Jeremias 2:21 - Tupàn zeꞌeg

²¹ Aputym uwà 'yw heremixamixak kwer ài, uwà 'yw ikatu wera'u ma'e ài. Peme'e pezehezehe nehe kury. Uwà 'yw inem ma'e kwer romo peiko kury. Uwà 'yw ikatu 'ym ma'e romo peiko kury.

Jeremias 2:21 ပူးပေါင်းရင်းမြစ်များ

Gênesis 18:19

Aexak Àmàrààw hezeupe ihe. A'e rupi uzapo kar heremimume'u ràm wa'yr wanupe nehe, uzuapyapyr wanupe nehe no. A'e rupi izuapyapyr uzapo putar ikatuahy ma'e wà nehe, heze'eg iawy 'ym pà wà nehe. Aze weruzar tuwe heze'eg wà nehe, azapo putar heremimume'u kwer upaw rupi katete ihe nehe, ikatuahy ma'e purupe iapo pà Àmàrààw rehe ihe nehe, i'i uzeupe.

Gênesis 32:28

— Amo ae nerer amono putar newe ihe nehe kury. Nereiko kwaw Zako romo ko 'ar henataromo nehe kury. Ereku'apyhyk Tupàn ne. Ereku'apyhyk awa ne wà no, waneityk pà ne wà no. A'e rupi Izaew nerer pyahu romo kury, i'i izupe. (-Uku'apyhyk Tupàn a'e, i'i her zaneze'eg rupi.)

Salmos 44:2

Eremuhem kar teko nemuwete 'ymar ne wà. Eremupyta kar neremiaihu waiwy rehe ne wà, wanekuzaromo ne wà. Umume'u a'e ma'e urewe wà. Erezepyk teko amo ae ywy rehe har wanehe. Eremukàg kar neremiaihu ne wà. Umume'u a'e ma'e urewe wà.

Salmos 80:8

Teko Izaew izuapyapyr wà, nuzawy kwaw ma'e'yw uwà'yw her ma'e wà. Ererur i'yw Ezit ywy wi ne. Eremuhem kar amogwer teko ko ywy wi ne wà. Erezutym uwà'yw waywy rehe.

Salmos 80:9

Eremukatu ywy izupe. Hapo wixe ywy pupe. Uhàuhàz hapo ywy rehe.

Êxodo 15:17

Ereraha putar neremiaihu a'e pe ne wà nehe. Eremuigo kar putar neremiruze'eg ywytyr nema'e rehe ne wà nehe, Ta'e erexak a'e ywytyr nereko haw romo ne xe. Ne ae erezapo a'e neràpuzuhu.

Isaías 1:21

Amo 'ar rehe Zeruzarez tawhu pe har weruzar katu Tupàn a'e wà. Ko 'ar rehe nuzawy kwaw kuzàwyzài wà. Amo 'ar rehe heta tetea'u teko ikatu ma'e iapo har a'e pe wà, imunar 'ym ma'e wà. Ko 'ar rehe xo puruzuka ma'e zo upyta a'e pe wà kury.

Isaías 27:2

A'e 'ar mehe Tupàn Tuweharupi Wiko Ma'e uze'eg putar nezewe nehe. — Pezegar uwà heremitygwer pe har heta tetea'u haw rehe pe nehe.

Isaías 41:8

Tupàn Tuweharupi Wiko Ma'e uze'eg teko Izaew wanupe. — Peiko heremiruze'eg romo. Peiko heremixamixak kwer romo. Àmàrààw hemyrypar izuapyapyr romo peiko.

Isaías 5:4

Azapo ikatu ma'e paw izupe hepuner haw rupi ihe. Màràzàwe tuwe i'a kwer hazahy. Àro uwà hete katu ma'e. Màràzàwe tuwe i'a kwer nahete katu kwaw.

Isaías 60:21

Teko nepupe har wiko ma'e uzapo putar ikatu ma'e a'e wà nehe. Tuweharupi ereiko putar Ywy Imume'u Pyrer izar romo nehe. A'e teko wiko ma'eà'yz heremitygwer ài wà. Hepo pupe azapo ihe wà, ta'e hepurexak kar wer hekàg wera'u haw rehe purupe ihe xe.

Isaías 61:3

Emono tuwihawete waàkàg rehe har Xiàw pupe har uzai'o ma'e wanupe nehe, wamurywete kar pà nehe. Nan kwaw purumuzemumikahy kar haw a'e. Purumurywete kar har a'e. Emono kàpuhàg hyàkwegatu ma'e wanehay kwer hekuzaromo nehe. Emono kamir turywete haw pe har uzemumikahy haw pe har hekuzaromo nehe. Uzapo putar ikatu ma'e a'e wà nehe. A'e teko nuzawy kwaw ywyra Tupàn Tuweharupi Wiko Ma'e hemitygwer wà nehe. Wexak kar putar hekàgaw teko paw wanupe wà nehe. Wexak kar putar hepuràg eteahy haw wanupe wà nehe no.

