Jeremias 10:24 - Tupàn zeꞌeg

²⁴ O Tupàn Tuweharupi Wiko Ma'e, emu'e ureànàm ne wà nehe. Ezepykahy zo wanehe nehe. Ezepyk zo urerehe nekwahy mehe nehe. Aze mo erezepyk urerehe nekwahy mehe, uremumaw pe mo paw rupi.

Jeremias 10:24 ပူးပေါင်းရင်းမြစ်များ

Jó 6:18

Wata haw rehe uzemono'og ma'e ukàzym 'y hekaekar pà wà. Wata oho waiko ywyxiguhu rupi wà. Umàno a'e pe wà.

Salmos 38:1

O Tupàn Tuweharupi Wiko Ma'e, ezepyk zo herehe nekwahy mehe nehe. Ihewe nekwahy mehe, ezepyk zo herehe nehe.

Salmos 6:1

O Tupàn Tuweharupi Wiko Ma'e, emume'u zo heremiapo kwer ikatu 'ym ma'e nekwahy mehe nehe. Herehe ezepyk zo nekwahy haw uhua'u ma'e rupi nehe.

Salmos 6:2

Hepuhareko pe nehe, ta'e nahekàg kwaw ihe xe. Hemukatu pe nehe, ta'e hema'eahy ihe xe.

Isaías 28:28

Arozràn inupànupà mehe nunupàahy kwaw. Nuzukazuka kwaw arozràn. Ukwaw itahu iapu'a ma'e heruwakaw haryw rehe aroz ràn ihaihaw 'ym pà.

Isaías 40:23

A'e ae weityk tuwihawete ikàg ma'e wà. A'e ae umumaw tuwihaw upuner ma'e wakàgaw.

Jeremias 30:11

Aiko putar pepyr pepyro pà ihe nehe. Apumuhàmuhàz ywy nànàn ihe. Amumaw putar a'e ywy paw rupi ihe wà nehe. Napumumaw kwaw nehe. Nezewe rehe we azepyk putar penehe nehe. Penehe hezepyk mehe napuraraw kar wera'u kwaw ma'erahy peme nehe. Ihe Tupàn Tuweharupi Wiko Ma'e aze'eg kwez kury.

Jeremias 46:28

Aiko putar penehe we pepyro pà nehe. Apumuhàz ywy tetea'u rehe ihe. Amumaw putar teko a'e ywy rehe har paw ihe wà nehe. Napumumaw kwaw nehe. Napezepyro kwaw hezepykaw wi nehe. Nezewe rehe we penehe hezepyk mehe nazepykahy kwaw nehe. Ihe Tupàn Tuweharupi Wiko Ma'e aze'eg kwez kury.

Habacuque 3:2

— O Tupàn Tuweharupi Wiko Ma'e. Teko umume'u neremiapo kwer ihewe wà. Akyze katu teko ihe kury. Kwehe mehe erezapo purumupytuhegatu kar haw. Ezapo wi agwer ma'e ko 'ar rehe nehe kury. Nezewe mehe urupuner putar hexakaw rehe ure nehe no. Erekwahy iko ne. Nezewe rehe we urepuhareko pe nehe.