Isaías 9:18 - Tupàn zeꞌeg

¹⁸ Tata wapy ka'a. Wapy xu. Nezewegatete teko wakatu 'ymaw ukaz tata ài. Nuzawy kwaw tata uhua'u ma'e ka'a pe har. Umuzeupir kar tàtàxiner tetea'u.

Isaías 9:18 ပူးပေါင်းရင်းမြစ်များ

1 Reis 16:21

Teko Izaew ywy rehe har uzemuza'aza'ak mokoz pehegwer romo wà kury. Pitài pehegwer uputar Ximini Zinat ta'yr uwihawete romo wà. Inugwer pehegwer uputar Oniri uwihawete romo a'e wà no.

Salmos 37:20

Ikatu 'ym ma'e umàno putar wà nehe. Tupàn Tuweharupi Wiko Ma'e iàmàtyry'ymar ukàzym putar ma'eputyr ka'a pe har ài wà nehe. Tàtàxiner ài ukàzym putar wà nehe.

Salmos 68:2

Umuhàmuhàz tàtàxiner ài wà. Ukàzym tàtàxiner ywytu rehe. Iraity typyràn tata huwake a'e. Nezewegatete ikatu 'ym ma'e upaw Tupàn henataromo wà.

Salmos 83:14

Tata wapy ka'a a'e. Tatareny uhua'u ma'e ukaz ywytyr rehe no.

Isaías 1:31

Teko upuner ma'e nuzawy kwaw ka'a uxinig ma'e wà. Wanemiapo kwer nuzawy kwaw tata pirik ma'e. Tata umumaw putar a'e upuner ma'e a'e wà nehe, wanemiapo kwer inuinuromo a'e wà nehe. Naheta kwaw wapyro àràm wanupe wà nehe.

Isaías 1:7

Peywy iaiw. Tata umumaw tawhu peneko haw wà. Penenataromo amo ywy rehe har umuaiw peywy wà. Naheta kwaw ikatu ma'e a'e ywy rehe kury. Amo ywy rehe har umumaw peywy wà.

Isaías 26:11

O Tupàn Tuweharupi Wiko Ma'e, ereupir nepo teko wanehe nezepyk pà. Nezewe rehe we neàmàtyry'ymar nuzekaiw kwaw nerehe wà. Erezamutar katu neremiaihu ne wà. Amogwer teko wexak putar wamutar katu haw wà nehe. Hexak mehe imaranugar putar wà nehe. Tuwe nekwahy haw wapy a'e teko tata ài wà nehe.

Isaías 27:4

Naikwahy kwaw izupe kury. Hakuir hekwahy haw. Aze xu hezuz imuaiw kar pà nehe, aze ka'a hezuz imuaiw kar pà nehe no, amunyk putar tata xu rehe nehe, ka'a rehe nehe no, wamumaw pà nehe.

Isaías 3:5

Teko paw uzeàmàtyry'ym putar wà nehe. Teko paw imunar putar wapi har ma'e rehe wà nehe. Kwàkwàmo nuzeruze'eg kwaw tua'uhez kwer wanehe wà nehe. Teko ikatu 'ym ma'e uze'eg zemueteahy putar teko imunar 'ym ma'e wanehe wà nehe.

Isaías 30:30

Teko paw wenu putar Tupàn Tuweharupi Wiko Ma'e ize'eg ikatuahy ma'e. Wexak kar putar wekwahy haw ipuruzukaiw ma'e wanupe nehe. Heta putar tata hakuahy ma'e wenataromo har paw hapy har nehe. Heta putar 'y ywy ipykar nehe no. Ywytu ur putar àmàn inuromo nehe. Ita tetea'u ukyr putar àmàn ài nehe. Upir putar uzywa ikàg ma'e teko wanehe uzepyk pà nehe.

