Tiago 5:11 - Tupàn zeꞌeg

¹¹ — Hurywete ma'e, za'e wanupe, ta'e nupytu'u kwaw uzeruzar ire wà xe, ma'erahy ipuraraw mehe wà xe. Pema'enukwaw a'e awa kwehe mehe wiko ma'e rehe pe, a'e awa Zo her ma'e rehe pe. Ikàg a'e no. Nupytu'u kwaw uzeruzar ire ma'erahy tetea'u ipuraraw mehe a'e. Pekwaw ikàg awer. Iahykaw rehe Tupàn uzapo ikatuahy ma'e tetea'u izupe, ta'e nupytu'u kwaw uzeruzar ire ma'erahy ipuraraw mehe a'e xe. Ta'e Zanezar upurupuhareko katu a'e xe. Na'izepyk wer kwaw purehe a'e.

Tiago 5:11 ပူးပေါင်းရင်းမြစ်များ

1 Crônicas 21:13

Uwazar Tawi ize'eg izupe. — Naheta kwaw hepyro àwàm ihewe. Nezewe rehe we naputar kwaw awa herehe wazepyk àwàm. Tupàn Tuweharupi Wiko Ma'e a'e, tuwe a'e ae uzepyk herehe nehe, ta'e upurupuhareko katu a'e xe, i'i Tawi Kaz pe.

2 Crônicas 30:9

Aze pezewyr Tupàn pe nehe, a'e mehe peàmàtyry'ymar peànàm waneraha arer pena'yr waneraha arer a'e wà nehe, upuhareko putar a'e wà nehe. Umuzewyr kar putar waneko awer pe wà nehe no. Ta'e Tupàn Tuweharupi Wiko Ma'e Zanezar ikatu a'e xe. Upurupuhareko no. Pemuawyze kar putar nehe no, aze pezewyr izupe nehe, i'i wanupe a'e pape rehe uze'eg imuapyk pà wà.

Neemias 9:17

— Nureruzar kwaw neze'eg nehe, i'i newe wà. Heharaz neremiapo kwer paw wi wà. Heharaz purumupytuhegatu kar haw neremiapo wer wi wà no. Wiko wera'u wà, a'e rupi wexak amo uwihaw wà. Urereraha wi pe Ezit pe nehe, i'i izupe wà. Heko wer wi amo pe uma'ereko e ma'e romo wà. Nezewe rehe we ereiko Tupàn teko wanemiapo kwer ikatu 'ym ma'e wi heharaz ma'e romo ne. Nekatuahy ne. Puramutar ma'e romo ereiko. Mewe katu erekwahy purupe. Nepurupuhareko haw uhua'u. A'e rupi na'urereityk kwaw pe ne.

Neemias 9:31

Erepuhareko katu ne wà. A'e rupi nereityk kwaw ne wà. Neremumaw kwaw ne wà. Ereiko Tupàn upurupuhareko katu ma'e romo. Ereiko Tupàn ikatu ma'e romo.

Jó 1:1

Amo awa wiko Uz ywy rehe a'e. Izo her romo a'e. Ikatu a'e. Imunar 'ym ma'e romo hekon. Ukyze Tupàn wi. Uzeagaw ikatu 'ym ma'e iapo 'ym pà.

Jó 1:2

Heta 7 ta'yr izupe wà. Heta na'iruz tazyr izupe wà no.

Jó 2:10

Uwazar Izo ize'eg izupe. — Ereze'eg iko iranaiw ma'e ài. Xipyhyk ikatu ma'e Tupàn hemimur kwer zane. Màràzàwe tuwe naxipyhyk kwaw iaiw ma'e izuwi ur ma'e kwer, i'i. Nezewe rehe we Izo nuzapo pixik kwaw ikatu 'ym ma'e Tupàn henataromo. Numume'u kwaw ni pitài ma'e ikatu 'ym ma'e henataromo.

Jó 23:10

Nezewe rehe we Tupàn ukwaw heata haw pitàitàigatu a'e. Aze heragaw nehe, — Heko haw nuzawy kwaw or ikatuahy ma'e, i'i putar ihewe nehe.

Salmos 103:13

Awa wereko katu tuwe wa'yr wà. Nezewegatete Tupàn Tuweharupi Wiko Ma'e wereko katu tuwe izuwi ukyze ma'e wà no.

