Jeremias 48:12 - Tupàn zeꞌeg

¹² Uhem amo 'ar iko kury. A'e 'ar mehe amono kar putar teko Moaw wanupe ihe nehe. Uzakook putar win ài wà nehe. Ukauka putar hyru win heityk pà ywy rehe wà nehe.

Jeremias 48:12 ပူးပေါင်းရင်းမြစ်များ

Salmos 2:9

Erezuhazuhaw putar ywyràihàg itaper iapo pyrer pupe ne wà nehe. Erezukazuka putar ywy'a ài ne wà nehe, i'i Tupàn ihewe, i'i tuwihawete.

Isaías 16:2

Moaw izuapyapyr wata ko rupi wà. Wata kwe rupi wà no. Yrykawhu Aronon izywyr wata e wà. Nuzawy kwaw wiràmiri wanaity wi imuwewe kar pyrer wà.

Isaías 30:14

Aze ywy'a uzeka, xo ipegegwer zo upyta. Nezewegatete apumumaw kar putar azeharomoete ihe nehe. Ni pitài ywy'a ipehegwera'i na'ikatu kwaw tàtàpyzgwer tata wi henuhemaw romo. Teko nupuner kwaw 'y henuhemaw rehe ytyzuzàmaw wi ipehegwer pupe wà, i'i Tupàn.

Jeremias 14:3

Hemetarer katu ma'e omono kar uma'ereko ma'e 'y hekar kar pà wanupe wà. Oho yzygwar pe wà. Nezewe rehe we nuexak kwaw 'y wà. Weruzewyr y'a ipor 'ym pà wà. Pezupyk peàkàg nehe. Pezemumikahy awyzewyze haw 'ym rehe nehe.

Jeremias 19:10

Na'e uze'eg wi Tupàn ihewe. — Ezukazuka ywy'a awa nerupi ur ma'e kwer wanenataromo nehe, i'i ihewe.

Jeremias 25:34

Pe tuwihaw wà. Peneiheihem nehe. Peiko heremiaihu wanehe uzekaiw ma'e romo. Peneiheihemahy nehe. Pezai'o ywy rehe pewapewak nehe no. Pezuka haw 'ar uhem kwez kury. Pe'ar putar nehe, ta'e pezuka putar àràpuhàràn hexaexak pyrer ài a'e wà nehe xe.

Jeremias 25:9

— Arur kar putar teko kwarahy heixe haw awyze har kutyr har paw rupi ihe wà nehe. Arur kar putar heremiruze'eg Namukononozor Mawiron pe har nehe no. Arur putar a'e teko Zuta ywy rehe har waàmàtyry'ym kar pà wanupe ihe wà nehe, ywy ko ywy huwake har waàmàtyry'ym kar pà wanupe ihe wà nehe no. Amumaw putar paw rupi ihe wà nehe. Nuzeupir pixik kwaw wà nehe. — Iaiw wà, i'i putar teko a'e teko wanexak mehe wà nehe. Ipytuhegatu putar wanexak mehe wà nehe. Ihe Tupàn Tuweharupi Wiko Ma'e aiko ko ma'e imume'u har romo ihe.

Jeremias 48:11

Tupàn Tuweharupi Wiko Ma'e uze'eg a'e kury. — Teko Moaw ywy rehe har wiko uzàmàtyry'ym 'ym pà tuweharupi wà. Ni amo zauxiapekwer nueraha kwaw waiwy wi ipyhyk pyrer romo wà. Moaw nuzawy kwaw win imonokatu pyrer. Teko numumyz kwaw a'e win wà. Nuzakook pixik kwaw hyru wi amo hyru ràm pe wà. Hete katu haw nuhem kwaw izuwi. Tuweharupi ikatu i'u mehe.

Jeremias 48:13

Na'e Moaw izuapyapyr upytu'u putar utupàn Kemoz rehe uzeruzar ire wà nehe. Nuzawy kwaw Izaew wà nehe. Izaew upytu'u utupàn Metew rehe uzeruzar ire wà no.

Jeremias 48:15

Amo zauxiapekwer umumaw putar Moaw wà nehe. Umumaw putar tawhu Moaw ywy rehe har wà nehe no. Uzuka putar kwàkwàmo ikatu wera'u ma'e wà nehe. Ihe tuwihawete ihe, aiko ko ma'e imume'u har romo ihe. Tupàn Tuweharupi Wiko Ma'e Ikàg Wera'u Ma'e herer romo ihe.

Jeremias 48:38

Xo zai'o haw zo heta tàpuz nànàn, katu pe tàpuz huwake no. Ta'e azuhaw Moaw ywy'a iputar 'ym zàwenugar ài ihe xe.

Jeremias 48:8

Ni pitài tawhu nuzepyro kwaw uzemumaw pàwàm wi nehe. Umumaw putar ywyàpyznaw rehe har wà nehe. Umumaw putar ywyapypepaw rehe har wà nehe no. Ihe Tupàn Tuweharupi Wiko Ma'e aiko ko ma'e imume'u har romo.

Naum 2:2

Tupàn Tuweharupi Wiko Ma'e umuzewyr kar putar teko Izaew wakàgaw wapuràg eteahy haw wanupe nehe. Waàmàtyry'ymar weraha teko paw Izaew ywy wi wà, weraha wama'e paw Izaew ywy wi wà no. Ywy nuzawy kwaw ywyra hàkà 'ym ma'e. A'e ywy rehe har ikàg wi putar wà nehe. Wakàg àwàm nuzawy kwaw wakàg awer nehe.