2 Timothee 3:2 - Nouveau Testament en Gulay 2004

² Dooge à ei njé tɔse kum de dè ra de ei’t kuwe a, à ei njé ndige narge a, à ei njé tɔje ra dege a, à ei njé ti ra dege a, à ei njé taje Nubege a, à ei njékaltà tà njé koje dege’t a, à ei njé tel ra oiyoge lé a, è k’ei njé kile rasɔl dè loo ke tò se ninn’t nga a tɔ.

2 Timothee 3:2 ပူးပေါင်းရင်းမြစ်များ

Matthieu 15:6

Titeke bè á sei adi nyangirkà le si tá pujur dè tà le Nube.

Tà ke Maje ke Luc ndang 12:15

Taɓai Jésu ede doobulege ede nè: – Kêm si dè ra si’t nè a kadi ngur kebe nyanbawge ke rara dè nang nè ra sei pênn-pênn. Tede ndikumgajer le doo nga, tò ɔje dè nyanbawge le’n ke tò ndaj-ndaj nga lé.

Tà ke Maje ke Luc ndang 16:14

Loo ke Jésu tam tàge nè nga titeke bè ɓaa, Pharisienge ke njé kunde nar dann kum de’t an-in tà le’n ke nyan lé.

Tà ke Maje ke Luc ndang 6:35

Nè sei ɓaa, i tári njébange le si, i rai de maje, adi dooge tunei sei nyan, nè i giri kêm si’t edi nè: «M’a tel kinge gugu ɓai» lé. Titeke bè á, nyan-kuge dè ji si à ee’n ngain a, a k’eei ngann le Nube ke Njèndi sêm danran’t. Tede Nube ke Njèndi sêm danran’t nga, è njè ra maje se dooge ke geri loo tel ra’n oiyo lé a, è njè ra maje se njékêmyêrge a tɔ.

Nyanra Njekawkulege 5:36

Adi kêm si olé dè Theudas’t, tede ndɔ ke kété è ɔse nang in tam ede nè: n’ee kuwe n’ee doo ke bò. Gir’n ke nè á dingemge aru sɔ umi nan goon’t mbuu. Nè loo ke dé tɔl’n mbeng kɔke ɓá ɓaa, dooge ke goon’t yali nan karé-karé malang ade nyan le’n ke unde gir nga tel è nyan ke karè.

Nje Ke Rome 11:18

Bè ɓaa, i tuge kàdi dè balkum kage ke kêm ndɔr’t ke doo jeng um kɔke nga lé. Ke nè á i tuge kàdi ɓaa, ade kêmi olé titeke è i á ul ngire kage lé, nè è ngire kage á uli se boté’n.

2 Nje Ke Corinthe 5:15

Krist wei tede le de malang, tede kade njé ke ndii kumgajer ndii tede le de ei kuwe lé ta. Nè à ndii kumgajer tede le Krist ke wei a, unde loo tee dann njé ke koo’t tede tà le de a tɔ.

Nje Ke Philippes 2:21

Dooge malang sangi nyange ke ɔje dè de ei kuwe m sangi nyange ke ɔje dè Jésu-Krist nga lé.

Nje Ke Colosses 3:5

Gir’n ke nè á inyei go tò se nan ke kaiya’t se nyan ke mine, se kem̂kein se ngur nyan ke majelé se nede nyan ke è mage polé nga, adi wei ra si’t mbɔrɔk-mbɔrɔk. Nyange malang nè nga ei le nang nè.

2 Nje Ke Thessalonique 2:4

Ngonn le njè tuju se non à kɔse nang kin, nyange malang dooge dɔyi nin éké nyan malang ke è ngarankum nyan ke dooge ilei koje dè’t nga, è à ute mbeng. Taɓai è à ndige le kaw sár ndi kem̂ kei ke tò se ninn’n le Nube, à ra ra’n ke Nube gée ɓai a tɔ.

1 Timothee 1:20

Hyménée se Alexandre ei dann dooge’t nè nga tɔ. M’inye de ji Sú’t. Titeke bè á ndɔ ke rang à teli kilei rasɔl dè Nube’t gugu lé ta.

1 Timothee 1:9

Taɓai, jè ger titeke gute-ndu Nube nga tò tede le njé ra nyan se dè naje’n lé, nè tò tede le njékaltàge se njé dum nange se njé nede Nubege se njékaiyage se njé kile rasɔl dè Nube’t se dè loo le’n ke tò se ninn’t. Gute-ndu Nube tò tede le njé tɔl bɔ dege se kon dege, tò tede le njé tɔl dooge a tɔ.

1 Timothee 3:3

Gar-gar, njèkan dè njékebe nange le Nube à è ɓer le yibe lé a, è njè ɓeekos lé, nè gar-gar à è njè kaw lom-lom, à è njè kɔl se doo lé, à è njè ndige nar lé a tɔ.

1 Timothee 6:10

Mwei-yo-nar è ngire nyange ke majelé malang. Njé ke nange ke an-in ngɔde go nar’t nga ndemi osoi kɔke heb dè kundekem̂’t le de, uwei nyantosowurge gai-gai ɓuki dè de ei’t kuwe adi wur de ndir’n njàk-njàk.