Isaías 30:33

Kwehe mehe Tupàn umuàgà'ym tatahu. Wapy putar Axir wanuwihawete ipupe a'e nehe. A'e tatahu ywykwaruhu iànàm ma'e ohoete ma'e pupe hin. Uhyk zepe'aw ukaz ma'e ràm. Tupàn Tuweharupi Wiko Ma'e ipytuhemaw a'e, nuzawy kwaw ywyku'i exopere her ma'e ukaz ma'e uwyryk ma'e a'e. Umunyk putar tata zepe'aw rehe nehe.

Isaías 33:12

Peiko putar tàtàpyzgwer romo nehe. Pekaz putar xu tata pupe heityk pyrer ài nehe.

Isaías 33:14

Xiàw rehe ikatu 'ym ma'e iapo har uryryryryz ukyze haw rehe wà. Ukyze tete wera'u mehe upuranu wà. — Mo upuner a'e tata purapy ma'e huwake weko haw rehe wà. Mo upuner tata ikaz re upytu'u 'ym ma'e huwake weko haw rehe wà, i'i wà.

Isaías 5:24

Tata wapy ka'axinig. Tata heny kwer umumaw ka'api'i. Nezewegatete pekàzym putar upaw rupi nehe. Peiko putar ywyra hapo ipuga ma'e kwer ài nehe. Ywytu weraha ma'eputyr ywyra wi ywyku'i kwer ài a'e. Naperuzar kwaw Tupàn Tuweharupi Wiko Ma'e Ikàg Wera'u Ma'e ize'eg. Napezekaiw kwaw Izaew Wazar Ikatuahy Ma'e hemiapo karer rehe.

Isaías 50:11

Pe tata imunykar wà, pe u'yw ukaz ma'e hereko har wà, pe'ar putar tata penemimunyk pupe nehe. U'yw penemimuàgy'ygwer pekutuk putar pezuka pà a'e wà nehe. Tupàn Tuweharupi Wiko Ma'e umur kar putar ko zepykaw penehe nehe. Ma'erahy iaiwahy ma'e ipuraraw pàwàm penàro iko a'e.

Jeremias 9:3

Tuweharupi ipurumume'u wer temu'emaw rehe wà. Munar haw wiko ko ywy rehe har wanuwihaw romo. Ze'eg azeharomoete har nuiko kwaw wanuwihaw romo. Tupàn Tuweharupi Wiko Ma'e uze'eg kury. — Heremiaihu uzapo ikatu 'ym ma'e amo ikatu 'ym ma'e rehe we wà. Naheputar kwaw wà.

Oséias 13:3

A'e rupi a'e teko ukàzym putar wà nehe. Ywàkun ywytyr rehe har ukàzym kwarahy ihem mehe a'e. Zuwiri ukàzym ku'em mehe a'e. Ywytu weraha ka'api'i uxinig ma'e a'e. Tàtàxiner uhem oho tàpuz wi a'e. Nezewegatete a'e teko ukàzym putar wà nehe no.

Joel 2:20

Amono kar putar tukur muite pewi ihe wà nehe. A'e tukur kwarahy heixe haw awyze har kutyr har wi ur ma'e kwer ihe wà nehe. Tukur amogwer wanenataromo ur ma'e ràm aityk putar Yryhu Umàno Ma'e Kwer her ma'e pupe wà nehe. Tukur amogwer wanaikweromo ur ma'e ràm aityk putar yryhu Mezitehàn pupe wà nehe. Tukur umàno ma'e kwer u'au'ar uzehezehe wà nehe, ywytyr iapo pà wà nehe. Inem putar wà nehe. Ipihe putar wà nehe. Uhua'u ma'e azapo putar ihe nehe. Ta'e ihe Tupàn Tuweharupi Wiko Ma'e azapo ma'e uhua'u ma'e ihe xe.

Joel 2:3

Tukur u'u ma'e paw wà. Tata wapy ma'e a'e. Umumaw ma'e a'e. Tukur nuzawy kwaw tata wà. Wahem 'ym mehe we ywy ikatuahy Tupàn reko haw ài a'e. Xe wi waho re ywy nuzawy kwaw ywyxiguhu. Tukur umumaw ma'e paw wà.

