Isaías 60:9 - Tupàn zeꞌeg

⁹ Muite wi a'e kanuhu wanur a'e wà. Uhua'u wera'u ma'e ur amo wanenataromo wà. Werur Tupàn hemiaihu wanereko waiwy rehe wà. Werur itaxig parat wà. Werur itazu or wà no. Wazar omono putar a'e ma'e Tupàn Ikatuahy Ma'e Tuweharupi Wiko Ma'e Izaew wazar pe a'e wà nehe. Tupàn umur ukàgaw upuràg eteahy haw peme a'e. Peiko hemiaihu romo.

Isaías 60:9 ပူးပေါင်းရင်းမြစ်များ

Gênesis 9:27

Tuwe Tupàn umuigo kar Zape ywy tetea'u izar romo a'e nehe. Tuwe Zape izuapyapyr wiko Xem heko haw pe wà nehe. Tuwe Kànàà wiko Zape pe uma'ereko e ma'e romo a'e nehe, i'i Noe a'e 'ar mehe.

1 Reis 10:1

Xama ywy rehe har wanuwihawete kuzà wenu teko Xàrumàw ikàgaw rehe waze'eg mehe a'e wà kury. A'e rupi oho Zeruzarez tawhu pe Xàrumàw rehe upuranu pà hagaw pà kury. — Zawaiw katu ma'e rehe apuranu putar hehe ihe nehe, i'i uzeupe.

1 Reis 10:22

Heta tetea'u kanuhu Xàrumàw pe wà. Wata oho waiko yryhu nànàn Iràw kanuhu wanupi wà. Umumaw na'iruz kwarahy wata pà wà. A'e re uzewyr Xàrumàw pe wà, ma'e tetea'u herur pà izupe wà. Or, parat, ita marupi, ka'i wà, ka'i zàwenugar mik her ma'e wà. Agwer ma'e werur wà.

1 Reis 22:48

Ywy Enom her ma'e pe naheta kwaw tuwihawete. Zuta wanuwihawete umuigo kar amo awa Enom wanuwihaw romo a'e.

1 Reis 8:41

Aze amo ae ywy muite har rehe har wenu teko nerehe waze'eg mehe nehe, ma'e ikàg ma'e neremiaihu wanupe neremiapo kwer rehe waze'eg mehe nehe, aze ur xe nemuwete katu pà newe uze'eg pà imuwak pà 'àg tàpuzuhu kutyr nehe,

Salmos 48:7

Wiko kanuhu pupe har Ykotok uhua'u ma'e inuinuromo har zàwe wà.

Salmos 72:10

Tuwihawete Epàn ywy rehe har umur putar ma'e izupe wà nehe. Yrypypo'o rehe har nezewegatete wà no. Tuwihawete Araw ywy rehe har wà nehe no, tuwihawete Exio rehe har wà nehe no, umur putar ma'e izupe wà nehe no.

Salmos 97:1

Tupàn Tuweharupi Wiko Ma'e wiko tuwihawete romo a'e. Nerurywete nehe, ywy. Penurywete nehe, yrypypo'o yryhu rehe har wà.

Êxodo 33:19

Uze'eg Tupàn Moizez pe kury. — Amugwaw kar putar hekatu haw nerenataromo paw rupi nehe kury. Amume'u putar herer Tupàn Tuweharupi Wiko Ma'e newe nerenataromo nehe no. Aze hepurupuhareko wer amo rehe nehe, apuhareko putar nehe. Aze hepuraihu wer amo rehe nehe, aihu katu putar ihe nehe.

Provérbios 18:20

Wyzài ikatu 'ym ma'e neremimume'u kwer uzewyr putar newe nehe.

Isaías 11:11

A'e 'ar mehe Zanezar a'e nehe, opo ikàg ma'e rehe we a'e nehe, umuzewyr kar putar wemiaihu amo ywy wi a'e wà nehe. Ko 'ar rehe wiko Axir ywy rehe wà, Ezit ywy rehe wà no, Pat ywy rehe wà, Exio ywy rehe wà no, Eràw ywy rehe wà, Mawiron ywy rehe wà no, Amat ywy rehe wà, Yryhu Mezitehàn her ma'e izywyr rehe wà, yrypypo'o yryhu rehe har wanehe wà no. A'e 'ar mehe umuzewyr kar putar wà nehe.

Isaías 2:16

Uzapypyk putar kanuhu uhua'u ma'e paw rupi nehe. Uzapypyk putar kanu ipuràg eteahy ma'e nehe no.

Isaías 24:15

Kwarahy ihemaw kutyr wiko ma'e umume'u ikatu haw wà nehe. Yryhu iwyr wiko ma'e umume'u putar Tupàn Tuweharupi Wiko Ma'e Izaew wazar her ikatu haw wà nehe.

Isaías 42:10

Pemuzàg zegar haw ipyahu ma'e Tupàn Tuweharupi Wiko Ma'e pe nehe. Tuwe teko ywy nànànar umume'u ikatu haw wà nehe. Tuwe yryhu rehe kanuhu pupe wata ma'e umume'u ikatu haw wà nehe. Tuwe yryhu pupe wiko ma'e umume'u ikatu haw wà nehe. Tuwe teko ywy muite har nànànar umume'u ikatu haw wà nehe.

