Isaías 9:17 - Tupàn zeꞌeg

¹⁷ Zanezar nupuhareko kwaw kwàkwàmo wà nehe, nupuhareko kwaw kuzàwaza wà nehe. Nupuhareko kwaw tu 'ym ma'e wà nehe. Nupuhareko kwaw imen umàno ma'e kwer wà nehe, ta'e ni amo nuzeruzar kwaw Tupàn rehe wà xe. Na'ikatu kwaw upaw rupi wà. Uze'eg he'o ma'e ài wà. Nezewe rehe we nahakuir kwaw Tupàn ikwahy haw. Upir wiwi opo wanehe uzepyk pà.

Isaías 9:17 ပူးပေါင်းရင်းမြစ်များ

Jó 15:34

Naheta kwaw izuapyapyr ikatu 'ym ma'e wanupe wà nehe. Tata umumaw putar imunar ma'e wanàpuz nehe no.

Salmos 109:12

Tuwe ni amo teko na'ikatu kwaw izupe wà nehe. Tuwe ni amo nuzekaiw kwaw ta'yr wanehe tazyr wanehe imàno re wà nehe.

Salmos 147:10

Kawaru ikàg ma'e nuiko kwaw Tupàn imurywete kar har romo wà. Zauxiapekwer ukyze 'ym ma'e numurywete kar kwaw Tupàn wà.

Isaías 1:4

Kwa, iaiw a'e teko ikatu 'ym ma'e wà. Tynehem wemiapo kwer ikatu 'ym ma'e pupe wà. Iaiw upaw rupi wà. Iaiw ma'e iapo haw ikatu wanupe upaw rupi. Utyryk Tupàn Tuweharupi Wiko Ma'e wi wà. Weityk Tupàn Ikatuahy Ma'e Izaew wazar wà. Weruwak ukupe kwer izupe wà.

Isaías 10:2

Napezekaiw kwaw hemetarer 'ym ma'e wanehe. Napepytywà kwaw ma'e hereko 'ymar pe wà. Pemunar kuzà imen umàno ma'e kwer wama'e rehe. Pemunar tu 'ym ma'e wama'e rehe.

Isaías 10:4

Zauxiapekwer peneraha putar wemipyhyk kwer romo wà nehe. Pezuka putar zeàmàtyry'ymawhu pe wà nehe. Nezewe rehe we nahakuir kwaw Tupàn ikwahy haw. Upir wiwi opo penehe uzepyk pà.

Isaías 10:6

Azàmàtyry'ym kar amo teko herehe uzeruzar 'ym ma'e a'e tuwihawete pe ihe wà. Aikwahy a'e teko wanupe. — Epyro wama'e paw heraha pà wanuwi nehe, a'e iteko izupe. — Epyropyrog wanehe to'om nahu rupi har ài nehe.

Isaías 13:18

Uzuka putar kwàkwàmo u'yw pupe wà nehe. Uzuka putar kuzàwaza u'yw pupe wà nehe no. Uzuka putar kwarearer wà nehe. Uzuka putar kuzàtàigwer wà nehe no. Uzuka putar pixika'i ma'e wà nehe no. Uzuka putar wapuhareko 'ym pà wà nehe.

Isaías 14:20

Nanetym kwaw amogwer tuwihawete zàwe wà, ta'e eremuaiw neywy ne xe. Erezuka teko neywy rehe har wà. Tuwe ko tuwihawete iaiw ma'e izuapyapyr umàno a'e wà nehe no.

Isaías 24:5

Ywy na'ikatu kwaw Tupàn henataromo a'e, ta'e hehe har na'ikatu kwaw henataromo a'e wà xe. Nuweruzar kwaw Tupàn ze'eg wà. Nuweruzar kwaw hemiapo karer wà. Tupàn uzapokatu uze'eg wanehe we. Teko uhaw a'e ze'eg a'e wà. — Xiruzar a'e ze'eg tuweharupi nehe, i'i kwehe mehe wà. Upytu'u heruzar ire wà.

Isaías 27:11

Ywyràkà uxinig upeupen pà. Kuzà omono'og heraha zepe'aw romo wà. Ko teko nukwaw kwaw ma'e wà. A'e rupi Tupàn zaneapo arer nupuhareko kwaw wà nehe. Uzepyk putar tuwe wanehe nehe.

