Jeremias 9:11 - Tupàn zeꞌeg

¹¹ Uze'eg Tupàn. — Azapo putar Zeruzarez ywytyr ita tetea'u iapo pyrer romo ihe nehe. Awarahu wiko putar a'e pe wà nehe. Tawhu Zuta ywy rehe har uzeapo putar ywyxiguhu romo wà nehe no. Ni amo nuiko kwaw a'e pe wà nehe, i'i Tupàn.

Jeremias 9:11 ပူးပေါင်းရင်းမြစ်များ

Neemias 4:2

Uze'eg uzehe we har wanenataromo, zauxiapekwer Xamari pe har wanenataromo no. — Ma'e 'aw Zutew ikàg 'ym ma'e uzapo waiko wà. Aipo uzapo wi putar tawhu wà nehe. Aze uzuka ma'ea'yr Tupàn henataromo wà, aipo upuner pitài 'ar rehe uma'ereko haw imumaw paw rehe wà. Tàpuz heityk pyrer ukaz paw. Ukaz te ita. Aipo upuner putar tawhu iapo wi haw a'e heityk pyrer ukaz ma'e kwer pupe wà nehe, i'i wanupe.

Salmos 107:43

Aze ma'e kwaw katu har romo ereiko nehe, nema'enukwaw katu ko ma'e rehe nehe. Ezeagaw Tupàn Tuweharupi Wiko Ma'e ipuruamutar katu haw ikwaw pà nehe.

Salmos 44:19

Ne urezuhaw pe urerezar pà àzàg yryhu pe har wainuromo ne. Urerezar pe pytunahy haw inuromo no.

Salmos 79:1

O Tupàn, nerehe uzeruzar 'ym ma'e wixe neywy rehe wà. Umuaiw neràpuzuhu imonokatu pyrer wà no. Weityk tàpuz Zeruzarez pe har paw wà no.

Isaías 13:22

Zawar hehaite ma'e ien her ma'e wà nehe, awara wà nehe no, Uze'eg putar tàpuzaiha pupe wà nehe, tàpuzuhu pupe wà nehe no. Mawiron i'ar uhem wà iko. Na'iàrew kwaw kury, i'i Tupàn Tuweharupi Wiko Ma'e.

Isaías 25:2

Erezuhazuhaw ureàmàtyry'ymar waneko haw tawhu ne wà. Ereityk tawhu pàrirogawaiha hereko har wà no. Eremumaw wanàpuzuhu wà. Teko nuzapo wi pixik kwaw a'e tàpuzuhu wà nehe kury.

Isaías 34:13

Xu 'yw hezuz putar teko hemetarer katu ma'e wanàpuzuhu wapupe nehe. Ka'a uzeapo putar tàpuztàtà wazar romo nehe no. Awara oho putar Enom ywy rehe wiko pà wà nehe. Wiranu oho putar a'e ywy rehe wiko pà wà nehe no.

Isaías 44:26

Amuzeapo kar ma'e heremiruze'eg ize'eg awer rupi katete ihe. Ma'e uzeapo putar heze'eg imume'u har wanemimume'u kwer rupi katete a'e wà nehe. — Teko wiko wi putar Zeruzarez tawhu pe wà nehe, a'e wanupe. — Teko uzapo wi putar tawhu Zuta ywy rehe har wà nehe, a'e wanupe. Amupu'àm kar putar tawhu imumaw pawer 'aromo nehe.

Jeremias 1:15

Aenoz putar teko kwarahy heixe haw awyze har kutyr har paw wamuwà ihe wà nehe. Wanuwihawete uhem putar xe a'e wà nehe. Umuapyk putar wenaw Zeruzarez tawhu hukenaw henataromo wà nehe, ipàrirogawtàtà ma'e izywyr wà nehe no, amo tawhu Zuta ywy rehe har waiwyr wà nehe no.

Jeremias 10:22

Pezeapyaka katu nehe. Uhem ze'eg herur pyrer kwez kury. Teko amo ywy kwarahy heixe haw awyze har kutyr har uzemuàgà'ymahy waiko amo ma'e rehe wà. Zauxiapekwer a'e wi ur ma'e ràm uzapo putar tawhu Zuta ywy rehe har ywyxiguhu romo a'e wà nehe, awarahu waneko haw romo a'e wà nehe, a'e wanupe.

