Isaías 59:13 - Tupàn zeꞌeg

¹³ Nuruiko kwaw nerehe uzeruzar katu ma'e romo. Urupytu'u neze'eg heruzar ire. Urutyryk newi, urezar. Uruze'eg ikatu 'ym ma'e iapo haw rehe. Uruze'eg neze'eg heruzar 'ymaw rehe no. Urumume'u amogwer wanupe ureremu'em àwàm.

Isaías 59:13 ပူးပေါင်းရင်းမြစ်များ

Tiago 3:6

Zaneapeku umuaiw ma'e tata ài a'e. Ikatu 'ym ma'e tetea'u xiapo zaneze'eg zemueteahy mehe zane, zaneremu'em mehe zane, amogwer wanemiapo kwer imume'u mua'u mehe zane. Zaneapeku zanezuru pe tuz a'e. Umuhàmuhàz ikatu 'ym ma'e zaneretekwer pupe paw rupi. Tata uhàuhàz a'e, ywyra hapy pà a'e. Zaneapeku pixika'i a'e no. Zaneze'eg zemueteahy mehe, ikatu 'ym ma'e uhua'u ma'e xiapo. Zanekwarer mehe zaze'eg zemueteahy. Zanetua'u mehe no. Zaneremimume'u kwer uhàuhàz tata ài.

Hebreus 3:12

Herywyr wà. Peme'egatu nehe, ikatu 'ym ma'e wi petyryk pà nehe. Tuwe ni amo pepyr har nuwereko kwaw ikatu 'ymaw upy'a pe wà nehe. Tuwe ni amo nuiko wi kwaw uzeruzar 'ym ma'e romo wà nehe. Tuwe nupuir kwaw Tupàn wikuwe ma'e wi wà nehe.

Tiago 1:15

Kwarer a'e, uzeapo uhy rie pe a'e. Uzexak a'e re. Nezewegatete teko ipurapo wer ikatu 'ym ma'e rehe a'e wà, upy'a pe a'e wà. A'e rupi amo 'ar mehe uzapo oho wà. A'e kuzà imemyr tua'uhez putar a'e nehe, umàno putar a'e nehe. Nezewegatete ikatu 'ym ma'e iapo har a'e wà nehe no, uzapo a'e ikatu 'ym ma'e a'e wà nehe, tatahu pe oho pà a'e wà nehe.

Tito 1:16

A'e Tupàn ze'eg heruzar 'ymar uze'eg mua'u nezewe wà. — Kwa, urukwaw katu Tupàn ure, urumuwete katu uruiko ure, i'i mua'u waiko wà. Nan kwaw pa. Agwer teko wanemiapo kwer uzawy Tupàn ikwaw par wanemiapo kwer a'e wà. Na'ikatu kwaw Tupàn pe wà kury. Noho kwaw Tupàn ze'eg rupi wà. A'e rupi nupuner pixik kwaw ikatu ma'e iapo haw rehe wà.

Mateus 10:33

— Naiko kwaw Zezuz hemiruze'eg romo ihe, aze amo i'i amogwer wanuwa rupi nehe, nezewegatete aze'eg putar Heru ywate har huwa rupi ihe nehe no. — Nuiko kwaw heremiruze'eg romo a'e, a'e putar izupe ihe nehe no.

Oséias 11:12

Nezewe i'i Tupàn Tuweharupi Wiko Ma'e. — Teko Izaew umàmàn heywyr wemu'emaw pupe wà. Wanemu'emaw nuzawy kwaw pàrirogawhu ihewe. Teko Zuta naheputar kwaw uzar romo wà. Tupàn Ikatuahy Ma'e romo aiko ihe. Tuweharupi azapo ma'e heze'eg rupi katete ihe.

Oséias 7:13

Nuzawy kwaw awa ka'a rupi wata ma'e wape ikwaw 'ymar wà. Amumaw kar putar ihe wà nehe. Ta'e uzàn ihewi wà xe. Ta'e naheputar kwaw uzar romo a'e wà xe. Hepurupyro wer zepe wanehe ihe. Hemu'em herehe uze'eg mehe a'e wà.

