Jeremias 14:19 - Tupàn zeꞌeg

¹⁹ O Tupàn Tuweharupi Wiko Ma'e, aipo ereityk tuwe Zuta ywy rehe har wà. Aipo teko Xiàw rehe har iro tuwe newe wà. Màràzàwe tuwe urekutuk pe ne. Nurupuner kwaw urekatu haw rehe kury. Uruàro zeàmàtyry'ym 'ymaw. Nezewe rehe we nuzeapo kwaw ikatu ma'e. — Uremukatu putar a'e nehe, uru'e urezeupe. Ur purumukyzeahy haw.

Jeremias 14:19 ပူးပေါင်းရင်းမြစ်များ

2 Crônicas 36:16

Teko upuka Tupàn ze'eg imume'u har wanehe wà. Nuzekaiw kwaw waze'eg rehe wà. Uze'eg urywahyahy wanupe wà. Iahykaw rehe Tupàn wikwahy tuwe wemiaihu wanupe kury. A'e rupi naheta kwaw wapyro haw.

Jó 30:26

Àro herurywete àwàm. Ur iaiw haw ihewe. Àro tatainy. Ur ipytunahy haw ihewe.

Salmos 78:59

A'e ma'e hexak mehe wikwahy Tupàn. Utyryk tuwe wemiaihu wanuwi.

Salmos 89:38

Erekwahy tuwihawete neremixak kwer pe ne. Eretyryk izuwi Nerezekaiw kwaw hehe.

Provérbios 29:1

Aze eremume'u amo hemiapo kwer ikatu 'ym ma'e iapo har pe tuweharupi nehe, aze nezewe rehe we nuzemukatu kwaw nehe, a'e teko u'ar putar iaiw paw pupe na'arewahy nehe. Nupuner kwaw uzepyro haw rehe nehe.

Jeremias 12:7

Uze'eg Tupàn Tuweharupi Wiko Ma'e kury. — Aityk heremiaihu ihe wà. Apuir teko heremixamixak kwer wanuwi no. Amono teko heremimutar katu waàmàtyry'ymar wapo pe ihe wà.

Jeremias 12:8

Teko heremixamixak kwer wiko heàmàtyry'ymar romo zàwàruhu iriàw ka'a pe har ài wà. Uhapukaz hekutyr wà. A'e rupi iro ihewe wà.

Jeremias 15:1

Na'e Tupàn Tuweharupi Wiko Ma'e uze'eg ihewe kury. — Aze mo Moizez wiko xe Xamuew rehe we ihewe uze'eg pà wà, napuhareko iwer mo 'aw teko ihe wà. Emono kar 'aw teko xe wi wà nehe. Tuwe ukàzym herenatar wi wà nehe.

Jeremias 15:18

Màràzàwe tuwe apuraraw wiwi ma'erahy teko ihe. Màràzàwe tuwe hekutuk awer hahy ihewe upytu'u 'ym pà. Màràzàwe tuwe nuke'e kwaw. Aipo napuner kwaw nerehe hezeruzar haw rehe. Aipo ereiko yrykaw kwarahy mehe typaw ma'e ài, a'e izupe.

Jeremias 30:12

Tupàn Tuweharupi Wiko Ma'e uze'eg Zeruzarez tawhu pe kury. — Naheta kwaw imukatu haw 'aw teko wama'eahy haw pe. Waperew nuke'e kwaw.

Jeremias 30:13

Naheta kwaw penehe uzekaiw ma'e wà. Naheta kwaw muhàg peperew pe. Naheta kwaw pemukatu àwàm hàro haw.

Jeremias 51:5

Ihe Tupàn Tuweharupi Wiko Ma'e upuner wera'u ma'e napuir kwaw Izaew wanuwi ihe. Naityk kwaw Zuta ihe wà. Teko Mawiron uzapo ikatu 'ym ma'e herenataromo a'e wà. Aiko Tupàn ikatuahy ma'e Izaew wazar romo ihe.

