Jeremias 30:19 - Tupàn zeꞌeg

¹⁹ Teko a'e pe wiko ma'e uzegar putar hekatu haw imume'u pà wà nehe. Uhapukaz putar urywete haw rehe wà nehe no. Amueta tetea'u kar putar ihe wà nehe. Areko katu kar putar a'e teko amo teko wanupe ihe wà nehe no.

Jeremias 30:19 ပူးပေါင်းရင်းမြစ်များ

Esdras 6:22

Umumaw 7 'ar uzegar hawhu typy'ak imuapiruru kar 'ym pyrer her ma'e iapo pà urywete haw rehe wà. Hurywete tuwe wà. Ta'e Tupàn Tuweharupi Wiko Ma'e uma'ereko Axir wanuwihawete ipy'a pupe a'e xe, Izaew wamyrypar romo imuigo kar pà a'e xe. Upytywà tàpuzuhu iapo wi mehe wà.

Neemias 8:12

Na'e teko paw oho weko haw pe wà. Umai'u urywete pà wà. Ui'u win pupe urywete pà wà no. Ma'e hereko har omono ma'e hereko 'ymar wanupe wà. Ta'e wenu katu Tupàn ze'eg wanupe imugeta pyrer a'e wà xe.

Neemias 8:17

Upyhyk awer wi uzewyr ma'e kwer paw uzapo tàpuzràn wà, ipupe upyta pà wà. Zuzue Nun ta'yr heko mehe arer we teko nuzapo pixik kwaw zegar hawhu tàpuzràn her ma'e wà. Uzapo wà kury. Hurywete paw rupi iapo mehe wà.

Salmos 53:6

Tuwe Tupàn uputar Izaew wapyro àwàm Zeruzarez wi ur ma'e ràm a'e nehe. Zako izuapyapyr hurywete putar wà nehe, Ta'e Tupàn umukatu putar waneko haw a'e nehe xe.

Isaías 12:1

A'e 'ar mehe teko paw uzegar putar nezewe wà nehe. — Amume'u nekatu haw, O Tupàn Tuweharupi Wiko Ma'e. Kwehe mehe erekwahy ihewe. Nekwahy haw upaw kury. Ko 'ar rehe hemurywete kar iko ne.

Isaías 26:15

Ne Tupàn Tuweharupi Wiko Ma'e, uremueta tetea'u wera'u pe ne. Eremuhua'u wera'u ureywy no. A'e rupi teko ukwaw nekàgaw wà kury.

Isaías 27:6

Ywyra ikatu ma'e hapo katu a'e. Na'e hezuz. A'e re iputyr. Na'e i'akatu. Nezewegatete teko Izaew izuapyapyr umynehem putar ywy paw a'e wà nehe no.

Isaías 35:10

Tupàn Tuweharupi Wiko Ma'e hemipyro kwer uzewyr putar weko haw pe wà nehe. Uzewyr putar Zeruzarez pe uzegar pà wà nehe. Wiko putar a'e pe tuweharupi urywete romo wà nehe. Turywete haw nehe, zemumikahy 'ymaw nehe, wainuinuromo wanuz tuweharupi wà nehe. Naheta kwaw zemumikahy haw a'e pe nehe. Teko nuzai'o kwaw a'e pe wà nehe.

Isaías 51:11

Tupàn Tuweharupi Wiko Ma'e hemipyro ràm uzewyr putar weko awer pe wà nehe. Uzewyr Zeruzarez tawhu pe uzegar pà wà nehe. Wiko putar a'e pe tuweharupi urywete pà wà nehe. Turywete haw oho putar wanupi nehe. Wata putar urywete pà wà nehe. Naheta kwaw zemumikahy haw nehe. Nuzai'o kwaw wà nehe.

Isaías 51:3

Ihe Tupàn Tuweharupi Wiko Ma'e apuhareko katu putar Zeruzarez tawhu ihe nehe. Apuhareko katu putar tàpuz ipupe har heityk pyrer paw nehe no. Ywy uxinig ma'e kwer a'e pe har azapo putar ma'etymaw romo nehe. Nuzawy kwaw ma'etymaw En ywy rehe heremitygwer a'e nehe. Heta putar turywete haw a'e pe nehe. Hurywete putar a'e pe har wà nehe. Heta putar zegar haw nehe. Umuzàg putar zegar haw hekatu haw imume'u pà wà nehe.

Isaías 52:9

Zeruzarez heityk pyrer, ezegar nerurywete haw rehe nehe, ta'e Tupàn Tuweharupi Wiko Ma'e upuhareko katu wemiaihu a'e wà xe. Upyro putar Zeruzarez a'e nehe.