Isaías 42:4

Na'ikene'o kwaw nehe. Nuzemumikahy kwaw nehe. Umume'u wi wi putar heremiapo putar haw oho iko nehe. Ikàg putar imume'u mehe nehe. Teko ywy muite har nànànar wàro ipurumu'e haw henu haw waiko wà, i'i Tupàn.

Isaías 43:4

Amono ywy tetea'u penekuzaromo ihe. Ywy rehe har tetea'u amono penekuzaromo ihe wà, ta'e apuamutar ihe xe. Teko heremiamutar romo peiko. Apumuigo kar putar tuwihaw romo nehe.

Isaías 43:6

— Pemuhem kar heremiaihu peneko haw wi nehe, a'e putar kwarahy heixe haw awyze har kutyr har wanupe nehe. — Pemupyta kar zo heremiruze'eg peywy rehe nehe, a'e putar kwarahy ihemaw awyze har kutyr har wanupe nehe. — Tuwe hera'yr uzewyr weko awer pe herazyr wanupi wà nehe, a'e putar ywy muite wera'u rehe har wanupe nehe.

Isaías 46:13

Amuhem kar putar purupyro haw heremimume'u kwer na'arewahy ihe nehe. Nan kwehe tete aityk putar heàmàtyry'ymar ihe wà nehe. Apyro putar Xiàw rehe wiko ma'e ihe wà nehe. Amuza'aza'ak hekàg wera'u haw ipehegwer imono pà teko Izaew wanupe nehe, i'i Tupàn.

Isaías 49:1

Teko ywy muitea'u har wà, ihe Tupàn hemiruze'eg romo aiko ihe. Pezeapyaka katu heze'eg rehe nehe. Pezekaiw katu heze'eg rehe nehe, teko ywy nànànar wà. Aikuwe hehy hie pe ihe. A'e wi hehem 'ym mehe we Tupàn Tuweharupi Wiko Ma'e herexak a'e. Nazexak kar kwaw a'e mehe ihe rihi. Herenoz herer imume'u pà a'e mehe a'e.

Isaías 49:22

Zanezar Tupàn Tuweharupi Wiko Ma'e uze'eg wemiaihu wanupe. — Aupir putar hepo nehe. Apoe'eg putar teko amo ywy rehe har wanuwihaw wanupe nehe. — Peraha pena'yr penazyr wamuzewyr kar pà Zeruzarez tawhu pe pe wà nehe. Perur pepuxi'awar romo pe wà nehe. Perur peaxi'i rehe pe wà nehe no.

Isaías 51:5

Azur putar wapyro pà na'arewahy nehe. Heàmàtyry'ymar waneitykaw 'ar uhem wà iko. Aruze'eg putar teko ywy nànànar ihe wà nehe. Teko ywy muite har heràro herereko wà. Uzeruzar herehe wà. — Zanepyro putar zaneàmàtyry'ymar wanuwi nehe, i'i ihewe wà.

Isaías 55:5

Pezapo kar putar ma'e teko amo ae ywy rehe har wanupe nehe kury. Teko penemigwaw 'ym wiko putar peme uma'ereko ma'e romo wà nehe. Uzàn putar wà peneruzar pà wà nehe. A'e ma'e uzeapo putar nehe, ta'e ihe Tupàn Tuweharupi Wiko Ma'e pezar ihe xe, Izaew wazar Ikatuahy Ma'e ihe xe, amono hepuner haw peme ihe xe. Apuereko tuwihaw ài no, i'i Tupàn

Isaías 57:17

Aikwahy heremiaihu wanupe. Azepyk wanehe no ta'e uzapo ikatu 'ym ma'e wà xe. Hewyrowyroahy amo wama'e rehe wà no. Atyryk wanuwi ta'e aikwahy ihe xe. Nezewe rehe we wiko wi wi uzauzarahy ma'e romo wà. Oho wi wi wape rupi wà no.

Isaías 60:4

Zeruzarez. Eme'e nezeiwyr nehe. Exak uzeapo romo ma'e nehe. Nera'yr uzewyr wà waiko wà. Uhem wà waiko wà. Muite wi nera'yr wanur wà. Nerazyr ur waiko uhy wazywa rehe wà no.

Isaías 60:6

Teko Minià ywy rehe har wà nehe, Epa ywy rehe har wà nehe no, ur putar kawaru kupewa'a tetea'u wanerur pà wà nehe. Werur putar ma'e tetea'u wakupepe wà nehe. Teko Xawa ywy rehe har ur putar wà nehe no. Werur putar itazu or wà nehe. Werur putar yhyk hyàkwegatu ma'e wà nehe no. A'e paw umume'u putar Tupàn Tuweharupi Wiko Ma'e hemiapo kwer ikàg ma'e a'e wà nehe.