Jeremias 16:10

A'e ma'e teko wanupe imume'u mehe nehe, upuranu putar nerehe wà nehe. — Màràzàwe tuwe Tupàn uzepyk putar urerehe nezewe a'e nehe, i'i putar newe wà nehe. — Ma'enugar iaiw ma'e uruzapo ure. Ma'enugar ikatu 'ym ma'e uruzapo Tupàn Tuweharupi Wiko Ma'e urezar ikutyr ure, i'i putar newe wà nehe.

Jeremias 25:11

Amumaw putar ko ywy paw rupi ihe nehe. — Iaiw, i'i putar teko hexak mehe wà nehe. Mawiron wanuwihawete umumaw putar 70 kwarahy teko paw wazar romo wiko pà nehe.

Jeremias 25:18

Teko Zeruzarez pe har wà, Zuta ywy rehe har wà no, wanuwihawete wà, wanuwihaw wà no, paw rupi u'u wà. I'u re waiwy uzeapo ywyxiguhu romo. — Iaiw, i'i teko hexak mehe wà. Ukyzeahy hexak mehe wà. Ze'egaiw purehe imono mehe teko umume'u a'e ma'e her wà. Ko 'ar rehe nezewe hekon a'e no.

Jeremias 26:18

— Ezeki Zuta ywy rehe har wanuwihawete romo heko mehe Tupàn ze'eg imume'u har Mikez her ma'e Morezet pe har umume'u Tupàn Tuweharupi Wiko Ma'e upuner wera'u ma'e ize'eg teko wanupe a'e. Na'aw a'e ze'eg xe. — Zeruzarez uzeapo putar ywytyr ita iapo pyrer romo nehe. Uma'ereko ma'e uwykawyka putar Xiàw ywytyr ko ài wà nehe. Tàpuzuhu henaw uzeapo putar ka'a romo nehe, i'i.

Jeremias 26:9

Tupàn uze'eg nezewe a'e, ere urewe. — Kwehe mehe amumaw Xiro taw ihe. Amumaw putar 'àg tàpuzuhu nezewegatete ihe nehe no. Amumaw putar 'aw tawhu ihe nehe no. Ni amo nuiko kwaw ipupe wà nehe, ere urewe Tupàn her rehe. Màràzàwe tuwe ereze'eg nezewe, i'i ihewe wà. Na'e teko uzemono'og heywyr tàpuzuhu huwake katu pe wà kury.

Jeremias 34:22

Aze'eg putar peàmàtyry'ymar wanupe nehe. Na'e uzewyr putar wà nehe. Uzàmàtyry'ym putar tawhu ipyhyk pà tata pupe imumaw pà wà nehe. Tawhu Zuta ywy rehe har azapo putar ywyxiguhu teko heta 'ymaw romo ihe wà nehe.

Jeremias 4:27

— Ywy paw uzeapo putar ywyxiguhu romo nehe, i'i Tupàn. Nezewe rehe we numumaw kwaw paw rupi nehe.

Jeremias 44:2

Tuweharupi wiko ma'e upuner wera'u ma'e Izaew wazar uze'eg nezewe a'e. — Pexak iaiw haw Zeruzarez rehe heremimu'ar kwer, amogwer tawhu Zuta ywy rehe har wanehe heremimu'ar kwer no. Te kutàri upyta heityk pyrer romo. Ni amo nuiko kwaw wapupe wà.

Jeremias 49:33

Azor uzeapo putar ywyxiguhu romo nehe. Nuzeapo pixik kwaw ywy ikatu ma'e romo nehe. Teko nuiko kwaw a'e pe wà nehe. Xo awarahu zo wiko putar a'e pe wà nehe.

Jeremias 50:3

Amo teko kwarahy heixe haw awyze har kutyr har ur Mawiron iàmàtyry'ym pà wà. Mawiron uzeapo putar ywyxiguhu romo nehe. Teko wà, ma'ea'yr wà no, uzàn putar oho a'e wi wà nehe. Ni amo nuiko kwaw a'e pe wà nehe.

Jeremias 51:37

Na'e Mawiron wiko putar ywytyr ita iapo pyrer romo nehe. Miar ipuruzukaiwahy ma'e wiko putar a'e pe wà nehe. Teko ukyzeahy putar hexak mehe wà nehe. Ni amo nuiko kwaw a'e pe wà nehe. Mawiron rehe ume'e ma'e paw ukyze putar wà nehe. Ta'e ukwaw putar a'e pe uzeapo ma'e kwer a'e wà xe.

