1 Timothee 6:17 - Nouveau Testament en Gulay 2004

¹⁷ I ndeje bawge ke ndii dè nang nè ɗarinè le kade tii ra de lé a, le kade undei kem̂ de tchên dè nyanbaw ke à tò mbɔr lé nga lé a tɔ. I ndeje de le kade undei kem̂ de tchên ke dè Nube’t. Nube á è njè kade jèi nyange malang kade tooi ra jéi’t ndàj-ndàj tede kade jè ndii dann ranel’t.

1 Timothee 6:17 ပူးပေါင်းရင်းမြစ်များ

Matthieu 12:32

Ke nè á doo karé tam tà ke majelé se’m man Ngonn doo ɓaa, d’a kade kêm de tin mbit dè’t ɓai. Nè ke nè á doo karé tam tà ke majelé se Ndil-Kêmnda ɓaa, d’a d’ade kêm de tin mbit dènn’t kêm ɓalge’t ke ɗarinè éké kêm ɓalge’t ke à reei nga lé a tɔ.

Matthieu 19:23

Jésu tel ede njékuwe-girnge ede nè: – Kerɔte kuwe, man m’ede sei ndàt, le kade baw um nan’t bɔk se Nube nga è nyan ke loo’n tur ngain.

Matthieu 25:16

Ngonn njèndi ke inge nar kule ke ndɔ aru mi nga, ɔte ke loon’t nè aw ndogo’n nyan tur gir ɓaa, è inge made aru mi dè’t.

Matthieu 27:57

Loo ke loo sɔl ɓá ɓaa, dingem karé ke è baw ree. Doo nè nga géa è njèkuwe-gir-Jésu tɔ. Ri’n nè Joseph. Ɓee le’n è Arimathée.

Matthieu 6:32

Nyange nè malang nga, è dooge ke geri Nube lé á ei njé sang de se ndɔge-ndɔge. Tede Bɔ si ke danrán ger nyange malang ke sei awi ndoo de.

Marc 10:24

Ndil de tee an-in soin-soin dè tà ke è tam’t nè nga. Nè Jésu tel ede de ede nè: – Basage, njé ke umi kêm de dè nyanbawge ke dè nang nè nga, kaw kêm Konɓee’t le Nube à tur se de ngain.

Tà ke Maje ke Luc ndang 19:2

Doo karé bè ke è baw ndi kêm ɓee’t nè nga. Ri’n nè Zachée. E ngar le njétaa tirge.

Tà ke Maje ke Luc ndang 3:11

E tel ile de dè’t ede nè: – Ke nè á doo karé dann si’t aw se kubu joo ɓaa, maje kade unn karé ade doo ke le’n goto. Doo ke inge nyankuse géa, maje kade ra titeke bè tɔ.

Nyanra Njekawkulege 14:17

Nè né è bè géa, è ra se de maje kum’n ke kété-kété m ebe’t lé. E ra se si maje, ade sei mann-ndi ke in danrán nú ade ingei nyankuse usei, i ndii dann ranel’t bɔndum.

Nyanra Njekawkulege 14:27

Loo ke njékawkulege ke joo nè teli reei Antioche, ɓeekon ke Syrie ɓá ɓaa, ɔsi nja njékebe nange le Nube ɔri ser nyange malang ke Nube ra se de a, se tà rebe ke è ɔr inye wei ade dooge ke ei Juipge lé undei kêm de dènn’t a tɔ adi d’oo.

Nyanra Njekawkulege 17:25

Nube aw ndoo kade ji dooge tá ra nyan ade’n lé, tede nyan karé géa nal’n lé. Nè è ade dooge bere mbak ndikumgajer a, kebe ke taai a, se gute nyange malang ke awi ndoo’n a tɔ.

Nje Ke Rome 11:20

E kum kuwe. Dé jeng de kɔke tede kunn mbi dè tà’t le de. I taa gute de takul kundekêm lei. I ti rai lé, nè unde kumkunju dè rai’t.

Nje Ke Ephese 5:5

Ooi maje: doo karé bè dann njé tò se nan ke kaiya’t éké doo ke ra’n mine éké njè nede nyan a ingei nyan-ndube kem̂ Konɓee’t le Krist lé a, kem̂ Konɓee’t le Nube ndan lé a tɔ. Nede nyan nga è mage polé.

