Jeremias 3:2 - Tupàn zeꞌeg

² Eme'e ywytyr apyr nehe. Ereiko kuzà wyzài romo ywytyr nànàn. Aipo heta we amo ywytyr penemimuaiw 'ym. Pepyta pe iwyr pema'e ime'eg àràm wanàro pà. Awa Àràw ywy rehe arer upyta pe iwyr wata ma'e wanàro pà a'e wà. Ta'e imunar wama'e rehe wà xe. Peiko agwer imunar ma'e wazàwe. Pemuaiw Izaew ywy kuzà wyzài wazàwe peneko haw pupe, iaiw ma'e penemiapo kwer pupe.

Jeremias 3:2 ပူးပေါင်းရင်းမြစ်များ

Gênesis 38:14

A'e rupi Tamar umunehew amo wopoz oho kury, wopoz umen umàno ma'e kwer rehe uzai'o haw rehe har hezar pà imonokatu pà kury. Upyk uwa amo pàn pupe. Nezewe teko nukwaw kwaw a'e wà. A'e re wapyk oho Enaim tawhu pe heixe haw huwake kury. Ximinat piar rupi tuz. — Xera wiko awa tua'u ma'e romo a'e kury. — Ereko Tamar neremireko romo nehe, ni'i kwaw Zuta izupe rihi. Nuzapo kwaw ma'e uze'eg awer rupi a'e, i'i in uzeupe.

1 Reis 11:3

Wereko 700 tuwihawete wanazyr wemireko romo wà. Wereko 300 kuzà wemirekoagaw romo wà no. Umunyryk kar hemireko Xàrumàw Tupàn wi wà.

2 Reis 23:13

Umuaiw Zuzi amo ma'ea'yr hapy haw no. Tuwihawete Xàrumàw uzapo a'e ma'ea'yr hapy haw wikuwe mehe. Zeruzarez huwake kwarahy hemaw kutyr hin. Ywytyr uri tyw her ma'e huwake kwarahy hemaw awyze har kutyr har kutyr hin. Teko umuwete Atarot tupàn kuzà Xitom pe har wazar iaiw ma'e a'e pe a'e wà. Umuwete Kemoz Moaw wazar a'e pe wà no. Umuwete Morok Amon wazar iro ma'e a'e pe wà no. Umuaiw Zuzi wamuwete haw.

Salmos 106:38

Uzuka kwarer ikatu 'ym ma'e iapo pixik 'ymar kuzàtài ikatu ma'e wanehe we wà. Wa'yr wazyr uzuka tupàn a'ua'u Kànàà ywy rehe har wazar wanupe wà. A'e rupi ywy uzeapo iaiw ma'e romo Tupàn henataromo a'e, ta'e kwarer wanuwykwer kuzàtài wanuwykwer heta hehe a'e xe.

Provérbios 23:28

Nuzawy kwaw imunar ma'e wà. Wàro wemipyhyk ràm wà. Umuigo kar awa tetea'u wemireko 'ym puhe oho ma'e romo wà.

Provérbios 7:11

Uze'egahy a'e. Nuweruzar kwaw tuwihaw ze'eg wà. Tuweharupi wata oho nahu rupi no.

Jeremias 12:12

Ywytyr ywyxiguhu rehe har nànàn uzexak kar awa wà. Uzuka wata ma'e wama'e rehe imunar pà wà. Amono kar zeàmàtyry'ymawhu ywy rehe imumaw kar pà paw rupi ihe. Ni amo nupuner kwaw zeàmàtyry'ym 'ymaw rehe weko haw rehe wà.

Jeremias 2:20

Tupàn Tuweharupi Wiko Ma'e uze'eg kury. — Teko Izaew izuapyapyr wà, kwehe mehe pepytu'u hereruzar ire. Napepureruzar wer kwaw herehe. Napepurumuwete wer kwaw herehe no. Ywytyr aiha ma'e nànàn, ywyra u'àgaw hereko har nànàn, pe'aw kuzà wyzài wapuhe tupàn a'ua'u wamuwete pà.

Jeremias 2:23

— Nuruzapo kwaw ikatu 'ym ma'e ure, napepuner kwaw peze haw rehe. — Nurumuwete pixik kwaw tupàn Ma'aw her ma'e ure, napepuner kwaw peze haw rehe. Pezapo ikatu 'ym ma'e ywyàpyznaw pupe. Pema'enukwaw katu penemiapo kwer rehe nehe. Peme'e penemiapo kwer rehe nehe. Peiko kawaru kupewa'a kuzà imupuru'a kar haw 'ar rehe wiko ma'e ài. Uzàn e oho iko kwe rupi a'e.