Isaías 3:8

Zauxiapekwer weityk Zeruzarez imumaw pà wà. Zuta ywy rehe weityk taw paw wà. Teko uzapo ikatu 'ym ma'e wà. Teko umume'u ikatu 'ym ma'e wà. Nezewe mehe nuweruzar katu kwaw Tupàn Tuweharupi Wiko Ma'e wà. Ikàg a'e, Ipuràg eteahy a'e no. Wanemiapo kwer iro henataromo wà.

Isaías 31:2

Tupàn Tuweharupi Wiko Ma'e ukwaw katu ma'e a'e. Ukwaw iaiw paw imur kar haw. Tuweharupi uzapo wemimume'u kwer. A'e rupi wiko putar ikatu 'ym ma'e iapo har wàmàtyry'ymar romo nehe. Wiko putar teko amo teko iaiw ma'e wapytywà har wàmàtyry'ymar romo nehe.

Isaías 31:3

Ezit ywy rehe har nuiko kwaw tupàn romo wà. Xo teko romo zo wanekon wà. Waneimaw kawaru wiko amogwer ma'ea'yr umàno ma'e ràm romo wà. Nuiko kwaw tekwe umàno 'ym ma'e ràm romo wà. Tupàn Tuweharupi Wiko Ma'e opo hupir mehe wanehe uzepyk mehe nehe, a'e paw umàno putar a'e 'ar mehe we wà nehe. Ezit ywy ikàg ma'e a'e, Zuta ywy ikàg 'ym ma'e a'e no. Mokoz u'ar putar umàno pà wà nehe.

Isaías 33:11

Penemiapo kwer hekuzar wera'i ka'axinig ma'e wi. Penemiapo ràm imume'u pyr nuzawy kwaw ity heityk pyrer. Azupy tata ài wamumaw pà wanapy pà nehe.

Isaías 33:12

Peiko putar tàtàpyzgwer romo nehe. Pekaz putar xu tata pupe heityk pyrer ài nehe.

Isaías 40:30

Te kwàkwàmo ikene'o wà. Uzepyapi u'ar pà wà.

Isaías 5:24

Tata wapy ka'axinig. Tata heny kwer umumaw ka'api'i. Nezewegatete pekàzym putar upaw rupi nehe. Peiko putar ywyra hapo ipuga ma'e kwer ài nehe. Ywytu weraha ma'eputyr ywyra wi ywyku'i kwer ài a'e. Naperuzar kwaw Tupàn Tuweharupi Wiko Ma'e Ikàg Wera'u Ma'e ize'eg. Napezekaiw kwaw Izaew Wazar Ikatuahy Ma'e hemiapo karer rehe.

Isaías 5:25

A'e rupi Tupàn Tuweharupi Wiko Ma'e wikwahy wemiaihu wanupe. Upyho opo wanehe uzepyk pà. Ywytyruhu uryryryryz wà. Zauxiapekwer wezar umàno ma'e kwer wanetekwer nahu rupi heityk pyrer ài wà. Nezewe rehe we Tupàn ikwahy haw nupytu'u kwaw. Upyho opo iko wanehe uzepyk àwàm rehe rihi.

Isaías 62:5

Awa wereko kuzà wemireko romo a'e. Nezewegatete neapo arer nerereko putar wemireko romo a'e nehe no. Kuzà umurywete kar umen ràm a'e. Nezewegatete eremurywete kar putar nezar nehe no.

Isaías 65:19

Zeruzarez ikatu putar ihewe nehe. Heremiaihu hemynehem putar turywete haw pupe wà nehe. Teko nuenu pixik kwaw teko wazai'o haw a'e pe wà nehe. Ma'erahy ipuraraw paw rehe teko wanehapukaz haw nuzenu pixik kwaw a'e pe nehe.

Isaías 9:12

Xir ywy kwarahy hemaw kutyr tuz a'e. Pirite ywy kwarahy heixe haw kutyr tuz a'e. Uzurupeka zàwàruhu ài teko Izaew wa'u pà wà. Nezewe rehe we nahakuir kwaw Tupàn ikwahy haw, upir wiwi opo wanehe uzepyk pà.

