Jeremias 48:46 - Tupàn zeꞌeg

⁴⁶ Uzemumikahy teko Moaw izuapyapyr wà. Zauxiapekwer amo ywy rehe har uzuka teko Kemoz imuwete har wà. Weraha wana'yr ipyhyk pyrer romo wà. Weraha wanazyr wà no.

Jeremias 48:46 ပူးပေါင်းရင်းမြစ်များ

1 Reis 11:7

Uzapo kar amo Kemoz imuwete katu haw ywytyr Zeruzarez huwake har kwarahy hemaw kutyr har rehe. Iaiw tuwe Kemoz a'e no. Moaw izuapyapyr wazar romo hekon a'e. Uzapo amo Morok imuwete haw no. Amon wazar iaiw ma'e romo hekon Morok a'e.

2 Reis 23:13

Umuaiw Zuzi amo ma'ea'yr hapy haw no. Tuwihawete Xàrumàw uzapo a'e ma'ea'yr hapy haw wikuwe mehe. Zeruzarez huwake kwarahy hemaw kutyr hin. Ywytyr uri tyw her ma'e huwake kwarahy hemaw awyze har kutyr har kutyr hin. Teko umuwete Atarot tupàn kuzà Xitom pe har wazar iaiw ma'e a'e pe a'e wà. Umuwete Kemoz Moaw wazar a'e pe wà no. Umuwete Morok Amon wazar iro ma'e a'e pe wà no. Umuaiw Zuzi wamuwete haw.

Isaías 16:2

Moaw izuapyapyr wata ko rupi wà. Wata kwe rupi wà no. Yrykawhu Aronon izywyr wata e wà. Nuzawy kwaw wiràmiri wanaity wi imuwewe kar pyrer wà.

Jeremias 48:13

Na'e Moaw izuapyapyr upytu'u putar utupàn Kemoz rehe uzeruzar ire wà nehe. Nuzawy kwaw Izaew wà nehe. Izaew upytu'u utupàn Metew rehe uzeruzar ire wà no.

Jeremias 48:7

Moaw izuapyapyr wà, pezeruzar pekàgaw rehe penemetarer rehe. Ko 'ar rehe peàmàtyry'ymar wiko putar pezar romo a'e wà nehe. Weraha putar tupàn pezar Kemoz her ma'e a'e wà nehe, peywy wi a'e wà nehe. Weraha putar penuwihawete ta'yr wà nehe no, xaxeto penehe we har a'e wà nehe no.

Números 21:29

Pezemumikahy nehe, Moaw ywy rehe har wà. Tupàn ua'u Kemoz imuwete har wà. Pekàzym putar nehe. Tupàn ua'u pezar umuzàn kar zauxiapekwer pemyrypar wà. Omono kar penazyr peàmàtyry'ymar wanupe wà no, umuigo kar Xeom Amohe wanuwihawete pe uma'ereko e ma'e romo wà.

Juízes 11:24

Kutàri pepurupyro wer wi peiko peywy rehe. Tupàn ua'u Kemoz her ma'e pezar a'e, omono amo ywy peme a'e. Pepyta a'e ywy rehe nehe. Tupàn Tuweharupi Wiko Ma'e umur ko ywy urewe. A'e rupi urupyta putar xe ko ywy rehe nehe, ta'e Tupàn upyro ko ywy ureàmàtyry'ym arer wanuwi a'e xe.