Oséias 6:7

Heremiaihu Ànà tawhu pe waneko mehe, uhaw ze'egaw herehe we wemiapo katu kwer wà. Upytu'u hereruzar ire wà. Nuzawy kwaw heremireko amo awa puhe uker ma'e wà.

Oséias 1:2

Tupàn Izaew wanupe uze'eg mehe, Ozez pe izypy mehe arer rehe uze'eg mehe, uze'eg nezewe izupe. — Exaexak amo kuzàwyzài tàpuzuhu tupàn a'ua'u imuwete haw pe har neremireko ràm romo nehe. Ereko neremireko romo nehe. Nera'yr a'e kuzà hehe we àràm wiko putar kuzàwyzài imemyr romo a'e wà nehe. Ta'e teko Izaew nuzawy kwaw kuzàwyzài ihewe a'e wà xe. Izaew nuiko kwaw heremireko ikatu ma'e zàwe wà. Izaew upuir ihewi wà.

Ezequiel 18:25

Nezewe rehe we peze'eg nezewe ihewe. — Ne urezar Tuweharupi Wiko Ma'e ne, neremiapo na'ikatu kwaw, peze peiko ihewe. Peinu katu ko heze'eg nehe, Izaew izuapyapyr wà. Heremiapo na'ikatu kwaw peme. Pezawy peiko. Penemiapo na'ikatu kwaw.

Ezequiel 6:9

Zauxiapekwer weraha putar a'e teko weko haw pe wemipyhyk kwer romo wà nehe. A'e pe wiko mehe ima'enukwaw putar herehe wà nehe. — Azeharomoete uzepyk zanerehe a'e, i'i putar ihewe wà nehe. — Zanemumaranugar kar a'e, i'i putar ihewe wà nehe no. Ta'e wapy'a uzeruzar 'ym ma'e hereityk a'e wà xe. Nahemuwete kwaw wà. Umuwete katu tupàn a'ua'u wà. Na'iakatuwawahy kwaw uzehe a'e wà nehe, ta'e iaiw a'e wà xe. Uzapo purumuhuhuk kar ma'e wà.

Jeremias 42:20

Pezawy peiko. A'e rupi pepuner te pemàno haw rehe nehe. — Eze'eg Tupàn Tuweharupi Wiko Ma'e Zanezar pe nehe, peze ihewe. — Eze'eg Tupàn Tuweharupi Wiko Ma'e pe urerehe nehe. A'e re emume'u ize'eg paw urewe nehe, ureremiapo ràm imume'u pyr nehe. A'e mehe uruzapo putar nehe, peze ihewe.

Jeremias 32:40

Azapokatu putar ko heze'egaw upaw pixik 'ym ma'e wanehe we ihe nehe: Napytu'u pixik kwaw ikatu ma'e wanupe iapo re ihe nehe. Azemuawate katu kar putar wanupe nehe. Hemuwete katu putar upy'a pe azeharomoete wà nehe. Nutyryk pixik kwaw ihewi wà nehe.

Jeremias 17:13

O Tupàn Tuweharupi Wiko Ma'e, ereiko teko Izaew izuapyapyr wanemiàro romo ne. Nereitykar paw wiko putar ikàg 'ym ma'e romo wà nehe. Ukàzym putar her ywyxig rehe imuapyk pyr ài wà nehe. Ta'e nereityk a'e wà xe, Tupàn Tuweharupi Wiko Ma'e, 'ytyzuzàmaw 'y ikatu ma'e imur har zàwenugar.

Jeremias 5:23

Peiko teko hereruzar 'ymar romo heremiapo putar haw iapo 'ymar romo. Heàmàtyry'ym pe kury hereityk pà.

Jeremias 3:20

Napezawy kwaw kuzà umen 'ym puhe oho ma'e. Peiko nezewe nugar romo ihewe. Ihe Tupàn Tuweharupi Wiko Ma'e aiko uze'eg ma'e romo, i'i Tupàn.

