Lucas 4:18 - Tupàn zeꞌeg

¹⁸ Zanezar Hekwe wiko herehe a'e. Ta'e herexak a'e xe, uze'eg puràg imume'u kar pà ihewe a'e xe. — Emume'u heze'eg puràg ma'e hereko 'ymar wanupe nehe, i'i ihewe. — Ikatu 'ym ma'e iapo har a'e wà, zemunehew paw pe wiko ma'e ài wanekon a'e wà. Emume'u heze'eg puràg wanupe nehe no, a'e mehe zemunehew paw wi uhem ma'e kwer ài wanekon putar wà nehe, aze uzeruzar hehe wà nehe, i'i ihewe. — Ikatu 'ym ma'e iapo har a'e wà, hehàpyhà 'ym ma'e ài wanekon a'e wà. Emume'u heze'eg puràg wanupe nehe, a'e mehe wiko putar hehàpyhàgatu ma'e romo a'e wà nehe, i'i ihewe. — Ikatu 'ym ma'e iapo har a'e wà, uzemumikahy a'e wà. Emume'u heze'eg puràg wanupe nehe. A'e mehe hurywete putar wà nehe, i'i ihewe.

Lucas 4:18 ပူးပေါင်းရင်းမြစ်များ

Gênesis 3:15

— Urumuigo kar putar a'e kuzà iàmàtyry'ymar romo ihe nehe, amuigo kar putar a'e kuzà neàmàtyry'ymar romo ihe nehe no. Nezuapyapyr a'e wà nehe, wiko putar izuapyapyr waàmàtyry'ymar romo a'e wà nehe. Izuapyapyr wiko putar nezuapyapyr waàmàtyry'ymar romo a'e wà nehe no. Pitài izuapyr ukamik putar neàkàg newi nehe. Ne erexi'u putar izuapyr ipyakaza rehe ne nehe no, i'i izupe.

2 Crônicas 34:27

Erezemumikahy herenataromo ikàg 'ym ma'e romo nereiko pà. Eremu'i nekamir. Zeruzarez rehe ipupe har wanehe hezepyk àwàm henu mehe erezai'o. Urenu ihewe neze'eg mehe.

Salmos 102:20

Wenu imunehew pyrer wakuhem mehe wà. Zaneàmàtyry'ymar umume'u amo zaneànàm wamàno àwàm wà. Tupàn upyro a'e izuka pyràm wà.

Salmos 147:3

Umukatu uzemumikahy tuwe ma'e wà. Omono muhàg wakutuk awer rehe a'e, wakixi awer rehe a'e.

Salmos 2:2

Wanuwihawete uzemuàgà'ym wà. Waneruze'egar umume'u Tupàn Tuweharupi Wiko Ma'e iàmàtyry'ym àwàm wà. — Xiàmàtyry'ym tuwihawete Tupàn hemixak kwer nehe, i'i uzeupeupe wà no.

Salmos 2:6

Nezewe i'i Tupàn. — Amuapyk kar tuwihawete heremiruze'eg ihe, henaw rehe ihe, Xiàw pe ihe, ywytyr heremimonokatu karer rehe ihe, i'i Tupàn.

Salmos 34:18

Tupàn upyta uzemumikahy ma'e wanuwake a'e. Upyro teko upyro àwàm hàro re upytu'u ma'e a'e wà.

Salmos 45:7

Erezamutar katu ikatu haw ne. Naneakatuwawahy kwaw ikatu 'ymaw rehe. A'e rupi Tupàn nezar nerexak tuwihawete romo nemuigo kar pà a'e. Nemurywete kar tuwe tuweharupi. Nerurywete wera'u amogwer tuwihawete wanuwi upaw rupi ne.

Salmos 51:17

O Tupàn, herekwe wiko wera'u 'ym ma'e amono newe imono pyr romo ma'ea'yr izuka pyr zàwenugar romo ihe. Nereityk kwaw teko wiko wera'u 'ym ma'e ne wà. Teko wemiapo ikatu 'ym ma'e wi uzemumikahy ma'e eremur kar nezeupe ne wà.

Isaías 32:3

Na'e teko paw upuner ma'e hexak katu wi haw rehe wà nehe. Wenu katu wi ma'e paw wà nehe no.

Isaías 35:5

Na'e hehàpyhà 'ym ma'e wexak putar wà nehe. Iapyha 'ym ma'e wenu putar a'e wà nehe no.

Isaías 42:7

Eremuehazawok putar hehàpyhà 'ym ma'e ne wà nehe. Eremuhem kar putar iàpixipixi pyrer wazemunehew paw wi ne wà nehe. Eremuhem kar putar zemunehew paw ipytunahy ma'e pe wiko ma'e wamono ne wà nehe.