Jeremias 8:22

Aipo naheta kwaw muhàg Zireaz pe kury. Aipo naheta kwaw muhàg kwaw par a'e pe. Heta. Màràzàwe tuwe numukatu kar kwaw heànàm wà.

Lamentações de Jeremias 1:4

Xiàw piarer uzemumikahy wà. Ta'e naheta kwaw wanupi mynykaw Tupàn imuwete haw pe wata ma'e wà xe. Kuzàwaza Tupàn Hàpuzuhu pupe uzegar ma'e uzemumikahy wà. Xaxeto ikuhem tuweharupi wà. Tawhu upuraraw ma'erahy tuweharupi. Naheta kwaw teko ipupe nahu rupi katu pe uzemono'og ma'e ràm wà.

Lamentações de Jeremias 2:2

Zanezar umumaw tawhu Zuta ywy rehe har paw a'e wà, purupuhareko 'ym pà a'e. Wekwahy haw pupe umumaw hàpuztàtà paw rupi wà. Weityk Zuta ywy rehe har ywy rehe ikàg 'ym ma'e romo wamuigo kar pà wà, wanuwihaw wanehe we wà.

Lamentações de Jeremias 3:47

Uruiko urekyze haw myter pe, ikatu 'ymaw inuromo, iaiw haw ipupe, uremumaw paw inuromo.

Levítico 26:32

Amuaiw putar ywy peneko haw nehe. Peàmàtyry'ymar peywy rehe wiko ma'e ràm ipytuhegatu putar hexak mehe wà nehe.

Miquéias 1:6

A'e rupi Tupàn Tuweharupi Wiko Ma'e uze'eg nezewe. — Azapo putar Xamari tawhu ma'e heityk pyrer ywytyr romo iapo pyrer romo kaiwer rehe har romo ihe nehe. Azapo putar tupawer uwà tyw romo nehe. Aruwaruwak putar itahu tawhu parer ywytyr wi nehe. Aexak kar putar ita tàpuz Xamari pe har wype har ywy rehe ihe wà nehe.

Miquéias 3:12

Penemiapo kwer iro Tupàn pe. A'e rupi Zeruzarez uzeapo putar ita tetea'u ywytyr romo iapo pyràm romo nehe. Teko weruwaruwak putar ywy Xiàw ywytyr rehe har wà nehe, wyzài ma'etym àwàm ài wà nehe. Tupàn Hàpuzuhu renaw uzeapo putar ka'a romo nehe no.

Miquéias 6:16

A'e ma'e paw uzeapo putar nehe, ta'e pezapo iaiw ma'e tuwihawete Oniri ài pe xe, ta'yr tuwihawete Akaw ài pe no xe. Pezapo ma'e peho peiko waze'eg awer rupi katete. A'e rupi amumaw putar Zeruzarez tawhu nehe. Teko amo ae ywy rehe har paw upuka putar a'e tawhu pe har wanehe wà nehe. Teko paw uze'eg zemueteahy putar penehe wà nehe.

Deuteronômio 29:23

Peywy uzeapo putar ywyxiguhu romo nehe. Ywyzu ukaz ma'e upyk putar nehe. Xa upyk putar nehe no. Naheta kwaw ma'etymaw nehe. Napemono'og kwaw arozràn nehe. Ni amo ka'akyr nahezuz kwaw a'e pe nehe. A'e ywy nuzawy kwaw tawhu Tupàn Tuweharupi Wiko Ma'e hemimumaw kwer nehe. Wikwahy wanupe a'e, a'e rupi umumaw wà. Na'aw waner xe wà: Xotom, Komor, Anima, Zemoim.

Apocalipse 18:2

Uze'eg uhapukaz pà kury. — Mawiron tawhu upaw kwez kury, i'i ihewe. — Teko nuiko kwaw a'e pe a'e wà kury. Xo àzàg zo a'e wà, xo tekwe ikatu 'ym ma'e zo a'e wà, xo Zurupari hemiruze'eg zo wiko a'e pe a'e wà kury. Wiràmiri iaiw ma'e inem ma'e zo wiko a'e pe a'e wà no, i'i ihewe.