Zacarias 10:4 - Tupàn zeꞌeg

⁴ Heremiaihu wanuwihaw ràm paw wà nehe, zauxiapekwer heremiruze'eg wanuwihaw ràm paw wà nehe no, heremiaihu waneruze'egar ràm paw wà nehe no, wiko putar a'e parer romo wà nehe.

Zacarias 10:4 ပူးပေါင်းရင်းမြစ်များ

Gênesis 49:24

Nezewe rehe we ywyrapar ikàg a'e. Izywa ikàg wiwi no. Ta'e Tupàn ikàg ma'e Zako izar umukàg kar a'e xe. Tupàn àràpuhàràn mono'ogar zàwenugar a'e, itahu Izaew wapyro har zàwenugar a'e, umukàg kar putar a'e nehe.

Esdras 9:8

Ko 'ar rehe, o Tupàn Tuweharupi Wiko Ma'e urezar, eremumaw amo 'ar iko nekatuahy pà urewe. Eremuhem kar amogwemogwer ureinuinuromo har a'e tuwihaw wi ne wà. Uremuigo kar pe xe ko ywy imonokatu pyrer rehe. Ni amo na'ureàmàtyry'ym kwaw xe wà. Uremuhem kar pe urepyhyk kar awer wi. Uremuigo kar wi pe no.

Salmos 118:22

Tàpuz iapo har weityk amo ita wà. Iahykaw rehe a'e ita ikàg wera'u amo ita wanuwi a'e.

Isaías 19:13

Zuwà wanuwihaw weityk uma'ekwaw katu haw wà. Tuwihaw hemu'em Men tawhu pe har wanupe wà. A'e pe har uzeruzar e waze'eg rehe wà. Ezit ywy huwakeake har wanuwihawete uzapo kar ikatu 'ym ma'e teko wanupe wà.

Isaías 28:16

A'e rupi Tupàn Tuweharupi Wiko Ma'e Zanezar uze'eg nezewe kury. — Amuapyk amo ita hereko Xiàw rehe ihe kury. Ita hekuzar katu ma'e a'e. Aexaexak a'e ita ihe. A'e ita upyta putar amo ita heràpuzuhu wy pe har iahykaw rehe a'e nehe, imuàtà katu pà a'e nehe. Amuapyk ko ze'eg hehe. — Tupàn rehe uzeruzar ma'e nukyze kwaw wà, i'i ze'eg ita rehe har.

Isaías 49:2

Uzapo heze'eg takihepuku haime katu ma'e ài. Hemim hepyro pà opo pupe. Heapo u'yw hakwa katu ma'e ài. Hemonokatu a'e. — 'Ar ikatu ma'e rehe apyhyk putar nehe, i'i ihewe.

Isaías 54:16

Azapo itaper ima'ema'e har ihe wà. Upy tàtàpyz rehe wà. Uzapo puruzuka haw zeàmàtyry'ymawhu pe har wà. Azapo zauxiapekwer ihe wà no. Uzuka teko a'e puruzuka haw pupe wà. Umumaw teko a'e puruzuka haw pupe wà.

Jeremias 1:18

Einu heze'eg nehe, Zeremi. Teko ko ywy rehe har wiko putar neàmàtyry'ymar romo a'e wà nehe: Zuta ywy rehe har wanuwihawete wà, amogwer tuwihaw wà, xaxeto wà, teko wà. Paw rupi wiko putar neàmàtyry'ymar romo wà nehe. Nezewe rehe we kutàri amono hekàgaw teko newe. Nezewe mehe erepuner putar a'e teko wanenataromo neze'egaw rehe nehe. Ereiko putar tawhu pàrirogawtàtà ma'e tetea'u hereko har ài nehe, izyta itaper iapo pyrer ài nehe no, pàrirogawtàtà ma'e itazu morog iapo pyrer ài nehe no. Nanereityk kwaw wà nehe. Ta'e aiko putar neruwake ihe nehe xe, nerehe hezekaiw pà ihe nehe xe. Ihe Tupàn Tuweharupi Wiko Ma'e aze'eg kwez kury, i'i Tupàn ihewe.

Jeremias 51:20

Tupàn Tuweharupi Wiko Ma'e uze'eg kury. — Mawiron, ereiko hepurunupà haw romo ne. Ereiko hetakihepuku romo hepuruzuka haw romo. Apei'ài'àg teko ywy tetea'u rehe har nepupe ihe wà. Amumaw tuwihaw ihe wà. Amumaw wanemiruze'eg ihe wà no.

Zacarias 9:10

Umumaw putar Izaew ma'e ywyramawa zeàmàtyry'ymaw rehe har wà nehe. Umumaw putar zauxiapekwer kawaru ku'az har Zeruzarez pe har wà nehe no. Uhauhaw putar waywyrapar wà nehe. Uhauhaw putar wanu'yw wà nehe no. Umuigo kar putar teko ywy nànànar zeàmàtyry'ym 'ymaw rehe wà nehe. Ipureruze'egaw uzypyrog ko yryhu pe. Oho amo yryhu pe no. Uzypyrog yrykaw Ewparat pe. Oho ywy ahykaw pe.

