Jeremias 15:1 - Tupàn zeꞌeg

¹ Na'e Tupàn Tuweharupi Wiko Ma'e uze'eg ihewe kury. — Aze mo Moizez wiko xe Xamuew rehe we ihewe uze'eg pà wà, napuhareko iwer mo 'aw teko ihe wà. Emono kar 'aw teko xe wi wà nehe. Tuwe ukàzym herenatar wi wà nehe.

Jeremias 15:1 ပူးပေါင်းရင်းမြစ်များ

Gênesis 19:27

Iku'egwer pe Àmàrààw ume'e izi'itahy a'e. Oho Tupàn Tuweharupi Wiko Ma'e pe uze'eg awer pe a'e.

2 Reis 17:20

A'e rupi Tupàn Tuweharupi Wiko Ma'e utyryk Izaew nànàn kury. Uzepyk wanehe. Omono wàmàtyry'ymar wanupe. Iahykaw rehe omono kar uzewi wà.

Salmos 106:23

Wikwahy Tupàn Izaew wanupe. Uze'eg nezewe. — Amumaw putar Izaew paw ihe wà nehe, i'i. Hemiruze'eg hemixak kwer Moizez uze'eg oho henataromo kury. — Ezuka zo ne wà nehe, i'i izupe. A'e rupi nuzuka kwaw wà.

Salmos 99:6

Moizez wiko xaxeto romo Tupàn henataromo Àràw rehe we a'e. Xamuew umuwete katu Tupàn a'e no. Uze'eg Tupàn Tuweharupi Wiko Ma'e pe wà. Uwazar waze'eg wanupe a'e.

Provérbios 14:35

Tuwihawete omono temetarer tetea'u wemiruze'eg ma'e iapo haw ikwaw katu har wanupe wà. Uzepyk ma'e iapo haw ikwaw 'ymar wanehe wà.

Jeremias 10:18

Ta'e Tupàn Tuweharupi Wiko Ma'e pemuhem kar putar ko ywy wi a'e nehe xe. Nezewe mehe pezypyrog putar ma'e ikwaw pà nehe. Ihe Tupàn Tuweharupi Wiko Ma'e aiko ko ma'e imume'u har romo ihe.

Jeremias 11:14

Zeremi, eze'eg zo ihewe 'aw teko wanehe nehe. Enoz zo ma'e wanupe heremimono ràm ihewe nehe. Weko haw zawaiw katu mehe wenoz putar upyro àwàm ihewe wà nehe. Nainu kwaw ihe wà nehe, i'i ihewe.

Jeremias 14:11

Na'e Tupàn Tuweharupi Wiko Ma'e uze'eg ihewe kury. — Epytywà 'aw teko ne wà nehe, ere zo ihewe nehe, i'i ihewe.

Jeremias 14:12

Aze uzekwaku wà nehe, umai'u 'ym pà wà nehe, aze uze'eg tetea'u ihewe wà nehe, nezewe rehe we nainu kwaw ihe wà nehe. Aze uzuka ma'ea'yr herenataromo wà nehe, aze werur arozràn ihewe wà nehe, nezewe rehe we namuawyze kwaw ihe wà nehe. Nan. Azuka kar zauxiapekwer wanupe zeàmàtyry'ymawhu pe ihe wà nehe. Azuka putar ma'uhez hawhu pupe ihe wà nehe, ma'eahy haw tetea'u pupe ihe wà nehe no, i'i ihewe.

Jeremias 15:19

Tupàn Tuweharupi Wiko Ma'e uwazar heze'eg ihewe. — Aze erezewyr nehe, urumuawyze putar ihe nehe. Ereiko wi putar heremiruze'eg romo nehe. Aze eremume'u ikatu ma'e nehe, aze neremume'u kwaw ze'eg ikatu 'ym ma'e nehe, ereiko wi putar heze'eg imume'u har romo nehe. Teko uzewyr putar newe wà nehe. Nezewe rehe we ezewyr zo wanupe nehe.

Jeremias 16:13

A'e rupi apumuhem kar hyahy putar ko ywy wi ihe nehe. Apuityk putar amo ywy rehe nehe. Napekwaw kwaw a'e ywy. Peipy nukwaw kwaw a'e ywy a'e wà no. A'e ywy rehe pemuwete putar amo tupàn pe wà nehe, 'aromo pe wà nehe, pyhaw pe wà nehe no. Ta'e nahekatu kwaw peme ihe nehe xe, ere wanupe nehe, i'i Tupàn ihewe.

Jeremias 16:5

Eixe zo tàpuz me teko uzai'o ma'e wapyr nehe. Ezemumikahy zo nehe. Ezai'o zo amo wanehe nehe. Ta'e ihe namono kwaw heze'egatu 'aw teko wanehe ihe nehe xe. Nuiko kwaw zeàmàtyry'ym 'ymaw rehe wà nehe. Napuruamutar kwaw nehe. Napupuhareko kwaw nehe no. Ihe Tupàn Tuweharupi Wiko Ma'e aiko ko ma'e imume'u har romo ihe.

Jeremias 18:20

Heàmàtyry'ymar umekuzar ikatu ma'e ikatu 'ym ma'e rupi wà. Aipo ikatu nezewe haw. Uhàwykàz ywykwar wà. — Aze ru'u Zeremi u'ar putar ipupe nehe, i'i wà. Nema'enukwaw ko ma'e rehe nehe. Azur newe heze'eg pà wapytywà àwàm henoz pà newe. — Ezepyk zo wanehe nekwahy mehe nehe, a'e newe.