Isaías 55:5

Pezapo kar putar ma'e teko amo ae ywy rehe har wanupe nehe kury. Teko penemigwaw 'ym wiko putar peme uma'ereko ma'e romo wà nehe. Uzàn putar wà peneruzar pà wà nehe. A'e ma'e uzeapo putar nehe, ta'e ihe Tupàn Tuweharupi Wiko Ma'e pezar ihe xe, Izaew wazar Ikatuahy Ma'e ihe xe, amono hepuner haw peme ihe xe. Apuereko tuwihaw ài no, i'i Tupàn

Isaías 60:19

Kwarahy nuhyape katu pixik kwaw 'ar romo nehe. Zahy nuhyape pixik kwaw pyhaw nehe, ta'e ihe Tupàn Tuweharupi Wiko Ma'e aiko putar tatainy newe tuweharupi har romo ihe nehe xe. Hepuràg eteahy haw hekàgaw uhyape katu putar nerehe nehe.

Isaías 60:22

Naheta tete kwaw wà kury. Heta tetea'u putar wà nehe. Teko ko ywy rehe har na'ikàg kwaw wà. Ikàg wera'u putar amo teko wanuwi upaw rupi katete a'e wà nehe. Aiko Tupàn Tuweharupi Wiko Ma'e romo ihe. 'Ar ikatu mehe azapo kar putar a'e ma'e paw rupi ihe nehe. Na'iàrew kwaw nehe.

Isaías 60:9

Muite wi a'e kanuhu wanur a'e wà. Uhua'u wera'u ma'e ur amo wanenataromo wà. Werur Tupàn hemiaihu wanereko waiwy rehe wà. Werur itaxig parat wà. Werur itazu or wà no. Wazar omono putar a'e ma'e Tupàn Ikatuahy Ma'e Tuweharupi Wiko Ma'e Izaew wazar pe a'e wà nehe. Tupàn umur ukàgaw upuràg eteahy haw peme a'e. Peiko hemiaihu romo.

Jeremias 17:26

Ur putar tawhu Zuta ywy rehe har wanuwi wà nehe, taw Zeruzarez izywyr har wanuwi wà nehe no, Mezàmi ywy wi wà nehe no, ywytyr heta 'ymaw wà nehe no, ywytyr kwarahy ihemaw awyze har kutyr har wanuwi wà nehe no. Werur putar ma'e hapy pyràm heràpuzuhu pe wà nehe. Werur putar ma'ea'yr izuka pyràm wà nehe no. Werur putar arozràn wà nehe, yhyk zàwenugar wà nehe no, hekatu haw hekuzar ràm wà nehe no.

Jeremias 3:16

A'e ywy rehe teko tetea'u romo peneko mehe ni amo nuze'eg kwaw heze'eg hyru rehe wà nehe. Napeze'eg kwaw heze'eg hyru rehe nehe. Napema'enukwaw kwaw hehe nehe. Napeputar kwaw nehe. Napezapo kwaw amo nehe.

Jeremias 31:27

— Ihe Tupàn Tuweharupi Wiko Ma'e amume'u ko ma'e ihe kury. — Uhem amo 'ar iko kury. A'e 'ar mehe amynehem putar Izaew ywy teko wapupe ihe nehe, ma'ea'yr wapupe ihe nehe no. Amynehem putar Zuta ywy ihe nehe no.

Jeremias 31:4

Amueta tetea'u wi putar heremiaihu ihe wà nehe. Pepyhyk wi putar pema'e ipuipu ma'e nehe. Pepynyk putar penurywete haw rehe nehe no.

Jeremias 33:22

Amueta tetea'u kar putar heremiruze'eg Tawi izuapyapyr ihe wà nehe. Amueta tetea'u kar putar xaxeto Erewi izuapyapyr ihe wà nehe no. Amueta tetea'u kar azeharomoete ihe wà nehe. Teko nupuner kwaw zahytata ywak rehe har wapapar haw rehe wà. Nupuner kwaw ywyxig yryhu izywyr har wapapar haw rehe wà no. Nezewegatete nupuner kwaw a'e teko wapapar haw rehe wà nehe no.

Ezequiel 36:37

Zanezar Tuweharupi Wiko Ma'e uze'eg kury. — Urepytywà pe nehe, i'i putar Izaew ihewe wà nehe, ta'e amume'u kar putar wanupe ihe nehe xe. Amueta tetea'u kar putar a'e teko àràpuhàràn tetea'u imono'og pyrer ài wà nehe.