Isaías 66:12

Ihe Tupàn Tuweharupi Wiko Ma'e amume'u ko ma'e Zeruzarez pe har wanupe ihe: Hemetarer katu ma'e ài peneko haw ur putar peme yrykawhu ài nehe. Temetarer ywy nànànar ur putar peme nehe no, hekuzar katu ma'e ywy nànànar ur putar peme nehe no, 'y tyhu ma'e uwyrykahy ma'e ài nehe. Na'e Zeruzarez wiko putar pehy ài nehe. Pemukamu putar nehe. Peneraha putar uzywa rehe nehe. Upuxi'awar rehe pepyhyk putar peamutar katu pà nehe no.

Jeremias 3:17

'Ar ikatu ihem mehe — Tupàn Tuweharupi Wiko Ma'e henaw, i'i putar teko Zeruzarez rehe wà nehe. Ywy nànànar uzemono'og putar a'e pe herer rehe wà nehe. Izypy mehe wapy'a uzeruzar 'ym ma'e ikatu 'ym ma'e uzapo kar ma'e wanupe. A'e 'ar ikatu ma'e rehe nuzapo kwaw a'e ma'e wà nehe.

Jeremias 30:19

Teko a'e pe wiko ma'e uzegar putar hekatu haw imume'u pà wà nehe. Uhapukaz putar urywete haw rehe wà nehe no. Amueta tetea'u kar putar ihe wà nehe. Areko katu kar putar a'e teko amo teko wanupe ihe wà nehe no.

Ezequiel 39:7

Akwaw kar putar herer ikatuahy ma'e heremiaihu Izaew wanupe nehe. Teko nuze'eg zemueteahy pixik kwaw herer rehe wà nehe. Ihe Tupàn Tuweharupi Wiko Ma'e ihe aiko Izaew wazar ikatuahy ma'e romo ihe. Teko ywy nànànar ukwaw putar herekuwe haw wà nehe.

Miquéias 4:13

Tupàn Tuweharupi Wiko Ma'e uze'eg kury. — Teko Zeruzarez pe har wà. Pepu'àm peàmàtyry'ymar wazuka pà nehe. Apumukàg putar ihe nehe. Peiko putar tapi'ak awa i'ak itaper iapo pyrer hereko har ài nehe, ipyàpe itamorog iapo pyrer hereko har ài nehe. Pemumaw putar teko ywy tetea'u wanehe har wà nehe. Aiko ywy nànànar wazar romo ihe. Pemur putar wama'e wakàgaw rupi wanemimono'og kwer ihewe nehe.

Miquéias 7:12

A'e 'ar mehe zaneiwy rehe arer uzewyr putar Zeruzarez pe wà nehe. Ur putar Axir wi wà nehe. Ur putar Ezit wi wà nehe no. Ur putar ywy Ewparat yrykaw izywyr har wi wà nehe no. Ur putar yryhu wi wà nehe. Ur putar ywytyruhu muitea'u wera'u ma'e wi wà nehe no.

Sofonias 2:11

Tupàn Tuweharupi Wiko Ma'e uzàmàtyry'ymahy putar wà nehe. Umumaw putar amogwer teko wazar tupàn a'ua'u upaw rupi wà nehe. Na'e teko pitàitàigatu umuwete katu putar Tupànete uiwy rehe weko haw pe wà nehe.

Zacarias 14:14

Te Zuta ywy rehe har uzàmàtyry'ym putar Zeruzarez pe har oho wà nehe. Zauxiapekwer weraha putar temetarer a'e ywy wi huwake har rehe paw wà nehe. Itazu or tetea'u, itaxig parat tetea'u no, kamir tetea'u no, topoz tetea'u no.

Lucas 2:32

— Tatainy ài wiko putar nehe. A'e rupi umume'u putar nekatu haw Zutew 'ym wanupe nehe, i'i izupe. — Teko uze'egatu putar Izaew izuapyapyr wanehe a'e wà nehe, neremiruze'eg wanehe a'e wà nehe, ta'e Zezuz Izaew izuapyr romo hekon a'e no xe, i'i Tupàn pe.

João 17:26

Amume'u neze'eg wanupe ihe, nekwaw kar pà wanupe ihe. Amume'u wi wi putar wanupe ihe nehe kury. — Heru heamutar katu a'e, a'e wanupe ihe. A'e rupi uzeamutamutar katu putar a'e wà nehe no. A'e rupi aiko putar wainuromo ihe nehe no.

Atos 9:15

I'i Zanezar izupe. — Eho ipyr nehe ty. Ta'e aexak ihe xe, heremiruze'eg romo ihewe uma'ereko ma'e romo imuigo kar pà ihe xe. Umume'u putar herehe ze'egaw zutew 'ym wanupe nehe, tuwihaw wanupe nehe no, Izaew ywy rehe har wanupe nehe no, i'i izupe.

Gálatas 3:26

Ta'e pezeruzar haw rupi peiko Tupàn ta'yr romo Zaneruwihawete Zezuz inuromo pezemono'og pà pe kury xe.

Josué 9:9

— Ure newe uma'ereko ma'e ure, ywy muitea'u har wi uruzur ure, ta'e uruenu Tupàn pezar ikàgaw imume'u awer ure xe. Ta'e uruenu hemiapo kwer imume'u awer ure xe, Ezit ywy rehe hemiapo kwer imume'u awer ure xe.