Isaías 57:13 - Tupàn zeꞌeg

¹³ Pehapukaz putar pepytywà àwàm henoz pà ihewe nehe. A'e 'ar mehe tupàn a'ua'u penemimuwete tetea'u napenenu kwaw a'e wà nehe. Ywytu weraha putar a'e tupàn a'ua'u muite xe wi wà nehe. Pitài ipy haw umukàzym kar putar wà nehe. Herehe uzeruzar ma'e wiko putar ywy heremimume'u kwer rehe wà nehe. Ywytyr ikatuahy ma'e herenaw uzeapo putar waneko haw romo nehe.

Isaías 57:13 ပူးပေါင်းရင်းမြစ်များ

2 Reis 3:13

Uze'eg Erizew Izaew wanuwihawete pe. — Naiko kwaw Tupàn ze'eg imume'u har romo newe ihe. Neru a'e, nehy a'e no, wikuwe mehe upuranu amo tupàn a'ua'u ze'eg imume'u har wanehe wà. Ne eho wanupe kury, wanehe nepuranu pà kury, i'i Erizew Izaew wanuwihawete pe. Uze'eg Zoràw izupe. — Nan ty. Ure na'iruz tuwihawete ure. Tupàn Tuweharupi Wiko Ma'e uremono Moaw wanuwihawete pe a'e, i'i izupe.

Jó 21:18

Ma'e 'ar mehe umuhàmuhàz ka'akyr ài wà. Ma'e 'ar mehe ywytu weraha ywyku'i kwer ài a'e. Ma'e 'ar mehe Tupàn weraha ikatu 'ym ma'e nezewe a'e wà.

Salmos 1:4

Ikatu 'ym ma'e nuiko kwaw wazàwe wà. Nuzawy kwaw arozpirer uxinig ma'e ywytu hemiraha wà.

Salmos 118:8

Tupàn Tuweharupi Wiko Ma'e rehe zanezeruzar haw Ikatu wera'u teko wanehe zanezeruzar haw wi.

Salmos 125:1

Tupàn Tuweharupi Wiko Ma'e rehe uzeruzar ma'e Wiko Xiàw ywytyr ài wà. Teko nupuner kwaw Xiàw heitykaw rehe wà. Ikàg tuweharupi a'e.

Salmos 37:11

Amo wanuwi wiko wera'u 'ym ma'e wiko putar katu haw rehe wà nehe, ywy imume'u pyrer rehe wà nehe. Hurywete putar wà nehe. Heta tetea'u putar ma'e wanupe nehe no. Wiko putar zeàmàtyry'ym 'ymaw rehe wà nehe.

Salmos 37:22

Tupàn omono uze'egatu amo teko wanehe. A'e teko wiko putar katu haw rehe ywy imume'u pyrer rehe wà nehe. Omono uze'egaiw amo wanehe. Umumaw putar a'e teko wà nehe.

Salmos 37:29

Teko ikatu ma'e wereko putar ywy imume'u pyrer wà nehe. Tuweharupi hehe wanekon putar wà nehe.

Salmos 37:3

Ezeruzar Tupàn Tuweharupi Wiko Ma'e rehe ikatu ma'e iapo pà nehe. Eiko katu tuwe ywy imume'u pyrer rehe nehe.

Salmos 37:34

Pezeruzar Tupàn Tuweharupi Wiko Ma'e rehe nehe. Peruzar ize'eg nehe no. Umur putar ywy imume'u pyrer peme a'e nehe. Nezewe mehe peiko putar ikàg ma'e ikwaw pyr romo nehe. Tupàn umumaw putar ikatu 'ym ma'e a'e wà nehe. Pexak putar wamumaw mehe pe wà nehe.

Salmos 37:9

Tupàn Tuweharupi Wiko Ma'e rehe uzeruzar ma'e Wiko katu putar ywy imume'u pyrer rehe wà nehe. Ikatu 'ym ma'e uzemumaw putar wà nehe.

Salmos 58:9

Uzeapo ma'e ikwaw 'ym mehe we Ikatu 'ym ma'e uzemonohok kar ka'akyr ài wà. Wanekuwe mehe we Tupàn omono kar putar uzewi upytuhemaw pupe wekwahy haw ukaz ma'e rupi nehe.

Salmos 84:12

O Tupàn Ikàg Wera'u Ma'e, Hurywete tuwe nerehe uzeruzar ma'e wà.

Provérbios 28:25

Ma'e tetea'u iputarahy har umuzeapo kar ikatu 'ymaw tuweharupi a'e wà. Tupàn Tuweharupi Wiko Ma'e rehe uzeruzar ma'e wiko katu putar wà nehe.

Isaías 11:9

Xiàw ywytyr ikatu ma'e rehe teko nuzapo kwaw ikatu 'ym ma'e uzeupeupe wà nehe. Numumaw kwaw amo wama'e wà nehe. Ikatuahy putar a'e pe nehe. 'Y umynehem yryhu. Nezewegatete ywy tynehem putar Tupàn Tuweharupi Wiko Ma'e ikàgaw ipuràgaw ikwaw paw pupe a'e nehe no.

