésu Ngonn le Nube ke unde kem̂ danran ndàt gang aw sár ra Nube’t nú.

1 Jean 3:5

Sei geri mbak titeke Krist unde loo tee tede kɔr majelé kum kɔke. Nè è nga majelé karé bè géa goto rann’t.

2 Pierre 1:16

Ger ke ndɔ ke j’adi i geri tɔgmong a, se ndɔ tel le Jésu-Krist Kuwe-ɓee le jéi nga, jè ndolé’n go kumkunju le sútàge lé. Nè j’ɔrgo nyange nè nga j’ade sei tede ndubra le’n ke ndɔ ke jè kuwe j’an se kum jé.

1 Pierre 3:22

Krist nga in aw ndi dè jikon Nube’t dɔ danrán. Dooge ke danrán se njékonɓeege a, se njé tɔgmong-ge malang a tɔ, ulei dè de adi nin.

1 Pierre 1:21

E takul’n è Krist á sei undei kem̂ si dè Nube’t ke njè kade unde loo tee dann njé ke koo’t a, ke njè kule ndubra dènn’t a tɔ. Gir’n ke nè á sei undei kem̂ si dè Nube’t a, kem̂ si too’n tchên ke dènn’t a tɔ.

Hebreuge 8:1

Maw tàge malang ke jè ndige le kede sei nga á nè: J’awi se maw njèkuje nyan-mese ke bò. E ndi danrán kɔte kutu-ngar’t le Nube ke njè dum dè nyange malang.

Marc 16:19

Loo ke Kuwe-ɓee Jésu ede de tàge nè gir gang ɓá ɓaa, Nube ade aw ndi dè jikonn’t danrán nú.

Lookilera’n 3:21

Doo ke tête rɔ ɓaa, m’a m’ade à ndi se’m kutu-ngar’t le’m, titeke man géa m’tête’n rɔ ɓita m’aw m’ndi’n se Bɔ’m dè kutu-ngar’t le’n ɓai.

Hebreuge 7:27

Jésu è tite maw njèkuje nyan-mesege ke rang lé. E aw ndoo kunn nyankuje-mesege kade kuge’n dè majelége le’n se le dooge ke rang se ndɔ karé-karé lé. Nè è unn ra’n è kuwe ade ke nyankuje-mese uge’n dè majelé le dooge nja karé bere luk-luk ke ngang’n.

Nyanra Njekawkulege 2:33

Nube unn ndu’n kété mari ede nè n’a n’ule se Ndil-Kêmnda kade dooge. Loo ke è unn Ngonn’n Krist mbeng ade aw ndi dɔ dè jikon’t ɓá ɓaa, è ade’n Ndil-Kêmnda nga. Taɓai Krist in ke kété ule se Ndil-Kêmnda nga ade yal nan dè jéi’t karé-karé malang. E nè nga, è nyan ke sei an-in se kum si a, ooi tà’n se mbi si ɗarinè ɓá ta.

Jean 1:29

Barè lookar’n, loo ke Jean an Jesu à ree ke rann’t ɓaa, è tam ede nè: – An-in! Ngonn Bate le Nube ke njèkɔr kaiya dè dooge’t dè nang nè nga.

Nje Ke Colosses 3:1

Sei undei loo i teei se Krist dann njé ke koo’t ɓá. Bè ɓaa, i sangi nyange ke dɔ danran, loo ke Krist ndi tutu dè jikon Nube’t.

Nje Ke Rome 8:34

Dooge ke Nube kuwe tɔr de a, ɔr tà dè de’t a tɔ nga, ké nan ase gangtà dè de’t wa? Doo karé bè ke ase gangtà dè de’t goto, tede Jésu-Krist wei tede tà le de. Jésu-Krist ke wei tede tà le de nga, è unde loo tee dann njé ke koo’t. Taɓai è aw ndi dè jikon Núbe’t à ra rebe tà le jéi.

Nyanra Njekawkulege 7:56

Etienne tam ede nè: – An-in! man m’an kum danran teen ra’n. M’an Ngonn doo nda se nja’n dɔ dè jikon Nube’t.

Nje Ke Rome 1:16

Ma m’ra rasɔl dè tà kile mber Tà ke Maje’t nga lé, tede è tɔgmong le Nube le kaje’n nanan ke um kêm’n dè’t, Juipge kuwe kété ɓita njé ke ei Juipge lé ɓai.

Hebreuge 9:16

Loo ke magtub ke ɔje dè kai nyan-ndube tò tutu ɓai ɓaa, gar-gar è tà le kade kuwe njè ndang magtubge nè wei pa ɓita.

Matthieu 22:24

– Njèndó dooge nyan, ndɔ ke Moise tam ede nè: «Ke nè á dingem se dinye taai nan, nè oji ngonn ke dingem lé ɓai á dingem wei ɓaa, maje kade ngokon’n ke ndêin taa dinye nè unde’n gute ngokon’n ke wei.»

Tite 2:14

Jésu-Krist inye ra’n ade yo uge’n dè jéi, ɔr’n jèi dann majelé’t bere mbak. E ɔr jèi unde jèi se ninn’n le kade jèi kosdooge le’n kuwe deri. Jésu ra titeke bè tede kade jèi kosdooge le’n ke njé ra nyange ke maje se rakɔlé.

Hebreuge 1:13

Kerɔte kuwe, Nube nga teen tà’n nja karé bè kuwe ede doo ke danrán ede nè: «I ndi dè jikonm’t sár kade m’ade njé bange lei teli ei nyan-sure-nja kum lei» bè ndan lé ɓai.

2 Pierre 1:17

Jésu-Krist oo ndu Nube njè ndubra ke bò loo ke ndɔ ke inge’n inge’n riɓar se ndubra ra Bɔ’n Nube’t. Ndɔ ke Nube tam nè: «E nè nga è Ngonn kem̂’m ke m’tár’n ngain a, ra’m nel’m dènn’t ngain a tɔ.»