1 Timothee 2:6 - Nouveau Testament en Gulay 2004

⁶ Jésu-Krist inye ra’n è kuwe ade yo uge’n dè dooge malang. E ke nè á è tà ke è ɔrgo kété kem̂ ndɔn’t le’n nga.

1 Timothee 2:6 ပူးပေါင်းရင်းမြစ်များ

Matthieu 20:28

E titeke bè á man ke m’ee Ngonn doo nga, m’ree’n dè nang nè. M’ree le kade dooge ei ngann njékulege le’m lé, nè m’ree tede le k’ee ngonn njèkule le dooge a, le kinye ra’m kade yo tede le kuge’n dè de a tɔ.

Marc 1:15

– Ndɔ ke Nube ɔje nga ase deĵ ɗarinè ta, Konɓee le Nube nain ngɔr. I turi hal si, undei kêm si dè Tà ke Maje’t a tɔ.

Marc 10:45

Oiyo man Ngonn doo géa, m’ree le kade dooge ei ngann njékulege le’m lé, nè m’ree le kade m’ee ngonn njèkule le de a, le kinye ra’m kade yo ke nyan gang dè dooge bule a tɔ.

Jean 10:15

Bɔ’m ger’m tede man géa m’ger’n a tɔ. Gir’n ke nè m’ile’n ra’m kɔke tede le batege le’m.

Jean 6:51

Mapa ndikumgajer ke in danrán nga è man. Doo ke use mapa nè nga ɓaa à ndi kumgajer se non. Mapa ke m’a m’ade le kade dooge ke dè nang nè ndii kumgajer nga, è danra’m man kuwe.

Nje Ke Rome 16:26

Nè ɗarinè, Tà ke Maje nè nga kile ra’n ke nata. Titeke bè á dooge malang ke ei Juipge lé asikum ger Tà ke Maje le Krist takul magtubge ke njéribe-dè-tàge ke tà Nube’t ndangi. Nube ke Njèndi se non unn ndukunn nè nga titeke bè le kade dooge malang undei kêm de dènn’t a, ilei koje dènn’t a tɔ.

Nje Ke Rome 5:6

Oiyo, loo ke ndɔ ke tɔg jéi ase tee ji ɓer’t le kaiya lé ɓai nga, Krist wei tede njékute Nube mbeng-ge dann kurloo ke è Nube kuwe ɔje.

1 Nje Ke Corinthe 1:6

Tà le Krist ke ndɔ ke j’ede sei nga tule ngire’n kêm si’t janm-janm.

2 Nje Ke Corinthe 5:21

Krist nga ra majelé karé bè lé, nè Nube tel’n ke danra majelé ke deri tede le jéi. Nube ɔr tà dè jéi’t takul Krist. Takul kum ke j’um nan’t bɔk se Krist á Nube ɔr’n tà dè jéi’t.

Nje Ke Galatie 1:4

Jésu Krist inye ra’n è kuwe ade yo tede kaiyage le jéi. E inye ra’n ade yo tede le kɔr’n jéi wont ji tɔgmong ke majelé le dè nang nè nga se go kem̂ndige le Bɔ jéi Nube.

Nje Ke Galatie 4:4

Nè loo ke dè kurloo ke Nube ɔje ase deĵ ɓá ɓaa, Nube ule Ngonn’n. Ngonn’n nga dinye á oje’n a, ndi gir gute-ndu’t a tɔ.

Nje Ke Ephese 1:17

Man m’ra titeke bè le kade Nube le Kuwe-ɓee le jéi Jésu-Krist, è Bɔ jéi ke ndubra è le’n ade sei kumkunju le Ndil. Titeke bè á kum si à gang’n dè Nube’t le kade i geri nin njai-njai.

Nje Ke Ephese 1:7

Takul Krist ke wei ade mese’n an-in nang á j’ingei nyankuge dè jéi ɓee ɓer’t a, Nube ade kem̂’n tin’n mbit dè kaiyage’t le jéi a tɔ. E kem̂noje ke bò ke gar’n goto á Nube uwe se jéi!

Nje Ke Ephese 3:5

Nyan ke tò loo ɓɔyɔn’t nè nga, Nube ribe dè ade dooge ke kété mari gerii lé. Nè ɗarinè, è ribe dè se go Ndil’n ade njékawkulege se njéribe-dè-tàge ke tànn’t ke tooi se ninn de gai se go Ndil.