Ezequiel 37:10

Na'e azapo kar a'e ma'e ywytu pe Tupàn ze'eg rupi kury. Pytuhemaw wixe wanetekwer wapupe. Wikuwe wi wà kury. Upu'àm wà. Teko tetea'u wà. Aze mo uzemono'og wà, uzapo mo zauxiapekwer wamono'ogaw uhua'u ma'e romo wà.

Ezequiel 37:26

Azapokatu putar heze'egaw wanehe we ihe nehe. A'e rupi wiko katu putar tuweharupi a'e ywy rehe wà nehe. Amueta tetea'u kar putar ihe wà nehe. Amono putar heràpuz waiwy rehe nehe. Upyta putar a'e pe tuweharupi wà nehe.

Zacarias 10:8

Aenoz putar heremiaihu ihe wà nehe. Amono'og putar ihe wà nehe. Arur wi putar waiwy pe wà nehe. Waneta àwàm nuzawy kwaw waneta awer nehe.

Zacarias 12:8

A'e 'ar mehe apyro putar Zeruzarez pe har waàmàtyry'ymar wanuwi wà nehe. Wainuromo har ikàg 'ym wera'u ma'e wiko putar ikàg ma'e romo tuwihawete Tawi ài wà nehe. Tawi izuapyapyr oho putar wanenataromo wà nehe. Nuzawy kwaw Tupàn Tuweharupi Wiko Ma'e heko haw pe har wà nehe. Nuzawy kwaw Tupàn wà nehe. Ikàg putar wà nehe. Teko uzeruze'egatu putar wanehe wà nehe.

Zacarias 2:4

Uze'eg Tupàn heko haw pe har ràgypy izupe kury. — Ezàn na'arewahy kwàkwàmo puku haw hagaw paw hereko har pe neze'eg pà kury. — Heta wi putar Zeruzarez pe har wà nehe. Heta tetea'u putar teko a'e pe wà nehe. Heta tetea'u putar ma'ea'yr a'e pe wà nehe no. Teko nupuner kwaw pàrirogaw tàtà ma'e tawhu izywyr har iapo haw rehe wà nehe, ta'e heta tetea'u putar tuwe teko a'e pe wà nehe xe.

Zacarias 8:19

— Kwarahy nànàn pezapo pezekwaku haw pemai'u 'ymaw 4 haw zahy rehe, 5 haw zahy rehe no, 7 haw zahy rehe no, 10 haw zahy rehe no. Pepytu'u nehe kury. Ko 'ar henataromo a'e zahy uzeapo putar mynykawhu romo nehe. Zuta hurywete putar a'e 'ar rehe wà nehe. A'e rupi pezamutar katu ze'eg azeharomoete har nehe. Pezamutar katu zeàmàtyry'ym 'ymaw nehe no, i'i wanupe.

João 17:22

Eremur nekàgaw nepuràg eteahy haw ihewe ne. Nezewegatete amono hekàgaw hepuràgaw kwez wanupe ihe no. A'e rupi wiko putar uzeinuinuromo pitài romo a'e wà nehe no, pitài romo zanereko haw ài a'e wà nehe no.

1 Pedro 1:7

Uzeruzar 'ym ma'e upuraraw kar putar ma'erahy peme a'e wà nehe. Tupàn numupytu'u kar kwaw a'e wà nehe. Ta'e pekàg putar ipuraraw mehe nehe xe. A'e mehe teko uze'eg putar nezewe peme a'e wà nehe. — Uzeruzar tuwe Zezuz rehe a'e wà, i'i putar peme a'e wà nehe. Aze zanepurexak wer ita hekuzar katu ma'e or her ma'e heny katu ma'e ikatu haw rehe nehe, ximupyràn tata pupe nehe. Hepuxi kwer wapyk i'aromo nehe. Xityk izuwi. Upyta xo ikatuahy ma'e zutyka'i nehe. Nezewegatete pezeruzar haw no. Ikatu wera'u a'e ita wi Tupàn pe a'e. A'e rupi xixak putar ikatu haw nehe, aze xipuraraw ma'erahy nehe. Ma'erahy ipuraraw paw a'e, nuzawy kwaw tata a'e. Aze napepytu'u kwaw pezeruzar ire nehe, ma'erahy ipuraraw mehe nehe, napepytu'u pixik kwaw pezeruzar ire nehe. A'e rupi Zezuz Zaneruwihawete purupe izexak kar mehe nehe, a'e 'ar mehe nehe, umume'u putar uzehe pezeruzar katu haw a'e nehe. Peiko putar ikàg ma'e romo ipuràg eteahy ma'e romo a'e 'ar mehe nehe no. Umume'u putar pekatu haw teko wanuwa rupi paw rupi a'e 'ar mehe nehe no. Teko pemuawate katu putar a'e wà nehe.