Isaías 54:8 - Tupàn zeꞌeg

⁸ Hekwahy mehe azeàmim newi. Nazexak kar kwaw newe ta'e aikwahy newe ihe xe. Namumaw kwaw kwarahy tetea'u muite newi nehe. Urupuhareko katu putar nehe, ta'e uruamutar katu hepytu'u 'ym pà ihe xe, i'i Tupàn Tuweharupi Wiko Ma'e nepyro har a'e.

Isaías 54:8 ပူးပေါင်းရင်းမြစ်များ

Salmos 103:17

Aze teko umuwete katu Tupàn Tuweharupi Wiko Ma'e izuwi ukyze katu pà wà, Tupàn uzamutar katu a'e teko a'e wà. Wamutar katu haw nupaw pixik kwaw nehe. Tupàn ikatu haw nupaw pixik kwaw nehe. Omono wana'yr wanupe. Omono wa'yr wapurumuzàmuzàg wanupe no.

Salmos 103:4

Hepyro hemàno haw wi. Umur uze'egatu herehe heamutar katu pà, ikatu ma'e ihewe imur pà no.

Salmos 13:1

O Tupàn Tuweharupi Wiko Ma'e, nereharaz hewi ne. Màràn mehe nema'enukwaw wi putar herehe nehe. Aipo nanema'enukwaw pixik kwaw herehe nehe. Màràn 'ar eremumaw putar neruwa ihewi ipyk pà nehe.

Salmos 27:9

Ezeàmim zo ihewi nehe. Eikwahy zo ihewe nehe. Hemono kar zo pe nezewi nehe. O Tupàn hepyro har, ereiko hepytywà har romo. Etyryk zo ihewi nehe. Ihewi eho zo nehe.

Salmos 30:5

Neremumaw kwaw 'ar tetea'u nekwahy pà ne. Nekatu haw nupytu'u pixik kwaw. Amo upuner pytun gatu imumaw paw rehe uzai'o pà ma'e rehe a'e wà. Iku'em mehe ur wi hurywete haw.

Isaías 14:1

Tupàn Tuweharupi Wiko Ma'e upuhareko wi putar Izaew a'e wà nehe. Omonokatu wi putar wemiaihu romo wà nehe no. Umuzewyr kar putar Izaew waiwy kwehe arer pe wà nehe. Amo ae ywy rehe arer wiko putar a'e pe wainuinuromo wà nehe.

Isaías 26:20

Heremiaihu wà, peho peneko haw pe penàpuz iwàpytym pà nehe. Pemumaw amo zahy pezeàmim pà nehe. Tupàn wikwahy teko wanemiapo kwer rehe a'e. A'e rupi uzepyk iko wanehe. Xo ipytu'u paw ire pehem wi nehe.

Isaías 40:27

Teko Izaew izuapyapyr wà: màràzàwe tuwe peze'eg pezemumikahy haw rupi. — Tupàn Tuweharupi Wiko Ma'e nuzekaiw kwaw zanerehe, peze peiko. — Tupàn Tuweharupi Wiko Ma'e nume'e kwaw zanereko haw rehe, peze peiko. Màràzàwe tuwe peze'eg nezewe.

Isaías 45:15

Tupàn Izaew wazar a'e, wemiaihu wapyro har a'e, uzeàmim teko wanuwi a'e.

Isaías 47:6

Aikwahy heremiaihu wanupe ihe, heremiruze'eg heremixamixak kwer wanupe ihe. A'e rupi amuigo kar teko ikàg 'ym ma'e romo ihe wà. Amono pepo pe ihe wà no. Napekatu kwaw heremiaihu wanupe. Nan. Te tua'uhez ma'e wanupe te ihya'uhez ma'e wanupe pepuraraw kar ma'erahy.

Isaías 48:17

Tupàn Tuweharupi Wiko Ma'e, Izaew wazar Ikatuahy Ma'e, wapyro har, uze'eg wemiaihu wanupe kury. — Aiko Tupàn Tuweharupi Wiko Ma'e romo ihe, pezar romo ihe. Apumu'e iteko ihe, ta'e nezewe mehe peneko haw ikatu putar nehe xe. Apueruata peneraha pe ikatu ma'e peho àwàm hexak kar pà peme ihe.