Zacarias 9:8

Apyro putar heremiaihu waàmàtyry'ymar wanuwi ihe wà nehe. Namuixe kar kwaw zauxiapekwer a'e ywy rehe har heywy rehe wà nehe. Naheta pixik kwaw tuwihaw iaiw ma'e heremiaihu waneruze'egar romo wà nehe. Ta'e aexak heremiaihu ma'erahy ipuraraw mehe ihe wà xe.

Números 24:17

Ame'e uzeapo ma'e ràm rehe. Aexak teko Izaew izuapyapyr wà. Wanuwihawete zahytata uhyape katu ma'e uzexak kar putar wanupe nehe. Ur putar Izaew wanuwi zahytata uwewe ma'e ài. Weityk putar Moaw wanuwihaw wà nehe. Umumaw putar 'aw teko wiko wera'u ma'e wà nehe.

Mateus 9:38

Aroz tetea'u ihyk mehe ko zar umur kar uma'ereko ma'e ko pe a'e wà, aroz ipo'opo'o kar pà wanupe a'e wà. Nezewegatete peze'eg Tupàn pe nehe. A'e mehe umur kar putar uze'eg imume'u har xe a'e wà nehe. A'e rupi teko ukwaw putar Tupàn ze'eg puràg a'e wà nehe. Uzeruzar putar hehe wà nehe.

Lucas 20:17

Ume'e Zezuz wanehe. Ma'in a'e ze'eg kwehe arer pape rehe imuapyk pyrer a'e, i'i wanupe. Tàpuz iapo har weityk 'aw ita imono a'e wà. — Na'ikatu kwaw zanewe, i'i wà. A'e ita a'e nehe kury, upyta putar tàpuz iwy pe a'e nehe kury.

Efésios 2:20

Tupàn hemiruze'eg a'e wà, tàpuz ài wanekon a'e wà, ta'e Tupàn wiko wainuromo a'e xe. Ta'e wiko wapy'a pe xe. Tupàn ze'eg imume'u har a'e wà, Zezuz hemimono karer a'e wà no, tàpuz ywyra ài wanekon a'e wà. Zaneruwihawete a'e no, ita tàpuz iwy pe har ài hekon a'e no. Zane tàpuz iàrukàg ài zaiko zane. Tàpuz 'aromo har ài zaiko no. Zatyryk ikatu 'ym ma'e wi zane, zazemonokatu pà Tupàn pe zane. Nezewe mehe hàpuz ikatu putar izupe nehe.

2 Timóteo 2:4

Zauxiapekwer uma'ereko mehe nuzekaiw kwaw uma'e rehe a'e, ta'e ipurumurywete kar wer weruze'egar rehe a'e xe. A'e rupi ezapo zo neremiapo putar haw nehe. Ezapo Tupàn hemiapo putar haw nehe kury, ta'e nepurumurywete kar wer Tupàn rehe ne no xe.

1 Pedro 2:6

Ta'e nezewe i'i Tupàn ze'eg kwehe arer a'e xe. — Teko wexak ita ikatu ma'e a'e wà, tàpuz iwy pe har romo a'e wà. Nezewegatete aexak penuwihawete ihe no. Xiàw taw pe wiko putar a'e nehe. Hehe uzeruzar ma'e a'e wà nehe, nuzemumikahy pixik kwaw a'e wà nehe. Hurywete putar wà nehe, ta'e uzeruzar hehe wà nehe xe.

Apocalipse 17:14

Uzàmàtyry'ym putar Àràpuhàràna'yr zàwenugar a'e wà nehe. Àràpuhàràna'yr zàwenugar weraha putar weminoz uzeupi a'e wà nehe, puràmàtyry'ymaw pe a'e wà nehe. Hemixamixak kwer a'e wà nehe, hemiruze'eg uzeruzar katu ma'e a'e wà nehe no, weityk putar àzàguhu a'e wà nehe, weityk putar hemiruze'eg a'e wà nehe no, ta'e Àràpuhàràna'yr zàwenugar wiko putar teko wazar wazar romo a'e nehe xe, wiko putar tuwihaw wanuwihaw romo a'e nehe no xe, i'i ihewe.

1 Samuel 14:38

Na'e uze'eg Xau amogwer tuwihaw wanupe kury. — Pezur xe nehe ty wà. Pepuranuranu teko wanehe nehe. — Ma'e ikatu 'ym ma'e pezapo kwez Tupàn henataromo kutàri. Ta'e nuze'eg kwaw zanewe a'e xe, peze wanupe nehe, i'i wanupe.