Jeremias 49:29 - Tupàn zeꞌeg

²⁹ Pepyhyk wanàpuzràn nehe, waneimaw pe wà nehe no, pàn wanàpuzràn huken rehe imuzaiko pyrer nehe no, wanàpuzràn pupe har paw nehe no. Pepyhyk waneimaw kawaru kupewa'a pe wà nehe, nezewe peze'eg pà nehe: Teko ywy nànànar ukyze wà, peze wanupe nehe.

Jeremias 49:29 ပူးပေါင်းရင်းမြစ်များ

Gênesis 37:25

A'e re wapyk tyky'yr umai'u pà wà. A'e 'ar mehe we wexak amo teko wata ma'e a'e pe wakwaw mehe wà. Izimaew izuapyapyr romo wanekon wà. Zireaz ywy wi wanur wà, Ezit ywy rehe oho pà wà. Weraha kàpuhàg tetea'u oho weimaw kamer wakupe pe wà. Weraha amo ma'e taz zàwenugar tetea'u uzeupi wà no.

Jó 1:3

Heta tetea'u heimaw wà: 7.000 àràpuhàràn hawitu ma'e wà, 3.000 kawaru kupewa'a kamer her ma'e wà, 1.000 tapi'ak wà, 500 zumen wà. Heta tetea'u uma'ereko e ma'e izupe wà no. Wiko awa hemetarer katu wera'u ma'e romo awa kwarahy ihemaw kutyr har paw wanuwi.

Salmos 120:5

Peinuromo hereko haw upuraraw kar ma'erahy ihewe Mezek ywy rehe hereko haw ài, Kenar ywy rehe hereko haw ài.

Salmos 31:13

Aenu heàmàtyry'ymar wanewowo mehe ihe wà. Teko heruwake har tetea'u umume'u hezuka àwàm waiko wà. Umume'u hereityk àwàm uzeupeupe wà. — Ma'e zapuner iapo haw rehe izuka pà nehe, i'i uzeupeupe wà.

Isaías 13:20

Mawiron uzeapo putar teko heta 'ymaw romo nehe. Ni amo nuiko wi pixik kwaw a'e pe wà nehe. Teko Ar her ma'e wata ma'e numuapyk pixik kwaw wàpuzràn a'e pe wà nehe. Ni amo àràpuhàràn hawitu ma'e wamono'ogar nueraha pixik kwaw weimaw a'e pe wapoz pà wà nehe.

Isaías 60:7

Teko werur putar àràpuhàràn hawitu ma'e Kenar ywy wi wà nehe, Nawaiot ywy wi wà nehe no. Uzuka putar weimaw wanapy pà ma'ea'yr hapy haw rehe Tupàn henataromo wà nehe. Omono putar izupe imurywete kar pà wà nehe. Tupàn Tuweharupi Wiko Ma'e umupuràg eteahy wera'u putar wàpuzuhu ipuràg ma'e a'e nehe no.

Jeremias 10:20

Umumaw putar ureràpuzràn wà nehe. Ureràpuzràn ihàm ohok a'e. Urera'yr uhem oho wà. Paw rupi oho xe wi wà. Nupyta kwaw teko ureràpuzràn imupu'àm wi àràm wà. Naheta kwaw amo pànuhu imuzaiko àràm wà no, i'i wà.

Jeremias 4:20

Iaiw haw tetea'u ur. Umumaw ywy paw rupi wà. Na'arewahy umumaw zanereko haw tàpuzràn wà. Umu'i pàn tàpuz pupe imuzaikaw pyrer wà.

Jeremias 46:5

Ma'e aexak teko ihe, i'i Tupàn. Ezit ywy rehe har uzàn ukyze pà wà. Uzàn wà, ta'e ukyzeahy wà xe. Uzàn na'arewahy wà. Nume'e kwaw waikwer amo wà nehe.