Salmos 103:8

Tupàn Tuweharupi Wiko Ma'e ikatuahy a'e. Upurupuhareko a'e no. Iàrew purupe ikwahy haw. Upuruamutar katu no.

Salmos 116:5

Tupàn Tuweharupi Wiko Ma'e ikatuahy purupe a'e. Nupuir kwaw wemiaihu wanuwi a'e. Zanezar zanepuhareko a'e.

Salmos 119:132

Ereme'egatu neamutar katu har wanehe wapuhareko katu pà. Eme'e wi herehe nezewegatete nehe no.

Salmos 145:8

Tupàn Tuweharupi Wiko Ma'e ikatu a'e. Upurupuhareko katu tuwe no. Iàrew wikwahy pà. Upuruamutar katu tuweharupi.

Salmos 37:37

Eme'egatu ikatu ma'e wanehe nehe. Eme'e imunar 'ym ma'e hemu'em 'ym ma'e wanehe nehe. Heta wazuapyapyr zeàmàtyry'ym 'ymaw iamutar har wanupe wà. Erexak putar waneta haw nehe.

Salmos 51:1

O Tupàn, hepuhareko pe nehe, ta'e erepuruamutar katu ne xe. Erepurupuhareko katu ne, A'e rupi emunàn heremiapo kwer ikatu 'ym ma'e paw ihewi nehe.

Salmos 78:38

Nezewe rehe we Tupàn upuhareko wemiaihu wà. Numumaw kwaw wà. Umunàn wanemiapo kwer wanuwi uweharaz tà. Tuweharupi umuakuir wekwahy haw a'e. Umumaw wekwahy haw a'e.

Salmos 86:15

Ne, hezar, ereiko Tupàn purupuhareko ma'e romo puruamutar katu ma'e romo ne. Iàrew purehe nezepykaw. Nekatuahy. Neretyryk kwaw neremiruze'eg wanuwi.

Salmos 86:5

O hezar, nekatuahy ne. Teko wanemiapo kwer ikatu 'ym ma'e imunànar romo ereiko. Erezamutar katu newe uze'eg ma'e paw ne wà.

Salmos 94:12

O Tupàn Tuweharupi Wiko Ma'e, hurywete neremimu'e wà. Neze'eg rehe neremimu'e hurywete wà.

Êxodo 34:6

Ukwaw Tupàn oho Moizez henataromo. Ukwaw mehe uze'eg nezewe uzehe kury. — Tuweharupi wiko ma'e romo aiko ihe, Tupàn Tuweharupi Wiko Ma'e romo aiko ihe. Apurupuhareko ihe, apuraihu ihe: Heàrew hekwahy pà. Napytu'u kwaw heremiaihu wamutar katu re. Uhua'u hepuruamutar katu haw. Teko nupuner kwaw hepuruamutar katu haw paw ikwaw paw rehe wà.

Eclesiastes 7:8

Amo ma'e iahykaw a'e, ikatu wera'u izypyrogaw wi. Teko ma'e hàrogatu har ikatu wera'u amogwer wiko wera'u ma'e wi wà.

Isaías 63:7

Amume'u putar Tupàn Tuweharupi Wiko Ma'e ipuruamutar katu haw purupe ihe nehe. Uzapo ikatu ma'e tetea'u a'e. A'e rupi amume'u putar ikatu haw izupe nehe, ta'e Tupàn Tuweharupi Wiko Ma'e umur tuwe uze'egatu zanerehe a'e xe. Wexak kar ukatuahy haw wemiaihu wanupe. Ta'e upurupuhareko katu a'e xe. Upuruamutar katu a'e no.

Isaías 63:9

A'e rupi upyro wanemipuraraw paw wi a'e wà. A'e ae wiko wapyro har romo a'e. Numur kar kwaw weko haw pe har wapyro àràm romo wà. Numur kar kwaw amo wyzài wemiruze'eg. A'e ae uzapo. Uzamutar katu a'e wà. Upuhareko wà no. A'e rupi upyro wà. Tuweharupi nehe, kwarahy nànàn nehe, upyhyk waneraha pà wà.

Lamentações de Jeremias 3:22

Tupàn puruamutar katu haw nupaw kwaw a'e. Ikatu haw nupaw pixik kwaw.