Jeremias 3:10

Ko ma'e iroahy wera'u ihewe. Zuta Izaew tyker umen 'ym ipuhe oho ma'e kwer a'e, uzewyr mua'u ihewe. Nuzewyr kwaw azeharomoete. Iro ihewe. Ihe Tupàn Tuweharupi Wiko Ma'e aze'eg kwez kury, i'i ihewe.

Jeremias 2:13

Heremiaihu uzapo mokoz ikatu 'ym ma'e wà. Aiko 'ytyzuzàmaw zàwenugar romo. Nezewe rehe we hereityk wà. Uhàwykàz amo 'ytyzuzàmaw hekar pà wà. Oxorok a'e 'ytyzuzàmaw. Te àmàn imono'og pyrer uhem wanuwi.

Isaías 57:11

Pekyze tuwe a'e tupàn a'ua'u wanuwi. Mo romo wanekon wà. Màràzàwe tuwe penemu'em ihewe. Màràzàwe tuwe peneharaz tuwe ihewi. Amumaw kwarahy tetea'u heze'eg 'ym pà. Aipo a'e rupi peneharaz ihewi. Aipo a'e rupi napekyze kwaw ihewi.

Isaías 48:8

Akwaw penehe hezeruzar 'ymaw ihe. Akwaw hereruzar har 'ym tuweharupi har romo peneko haw no. A'e rupi napeinu pixik kwaw ko ma'e. Napekwaw kwaw ma'e wazeapo àwàm.

Isaías 32:6

Hemu'em ma'e umume'u temu'emaw a'e. Tuweharupi ima'enukwaw wemiapo ràm iaiw ma'e rehe. Hemu'em Tupàn Tuweharupi Wiko Ma'e rehe no. Uzapo ma'e Tupàn pe iro ma'e oho iko. Nomono kwaw temi'u ima'uhez ma'e wanupe. Nomono kwaw 'y iziwez ma'e wanupe a'e no.

Isaías 31:6

Teko Izaew wà, petyryk muite Tupàn wi. Pezemumikahy penemiapo kwer rehe izupe pezewyr pà nehe.

Isaías 5:7

Tupàn Tuweharupi Wiko Ma'e Ikàg Wera'u Ma'e iko uwà tyw izar ài, uwà Tupàn hemimutar a'e, wiko Izaew romo teko Zuta ywy rehe har romo a'e. Tupàn weruzar kar uze'eg wanupe. Nuweruzar kwaw wà. Iaiw ma'e uzapo upuruzuka pà wà. Wàro ikatu ma'e wanemiapo, nuexak kwaw. Xo umàno etea'i ma'e wanehapukaz taw zo wenu a'e. — Urepytywà pe nehe, i'i wà.

Provérbios 30:9

Ta'e aze heta wera'u ma'e ihewe nehe, — Naputar kwaw Tupàn ihe, a'e putar ru'u newe nehe. Aze hemetarer 'ym ma'e romo aiko nehe, hemunar putar ru'u ma'e rehe nehe. Nezewe mehe arur putar maranugar haw Tupàn hezar her rehe nehe.

Salmos 78:36

Waze'eg awer paw temu'emaw romo a'e wà. Umume'u a'e ma'e paw Tupàn pe wemu'em pà wà.

Salmos 18:21

Tuweharupi aruzar Tupàn Tuweharupi Wiko Ma'e ze'eg ihe. Napytu'u pixik kwaw heruzar ire.

Josué 24:27

Uze'eg teko wanupe. — Peme'e 'àg itahu rehe nehe. Wiko putar zaneremiapo kwer hexak arer zàwenugar romo nehe. Wenu Tupàn Tuweharupi Wiko Ma'e ize'eg awer paw a'e. Wiko putar penemiapo hexakar romo a'e nehe no. Nezewe mehe napeityk kwaw Tupàn nehe.

Jó 31:28

Aze mo azapo a'e iaiw ma'e, Apytu'u mo Tupàn ywate har heruzar ire. Tàmuz uzepyk mo herehe wà.