Amós 7:4

Zanezar Tupàn Tuweharupi Wiko Ma'e wexak kar amo ae puahu zàwenugar ihewe kury. Uzemuàgà'ym wemiaihu wanehe tata pupe uzepyk àwàm rehe a'e. Tata umuxinig yryhu ywy iwy pe har. Wapy ma'e itym pyrer paw oho iko wamumaw pà.

Obadias 1:18

Teko Zuta ywy rehe har a'e wà nehe, teko Izaew ywy rehe har a'e wà nehe no, nuzawy kwaw tata a'e wà nehe. Tata wapy ka'akyr a'e. Nezewegatete Izaew umumaw putar Ezau izuapyapyr wà nehe. Ni pitài Enom izuapyapyr nuzepyro kwaw wanuwi wà nehe. Ihe Tupàn Tuweharupi Wiko Ma'e aze'eg kwez ihe kury.

Naum 1:10

Peiko xu tyw ài pe. Peiko ka'akyr uxinig ma'e kwer ài pe no. Tupàn umunyk putar tata penehe nehe. Pekaz putar upaw rupi nehe.

Naum 1:6

Tupàn Tuweharupi Wiko Ma'e ikwahy mehe, ni amo nupuner kwaw upu'àmaw rehe wà. Mo upuner ikwahy haw ipuraraw paw rehe wà. Ikwahy haw uwyryk oho iko tata yrykawhu romo uzeapo ma'e kwer ài. Henataromo itahu uzekazeka wà.

Malaquias 4:1

Uze'eg wi Tupàn Ikàg Wera'u Ma'e kury. — Uhem putar amo 'ar nehe. A'e 'ar mehe wiko wera'u ma'e paw a'e wà nehe, ikatu 'ym ma'e paw a'e wà nehe no, ukaz putar ka'akyr tata pupe ukaz paw ma'e ài a'e wà nehe. Ukaz putar a'e 'ar mehe wà nehe. Upaw putar wà nehe.

Mateus 25:41

Na'e a'e putar heahur rehe har wanupe nehe. — Pehem peho ihewi nehe ty wà, ta'e Tupàn umume'u penehe uzepyk àwàm kwez peme a'e xe. Peho putar tatahu pe nehe. Nuwew pixik kwaw a'e tatahu a'e nehe. Tupàn umuàgà'ym a'e tatahu kwez a'e. Ta'e omono kar putar Zurupari a'e pe a'e nehe no xe. Omono kar putar hemiruze'eg a'e pe a'e wà nehe no xe.

Deuteronômio 32:22

Hekwahy haw ukaz putar tata zàwe nehe. Umumaw putar ywy rehe har paw rupi nehe. Te umàno ma'e kwer wapyta haw wapy putar nehe. Wapy putar ywytyruhu iwy pe har nehe.

Hebreus 6:8

Aze xu itua'u nehe, aze heta tetea'u ka'akyr nehe, upyk putar ma'e itym pyrer nehe. Na'ikatu kwaw itym arer pe nehe. Nezewegatete, aze uzeruzar ma'e oho tuwe waiko Tupàn hape rupi wà nehe, upytu'u 'ym pà wà nehe, a'e mehe Tupàn hurywete putar nehe. Aze upytu'u uzeruzar ire wà nehe, na'ikatu kwaw Tupàn pe wà nehe. A'e ko zar umunyk putar tata xu rehe nehe. Nezewegatete Tupàn omono kar putar uzeruzar 'ym ma'e tatahu pe wà nehe.

Apocalipse 14:11

— Tàtàxin a'e nehe, a'e tata wi uhem ma'e ràm a'e nehe, uzeupir putar oho tuweharupi a'e nehe, awyze har rupi upaw 'ym pà a'e nehe, ta'e nuwew kwaw a'e tata a'e nehe xe, i'i oho iko uwewe pà. — Àzàguhu imuwete katu har a'e wà nehe, hagapaw imuwete katu har a'e wà nehe, her wehàpykà rehe hereko har a'e wà nehe, nupytu'u kwaw a'e ma'erahy ipuraraw ire wà nehe, i'i oho iko uwewe pà.