Daniel 9:9

Nezewe rehe we urepuhareko katu pe ne. Nepurumunàn wer ureremiapo kwer rehe wyzài 'ar mehe. Aze uruàmàtyry'ym ure, nezewe rehe we eremunàn ureremiapo kwer.

Joel 2:13

Aze pepurexak kar wer pekatu 'ymaw rehe pezemumikahy haw rehe ihewe nehe, aze pepytu'u wer ikatu 'ym ma'e iapo re nehe, pemu'i zo pekamir nehe. Pemu'i pepy'a nehe, i'i iko Tupàn peme. Pezewyr Tupàn Tuweharupi Wiko Ma'e Zanezar pe nehe. Ta'e ikatuahy a'e xe. Ta'e upurupuhareko a'e xe. Iàrew tuwe ikwahy haw. Upuruamutar katu no. Na'izepyk wer kwaw purehe. Ipurapo wer ikatu ma'e rehe purupe.

Jonas 4:2

A'e rupi uze'eg nezewe Tupàn pe kury. — O Tupàn Tuweharupi Wiko Ma'e. Heywy wi hehem 'ym mehe we amume'u ko ma'e neremiapo ràm ihe. A'e rupi hezàwehem wer newi Epàn ywy kutyr ihe. Akwaw Tupàn purupuhareko ma'e romo nereko haw ihe. Akwaw puruamutar katu ma'e romo nereko haw no. Iàrew nekwahy haw. Akwaw nereko haw. Akwaw nekatu haw. Tuweharupi nezewyr wer neze'eg wi. Nanezepyk wer kwaw purehe. Akwaw nereko haw.

Miquéias 7:18

O Tupàn. Naheta kwaw amo nezàwenugar wà. Ta'e nereharaz neremiaihu wikuwe ma'e wanemiapo kwer ikatu 'ym ma'e wi ne xe. Nerezepyk kwaw wanehe nehe. Nekwahy kwaw tuweharupi nehe. Erepytu'u putar nekwahy re nehe. Tuweharupi nepurexak kar wer nepuruamutar haw rehe purupe.

Números 14:18

Nezewe ereze'eg ne. — Ihe, Tupàn Tuweharupi Wiko Ma'e ihe, àrogatu ma'e ihe. Apurupuhareko katu ihe no. Amunàn katu 'ymaw ihe. Amunàn ikatu 'ym ma'e teko wanemiapo kwer ihe no. Nezewe rehe we iapo arer nuiko kwaw iapo 'ym arer ài ihewe wà. Aze tu uzapo ikatu 'ym ma'e wà, azepyk ta'yr wanehe. Azepyk hemimino wanehe no. Azepyk hemimino wana'yr wanehe no, ere purupe.

Mateus 10:22

Teko paw na'iakatuwawahy kwaw penehe a'e wà nehe, ta'e pezeruzar herehe pe xe. Aze amo uzeruzar Tupàn rehe nehe, aze nupytu'u kwaw uzeruzar ire nehe, ma'erahy ipuraraw mehe nehe, te iahykaw rehe nehe, Tupàn upyro putar a'e teko a'e nehe.

Lucas 1:50

Aze amo teko umuwete katu Tupàn a'e wà, Tupàn upuhareko katu a'e teko a'e wà, ko 'ar rehe har a'e wà, amo 'ar rehe àràm a'e wà no.

Lucas 11:10

Ta'e aze awa wenoz ma'e nehe, Tupàn umur putar izupe nehe. Aze awa wekar ma'e nehe, wexak putar nehe. Aze awa wenoz wixe àwàm nehe, uken uzewàpytymawok putar izupe nehe.

Lucas 6:36

Pepurupuhareko nehe. Ta'e nezewegatete penu ywate har a'e xe, upurupuhareko tuwe a'e xe.

Romanos 2:4

Tupàn ikatuahy a'e, a'e rupi nuzepyk kwaw teko ikatu 'ym ma'e iapo har wanehe tàrityka'i a'e. Iàrew. Nuikwahy kwaw tàrityka'i, iàrew ikwahy haw teko ikatu 'ym ma'e iapo mehe. Aipo nerezekaiw kwaw ikatu haw rehe ne, ikwahy 'ymaw rehe ne. Tupàn ikatuahy a'e. Nezewe i'i iko newe tuweharupi a'e. — Epytu'u ikatu 'ym ma'e iapo re nehe, ezewyr ihewe nehe, ezemumikahy neremiapo kwer rehe nehe, i'i iko newe. Ipurumuzewyr kar wer nerehe uzeupe a'e.