Jeremias 22:28

Na'e aze'eg ihe kury. — Aze ywy'a uzeka, izar weityk. Nuputar kwaw. Aipo Zoaki wiko ywy'a ài. Zauxiapekwer weraha ywy ikwaw pyr 'ym pe ta'yr wanehe we wà. Màràzàwe tuwe weraha wà.

Jeremias 23:39

Azeharomoete apyhyk putar ihe wà nehe. Aityk putar muite hezewi nehe. Kwehe mehe amumaw waipy ihe wà. Amumaw putar tawhu wanupe heremimono kwer ihe nehe no.

Jeremias 35:19

A'e rupi ihe Tupàn Tuweharupi Wiko Ma'e upuner wera'u ma'e Izaew wazar amume'uahy ko ma'e Zonanaw Hekaw ta'yr pe ihe kury. Tuweharupi heta putar amo nezuapyr heremiruze'eg romo a'e nehe, a'e newe kury, i'i izupe.

Jeremias 52:3

Tupàn Tuweharupi Wiko Ma'e wikwahy teko Zuta ywy rehe har wanupe, Zeruzarez pe har wanupe no. A'e rupi weraha kar zauxiapekwer wanupe wanemipyhyk kwer romo wà. Zeneki upytu'u Mawiron wanuwihawete heruzar ire. Uzàmàtyry'ym.

Jeremias 9:19

Peinu teko Xiàw pe har wazai'o mehe pe wà nehe. Uze'eg nezewe wà: — Iaiw zanereko haw kury. Zanemaranugarahy zane kury. Weityk zaneràpuz wà. Zaha putar zaneywy wi nehe kury, i'i wà.

Ezequiel 14:14

Noe a'e, Taniew a'e no, Izo a'e no, aze mo wiko a'e pe wapyr wà, wakatu haw upyro mo a'e na'iruz awa wamàno haw wi a'e wà. Nupyro iwer mo amo teko wà. Ihe pezar Tuweharupi Wiko Ma'e aze'eg kwez kury.

Ezequiel 22:30

Aekar zepe amo pàrirogawtàtà iapo àràm. Aekar zepe amo pàrirogawtàtà u'ar ma'e kwer pe upyta ma'e ràm. Aekar zepe amo ko ywy wi wàmàtyry'ymar imono kar àràm. Aze mo aexak, namumaw iwer mo ko ywy. Naexak kwaw amo.

Oséias 9:15

Uze'eg Tupàn Tuweharupi Wiko Ma'e. — Teko Izaew wakatu 'ymaw paw uzypyrog tawhu Ziwkaw pe a'e. A'e pe azypyrog wanehe heakatuwawahy 'ym pà ihe. Amono kar heywy wi, ta'e uzapo ikatu 'ym ma'e oho waiko wà xe. Ko 'ar rehe ihe nehe, nazamutar kwaw ihe wà nehe kury. Wanuwihaw paw naheputar kwaw uzar romo wà.

Zacarias 3:3

Zuzue upu'àm wi Tupàn heko haw pe har henataromo ukamir imuipiw pyrer imunehew pà.

Deuteronômio 9:26

Nezewe aze'eg izupe. — O Tupàn Tuweharupi Wiko Ma'e. Emumaw zo neremiaihu ne wà nehe. Erexarexak a'e teko kwehe mehe ne wà. Erepyro Ezit wi nepuner haw rupi ne wà no.

Hebreus 9:24

Zaneruwihawete Zezuz a'e, nuiko kwaw tàpuzràn pupe a'e, nuiko kwaw teko wanemiapo kwer pupe a'e. Ta'e a'e tàpuzràn a'e xe, nuzawy kwaw Tupàn heko hawete a'e xe. Zaneruwihawete oho ywate, wixe tuwe Tupàn huwa rupi azeharomoete, zanerekuzaromo uze'eg pà izupe. Wiko tuwe a'e pe kury.

Juízes 5:9

Herurywete Izaew wanuwihaw wanehe ihe. Herurywete zauxiapekwer ipuruàmàtyry'ym wer ma'e wanehe ihe no. Azeharomoete ikatuahy Tupàn Tuweharupi Wiko Ma'e a'e.

1 Samuel 12:19

A'e rupi uze'eg Xamuew pe wà. — Eze'eg Tupàn Tuweharupi Wiko Ma'e pe urerehe kury. Nezewe mehe nurumàno kwaw nehe. Iaiw ma'e tetea'u uruzapo. A'e re urenoz tuwihawete no, amo ae iaiw ma'e iapo pà nezewe, i'i izupe wà.

1 Samuel 12:23

Ihe ihe, napytu'u kwaw penehe heze'eg ire izupe nehe. Aze mo apytu'u, a'e mehe mo ikatu 'ym ma'e azapo mo Tupàn henataromo. Apumu'e putar Tupàn rape ikatu ma'e rupi peho àwàm rehe ihe nehe.

1 Samuel 7:9

Na'e Xamuew uzuka àràpuhàràna'yr hawitu ma'e kury, hapy pà Tupàn pe imono pyr romo kury. — Epytywà Izaew ne wà nehe, i'i izupe. Wenu Tupàn ize'eg. Uzapo heminozgwer.