Isaías 63:9 - Tupàn zeꞌeg

⁹ A'e rupi upyro wanemipuraraw paw wi a'e wà. A'e ae wiko wapyro har romo a'e. Numur kar kwaw weko haw pe har wapyro àràm romo wà. Numur kar kwaw amo wyzài wemiruze'eg. A'e ae uzapo. Uzamutar katu a'e wà. Upuhareko wà no. A'e rupi upyro wà. Tuweharupi nehe, kwarahy nànàn nehe, upyhyk waneraha pà wà.

Isaías 63:9 ပူးပေါင်းရင်းမြစ်များ

Gênesis 48:16

Amo nereko haw pe har hepyro ikatu 'ymaw paw wi a'e. A'e ae nehe, tuwe uzapo ikatu ma'e wanupe nehe no. Tuwe hezuapyapyr umume'u herer uzeupeupe wà nehe. Tuwe ima'enukwaw heràmuz Àmàrààw her rehe wà nehe. Tuwe ima'enukwaw heru Izak her rehe wà nehe no. Tuwe heta tetea'u wana'yr wanupe wà nehe. Tuwe heta tetea'u wazuapyapyr wanupe wà nehe no, i'i Zako Tupàn pe.

Jó 37:23

Nazapuner kwaw Tupàn upuner wera'u ma'e ikwaw paw rehe. Uhua'u ipuner haw. Ikatuahy haw nupaw pixik kwaw. Nuzuka kwaw teko wà.

Salmos 25:22

O Tupàn, epyro neremiaihu Izaew ne wà nehe. Ikatu 'ym ma'e wanupe uzeapo ma'e wi epyro ne wà nehe.

Salmos 78:38

Nezewe rehe we Tupàn upuhareko wemiaihu wà. Numumaw kwaw wà. Umunàn wanemiapo kwer wanuwi uweharaz tà. Tuweharupi umuakuir wekwahy haw a'e. Umumaw wekwahy haw a'e.

Êxodo 14:19

Na'e amo Tupàn heko haw pe har ikàg ma'e a'e, zauxiapekwer Izaew izuapyapyr wanenataromo wata ma'e a'e, uzewyr wanaikweromo a'e kury. Ywàkun upu'àm ma'e a'e, Izaew wanenataromo har a'e, uzewyr wà wanaikwerupi a'e no.

Êxodo 15:13

Erezamutar katu neremiaihu ne wà. A'e rupi ereruze'eg putar neremipyro kwer ne wà nehe. Nekàgaw rupi ereraha putar a'e teko nereko haw ikatuahy ma'e pe ne wà nehe.

Êxodo 19:4

— Pe ae pexak heremiapo kwer Ezit ywy rehe arer. Wyràhu weraha umemyr upepo wamytepe uwewe pà. Nezewegatete apuerur xe Ezit ywy wi ihe, xe heruwake ihe.

Êxodo 33:14

— Ihe ae aha putar nerupi ihe nehe. A'e rupi ereityk putar neàmàtyry'ymar ne wà nehe, ta'e urupytywà putar ihe nehe xe, i'i Tupàn Moizez pe.

Êxodo 33:15

Na'e Moizez uze'eg wi Tupàn pe kury. — Aze nereho kwaw urerupi nehe, uremono kar zo pe xe wi nehe, i'i izupe.

Isaías 43:1

Teko Izaew wà, ko 'ar rehe Tupàn peapo arer uze'eg nezewe kury. — Pekyze zo nehe, ta'e apupyro putar ihe nehe xe. Apuenoz pener rupi ihe. Peiko heremiruze'eg romo.

Isaías 43:4

Amono ywy tetea'u penekuzaromo ihe. Ywy rehe har tetea'u amono penekuzaromo ihe wà, ta'e apuamutar ihe xe. Teko heremiamutar romo peiko. Apumuigo kar putar tuwihaw romo nehe.

Isaías 48:20

Pehem Mawiron tawhu wi nehe. Pezàwehem a'e wi nehe. Penehapukaz penurywete haw rupi ko ze'eg imume'u pà ywy nànànar wanupe nehe. — Tupàn Tuweharupi Wiko Ma'e upyro wemiruze'eg a'e wà, teko Izaew izuapyapyr her ma'e wapyro pà a'e wà, peze purupe nehe.

Isaías 51:10

Eremuxinig yryhu. Eremumaw 'y typya'u ma'e. Erezapo pe yryhu myteromo. Eremono kar teko neremipyro kwer a'e pe rupi ne wà.