Jeremias 6:30

— Parat ikatu 'ym ma'e, i'i putar ikatu 'ym ma'e wanupe wà nehe. Ta'e ihe Tupàn Tuweharupi Wiko Ma'e aityk ihe wà xe, i'i Tupàn.

Jeremias 7:29

Uze'eg wi Tupàn. — Pezai'o nehe, teko Zeruzarez pe har wà. Pemonohok pe'aw heityk pà nehe. Pemuzàg zegar haw purumuzemumikahy kar haw ywytyr apyr nehe. Ta'e ihe Tupàn Tuweharupi Wiko Ma'e aikwahy peme ihe xe. Apuityk kwez ihe kury.

Jeremias 8:15

Xiàro zeàmàtyry'ym 'ymaw zane. Nur kwaw ikatu ma'e. Xo purumukyzeahy kar haw zo ur zanewe.

Jeremias 8:22

Aipo naheta kwaw muhàg Zireaz pe kury. Aipo naheta kwaw muhàg kwaw par a'e pe. Heta. Màràzàwe tuwe numukatu kar kwaw heànàm wà.

Lamentações de Jeremias 2:13

Zeruzarez heremiamutar, ma'e apuner newe imume'u haw rehe. Ma'e azapo putar nemurywete kar pà nehe. Ni amo nupuraraw pixik kwaw ma'erahy nezàwe wà. Iaiw haw nerehe u'ar ma'e uhua'u yryhu ài a'e. Mo upuner nepyro àwàm herur haw rehe.

Lamentações de Jeremias 2:22

Eremur kar heàmàtyry'ymar iaiw ma'e ywy nànàn ne wà. Utupàn imuwete haw zàwenugar pe ur wà. O Tupàn Tuweharupi Wiko Ma'e nekwahy haw 'ar mehe ni amo nuzepyro kwaw wà. Ni amo nuikuwe kwaw wà. Amugakwaw hera'yr wamutar katu haw rupi ihe wà. Heàmàtyry'ymar umumaw hera'yr a'e wà.

Lamentações de Jeremias 4:17

Zame'e, te zanekene'o. Xiàro zanepytywà haw. Nuhem pixik kwaw. Zazeruzar teko amo ywy rehe har wanehe. — Zanepytywà putar a'e wà nehe, za'e zepe wanupe. Nupuner kwaw wà.

Lamentações de Jeremias 5:22

Aipo urereityk pe azeharomoete. Aipo urewe nekwahy haw nupaw pixik kwaw nehe. Upaw.

Miquéias 1:12

Marot tawhu pe har wàro upyro àràm waiko ukyze pà wà. Ta'e Tupàn Tuweharupi Wiko Ma'e umur kar a'e iaiw paw Zeruzarez huwakea'i a'e xe.

1 Tessalonicenses 5:3

Kuzà ipuru'a ma'e a'e, nukwaw kwaw umemyrahy haw wi uhem àwàm a'e. — Nahepurupuraraw wer kwaw zepe a'e ma'erahy rehe ihe, i'i putar zepe uzeupe nehe. Nan kwaw pa. Upuraraw putar a'e ma'erahy azeharomoete nehe. Nupuner kwaw uhemaw rehe izuwi nehe. Nezewegatete teko a'e wà nehe no. Nukwaw kwaw ma'erahyhu iahykaw rehe har ihemaw 'ar a'e wà no. — Xo ikatuahy ma'e uzeapo iko zanewe kury, naxipuraraw kwaw ma'erahy zaiko zane kury, i'i putar uzeupeupe wà nehe. Na'arewahy a'e 'ar mehe we uhem putar ma'erahyhu iahykaw rehe har a'e nehe. — Nahepurupuraraw wer kwaw zepe ko ma'erahy rehe ihe, i'i putar zepe uzeupe wà nehe, a'e kuzà ài wà nehe. Nan kwaw pa. Upuraraw putar tuwe a'e ma'erahyhu wà nehe. Nupuner kwaw uhemaw rehe izuwi wà nehe.