Nje Ke Ephese 5:2

I njiyei se tár nan titeke Krist tár’n jèi á inye’n ra’n ade Nube tede le jéi è kuwe ke nyan kade noje se nyankuje-mese ke taa kum Nube.

2 Nje Ke Thessalonique 1:10

Kuwe-ɓee Jésu à tel ree le kade njé ke le’n ilei riɓar dènn’t a, le kade njétaakem̂nge malang à an-in nin njai-njai kem̂ ndɔn’t nè nga. Sei géa a k’ei dann de’t tede umi kem̂ si dè tà’t ke ndɔ ke j’ede sei.

1 Timothee 6:15

Nube á è njè kɔje ndɔ kade Krist unde’n loo tee’n pan. Nube è ngire ranel. E kuwe karé bere luk-luk á è njè tɔgmong. Nube kuwe karé bere luk-luk á è Ngar dè ngarge a, è Kuwe-ɓee le kuwe-ɓeege a tɔ.

2 Timothee 1:8

Ade rai sɔli dè kɔrgo tà le Kuwe-ɓee le jéi nga lé. Ade rai sɔli dè’m man’t ke m’tò dangai’t tede tà le’n nga lé a tɔ. Ule rai se’m nan’t bàj dann nyankem̂kon ke m’ndi tutu tede Tà ke Maje. Dann nyankem̂kon’t nè nga, um kem̂i dè tɔgmong’t le Nube.

Tite 1:3

Loo ke ndɔ le’n ke è kuwe ɔje nga ase deĵ ɓaa, è ribe dè tà le’n nga ke nata se go Tà ke Maje ke m’ile mber’n. E Nube ke njèkaje jèi kuwe á unn’n ndu’n ade’m kade m’ile’n mber Tà ke Maje nga.

Tite 2:14

Jésu-Krist inye ra’n ade yo uge’n dè jéi, ɔr’n jèi dann majelé’t bere mbak. E ɔr jèi unde jèi se ninn’n le kade jèi kosdooge le’n kuwe deri. Jésu ra titeke bè tede kade jèi kosdooge le’n ke njé ra nyange ke maje se rakɔlé.

Hebreuge 9:12

Gile kei ke tò se ninn’n gai nè nga, Krist aw ile njà’n tutu nja karé bere luk-luk ke ngang’n. E aw kem̂ kei nè nga se mese bal binyege éké mese ngann mangege lé. Nè è aw gile kei ke tò se ninn’n gai nè nga se mese’n è kuwe taa’n jèi inye’n jèi dɔ sár se non.

1 Pierre 2:24

Krist nga oto majelége le jéi dènn’t aw’n weii’n kade kage-ke-dese’t tede kade j’ebi ra jéi dè ra majelége’t le jéi le teli ndii kumgajer ɔje dè nyanra ke se dè naje’n. Takul dòge ke è inge rann’t á j’aji.

1 Pierre 3:18

Krist nga kuwe géa, nyankem̂kon ra’n nja karé bere luk-luk ke ngang’n tede nyanra majelé le dooge. Krist è njè ra nyan se dè naje’n. Nyankem̂kon ra’n ɔje dè nyanra majelé le dooge tede le tel ree’n se si ra Nube’t. Danra’n á dé tɔl nè è tel ndi kumgajer takul Ndil-Kem̂nda.

1 Jean 4:10

E jèi á j’in-in se kem̂ jéi jè tári Nube kété lé, nè è Nube kuwe á tár jèi kété. Gir’n ke nè á è ule’n Ngonn’n ke nyankɔr kure majelége le jéi.

Lookilera’n 1:5

Maje kade Jésu-Krist njèkɔrgo tà ke get-get ade sei kem̂noje se kem̂lom. Jésu-Krist nga è kuwe karé bere á è doo ke desêin sàk-sàk ke unde loo tee dann njé ke koo’t. E nga è ngar ke on ɓee dè ngarge ke dè nang nè. Jésu-Krist nga tár jèi a, ɔr jèi dann kaiya’t le jéi takul mese’n a tɔ.

Lookilera’n 5:9

Nyankundege ke sɔ se ngatɔgege ke kɔr-joo-gidé-sɔ nè ɔsi pa ke kige ɗɔyi Ngonn bate edi nè: «I kuwe se kari asekum taa magtub nè le tutu nyankorji ke dé tinye’n tà’n. Tede è i kuwe á ndɔ ke dé tɔli. E i kuwe á uge dè girkoje dooge malang dè nang nè ke tà tam de è gai-gai se kosdooge a, se girkoje dooge se dè-ɓee-dè ɓee se mesi ade Nube.