Isaías 10:1

Amo tuwihaw uzapo kar ikatu 'ym ma'e teko wanupe wà. Tupàn uzepyk putar wanehe nehe. Pemunar teko wama'e rehe ta'e peiko wanuwihaw romo pe xe.

Isaías 30:12

A'e rupi Tupàn Ikatuahy Ma'e Izaew wazar uze'eg nezewe wemiaihu wanupe. — Naperuzar kwaw heze'eg. Pezeruzar puruzuka haw rehe. Pezeruzar temu'emaw rehe.

Isaías 58:2

Azeharomoete hemuwete katu tuweharupi a'e wà. — Urepurukwaw wer neremiapo putar haw rehe ure, i'i ihewe wà. Uze'eg waiko teko ikatu ma'e iapo har ài wà, heze'eg ihaw 'ymar ài wà. — Emur neze'eg ikatu ma'e urewe nehe, i'i ihewe wà. Ipurumuwete wer herehe tuweharupi wà, i'i Tupàn.

Isaías 58:9

Ihewe penehapukaz mehe pepytywà àwàm henoz mehe nehe, apuenu putar nehe. — Urepytywà pe nehe, peze putar ihewe nehe. — Aiko aiko xe ihe, a'e putar peme nehe. — Aze pepytu'u tuwe pemunar ire wà nehe, aze pepytu'u ikatu 'ym ma'e amo wanupe imume'u re nehe, aze pepytu'u peze'eg urywahyahy re pe nehe,

Isaías 58:13

Uze'eg Tupàn Tuweharupi Wiko Ma'e nezewe a'e. — Peruzar ze'eg mytu'u haw 'ar rehe har nehe. Napeme'eg kwaw ma'e 'ar ihewe imonokatu pyrer rehe nehe. Napeme'eg kar kwaw ma'e a'e 'ar rehe nehe. Tuwe mytu'u haw 'ar uzeapo mynykaw 'ar ài peme nehe. Tuwe upyta 'ar Tupàn Tuweharupi Wiko Ma'e pe imonokatu pyr romo peme nehe. Pemuawate a'e 'ar nehe. Pepytu'u pema'ereko 'ym pà nehe. Peme'eg zo ma'e a'e 'ar rehe nehe. Peze'eze'eg e zo a'e 'ar mehe nehe.

Jeremias 12:8

Teko heremixamixak kwer wiko heàmàtyry'ymar romo zàwàruhu iriàw ka'a pe har ài wà. Uhapukaz hekutyr wà. A'e rupi iro ihewe wà.

Amós 6:12

Aipo kawaru upuner itahu 'aromo uzànaw rehe wà. Nan. Aipo mokoz tapi'ak upuner ywy heruwakaw imuàzànaw rehe yryhu pupe wà. Nupuner kwaw wà. Nezewe rehe we — Puruzuka haw, peze ma'e rehe imunar 'ymaw rehe. — Purereko katu 'ymaw, peze purereko katu haw pe.

Jeremias 2:16

Azeharomoete Men pe har wà, Tapinez pe har wà no, upin wemipyhyk kwer teko Izaew ywy rehe har wa'aw wà.

Jeremias 2:17

Teko Izaew wà, pe ae pezapo ikatu 'ym ma'e pe. A'e rupi a'e ma'e paw uzeapo peme. Aiko Tupàn Tuweharupi Wiko Ma'e pezar romo ihe, hereityk pe. Pe rupi peneraha mehe hereityk pe pe.

Oséias 7:1

Azeagaw zepe teko Izaew wamukatu haw rehe ihe. Azeagaw zepe hemetarer katu ma'e romo wamuigo kar wi haw rehe no. Xo wanemiapo kwer ikatu 'ym ma'e zo aexak ihe, xo waiw paw zo aexak ihe. Hemu'em ma'e romo wanekon wà. Teko wanàpuz rehe imunar ma'e romo wanekon wà. Teko pe rupi wata ma'e tawhu pupe wata ma'e wama'e rehe imunar ma'e romo wanekon wà.