Nje Ke Colosses 3:16

Maje kade tà le Krist urkei kem̂ si’t bàj-bàj a, ade sei kumkunju ke deri tede kade i ndóii nan nyan a, i tɔji nan nyan a tɔ. Ɔsi page i rai oiyo se ngarankem̂ si bere mbak. Ɔsi page ke Ndil á ule tà si’t i piti Nube tede kem̂-maje le’n.

1 Nje Ke Thessalonique 1:9

Loo ke ndɔ ke j’aw ɓéee le si nga, sei uwei jè ke ra si’t. Sei turi gide si adi mage polége ɔsi wan i teli ke ra Nube’t tede le ra kule kade’n è Nube ke get ke njèndi kumgajer. Nyange nè malang ke ndɔ ke i rai nga, dooge à ɔdi nan kɔr ser’n ɓai.

1 Timothee 1:3

Loo ke ndɔ ke m’in le kaw kem̂ ɓeekon ke Macédoine nga, m’deji kade i nain kem̂ ɓee-bò ke Ephèse. M’inyei kem̂ ɓee-bò’t nè le kade in se njé ke nange ade ebi ra de dè ndó dooge tàge ke raikarè.

1 Timothee 3:15

Ke nè á m’aw m’ingei kalang lé ɓai géa, magtub nè kuwe à tɔji rebe njiye dann njékem̂keige le Nube. Njékem̂keige le Nube ke njèndi kumgajer nga ei njékebe nange le’n; ei kage ngaw-dann kei ke gete ngarankum tà.

1 Timothee 4:10

Ke nè á j’ule ra jé ndibe loo kule’t a, jè ra rɔ maje a ɓaa, è tede kem̂ jé ke j’unde tchên dè Nube’t ke njèndi kumgajer. Nube ke njèndi kumgajer nga è njèkaje dooge malang, nè njé ke undei kem̂ de dènn’t tá è njèkaje de ke get ɓai.

1 Timothee 5:21

Man m’ndeji tàkum Nube’t a, tàkum Jésu-Krist a, se tàkum dooge ke danrán le Nube a tɔ: an dè nyange nè nga sêw-sêw anje ndête éké kɔr kum doo a tɔ.

1 Timothee 6:13

M’unn ndu’m m’adi non Nube’t ke è ngire ndikumgajer le nyange malang a, se non Jésu-Krist’t ke ndɔ ke ɔrgo tà maje ngain tàkum ngar Ponce Pilate’t:

1 Timothee 6:9

An! dooge ke ndigi teli k’ei bawge nga osoi dann nyan sú’t se dann gum’t le ngur nyange ke raikarè ke majelé. Ngur nyange nè nga ile dooge tà yo’t a, dubu de dann tuju’t bɔndum a tɔ.

2 Timothee 4:10

Démas sure’m inye’m tede unde nyange ke dè nang nè dann kumn’t ngain. E ɔte aw kem̂ ɓee-bò ke Thessalonique. Crescens ɔte aw kum’n ke ɓeekon ke Galatie a, Tite aw kem̂ ɓeekon ke Dalmatie a tɔ.

Tite 2:12

Kem̂noje le Nube nè nga ndó jèi loo mbate nyange ke uwe made nan se le Nube lé a, se ngur nyange ke ɔje dè dè nang nè a tɔ. Nè kem̂noje nè nga ndó jèi rebe kunde kumkunju dè ra’t dann dooge ke ndii dè nang nè ɗarinè. Kem̂noje le Nube nga ndó jèi nyanra ke se dè naje’n ke uwe made nan se kile koje dè Nube’t.

Tite 3:6

Ndil-Kem̂nda nè nga, Nube ade taa kem̂ jéi pel-pel takul Jésu-Krist Njèkaje jèi.

2 Pierre 1:11

Titeke bè á Nube à ɔr’n tà rebe kaw kem̂ konɓee ke à tò sár se non le Jésu-Krist Kuwe-ɓee le jéi ke njèkaje jèi kinye wei bendeng kade jèi.