Isaías 45:13

Ihe amuzypyrog kar Xiru ma'e iapo kar pà izupe ihe. — Ereityk putar ywy tetea'u rehe har ne wà nehe, Amumew putar hape ràm henataromo ihe nehe. Uzapo wi putar Zeruzarez tawhu hereko haw romo a'e nehe no. Umuhem kar putar heremiaihu wamunehew paw wi a'e wà nehe. Nuenoz kwaw temetarer wamuhem kar haw hekuzaromo nehe. Ihe Tupàn Tuweharupi Wiko Ma'e Ikàg Wera'u ma'e amume'u ko ze'eg tekoko ihe, i'i Tupàn.

Isaías 49:9

Aze'eg putar zemunehew paw pe har wanupe nehe. — Pehem zemunehew paw wi nehe, a'e putar wanupe nehe. Ipytunaw rehe wiko ma'e wanupe aze'eg putar nezewe nehe no. — Ni amo nuiko kwaw pezar romo wà kury. Peiko izar 'ym ma'e romo kury, a'e putar wanupe nehe. Umai'u putar pe iwyr àràpuhàràn hawitu ma'e ài wà. Te ywytyr ka'a heta 'ymaw rehe wexak putar ka'api'i wà nehe.

Isaías 50:4

Zanezar Tupàn Tuweharupi Wiko Ma'e hemu'e herereko heremiapo ràm rehe a'e. Nezewe mehe amurywete kar putar ikene'o ma'e ihe wà nehe. Tuweharupi ku'em mehe hemurywete kar a'e, a'e rupi ainu katu ize'eg a'e 'ar rehe har.

Isaías 57:15

Tupàn Ikatuahy Ma'e Ywate Wera'u Ma'e a'e, Tupàn Tuweharupi Wiko Ma'e a'e, uze'eg a'e. — Hereko haw upyta ywate a'e. Ikatuahy a'e, ikatu 'ymaw wi imunyryk pyrer romo hekon a'e. Aiko ikàg 'ym ma'e wainuinuromo ihe no. Aiko ma'erahy ipuraraw par wainuinuromo ihe no. Nezewe mehe àro kar ikatu ma'e ikàg 'ym ma'e wanupe. Amono wakàgaw ipyahu ma'e ma'erahy ipuraraw par wanupe no.

Isaías 59:21

Tupàn Tuweharupi Wiko Ma'e uze'eg wemiaihu wanupe. — Na'aw heze'eg àwàm penehe we heremiapo katu ràm xe kury. — Herekwe peme heremimono kwer a'e nehe, hepurumu'e haw peme heremimur kwer a'e nehe no, upyta putar pepyr tuweharupi a'e wà nehe. Pemu'e putar pena'yr a'e ze'eg rehe nehe, ko 'ar rehe nehe, tuweharupi nehe no. Ihe Tupàn Tuweharupi Wiko Ma'e aze'eg kwez kury.

Isaías 61:1

Tupàn Tuweharupi Wiko Ma'e umur wekwe ihewe a'e. Herexak uze'eg ikatu ma'e purupe heraha kar pà ihewe. — Eraha hemetarer 'ym ma'e wanupe nehe, i'i ihewe. Hemono kar ma'erahy ipuraraw par wamurywete kar pà ihewe. — Emume'u imunehew pyrer wamuhem kar àwàm eho purupe nehe. Emume'u zemunehew paw pe har wamuhem kar àwàm wanupe nehe no, i'i ihewe.

Isaías 66:2

Ihe ae azapo ywak ihe. Azapo ywy ihe no. Aiko ma'e paw wazar romo no. Nezewe rehe we azekaiw hemetarer 'ym ma'e wanehe. Azekaiw katu wemiapo kwer ikatu 'ym ma'e rehe uzemumikahy ma'e wanehe no. Hewi ukyze ma'e wanehe no, heze'eg heruzar har wanehe no.

Ezequiel 9:4

— Eho Zeruzarez tawhu nànàn nehe. Teko uzapo purumupytuhegatu kar haw tetea'u xe wà. Amo uzemumikahy wikwahy pà a'e ma'e hexak mehe wà. Emuapyk amo ze'eg a'e teko wanehàpykàg rehe nehe, i'i izupe.

Daniel 9:24

Taniew, neànàm wanehe Tupàn izepykaw a'e nehe, tawhu izupe imonokatu pyrer rehe izepykaw a'e nehe no, umumaw putar 7 haw 70 kwarahy (490 kwarahy) nehe. Te upaw putar Tupàn iàmàtyry'ymaw nehe. Upytu'u putar ikatu 'ym ma'e iapo re wà nehe. Na'e Tupàn umunàn putar neànàm wanemiapo kwer ikatu 'ym ma'e a'e nehe. Tupàn uzapo putar ikatuahy ma'e nehe, ta'e ikatuahy tuweharupi a'e xe. Neremixak kwer uzeapo putar nehe. Uzeapo ma'e ràm imume'u pyrer uzeapo putar nehe. Xaxeto uzuka putar ma'ea'yr Tupàn henataromo a'e wà nehe no.

