Jeremias 4:18 - Tupàn zeꞌeg

¹⁸ — Zuta, ne ae eremur kar a'e iaiw haw nezeupe ne. Ta'e ereiko ikatu 'ym ma'e romo ne xe. Erezapo iaiw ma'e. Neremiapo kwer werur ko ma'erahy newe. Ukutuk nepy'a. Ihe Tupàn Tuweharupi Wiko Ma'e aiko ko ma'e imume'u har romo ihe, i'i Tupàn.

Jeremias 4:18 ပူးပေါင်းရင်းမြစ်များ

Salmos 107:17

Amo ima'eahy a'e wà, Ta'e uzapo ikatu 'ym ma'e a'e wà xe. Upuraraw ma'erahy ta'e iaiw a'e wà xe.

Provérbios 1:31

A'e rupi pepyhyk putar penemiapo kwer hekuzar nehe. A'e mehe pezemumikahy putar penemiapo kwer rehe nehe.

Provérbios 5:22

Awa iaiw ma'e uzapo ikatu 'ym ma'e a'e. Hemiapo kwer uzeapo ipyhykaw romo. Hemiapo kwer ikatu 'ym ma'e nuzawy kwaw kyhapari pira pyhykaw. Upyhyk wapo arer.

Isaías 50:1

Tupàn Tuweharupi Wiko Ma'e uze'eg wemiaihu wanupe. — Aipo ihe apomono kar peywy wi ihe, awa wemireko wi upuir ma'e ài ihe. Ma'e pe pemonokatu pape hepuir awer imume'u haw. Aipo ihe apume'eg uma'ereko e ma'e romo amo pe henewer haw wamekuzar pà ihe. Nan. Amo pepyhyk peneraha a'e wà, ta'e ikatu 'ym ma'e tetea'u iapo har romo peiko pe xe. Pekatu 'ymaw uhua'u. A'e rupi apomono kar wanupe ihe.

Jeremias 14:16

Umume'u a'e ma'e amo teko wanupe wà. Azuka kar putar a'e teko zeàmàtyry'ymawhu pe ihe wà nehe, ma'uhez hawhu pupe ihe wà nehe no. Zauxiapekwer weityk putar wanetekwer pe rupi Zeruzarez tawhu pupe wà nehe. Naheta kwaw wanetekwer watymar wà nehe. Uzeapo putar wanupe paw rupi nehe: wanemireko wanupe, wana'yr wanupe, wanazyr wanupe. Umekuzar putar ukatu 'ymaw wà nehe.

Jeremias 2:17

Teko Izaew wà, pe ae pezapo ikatu 'ym ma'e pe. A'e rupi a'e ma'e paw uzeapo peme. Aiko Tupàn Tuweharupi Wiko Ma'e pezar romo ihe, hereityk pe. Pe rupi peneraha mehe hereityk pe pe.

Jeremias 2:19

Pekatu 'ymaw ae uzepyk putar penehe nehe. Umume'u putar ikatu 'ym ma'e penemiapo kwer nehe, penehe uzepyk pà nehe, ta'e hereityk pe xe. Aiko Tupàn Tuweharupi Wiko Ma'e pezar romo ihe. Na'ikatu kwaw hereitykaw. Iro hereitykaw. Pekwaw putar iro haw nehe kury. Ihewi pekyze re pepytu'u haw iro a'e no. Pekwaw putar iro haw nehe no. Ihe Tupàn Tuweharupi Wiko Ma'e Upuner Wera'u ma'e aze'eg kwez ihe kury.

Jeremias 26:19

Uze'eg wi tuwihaw wà kury. — Tuwihawete Ezeki a'e, teko Zuta ywy rehe har a'e wà no, aipo uzuka Mikez a'e wà. Nan. Ezeki ukyze Tupàn Tuweharupi Wiko Ma'e wi a'e. Uzeagaw hemimutar iapo pà. Tupàn Tuweharupi Wiko Ma'e uzewyr iaiw haw wanehe imu'ar pyràm wemimume'u kwer wi a'e. Aze xiuka 'aw awa nehe, aipo ximu'ar kar putar iaiw haw zanezehe nehe, i'i wà.

Jeremias 5:19

Teko upuranu putar nerehe wà nehe. — Màràzàwe tuwe Tupàn uzapo a'e ma'e paw a'e, i'i putar newe wà nehe. Eze'eg nezewe wanupe a'e 'ar mehe nehe, Zeremi. — Peityk Tupàn pe. Pemuwete tupàn amo ywy rehe har ko ywy rehe wanerur ire. Ko 'ar rehe pema'ereko putar amo ae ywy rehe har wanupe nehe. Nuiko kwaw peywy rehe har romo wà, ere wanupe nehe, i'i Tupàn.

Jeremias 5:25

Penemiapo kwer ikatu 'ym ma'e a'e, peaiw haw a'e, umunyryk kar a'e ikatu ma'e pewi a'e. Napepuner kwaw a'e katu haw ipyhykaw rehe.

Jeremias 6:19

O ywy, einu katu ma'e nehe. Arur putar iaiw paw 'aw teko wanupe nehe. Ikatu nezewe izeapo àwàm, ta'e nuweruzar kwaw heze'eg a'e wà xe. Hepurumu'e haw nuzawy kwaw heityk pyrer wanupe.

Lamentações de Jeremias 3:15

Tupàn hemynehem temi'u iro ma'e pupe. Hemui'u kar iroahy ma'e pupe no. Napuner kwaw amo iro ma'e i'u wi haw rehe kury.

Ezequiel 39:24

Uzapo iro ma'e herenataromo wà. Iaiw wà. A'e rupi azepyk wanehe waneityk pà ihe.

Oséias 7:2

— Tupàn heharaz putar zaneremiapo kwer ikatu 'ym ma'e nànàn a'e nehe, i'i uzeupeupe wà. Wakatu 'ymaw umàmàn waiwyr wà. A'e rupi napuner kwaw hexak 'ymaw rehe nehe, i'i Tupàn.