Isaías 52:9

Zeruzarez heityk pyrer, ezegar nerurywete haw rehe nehe, ta'e Tupàn Tuweharupi Wiko Ma'e upuhareko katu wemiaihu a'e wà xe. Upyro putar Zeruzarez a'e nehe.

Daniel 6:22

Tupàn hezar umur kar amo weko haw pe har xe a'e. Uwàpytym zàwàruhu wazuru a'e. A'e rupi nahexi'u kwaw wà. Nazapo kwaw ikatu 'ym ma'e Tupàn henataromo ihe xe. Tupàn ukwaw iapo 'ymaw a'e. Nazapo kwaw ni pitài ikatu 'ym ma'e nekutyr ihe no, i'i Taniew tuwihawete pe.

Oséias 1:7

Azamutar wiwi putar Zuta ywy rehe har ihe wà nehe. Ihe Tupàn Tuweharupi Wiko Ma'e nezar ihe, apyro putar Zuta ihe wà nehe. Napyro kwaw zeàmàtyry'ymaw rupi ihe wà nehe. Napyro kwaw u'yw pupe ihe wà nehe. Napyro kwaw takihepuku pupe wà nehe. Napyro kwaw kawaru zeàmàtyry'ymaw pe oho ma'e pupe ihe wà nehe. Napyro kwaw zauxiapekwer kawaru ku'az wata ma'e wapupe ihe wà nehe, i'i Tupàn Tuweharupi Wiko Ma'e Ozez pe.

Joel 2:18

Na'e Tupàn Tuweharupi Wiko Ma'e wexak kar wemiaihu a'e ywy rehe har wamutar haw a'e kury. Upuhareko wemiruze'eg wà.

Zacarias 2:8

Tupàn Ikàg Wera'u Ma'e umur ukàgaw ihewe kury. — Emume'u ko heze'eg teko heremiaihu wanemetarer heraha arer wanupe nehe, i'i ihewe. Nezewe ize'eg. — Heremiaihu waàmàtyry'ymar nuzawy kwaw heàmàtyry'ymar ihewe.

Malaquias 3:1

Nezewe uze'eg Tupàn Ikàg Wera'u Ma'e. — Amono kar putar heze'eg heraha har herenataromo nehe. Umuàgà'ym putar herape ràm ihewe nehe. Pekar pezar ràm peiko. A'e tuwihaw uhem putar na'arewahy wàpuzuhu pe nehe. Ize'eg imume'u àràm penemiàro uhem iko kury. Azapo putar heze'egaw penehe we ihe nehe. Werur a'e heze'egaw iko peme.

Mateus 25:40

Na'e a'e putar wanupe ihe nehe kury. — Azeharomoete ko ma'e amume'u peme ihe. Pezapo agwer ma'e herywyr wanupe, te ikàg 'ym wera'u ma'e wanupe. A'e penemiapo kwer herywyr wanupe arer nuzawy kwaw penemiapo kwer ihewe arer a'e, a'e putar wanupe nehe.

Mateus 25:45

Na'e a'e putar wanupe ihe nehe. — Azeharomoete ko ma'e amume'u putar peme ihe nehe kury. Penekyty'ym agwer ma'e rehe pe, herywyr ikàg 'ym ma'e wanupe pe. Wanupe penekyty'ymaw nuzawy kwaw ihewe penekyty'ymaw, a'e putar wanupe nehe.

Lucas 15:5

Aze erexak nehe, nerurywete putar nehe. Ereupir putar imono neaxi'i rehe nehe.

Atos 12:11

— Ame'e tuwe iteko ra'e pa, hemuhem kar tuwe azeharomoete a'e pa, i'i uzeupe. — Umur kar tuwe Tupàn weko haw pe har kwez ihewe a'e, hepyro pà tuwihaw Ero wi a'e. Ipuruzuka wer herehe a'e. Zutew a'e wà no, a'e rupi katete a'e wà no. Tupàn hepyro kwez wanuwi. Nahezuka kwaw wà nehe, i'i Pet uzeupe.

Atos 7:38

Moizez wiko zaneràmuzgwer wapyr a'e, ywyxig heta haw rehe wazemono'og mehe a'e. Wiko a'e Tupàn heko haw pe har Xinaz ywytyr rehe uze'eg ma'e kwer huwake no. Tupàn umume'u uze'eg purumuigo kar har izupe a'e no. Umume'u zaneipy wanupe a'e no, ta'e Tupàn umume'u kar izupe a'e xe.

Atos 9:4

U'ar Xawru ywy rehe kury. Wenu amo ize'eg mehe. — Xawru, Xawru, màràzàwe tuwe erepuraraw kar ma'erahy ihewe, i'i izupe.