Sofonias 3:12

Amuigo kar putar amo teko Zeruzarez pupe ihe wà nehe. A'e teko nuiko wera'u kwaw amogwer wanuwi wà nehe. Nuiko wera'u kwaw ihewi wà nehe. Ma'e kwaw katu har romo wanekon putar wà nehe. Uzeruzar putar herehe wà nehe.

Zacarias 11:11

Uhaw uze'egaw a'e 'ar mehe azeharomoete a'e. Na'e àràpuhàràn hawitu ma'e me'egar herehe ume'e ma'e a'e wà, àràpuhàràn hawitu ma'e me'eg kar har herehe ume'e ma'e a'e wà no, ukwaw heremiapo kwer rupi Tupàn ize'eg awer a'e wà kury.

Malaquias 4:2

Pe ihewi ukyze ma'e, napemàno kwaw nezewe nehe. Apupyro putar nehe. Pepyro haw nuzawy kwaw kwarahy heny katu haw nehe. Kwarahy uhyape katu ma'e imuigo kar pà. Nezewegatete apumuigo kar putar nehe no. Tapi'aka'yr opoopor pari wi uhem mehe wà. Pepopor putar penurywete haw rehe nezewegatete nehe no.

Mateus 11:5

Hehàpyhà 'ym ma'e kwer hehàpyhàgatu a'e wà kury. Wata 'ym ma'e kwer wata waiko a'e wà no. Iperewàtà ma'e kwer ikatu a'e wà no. Iapyha 'ym ma'e kwer iapyha katu a'e wà no. Umàno ma'e kwer ukweraw wi a'e wà no. Amume'u ze'eg puràg aha teko ihe, ma'e hereko 'ymar wanupe ihe.

Mateus 12:18

Ai'aw heremiruze'eg a'e. Heremixak kwer romo hekon a'e. Heremiamutar katu romo hekon a'e no. Ikatuahy ihewe a'e. Amono kar putar herekwe izupe ihe nehe no. Umume'u putar heze'eg oho iko teko nànàgatu a'e nehe no.

Mateus 12:20

Aze teko nuzeruzar katu kwaw hehe wà nehe, Akwez heremiruze'eg umukàg putar wazeruzar haw a'e nehe. Aze teko nupuner kwaw uzehe uzekaiw paw rehe wà nehe, Akwez heremiruze'eg upytywà putar a'e teko a'e wà nehe. Umume'u putar heze'eg oho iko tuweharupi nehe, Ikatuahy ma'e iapo pà nehe. Te amo 'ar mehe nehe, Hekatu haw umumaw putar ikatu 'ym ma'e paw rupi a'e nehe.

Mateus 4:16

Teko ipytunaw rehe har ài wanekon a'e wà Wexak Tupàn ta'yr ikàg wera'u ma'e a'e wà kury. Hexakaw a'e, nuzawy kwaw tatainy heny katu ma'e hexakaw a'e. Uhyape katu tatainy. Nezewegatete Tupàn ta'yr ukwaw kar tuwe Tupàn ze'eg teko wanupe a'e no.

Mateus 5:3

— Aze teko ukwaw tuwe wemiapo kwer ikatu 'ym ma'e a'e wà nehe, — Xo Tupàn zo upuner heremiapo kwer imunànaw rehe a'e nehe, aze i'i nehe, hurywete putar a'e nehe. Ta'e wiko putar Tupàn hemiruze'eg romo a'e nehe xe.

Lucas 4:17

A'e pe har omono Izai pape izupe wà. Upiawok a'e pape, ze'eg hexak pà. Umugeta 'àm teko wanuwa rupi.

Lucas 6:20

Na'e ume'e Zezuz wemimu'e wanehe kury, uze'eg pà wanupe kury. — Pe heremimu'e pe, hemetarer 'ym ma'e romo peiko pe. Penurywete nehe, ta'e Tupàn hemiruze'eg romo peiko xe.

Lucas 7:22

Uze'eg Zuàw hemimu'e wanupe kury. — Pezewyr peho Zuàw pe nehe kury. Pemume'u penemixak kwer peneminu kwer izupe nehe, i'i wanupe. — Hehàpyhà 'ym ma'e kwer hehàpyhàgatu a'e wà kury. Wata 'ym ma'e kwer wata waiko a'e wà kury. Iperewàtà ma'e kwer ikatu a'e wà kury. Iapyha 'ym ma'e kwer iapyha katu a'e wà kury. Umàno ma'e kwer ukweraw wi a'e wà kury. Teko umume'u ze'eg puràg oho waiko ma'e hereko 'ymar wanupe a'e wà kury, peze peho Zuàw pe nehe, i'i wanupe.