Efésios 1:6

A'e rupi, tuwe ximume'u Tupàn ikatu haw izupe zane nehe, teko wanupe zane nehe no, ta'e zanepuhareko katu a'e xe. Zanepuhareko katu a'e, a'e rupi wexak kar ukàgaw upuràg eteahy haw iko teko wanupe a'e. Ta'e kwehe mehe umur e wa'yr zanewe xe, wemiamutar katu zanewe xe.

Efésios 2:4

Tupàn zanepuhareko katu tuwe a'e. Zaneamutar katu tuwe no.

Hebreus 10:39

Nazaiko kwaw uzeruzar ire upytu'u ma'e romo zane. Nazaiko kwaw tatahu pe oho ma'e ràm romo. Zazeruzar tuwe hehe. Zanepyro ikatu 'ym ma'e wi a'e, tatahu wi a'e.

Hebreus 3:14

Izypy mehe zazeruzar tuwe Zaneruwihawete rehe zane. Aze zazeruzar zaha zaiko hehe zane nehe, te iahykaw rehe nehe, zaiko putar ipyr tuweharupi nehe. Xiriko putar ikatu haw ikàgaw nehe no.

Hebreus 3:6

Zaneruwihawete a'e, Tupàn ta'yr romo hekon a'e. Tupàn hemiruze'eg wanuwihawete romo hekon a'e. Awa uzekaiw katu uzar hàpuz a'e. Nezewegatete Zezuz uzekaiw katu zanerehe a'e, ta'e zaiko tu hàpuz ài zane xe. Aze zanekàg nehe, zaiko wiwi putar hemiruze'eg romo nehe. Aze nazapytu'u kwaw ipyr zaneho àwàm rehe zanezeruzar ire nehe, zaiko wiwi putar hemiruze'eg romo nehe, zaiko wiwi putar Tupàn hàpuz zàwenugar romo nehe.

Tiago 1:12

Teko uzapo ikatu 'ym ma'e uzeruzar ma'e wanupe wà. Uzeruzar ma'e upuraraw ma'erahy wà no. Aze nupytu'u kwaw uzeruzar ire wà nehe, ma'erahy ipuraraw mehe wà nehe, ikatu 'ym ma'e ipuraraw mehe wà nehe, hurywete putar wà nehe. Aze uzeruzar wiwi oho waiko te iahykaw rehe wà nehe, wiko putar Tupàn pyr tuweharupi wà nehe, tatahu pe oho 'ym pà wà nehe. Ta'e nezewe i'i tuwe Tupàn purupe a'e xe. — Heamutar katu har a'e wà nehe, wiko putar tuweharupi hepyr a'e wà nehe, i'i purupe a'e xe.

Tiago 1:2

Herywyr wà, hereinyr wà. Aze pepuraraw ma'erahy nehe, wyzài ma'erahy nehe, aze uzeruzar 'ym ma'e uzapo wyzài ikatu 'ym ma'e peme wà nehe, penurywete nehe.

1 Pedro 1:13

Tupàn umur putar ikatuahy ma'e peme nehe, Zezuz Zaneruwihawete tur mehe nehe. Peàrogatu tur àwàm nehe. Pema'enukwaw tuwe Zezuz rehe nehe.

1 Pedro 3:14

Aze teko upuraraw kar ma'erahy penemiapo ikatu ma'e rehe peme wà nehe, penurywete nehe. Pekyze zo teko wanuwi nehe. Ma'e azapo putar nehe, peze zo nehe.

2 Pedro 2:9

Aze teko ikatu wà nehe, Tupàn ukwaw putar ma'erahy ipuraraw paw wi wapyro haw a'e nehe. Upyro putar wà nehe. Ukwaw ikatu 'ym ma'e iapo har wanexakaw a'e no. Amo 'ar mehe umume'u putar wanemiapo kwer a'e nehe, wanehe uzepyk pà a'e nehe.