Isaías 14:32

Ma'e i'i putar teko Pirite waze'egaw herur har wanupe wà nehe. Uwazar putar waze'eg wanupe nezewe wà nehe. — Tupàn Tuweharupi Wiko Ma'e uzapo Xiàw kwehe mehe a'e. Hemiaihu hemetarer 'ym ma'e wexak putar umimaw a'e pe wà nehe, i'i putar wanupe wà nehe.

Isaías 25:4

Ta'e ereiko hemetarer 'ym ma'e wanehe uzekaiw ma'e romo ne xe. Ereiko ma'e hereko 'ymar wapyro har romo no. Ereiko ywytuàiw wi teko wazeàmimaw ài no. Kwarahy haku mehe ereiko ma'e i'àgaw teko wamimaw ài no. Awa ipuruzukaiw ma'e wakwahy haw nuzawy kwaw ywytuaiw àmàkymehe har.

Isaías 40:24

A'e tuwihaw nuzawy kwaw ma'e hezuz romo ma'e kwer wà. Pixika'i wanapo. Aze Tupàn upytuhem wanehe, uxinig wà. Ywytu weraha muite ka'a ruwer uxinig ma'e ài wà.

Isaías 41:16

Pemomor putar ywate pe nehe. Ywytu weraha putar wà nehe. Ywytu ikàg wera'u ma'e umuhàmuhàz putar wà nehe. Na'e penurywete putar nehe, ta'e ihe Tupàn Tuweharupi Wiko Ma'e aiko pezar romo ihe xe. Hemuwete katu putar pe nehe. Aiko Tupàn Izaew wazar Ikatuahy Ma'e romo ihe.

Isaías 45:20

Nezewe uze'eg Tupàn Tuweharupi Wiko Ma'e. — Pezur pezemono'og pà nehe, teko umàno haw wi uhem ma'e kwer wà. Pepu'àm pezuwà tuwihaw wanenataromo nehe. Amo teko uze'eg tupàn a'ua'u wanupe wà. A'e tupàn nupuner kwaw wapyro haw rehe wà. A'e teko nukwaw kwaw ma'e wà. Amo teko uzemono'og wata pà tupàn a'ua'u wamuwete pà wà. Nezewegatete nukwaw kwaw ma'e wà no. Upir tupàn a'ua'u hagapaw ywyra iapo pyrer heraha pà wata mehe wà.

Isaías 49:8

Tupàn Tuweharupi Wiko Ma'e uze'eg nezewe wemiaihu wanupe. — Hekatu haw purupe hexak kar haw 'ar mehe nehe, awazar putar peneminozgwer peme ihe nehe. Pepyro àwàm 'ar ihem mehe nehe, apupytywà putar nehe. Azekaiw katu putar penehe ikatu 'ymaw wi nehe. Azapokatu putar heze'eg teko ywy nànànar wanupe nehe, peinuinuromo nehe. Azapo wi putar ywy peneko haw nehe. Amuzewyr kar putar peywy imuaiw pyrer nehe no.

Isaías 56:7

Apueraha putar ywytyr herenaw ikatuahy ma'e pe nehe. Penurywete putar heràpuzuhu pupe nehe, ihewe teko waze'egaw pupe nehe. Pepuner putar ma'ea'yr hapy haw rehe heruwa rupi nehe. Pepuner ma'e imur haw rehe ihewe nehe, ma'ea'yr hapy haw rehe penemimono imur haw rehe ihewe nehe. — Teko ywy nànànar Tupàn pe waze'egaw a'e, i'i putar teko heràpuzuhu pe wà nehe.

Isaías 60:21

Teko nepupe har wiko ma'e uzapo putar ikatu ma'e a'e wà nehe. Tuweharupi ereiko putar Ywy Imume'u Pyrer izar romo nehe. A'e teko wiko ma'eà'yz heremitygwer ài wà. Hepo pupe azapo ihe wà, ta'e hepurexak kar wer hekàg wera'u haw rehe purupe ihe xe.

Isaías 65:11

Amo peinuromo har utyryk ihewi wà. Ywytyr herenaw ikatuahy ma'e na'ikatu kwaw peme. Pemono temi'u win rehe we tupàn a'ua'u Kaz her ma'e pe wà, Meni her ma'e pe no. — Zanereko àwàm ikatu ma'e imur àràm wà, peze a'e tupàn a'ua'u wanupe. — Zanereko àwàm ikwaw par wà, peze a'e tupàn a'ua'u wanupe no.