João 1:41

Na'e wekar wyky'yr oho a'e kury, izupe uze'eg pà a'e kury. Wexak kury. — Uruexak Mexi kwez ure, i'i izupe huwàxi mehe. (— Zaneruwihawete Zanepyro har, i'i Mexi zaneze'eg rupi.)

João 12:46

Azur ywy rehe tatainy ài ihe, Tupàn ze'eg imume'u pà purupe ihe. A'e rupi herehe uzeruzar ma'e nuiko kwaw ipytunaw rupi wata ma'e ài a'e wà nehe, ta'e ukwaw putar Tupàn ze'eg a'e wà nehe xe.

João 3:34

Zezuz a'e, Tupàn hemimur kar romo hekon a'e. Umume'u Tupàn ze'eg oho iko purupe a'e kury, ta'e Tupàn umur tuwe wekwe ipy'a pe a'e xe.

Atos 10:38

Tupàn umur tuwe Wekwe Puràg Zezuz Nazare pe har pe. Umur tuwe ukàgaw no. Pekwaw imur awer. Wata Zezuz oho taw nàn, ikatu ma'e iapo pà. Umukatu tekwe ikatu 'ym ma'e hereko har wà, ta'e Tupàn upytywà a'e xe. Pekwaw wamukatu awer.

Atos 26:18

— Emuhàpyhàgatu kar waneha nehe. Emuzewyr kar nehe, ipytunaw wi tatainy pe ne wà nehe, Zurupari ikàgaw wi Tupàn pe ne wà nehe. A'e rupi aze uzeruzar herehe wà nehe, Tupàn heharaz putar wanemiapo kwer ikatu 'ym ma'e wi nehe, imunàn pà nehe. Wiko putar Tupàn hemiruze'eg romo Tupàn hemixamixak romo a'e wà nehe no, i'i ihewe, i'i Pawru a'e, tuwihaw Akiri pe a'e.

Atos 4:26

Ywy rehe har wanuwihaw wà, uzemuàgà'ym wà. Waneruze'egar wà, uzemono'og wà Zanezar pe ikatu 'ym ma'e iapo àwàm rehe uze'eg pà wà, Zaneruwihawete ikàgaw i'ok àwàm rehe uze'eg pà wà, i'i a'e ze'eg kwehe arer.

Atos 4:27

Azeharomoete Zezuz imàno 'ym mehe we Tuwihaw Ero a'e, Tuwihaw Pon Pirat a'e no, uzemono'og a'e wà, zutew 'ym wapyr a'e wà, Izaew ipurumuzàmuzàg wapyr a'e wà no. Uzemono'og taw pe wà, Zezuz neremiruze'eg ikatuahy ma'e izuka àwàm rehe uze'eze'eg pà a'e wà. Eremuigo kar nera'yr Zezuz Tuwihawete romo ne.

Colossences 1:13

Zurupari a'e, pyhaw wata ma'e wazar romo hekon a'e. Hemiruze'eg a'e wà, ikatu 'ym ma'e uzapo waiko a'e wà. Tupàn zanepyro ikatu 'ym ma'e wi a'e. Zanepyro pyhaw wata ma'e wazar wi a'e. A'e rupi Zurupari nuiko kwaw zanezar romo. Tupàn ta'yr a'e, hemiamutar katu a'e, a'e ae Zanezar romo hekon a'e.

Tiago 2:5

Tupàn wexaexak teko hemetarer 'ym ma'e ko ywy rehe har a'e wà, hemetarer katu ma'e ài wamuigo kar pà wazeruzar haw rehe a'e wà. A'e rupi upyhyk putar upureruze'egaw a'e wà, ta'e umume'u wamutar har wanupe a'e xe.

1 Pedro 2:9

Tupàn hemixamixak kwer romo peiko pe. Xaxeto ài peiko, tuwihawete pe uma'ereko ma'e romo peiko. Tupàn hemiruze'egete romo peiko. Penexanexak a'e. — Pemume'u heremiapo kwer peho teko nànàn nehe, ta'e ikatuahy heremiapo kwer ihe xe, i'i iko peme. Aze teko wata pyhaw wà nehe, nuexak kwaw wape ràm wà nehe. Izypy mehe peiko pyhaw wata ma'e wazàwe, ta'e napekwaw kwaw Tupàn hape rupi peho haw xe. Tupàn penenonenoz a'e. A'e rupi pekwaw hape rupi peho haw kury. 'Aromo wata ma'e wazàwe peiko kury.