Jeremias 48:27 - Tupàn zeꞌeg

²⁷ Moaw, erepuka teko Izaew wanehe. Aipo nema'enukwaw nepuka awer rehe. Ererekoahy Izaew ne wà. Nuzawy kwaw imunar ma'e tetea'u wainuinuromo imunehew pyrer newe wà.

Jeremias 48:27 ပူးပေါင်းရင်းမြစ်များ

Jó 16:4

Aze mo pepuraraw ma'erahy peiko hezàwe, Apuner mo peze'egaw imume'u haw rehe. Azeàkàgmuawawak mo ma'e kwaw katu har ài. Apukamikamik mo heze'eg tetea'u pupe no.

Salmos 44:13

Teko ureywy huwake har wexak neremiaihu pe neremiapo kwer wà. A'e rupi uze'eg zemueteahy urerehe wà. Uze'eg urywahyahy urerehe wà no.

Salmos 64:8

Tupàn umumaw putar a'e teko waze'eg hekuzaromo a'e wà nehe. A'e teko wanexakar uweruwaruwak putar uwàkàg wà nehe, wanehe uze'eg urywahyahy pà wà.

Salmos 79:4

Ywy ko ywy huwake har rehe har uze'eg zemueteahy urerehe wà. Upuka urerehe uze'eg urywahyahy pà wà.

Jeremias 18:16

Uzapo ko ywy iaiw ma'e romo wà. Tuweharupi teko uze'eg zemueteahy putar ko ywy rehe wà nehe. Hupi wata ma'e ràm paw ipytuhegatu putar hexak mehe wà nehe. Weruwaruwak putar wàkàg wà nehe.

Jeremias 2:26

Tupàn Tuweharupi Wiko Ma'e uze'eg kury. — Aze teko upyhyk imunar ma'e wà, imaranugar a'e. Nezewegatete teko Izaew izuapyapyr imaranugar putar wà nehe no. Pe paw rupi nehe: Penuwihawete wà, wana'yr wà, xaxeto penekuzaromo herenataromo har wà, heze'eg imume'u har pepyr har wà.

Lamentações de Jeremias 1:12

Uze'eg nezewe uzeiwyr wata ma'e wanupe wà. — Peme'e urerehe nehe. Aipo heta amo tahy haw urerahy haw zàwenugar. Wikwahy mehe Tupàn Tuweharupi Wiko Ma'e uzepyk urerehe ko ma'erahy ipuraraw kar pà a'e.

Lamentações de Jeremias 1:7

Ko 'ar rehe uzemumikahy ma'e rehe, 'ar ma'erahy ipuraraw paw rehe, Zeruzarez ima'enukwaw wemetarer paw rehe, wemetarer kwehe arer rehe. — Ni amo nur kwaw hepytywà pà a'e wà, i'i u'ar awer rehe ima'enukwaw pà. U'ar wàmàtyry'ymar wapuner haw pe. Iàmàtyry'ymar upuka hehe i'ar mehe wà.

Ezequiel 25:8

Zanezar Tuweharupi Wiko Ma'e uze'eg kury. — Zuta wiko amogwer ywy rehe har wazàwe wà, i'i Moaw wà.

Ezequiel 35:15

Heywy Izaew uzeapo ywyxiguhu romo. Nerurywete a'e ma'e izeapo mehe. Nezewegatete ywy nànànar hurywete putar nemuaiw awer rehe wà nehe no. Enom ywy ywytyruhu heta haw paw uzeapo putar ywyxiguhu romo nehe. Nezewe mehe teko paw ukwaw putar Tupàn Tuweharupi Wiko Ma'e romo herekuwe haw wà nehe.

Ezequiel 36:2

— Peinu katu pezar Tuweharupi Wiko Ma'e ize'eg nehe, ere wanupe nehe. — Izaew waàmàtyry'ymar uze'eg urywahyahy penehe wà. — Zaiko wi ywytyruhu kwehe arer wazar romo zane, i'i wà.

Ezequiel 36:4

A'e rupi ko 'ar rehe, ywytyr Izaew rehe har wà, peinu katu heze'eg ywytyruhu wanupe har nehe, ywytyr wanupe har nehe, yrykaw wanupe har nehe, ywyàpyznaw wanupe har nehe, ywy imumaw pyrer wanupe har nehe, tawhu teko hereko 'ymaw wanupe har nehe. Peywy huwake har imunar a'e ma'e rehe wà. Uze'eg urywahyahy nerehe wà. Aiko pezar Tuweharupi Wiko Ma'e romo.

Sofonias 2:10

Nezewe azepyk putar wanehe nehe. Ta'e wiko wera'u amogwer wanuwi wà xe. Ta'e uze'eg zemueteahy Tupàn Tuweharupi Wiko Ma'e Ikàg Wera'u Ma'e hemiaihu wanehe wà xe. — Uruityk putar Tupàn hemiruze'eg ure wà nehe, i'i purupe wà.

Sofonias 2:8

Tupàn Tuweharupi Wiko Ma'e Ikàg Wera'u Ma'e uze'eg nezewe. — Aenu Moaw izuapyapyr waze'eg mehe ihe wà. Aenu Amon izuapyapyr waze'eg mehe ihe wà no. Uze'eg urywahyahy heremiaihu wanehe wà. Uze'eg zemueteahy wanehe wà no. — Urupyro putar peiwy nehe, i'i heremiaihu wanupe wà.

Mateus 26:55

Na'e uze'eg a'e pe har nànàn kury. — Perur takihe ra'e, perur ywyràihàg ra'e no, hepyhyk pà ra'e no. Aipo imunar ma'e romo aiko ihe. Aipo a'e rupi hepyhyk pezuwà pe. Tuweharupi aiko pepyr ihe, Tupàn hàpuzuhu pupe ihe. Màràzàwe tuwe nahepyhyk kwaw pe a'e pe.

Mateus 27:38

Na'e uzywàzywà amo mokoz awa amo ae ywyra kanetar rehe a'e wà no, wamupu'àm pà a'e pe Zezuz huwake a'e wà no. Amo pitài iawyze har rehe i'àz a'e, inugwer iahur rehe i'àz a'e no. Ma'e rehe imunar ma'e romo wanekon a'e wà.

Mateus 7:2

Tupàn umume'u putar neremiapo kwer amo 'ar mehe a'e nehe no. Aze pixika'i neremimono amo pe nehe, a'e mehe pixika'i Tupàn hemimur newe a'e nehe no. Aze uhua'u neremimono amo pe nehe, a'e mehe uhua'u putar Tupàn hemimur newe nehe no.