Isaías 65:25

Awarahu hehaite ma'e umai'u putar àràpuhàràn hawitu ma'e wainuinuromo wà nehe. Zàwàruhu iriàw her ma'e u'u putar ka'api'i tapi'ak wainuinuromo wà nehe no. Mozaiw nuxi'u pixik kwaw teko wà nehe. Heywytyr ikatuahy ma'e rehe nuzeapo kwaw ikatu 'ym ma'e nehe. Nuzeapo kwaw purumuahy kar haw nehe, i'i. Tupàn Tuweharupi Wiko Ma'e uze'eg kwez kury.

Isaías 65:9

Amono putar wazuapyapyr tetea'u Zako izuapyapyr wanupe ihe wà nehe, Zuta izuapyapyr wanupe ihe wà nehe no. Amuigo kar putar a'e teko heywy izar romo ihe wà nehe no. Teko heremixamixak kwer wiko putar Ywy Heremimume'u kwer izar romo wà nehe. Wiko putar hehe tuweharupi wà nehe.

Isaías 66:20

Werur putar peywy rehe arer paw wà nehe, ihewe imur pyràm romo wà nehe. Ur putar heywytyr imonokatu pyrer Zeruzarez pe har pe wà nehe. Ur putar ma'ea'yr waku'az wà nehe: kawaru wà, kawaràn wà, kamer wà. Ur putar ywyramawa pupe wà nehe no, ywyramawa pixika'i ma'e pupe wà nehe no. Izaew werur arozràn kawaw imukatu pyrer pupe ihewe imur pyràm romo wà. Werur putar uiwy rehe arer ihewe nezewegatete wà nehe no.

Jeremias 2:28

Ma'e pe tupàn a'ua'u penemiapo kwer wanekon wà kury. Peneko haw zawaiw katu mehe nehe, tuwe tupàn a'ua'u pepyro wà nehe, aze upuner wà nehe. Zuta, tawhu nerehe har nànàn pitàitàigatu heta tupàn a'ua'u wà, i'i Tupàn.

Jeremias 22:20

Teko Zeruzarez pe har wà. — Peho Irimano ywy rehe penehapukaz pà nehe. Peho Màxà ywy rehe penehapukazahy pà nehe. Tuwe teko wenu peze'eg mehe wà nehe, Te ywytyruhu Moaw ywy rehe har pe wà nehe. Ta'e zauxiapekwer weityk ywy rehe har penuwake har pemyrypar paw rupi wà xe.

Jeremias 22:22

Ywytu umuhàmuhàz putar penuwihaw wà nehe. Zauxiapekwer weraha putar pemyrypar wemipyhyk kwer romo wà nehe. Uzapo putar tawhu peneko awer ikàg 'ym ma'e romo wà nehe, Imaranugar ma'e romo wà nehe no. Ta'e ikatu 'ym ma'e tetea'u pezapo pe xe.

Jeremias 30:14

Peamutar arer paw heharaz pewi wà. Nuzeruzar kwaw penehe wà. Apuàmàtyry'ym ihe, ta'e peiko heàmàtyry'ymar wazàwe pe xe. Penehe hezepykaw tàtàahy a'e, ta'e heta tetea'u penemiapo kwer ikatu 'ym ma'e xe. Pekatu 'ymaw uhua'u a'e no.

Ezequiel 20:40

Muite Izaew ywy rehe, ywytyr ihewe imonokatu pyrer rehe, ywytyr aiha Izaew ywy rehe har rehe, pe paw rupi hemuwete katu putar pe nehe. Pekatu putar ihewe nehe. Àro putar ma'ea'yr herenataromo penemizuka ràm ihe nehe. Pema'e ikatu wera'u ma'e perur putar ihewe nehe. Ma'e ihewe imur katu pyrer perur putar ihewe nehe.

Oséias 13:3

A'e rupi a'e teko ukàzym putar wà nehe. Ywàkun ywytyr rehe har ukàzym kwarahy ihem mehe a'e. Zuwiri ukàzym ku'em mehe a'e. Ywytu weraha ka'api'i uxinig ma'e a'e. Tàtàxiner uhem oho tàpuz wi a'e. Nezewegatete a'e teko ukàzym putar wà nehe no.

Joel 3:17

Nezewe pekwaw putar Tupàn Tuweharupi Wiko Ma'e pezar romo hereko haw nehe. Aiko Xiàw pe ihe, ywytyr ihewe imonokatu pyrer pe ihe. Zeruzarez uzeapo putar tawhu ikatuahy ma'e romo nehe. Teko amo ae ywy rehe har nupyro pixik kwaw a'e tawhu wà nehe.

Zacarias 7:13

Na'ipurenu wer kwaw herehe heze'eg mehe wà. Nezewegatete nainu kwaw ihewe waze'eg mehe ihe wà nehe no. Ihe Tupàn Ikàg Wera'u Ma'e aze'eg teko ihe kury.

Juízes 10:14

Peho a'e tupàn a'ua'u wanupe kury. — Urepytywà pe nehe, peze peho wanupe kury. Tuwe pepytywà putar ma'erahy ipuraraw mehe a'e wà nehe, i'i urywahyahy Tupàn Izaew wanupe.