Jeremias 2:7

Arur ywy ikatu ma'e rehe ihe wà. — Uzutym putar ma'e wà nehe, u'u putar wemipo'o kwer wà nehe, a'e wanupe. U'u putar ma'e a'e ywy rehe har ikatu wera'u ma'e wà nehe no. Nezewe rehe we ur heywy imuaiw pà wà. Uzapo ywy heremimono kwer purumuhuhuk kar haw romo wà.

Jeremias 3:1

Tupàn Tuweharupi Wiko Ma'e uze'eg kury. — Aze awa upuir wemireko wi nehe, aze hemireko weityk umen amo awa hereko pà nehe, imen ipy nupuner kwaw hereko wi haw rehe nehe. Agwer ma'e iapo haw umuaiw Izaew ywy rehe azeharomoete. Pe heremiaihu pe. Peho awa tetea'u wapuhe. Peho kuzà tetea'u wapuhe no. Ko 'ar rehe pezewyr wer ihewe. Ihe Tupàn Tuweharupi Wiko Ma'e aiko ko ma'e imume'u har romo xe ihe.

Jeremias 3:13

— Aiko ikatu 'ym ma'e iapo har romo, ere ihewe nehe. — Azàmàtyry'ym Tupàn Tuweharupi Wiko Ma'e hezar, ere ihewe nehe. — Ywyra u'àgaw hereko har nànàn amuwete katu tupàn a'ua'u amo ywy rehe har ihe wà. Nureruzar kwaw ihe, ere ihewe nehe. Ihe Tupàn Tuweharupi Wiko Ma'e aiko uze'eg ma'e kwer romo, i'i Tupàn. Amume'u ize'eg aha wanupe.

Jeremias 3:21

Ywytyr apyr uzenu wànoànog ma'e iko. Izaew izuapyapyr uzai'o waiko wà. — Nereharaz ureremiapo kwer wi nehe, i'i waiko wà. Ta'e wiko ikatu 'ym ma'e iapo har romo wà xe. Heharaz uzar Tupàn Tuweharupi Wiko Ma'e wi wà.

Jeremias 3:9

Na'imaranugar kwaw. Umuaiw uiwy, ta'e uker umen 'ym puhe a'e xe. Umuwete ita. Umuwete ywyra no.

Jeremias 7:29

Uze'eg wi Tupàn. — Pezai'o nehe, teko Zeruzarez pe har wà. Pemonohok pe'aw heityk pà nehe. Pemuzàg zegar haw purumuzemumikahy kar haw ywytyr apyr nehe. Ta'e ihe Tupàn Tuweharupi Wiko Ma'e aikwahy peme ihe xe. Apuityk kwez ihe kury.

Ezequiel 16:16

Eremupuràg tupàn a'ua'u wamuwete haw neropoz pupe. A'e pe erezemono wyzài awa pe kuzàwyzài ài.

Ezequiel 20:28

Amume'u amo ywy wanupe waneko àwàm romo ihe. A'e pe wanerur mehe wexak ywytyr aiha ma'e wà. Wexak ywyra u'àgaw iapo har wà no. Uzuka ma'ea'yr a'e ywytyr nànàn a'e ywyra nànàn tupàn a'ua'u wanupe wà. Hemuikwahy kar wà, ta'e wapy ma'ea'yr tupàn a'ua'u wanenataromo wà xe. Werur ma'ywa tykwer wanupe imono pyr romo wà no.

Oséias 2:5

Uzemono kuzàwyzài ma'e romo wiko pà. — Aekar putar awa hemen 'ym hepuhe uker ma'e ràm ihe wà nehe, i'i uzeupe a'e, ta'e na'imaranugar kwaw a'e xe. — Hepuhe uker ma'e ràm umur putar heremi'u ràm ihewe wà nehe. Umur putar 'y ihewe wà nehe no. Umur putar heropoz àràpuhàràn hawitu ma'e hawer iapo pyrer ihewe wà nehe. Umur putar heropoz irin iapo pyrer wà nehe no. Umur putar uri kawer ihewe wà nehe. Umur putar win ihewe wà nehe no, i'i pehy iko a'e.

Lucas 16:23

Upuraraw ma'erahy tetea'u tatahu pe wiko mehe. Ume'e ywate. Wexak Àmàrààw a'e pe. Wexak Arazar Àmàrààw huwake iapyk mehe no. Muite a'u wanekon izuwi wà.

Deuteronômio 12:2

Pemuhem kar putar teko a'e ywy rehe har waiwy wi pe wà nehe. A'e re peityk tupàn a'ua'u wazar wamuwete haw imumew pà paw rupi nehe. Umuwete tupàn a'ua'u ywytyruhu rehe wà, ywytyr rehe wà no, ywyra i'àg ma'e iwype wà no. Pemumaw paw rupi nehe.