Jeremias 11:16

— Uri 'yw huwy ma'e, a'e wanupe amo 'ar mehe. Nuzawy kwaw uri 'yw i'a katu ma'e wà. Ko 'ar rehe, amuànoànog putar àmàn ihe nehe. A'e 'ar mehe we apy putar tata pupe huwer rehe nehe, hàkà imonohok pà nehe.

Jeremias 11:17

Ihe Tupàn Tuweharupi Wiko Ma'e Upuner Wera'u Ma'e azutym Izaew Zuta rehe we ma'eà'yz ài ihe wà. Ko 'ar rehe amume'u iaiw haw wanehe i'ar àwàm ihe kury. A'e ae umu'ar kar a'e iaiw haw uzehe wà. Ta'e uzapo ikatu 'ym ma'e wà xe. Heputupyk Ma'aw pe ma'ea'yr wazuka pà wà, i'i ihewe.

Jeremias 5:10

Aze'eg putar waàmàtyry'ymar wanupe nehe. — Peityk wanemitygwer ma'ywa tyw nehe, a'e putar wanupe nehe. Nezewe rehe we namumaw kar kwaw paw rupi nehe. — Pezo'ok a'e ma'ywa 'yw ywy wi nehe, a'e putar wanupe nehe. Ta'e nuiko kwaw hema'e romo a'e wà xe.

Lamentações de Jeremias 4:1

Itazu or uzeapo ipihun ma'e romo azeharomoete a'e. Or ikatuahy ma'e naheny kwaw kury. Ita hekuzar katu ma'e tàpuzuhu pupe arer uhàuhàz nahu za'akaw pe kury.

Ezequiel 15:2

— Awa ta'yr, Aipo pitài uwà i'yw ikatu ywyra ài. Nan. Nezewegatete ka'a uhua'u ma'e ikatu wera'u uwà tyw wi no.

Mateus 21:33

— Pezeapyaka katu amo ma'emume'u haw rehe nehe ty wà, i'i Zezuz teko wanupe. — Nezewe amo ko zar heko awer a'e. Utym ma'ywa uwà her ma'e 'yw oho ko pe a'e. Uzapo pari ko izywyr no. Uzapo itahu ygu'ahu romo, ma'ywa kamikaw romo. Uzapo zuraw iànàgatu ma'e a'e pe ko izywyr a'e no. Ko rehe uzekaiw ma'e uzeupir zuraw rehe a'e wà, ko rehe ume'egatu pà a'e wà. Na'e ko zar wata oho a'e wi amo ywy rehe kury. Wezar awa a'e pe oko rehe wamuzekaiw kar pà wà.

Marcos 12:1

Na'e uze'eg wi Zezuz teko wanupe kury, uma'emume'u pà wanupe kury, wamu'e pà kury. Na'aw ima'emume'u awer. — Amo awa uzutym ma'ywa'yw a'e. Uzapo pari ko izywyr no. Uzapo itahu ygu'ahu romo, ma'ywa kamikaw romo. Uzapo zuraw a'e pe ko izywyr no. Omono kar amo awa a'e pe zuraw rehe wà kury, ko rehe wamume'e kar pà wà kury. Amo 'ar mehe ko zar wata oho a'e wi amo ae ywy rehe a'e kury. Wezar amo awa oko pe wà. — Pezekaiw katu heko rehe nehe, i'i wanupe.

Lucas 20:9

Na'e umume'u amo ma'emume'u haw teko wanupe a'e kury. — Nezewe awa a'e, utym ma'ywa'yw tetea'u oko pe. Na'e umuzekaiw kar amo teko oko rehe a'e wà kury. Na'e oho a'e wi wanuwi. Kwehe hekon amo ywy rehe.

João 15:1

(Amo ae tàpuz me) uze'eg wi Zezuz urewe a'e kury. — Ma'ywa 'yw ài aiko ihe. Heru a'e, ma'ywa 'yw rehe uzekaiw ma'e ài hekon a'e.

Deuteronômio 32:32

Iaiw Xotom tawhu pe har wazàwe wà, Komor tawhu pe har wazàwe wà. Nuzawy kwaw uwà 'yw i'a ma'e wà. I'a kwer na'ikatu kwaw. Iro. Upuruzuka no.

Deuteronômio 4:37

Tupàn uzamutar zaneipy wà. A'e rupi penexanexak a'e. Upuner haw uhua'u ma'e pupe pepyro Ezit ywy wi a'e.

Josué 24:31

Teko Izaew izuapyapyr umuwete Tupàn Tuweharupi Wiko Ma'e Zuzue hekuwe mehe wà. Imàno re umuwete waiko wà no, amo tuwihaw Tupàn Izaew wanupe hemiapo kwer ikwaw par wanekuwe mehe wà no.