1 Timothee 6:4

è doo ke ti ra libe kum’n m è ger nyan karé lé. E doo ke ngur naje tà se kɔl nan ra’n pênn-pênn. Naje tàge ke titeke bè nga oje kɔl nan se kem̂kein se taje ndu se girtà ke majelé dè nan’t

2 Timothee 3:4

Kem̂ ndɔge ke ngeinn’t nga, dooge à ei njé kunn dè nange a, à ei njé kin kur dè nyange’t bigm ra, à ei njé ndige ranel ke ɔje dè de tá ngain dum ndige Nube.

Jacques 2:8

Kerɔte kuwe, gute-ndu ngar ke dé ndang kem̂ Magtub’t d’ede nè: «I tár doo ndul madi titeke i tár’n danrai i kuwe bè» nga, ke nè á i rai ɔri son’n njêt ɓaa, sei rai maje.

Jacques 4:16

Nè ɗarinè, sei kuwe in-in se dè si ɔji rebe nyange le si undei kàde si. Kunde kàde ke titeke bè nga majelé.

Jacques 4:6

E uwe se jéi noje ke bò. Gir’n ke nè á Magtub ke tò se ninn’n tam’n ede nè: «Nube ute njé ti ra dege mbeng, nè è uwe noje se njé kule dè dege.»

1 Pierre 5:5

Sei basage géa, maje kade ulei dè si adi ngatɔgege. Maje kade sei malang i rai ra si ke ngann njékulege le nan tede Nube ute njé ti rage mbeng, nè è uwe noje se njé kule dè dege.

2 Pierre 2:10

Dooge ke ulei ra de mbiriri dann ngur nyange ke majelé le danra nga minei tanm-tanm tàkum Nube’t. E dé nè kuwe mbain á Nube à gangtà dè de’t. Dé dooge ke njé nede tɔgmong le Nube. Dé njé tà turge ke d’an ra de ke dooge ke asi. Dooge ke danrán ke ndubra le Nube gan dè de wak nga géa, dé d’ile koje dè de’t lé a, dé taje de a tɔ.

2 Pierre 2:12

Dé dooge nè nga, dé ra nyan nal gir tite dange ke dé ndon ɓaa, d’uwe de se gum a, dé tɔl a tɔ bè. Nyan ke dé gir njai lé géa, d’in dé tam tà ke majelé dè’t. Yo de à tò tite le dange ke walé bè tɔ.

2 Pierre 2:18

Njé tête tà kunde tà Nube’t nè nga leŝi dooge ke nange ilei de dann ngur nyange ke pás-pàs se tàge ke raikarè ke oji nan tà de’t pɔt-pɔt. Njé ke dé leŝe de d’ile de dann ngur nyange ke pás-pàs nè nga, ei dooge ke ɔri ra de dann njé ndemge’t ngɔr nè ɓai.

2 Pierre 2:3

D’a gol dè tàge gai-gai le libe’n kum si. D’a ra titeke bè tede kite’n dè si’t se go ngur nar ke ra de. Nè tà ke dé gang dè de’t mari bere nga, kure’n à ɔde kum de m tuju inye go de lé sár.

Jude 1:16

Dé dooge nè nga, dé njé ɓar tà nyon-nyon se ndɔge malang a, ra de ate de kárár a tɔ. Dé njiye se go ngur nyange ke kem̂ de dé’t kuwe a, tàge ke kum tam oji nan tà de’t pɔt-pɔt a tɔ. Dé njé tɔi dooge tede libe’n kum de taa’n nyan ji de’t ɔje dè maje le de dé kuwe karé.

Lookilera’n 13:1

Taɓai m’an dan karé ke rang unde loo tee dann ba-bò kate’t. Dan nè nga ube gajennge dɔg a, dènnge ei ji sejimute a tɔ. E tule jɔkɔ ke ndoin asenan se kɔnyon tu gajennge’t karé-karé malang. Rige ke dé ndang tu dènnge’t karé-karé malang nga ei rige ke ɔje dè tam tà ke majelé se Nube.

Lookilera’n 16:11

Dé taje Nube ke danrán dap-dap tede nyantosowurge ke ra de a, se dò ke ngakɔige ke gebi nan dè de’t. Nè né è bè géa, dooge nè turi hal de dè nyanra de ke majelé’t nga lé.

Lookilera’n 16:21

Kɔtchege ke bò-bò ke ɔyi tite nar-nda bè in-in danrán tilei dè dooge vbang-vbang. Dooge taji Nube dap-dap tede nyantosowur ke kɔtchege rai se de. Nyantosowur ke ra de nè nga, è nyantosowur ke tò ɓel ngain dum madege ke rang malang.

Lookilera’n 16:9

Loo tunge ke tò ɓel ngain tunge dooge ade taji ri Nube ke njèkule nyantosowurge se go tɔgmong le’n. Nè né è bè géa, dé mbate tel tur hal de tede kule’n ndubra dè Nube’t.