1 Coríntios 10:9

Amo ae 'ar mehe amo wagaw Tupàn a'e pe wà. A'e rupi Tupàn umur kar mozaiw a'e pe wanupe wà. Tuwe naxiagaw kwaw Tupàn nezewe zane nehe.

Deuteronômio 4:37

Tupàn uzamutar zaneipy wà. A'e rupi penexanexak a'e. Upuner haw uhua'u ma'e pupe pepyro Ezit ywy wi a'e.

Tito 2:14

Zezuz a'e, uzemono zanerekuzaromo a'e, uzezuka kar pà a'e. Umàno ikatu 'ym ma'e zaneremiapo kwer hekuzaromo. A'e rupi umunyryk kar ikatu 'ym ma'e zanewi. Zanemukatu uzeupe no. A'e rupi zanepurapo wer tuwe ikatuahy ma'e rehe amogwer wanupe zane kury, Tupàn pe zane no.

Hebreus 2:18

Ywy rehe heko mehe Zurupari uzeagaw zepe ikatu 'ym ma'e iapo kar pà Zezuz pe a'e. Upuraraw Zezuz ma'erahy a'e no. Nuzapo kwaw ikatu 'ym ma'e. A'e rupi ko 'ar rehe upuner teko wapytywà haw rehe nehe kury, aze Zurupari ipurapo kar wer ikatu 'ym ma'e rehe wanupe nehe.

Hebreus 4:15

Nuiko kwaw zanepuhareko 'ymar romo. Zanerereko katu a'e. Zanepuhareko katu a'e, ta'e nazanekàg kwaw zane xe. Ywy rehe heko mehe Zurupari ipurapo wer ikatu 'ym ma'e rehe izupe a'e. Nuzapo pixik kwaw ikatu 'ym ma'e a'e.

Apocalipse 1:5

Zezuz Zaneruwihawete a'e no, umume'u Tupàn ze'eg oho iko purupe a'e no, ko ywy rehe wiko mehe a'e no, iawy 'ym pà a'e no. Umàno, ukweraw wi umàno re no. A'e ràgypy ukweraw umàno re, umàno wi 'ym ma'e romo uzeapo pà zanerenataromo. Zakweraw putar zane nehe no. Ko ywy rehe har waneruze'egar romo hekon putar nehe, wanuwihaw romo hekon putar nehe. Tupàn a'e, a'e 7 heko haw pe har a'e wà no, Zezuz Zaneruwihawete a'e no, tuwe ikatuahy ma'e uzapo peme a'e wà nehe, ikatu 'ym ma'e iapo re pemupytu'u kar pà a'e wà nehe no, ma'erahy ipuraraw pàwàm wi pemunyryk kar pà a'e wà nehe no. Zezuz zaneamutar katu a'e. Umàno zanerekuzaromo. A'e rupi zanepyro zaneremiapo kwer ikatu 'ym ma'e wi.

Apocalipse 5:9

Na'e umuzàg amo ae zegar haw ipyahu ma'e a'e pe a'e wà kury. Ne zutyka'i ne, Erepuner a'e pape ipyhykaw rehe ne, Erepuner hewàpytymawokaw rehe ne. Ta'e nezuka a'e wà xe. Nemàno haw rupi eremekuzar teko Tupàn pe ne wà, wapyro pà ne wà. Erepyro amo tenetehar ne wà. Erepyro amo àwà ne wà no, Erepyro amo karaiw ne wà no. Nezewegatete erepyro teko tetea'u ne wà no. Erepyro amo ze'egete rupi uze'eg ma'e ne wà. Erepyro amo àwà ze'eg rupi uze'eg ma'e ne wà no. Erepyro amo karaiw ze'eg rupi uze'eg ma'e ne wà no. Nezewegatete erepyro amo ae ze'eg rupi uze'eg ma'e tetea'u ne wà no. — Erepyro amo ko ywy rehe har ne wà. Erepyro amo amo ae ywy rehe har ne wà no. Nezewegatete erepyro ywy nànàgatu har tetea'u ne wà no. — Erepyro amo pàrànà ne wà. Erepyro amo izu ma'e ne wà no, Erepyro amo ipihun wewer ma'e ne wà no. Nezewegatete erepyro teko hexakaw uzuawyawy ma'e tetea'u ne wà no.

Juízes 10:16

A'e rupi weityk tupàn a'ua'u amo ywy rehe arer wà. Umuwete katu Tupàn Tuweharupi Wiko Ma'e wà kury. Upuhareko wà kury, ta'e wexak waneko haw xe. Zawaiw katu tuwe waneko haw.