Isaías 9:21

Manaxe izuapyapyr uzàmàtyry'ym Eparai izuapyapyr oho wà. Eparai uzàmàtyry'ym Manaxe oho wà no. Uzemono'og oho Zuta izuapyapyr wàmàtyry'ym pà wà no. Nezewe rehe we nahakuir kwaw Tupàn ikwahy haw. Upir wiwi opo wanehe uzepyk pà.

Jeremias 18:21

Amuzewyr kar heze'eg ihe kury. Tuwe wana'yr umàno uma'uhez pà wà nehe. Tuwe zauxiapekwer uzuka zeàmàtyry'ymawhu pe wà nehe no. Tuwe wamen umàno kuzà wanuwi wà nehe. Tuwe wamemyr umàno wanuwi wà nehe no. Tuwe awa umàno ma'eahy wi wà nehe. Tuwe zauxiapekwer uzuka kwàkwàmo zeàmàtyry'ymawhu pe wà nehe.

Jeremias 5:1

Zeruzarez pe har wà. Peho nahu rupi nehe. Peme'e ma'e tawhu pupe har paw wanehe nehe. Pexak ma'e peneha pupe nehe. Pekar teko ikatu pe har wà nehe. Aipo pepuner amo ikatu ma'e iapo har hexakaw rehe. Aipo pepuner pitài ikatu ma'e iapo pà uzeagaw ma'e hexakaw rehe. Aze pexak pitài nehe, Tupàn umunàn putar Zeruzarez wanemiapo kwer wanehe uzepyk 'ym pà nehe.

Ezequiel 20:33

Amume'uahy tuwe ko ma'e herekuwe haw rehe, i'i zanezar Tuweharupi Wiko Ma'e. — Apueruze'eg putar hepo itaper iapo pyrer zàwenugar pupe ihe nehe, hepuner haw nànàn ihe nehe no, hekwahy haw nànàn ihe nehe no.

Amós 4:10

Amu'ar kar amo purumuma'eahy kar haw penehe, Ezit pe uzeapo ma'e kwer zàwenugar. Azuka kar kwàkwàmo zauxiapekwer wanupe zeàmàtyry'ymawhu pe ihe wà. Araha kar peneimaw kawaru paw peàmàtyry'ymar wanupe wà. Umàno teko tetea'u wà. Inem wanetekwer wà. Amuhàmuhàz inemaw zauxiapekwer waker haw nànàn no. Nezewe rehe we napezewyr kwaw ihewe. Ihe Tupàn Tuweharupi Wiko Ma'e amume'u ko ma'e teko ihe kury.

Amós 8:13

A'e 'ar mehe te kwàkwàmo ikàg wera'u ma'e, te kuzàwaza ikàg wera'u ma'e iàkàzym putar uiwez pà wà nehe.

Miquéias 7:2

Naheta kwaw ni pitài teko imunar 'ym ma'e hemu'em 'ym ma'e ko ywy rehe wà. Naheta kwaw ni pitài Tupàn heruzar har wà. A'e paw uzeagaw amogwer wazuka pà wà. Pitàitàigatu uzeagaw wapihar zemunehew paw pupe imunehew kar pà wà.

Zacarias 9:17

Ko ywy ikatuahy putar nehe. Ipuràg eteahy putar nehe no. Heta tetea'u putar arozràn i'u pyràm nehe. Heta tetea'u putar win nehe no. Uhyk putar nehe. Kwàkwàmo tua'u putar ikàg ma'e romo ipuràg eteahy ma'e romo wà nehe. Kuzàwaza ihya'u putar ikàg ma'e romo ipuràg eteahy ma'e romo wà nehe no.

Mateus 12:34

Mozaiw zàwe peiko. Iaiw ma'e romo peiko. A'e rupi napepuner kwaw ikatu ma'e imume'u haw rehe. Aze awa ipy'a tynehem ikatu 'ym ma'e pupe a'e nehe, izuru umuhem kar putar a'e iaiw ma'e a'e nehe.

Mateus 16:3

Aze ywak izi'itahy ipiràg ihem mehe, — Ukyr putar àmàn a'e nehe, peze izupe nehe. Pekwaw katu àmàn tur àwàm. Pekwaw katu àmàn tur 'ym àwàm, ywak rehe peme'e mehe. Uzeapo ma'e tetea'u iko kury, iahykaw hexak kar pà purupe kury. Màràzàwe tuwe napekwaw kwaw iahykaw ihem etea'i haw, i'i wanupe.