Jeremias 49:24

Teko Namaz tawhu pe har na'ikàg kwaw wà. Uwak uzàn pà wà ta'e ukyze katu wà xe. Tynehem ma'erahy pupe wà. Nuzawy kwaw kuzà imemyrahy ma'e wà.

Jeremias 49:5

Ma'ema'e wi amu'ar kar putar purumukyzeahy haw penehe nehe. Paw rupi pezàn putar izuwi nehe. Pezàn putar pezepyro pà màno haw wi nehe. Nupyta kwaw amo zauxiapekwer wamono'ogar romo wà nehe. Ihe Tupàn Tuweharupi Wiko Ma'e upuner wera'u ma'e aiko ko ma'e imume'u har romo ihe.

Jeremias 6:25

Noroho kwaw katu pe tawhu wi nehe. Nuruata kwaw pe rupi nehe. Ta'e ureàmàtyry'ymar wereko puruzuka haw a'e wà xe. Teko paw ukyzeahy wanuwi wà.

Habacuque 3:7

Aexak teko Kuxà ywy rehe har wazeputupytupykahy mehe ihe wà. Aexak teko Minià ywy rehe har wakyze katu mehe ihe wà no.

2 Coríntios 4:8

Amo 'ar mehe ma'erahy tetea'u urupuraraw ure, nurupytu'u kwaw Tupàn pe urema'ereko re ure. — Ma'e xiapo putar nehe kury, uru'e urezeupe. — Zapytu'u Tupàn pe zanema'ereko re nehe, nuru'e pixik kwaw urezeupe. Nuruzemumikahy kwaw ure.

2 Coríntios 7:5

Maxeton ywy rehe urehem ire nurupytu'u kwaw urema'ereko re. Nurupytu'u kwaw ma'erahy ipuraraw ire. Teko ipuruzukaiw urewe wà. Ureàmàtyry'ym wà. — Aipo uzeruzar ma'e xe har upuir putar Tupàn wi a'e wà nehe, uru'e zepe a'e mehe.

Juízes 6:5

Heta tetea'u wà, nuzawy kwaw tukur wà. Werur weimaw tapi'ak wà. Werur wàpuzràn wà no. Heta tetea'u wà. Heta tetea'u waneimaw kàwàruràn kamer her ma'e wanupe no. Teko nupuner kwaw waneta haw ipapar haw rehe wà. Ur ywy imumaw pà wà.

Juízes 7:12

Minià izuapyapyr a'e wà, Amarek a'e wà no, ywyxiguhu rehe har a'e wà no, uhàuhàz ywyàpyznaw rehe upaw rupi tukur tetea'u wazàwe wà. A'e ae wà, waneimaw kamer a'e wà no, heta tetea'u wà. Waneta haw nuzuawy kwaw ywyxig yryhu iwyr har.

Juízes 8:21

Na'e Zema Xaramun uze'eg Zineàw pe wà. — Ne ae ezur urezuka pà nehe, ta'e urezuka àràm nupuner kwaw awa 'ym romo weko haw a'e xe. Xo awaete ikàg ma'e upuner putar urezuka haw rehe nehe, i'i izupe wà. Na'e Zineàw uzuka Zema a'e. Uzuka Xaramun a'e no. Heta amo zahy ha'agaw paw waneimaw kamer wazu'yw rehe. Upyhyk Zineàw a'e ma'e waneimaw wamupuràg eteahy kar haw.

Juízes 8:26

Wexak a'e namipor or iapo pyrer ipuhuz haw wà kury. Heta 30 kir ipuhuz haw. Temetarer tetea'u a'e. Umur amo ae purumupuràg eteahy kar haw tetea'u izupe wà no. Umur kamir ipuwy ma'e izupe wà no. Upyro a'e kamir puku hekuzar katu ma'e Minià wanuwihaw wanuwi wà. Upyhyk Zineàw a'e ma'emupuràg eteahy kar haw kamer wazu'yw rehe har paw no.