Jó 36:16 - Tupàn zeꞌeg

¹⁶ Izo. Kwehe mehe Tupàn nepyro ikatu 'ymaw wi a'e. Nemuigo kar ikatu haw rehe. Neràpuz me teko umai'u katu tuweharupi wà.

Jó 36:16 ပူးပေါင်းရင်းမြစ်များ

Jó 15:11

Tupàn ipurumurywete kar wer nerehe. Màràzàwe tuwe nereputar kwaw nemurywete kar àwàm. Uruze'egatu uruiko newe her rehe.

Jó 19:8

Tupàn uwàpytym herape ràm pàrirogaw pupe a'e. A'e rupi napuner kwaw a'e pe rupi heho haw rehe. Upyk herape ipytunaw pupe.

Jó 5:17

Aze Tupàn umume'u amo hemiapo kwer ikatu 'ym ma'e izupe nehe, hurywete a'e teko a'e nehe. A'e rupi, eze'eg zemueteahy zo Tupàn upuner wera'u ma'e purehe izepykaw rehe nehe.

Salmos 118:5

Ma'erahy ipuraraw mehe aze'eg Tupàn Tuweharupi Wiko Ma'e pe wahy haw rupi ihe. Uwazar heze'eg ihewe hemuhem kar pà ma'erahy wi a'e.

Salmos 18:19

Hemunyryk ikatu 'ymaw wi. Hepyro ta'e heamutar katu a'e xe.

Salmos 18:20

Tupàn Tuweharupi Wiko Ma'e umekuzar katu putar hereko haw a'e nehe, ta'e aiko imunar 'ym ma'e romo hemu'em 'ym ma'e romo ihe xe. Uzapo ikatu ma'e ihewe, ta'e nazapo kwaw ikatu 'ym ma'e ihe xe.

Salmos 23:5

Erezapo mai'u hawhu ihewe. Heàmàtyry'ymar upuner herexakaw rehe a'e mai'u haw pe wà. Hemuixe kar pe nereminoz imuwete wera'u pyr ài. Eremynehem tuwe hekanek ihewe.

Salmos 31:8

Nahepyhyk kar kwaw pe heàmàtyry'ymar wanupe ne. Hemonokatu pe ikatu 'ymaw wi.

Salmos 36:8

Eremur temi'u tetea'u urewe ne. Ikatuahy a'e temi'u urewe. Nekatu haw nuzawy kwaw yrykaw urewe. Uremui'u kar pe a'e 'y pupe ne.

Salmos 63:5

Ikatu ma'e ihewe neremimur nuzawy kwaw temi'u hete katu ma'e. Uhyk ihewe. A'e rupi amuzàg nekatu haw rehe zegar haw herurywete haw rupi newe ihe.

Salmos 63:6

He'aw mehe, hema'enukwaw nerehe ihe. Amumaw pytun gatu nerehe hema'enukwaw pà.

Isaías 25:6

Xiàw ywytyr rehe Tupàn Tuweharupi Wiko Ma'e uzapo putar mai'u hawhu ywy nànànar wanupe nehe. Werur putar temi'u ikatu wera'u ma'e a'e pe nehe. Werur putar win ikatu wera'u ma'e a'e pe nehe no.

Isaías 55:2

Màràzàwe tuwe pemono penemetarer penemi'u 'ym imekuzar pà. Màràzàwe mehe tuwe pemumaw penemetarer pema'ereko haw hekuzar penemi'u 'ym ime'eg kar pà. Aze peinu heremiapo kar nehe, aze peruzar nehe, Pe'u putar temi'u ikatu wera'u ma'e nehe. Heta putar temi'u hete katu wera'u ma'e peme nehe.

Oséias 2:14

Tupàn uze'eg teko Izaew wanupe kury. — Amume'u putar heremiapo ràm ikatu ma'e kuzà heremiamutar pe nehe. A'e rupi oho putar wi ywyxiguhu pe herupi nehe. A'e pe urehem mehe amume'u putar iamutar haw izupe nehe. — Uruamutar ihe, a'e putar izupe nehe.