Jeremias 22:20 - Tupàn zeꞌeg

²⁰ Teko Zeruzarez pe har wà. — Peho Irimano ywy rehe penehapukaz pà nehe. Peho Màxà ywy rehe penehapukazahy pà nehe. Tuwe teko wenu peze'eg mehe wà nehe, Te ywytyruhu Moaw ywy rehe har pe wà nehe. Ta'e zauxiapekwer weityk ywy rehe har penuwake har pemyrypar paw rupi wà xe.

Jeremias 22:20 ပူးပေါင်းရင်းမြစ်များ

2 Reis 24:7

Ezit ywy rehe har nuhem pixik kwaw uiwy wi zauxiapekwer wanupi a'e 'ar ire a'e. Ta'e Mawiron wanuwihawete upyro ywy Ezit wanuwihawete hemipyhyk kwer paw izuwi a'e wà xe. Uzypyrog ywy ipyro pà izuwi Ewparat yrykaw pe. Upyro ywy oho iko te Ezit ywyzaw kwarahy heixe haw awyze har kutyr har pe no.

Isaías 57:13

Pehapukaz putar pepytywà àwàm henoz pà ihewe nehe. A'e 'ar mehe tupàn a'ua'u penemimuwete tetea'u napenenu kwaw a'e wà nehe. Ywytu weraha putar a'e tupàn a'ua'u muite xe wi wà nehe. Pitài ipy haw umukàzym kar putar wà nehe. Herehe uzeruzar ma'e wiko putar ywy heremimume'u kwer rehe wà nehe. Ywytyr ikatuahy ma'e herenaw uzeapo putar waneko haw romo nehe.

Jeremias 2:25

Teko Izaew izuapyapyr wà. Pema'emua'u katu nehe. Nezewe mehe napezepyapi kwaw nehe. Ta'e peata tetea'u amo tupàn a'ua'u wanekar pà pe xe. Pema'emua'u katu nehe. Nezewe mehe pe'az na'ixinigahy kwaw nehe. — Nan, peze peiko. — Nezewe rehe we aha putar tupàn a'ua'u amo ywy rehe har wanekar pà ihe nehe, ta'e azamutar katu ihe wà xe, peze peiko.

Jeremias 2:36

Màràzàwe tuwe peiko e ikatu 'ym ma'e romo. Pepytu'u Axir ywy rehe pezeruzar ire. Nezewegatete pepytu'u putar Ezit ywy rehe pezeruzar ire nehe no.

Jeremias 2:37

Pezewyr Axir wi ikàg 'ym ma'e romo. Nezewegatete pezewyr putar Ezit wi pemaranugar romo nehe no. Pezeruzar amo wanehe. Ihe Tupàn Tuweharupi Wiko Ma'e aityk a'e teko ihe wà. Aze pepyta wainuinuromo nehe, napepyhyk kwaw ikatu ma'e nehe.

Jeremias 22:22

Ywytu umuhàmuhàz putar penuwihaw wà nehe. Zauxiapekwer weraha putar pemyrypar wemipyhyk kwer romo wà nehe. Uzapo putar tawhu peneko awer ikàg 'ym ma'e romo wà nehe, Imaranugar ma'e romo wà nehe no. Ta'e ikatu 'ym ma'e tetea'u pezapo pe xe.

Jeremias 25:9

— Arur kar putar teko kwarahy heixe haw awyze har kutyr har paw rupi ihe wà nehe. Arur kar putar heremiruze'eg Namukononozor Mawiron pe har nehe no. Arur putar a'e teko Zuta ywy rehe har waàmàtyry'ym kar pà wanupe ihe wà nehe, ywy ko ywy huwake har waàmàtyry'ym kar pà wanupe ihe wà nehe no. Amumaw putar paw rupi ihe wà nehe. Nuzeupir pixik kwaw wà nehe. — Iaiw wà, i'i putar teko a'e teko wanexak mehe wà nehe. Ipytuhegatu putar wanexak mehe wà nehe. Ihe Tupàn Tuweharupi Wiko Ma'e aiko ko ma'e imume'u har romo ihe.

Jeremias 3:1

Tupàn Tuweharupi Wiko Ma'e uze'eg kury. — Aze awa upuir wemireko wi nehe, aze hemireko weityk umen amo awa hereko pà nehe, imen ipy nupuner kwaw hereko wi haw rehe nehe. Agwer ma'e iapo haw umuaiw Izaew ywy rehe azeharomoete. Pe heremiaihu pe. Peho awa tetea'u wapuhe. Peho kuzà tetea'u wapuhe no. Ko 'ar rehe pezewyr wer ihewe. Ihe Tupàn Tuweharupi Wiko Ma'e aiko ko ma'e imume'u har romo xe ihe.

Jeremias 4:30

Zeruzarez, Tupàn umume'u nerehe uzepykaw a'e. Màràzàwe tuwe eremunehew kamir ipiràg ma'e. Màràzàwe tuwe eremunehew ita hekuzar katu ma'e. Màràzàwe tuwe eremupinim nereha. Nereko wer ipuràg eteahy ma'e romo. Nezewe rehe we nepuhe oho ma'e kwer upuir newi wà. Ipuruzuka wer nerehe wà kury.

Lamentações de Jeremias 1:19

— Urepytywà pe nehe, uru'e uremyrypar wanupe. Wiko ureàmàtyry'ymar wamyrypar romo wà. Xaxeto a'e wà, tuwihaw a'e wà no, umàno nahu rupi wà wemi'u ràm hekar mehe wà. Na'imàno wer kwaw wà. Hekar mehe zauxiapekwer uzuka wà.

Lamentações de Jeremias 1:2

Umumaw pytun gatu uzai'o pà. Hehaykwer uwyryk huwa rehe. Kwehe mehe heta imyrypar tetea'u wà. Ni pitài nupyta kwaw imurywete kar har romo kutàri wà. Paw rupi weityk wà. Wiko iàmàtyry'ymar romo wà kury.

Ezequiel 23:22

A'e rupi ihe nezar Tuweharupi Wiko Ma'e amume'u ko ma'e newe kury, Oorima. Nepuhe oho ma'e nemuhuhuk kar nerereko wà. Ihe amuikwahy kar putar newe ihe wà nehe. Arur putar nereko haw pe ihe wà nehe. Umàmàn putar neiwyr wà nehe.

Ezequiel 23:9

A'e rupi amono a'e kuzà hemimutar Axir ywy rehe har wanupe ihe. Ta'e Oora uputarahy a'e awa a'e wà xe.

Ezequiel 27:6

Upyhyk ywyra kawar her ma'e Màxà pe har uze'ypykuz haw romo iapo pà wà. Umuhym pin 'yw Xip yrypypo'o pe har ata haw nerehe har romo iapo pà wà. Nemupuràg marupi pupe wà no.

Números 27:12

Tupàn Tuweharupi Wiko Ma'e uze'eg Moizez pe. — Ezeupir ko ywy Amari her ma'e rehe nehe. Exak ywy Izaew wanupe heremimono ràm nehe.

Deuteronômio 32:49

— Eho ywytyruhu heta haw Amari her ma'e ko Moaw ywy rehe har pe nehe. Ezeupir Nemo ywytyr Zeriko tawhu henataromo har rehe nehe. Ywytyr apyr nereko mehe erexak putar Kànàà ywy nehe. Amono putar a'e ywy teko Izaew izuapyapyr wanupe nehe.