Isaías 49:10

Na'ima'uhez kwaw wà nehe. Na'iziwez kwaw wà nehe. Kwarahy haku haw nuhem kwaw wanehe nehe. Ywytu haku ma'e ywyxiguhu wi ur ma'e kwer nupuraraw kar kwaw ma'erahy wanupe nehe, ta'e apuhareko katu ihe wà xe. Aexak kar putar waho àwàm wanupe nehe. Araha putar ytyzuzàmaw pe wà nehe.

Isaías 49:13

Pezegar nehe, ywak. Penurywete nehe, ywy. Ywytyr wà, penehapukaz penurywete haw rupi nehe, ta'e Tupàn Tuweharupi Wiko Ma'e umurywete kar wemiaihu wà xe. Upuhareko ma'erahy ipuraraw par wà no.

Isaías 49:26

A'u kar putar wo'o kwer peàmàtyry'ymar wanupe nehe. A'u kar putar uwykwer wanupe win ài nehe no. Nezewe mehe teko paw ukwaw putar ihe Tupàn Tuweharupi Wiko Ma'e romo hereko haw wà nehe. Pepyro har romo hereko haw ukwaw putar wà nehe no. Ihe Izaew wazar upuner ma'e ihe, aiko penekuzar imono har romo. Ukwaw putar hereko haw wà nehe no.

Isaías 54:10

Ywytyruhu upuner ukàzymaw rehe wà nehe. Ywytyr upuner uzepe'àpe'àgaw rehe wà nehe no. Nezewe rehe we napytu'u pixik kwaw neamutar katu re nehe. Neàmàtyry'ym pixik àwàm newe heremimume'u kwer nazuhaw pixik kwaw nehe, i'i Tupàn Tuweharupi Wiko Ma'e neamutar katu har a'e.

Isaías 54:5

Neapo arer a'e nehe, Tupàn Tuweharupi Wiko Ma'e a'e nehe, Tupàn Upuner Wera'u Ma'e a'e nehe, wiko putar nemen romo a'e nehe. Izaew wazar Ikatuahy Ma'e a'e nehe, ywy rehe har paw wazar a'e nehe, nepyro putar a'e nehe.

Isaías 55:3

Pezeapyaka katu heze'eg rehe nehe. Pezur ihewe nehe. Pezekaiw katu herehe nehe. Nezewe mehe peneko haw pyahu ma'e pereko putar nehe. Azapokatu putar heze'egaw upaw pixik 'ym ma'e ràm penehe we ihe nehe. Kwehe mehe amume'u heze'egatu Tawi pe izupe heremiapo ràm imume'u pà ihe. Azapo putar a'e ma'e peme ihe nehe.

Isaías 55:7

Tuwe teko iaiw ma'e upytu'u ikatu 'ym ma'e iapo re wà nehe. Tuwe upytu'u ikatu 'ym ma'e rehe uma'enukwaw ire wà nehe no. Pezewyr Tupàn Tuweharupi Wiko Ma'e Zanezar pe nehe, ta'e upurupuhareko a'e xe. Umunàn zaneremiapo kwer ikatu 'ym ma'e paw a'e no.

Isaías 60:10

Tupàn Tuweharupi Wiko Ma'e uze'eg Zeruzarez pe. — Teko amo ae ywy rehe arer uzapo wi putar nepàrirogaw iaiha ma'e tàtà ma'e a'e wà nehe. Wanuwihawete uma'ereko putar newe wà nehe no. Aikwahy ihe, a'e rupi azepyk nerehe. Nezewe rehe we uruamutar katu ihe. Urupuhareko katu no.

Isaías 63:7

Amume'u putar Tupàn Tuweharupi Wiko Ma'e ipuruamutar katu haw purupe ihe nehe. Uzapo ikatu ma'e tetea'u a'e. A'e rupi amume'u putar ikatu haw izupe nehe, ta'e Tupàn Tuweharupi Wiko Ma'e umur tuwe uze'egatu zanerehe a'e xe. Wexak kar ukatuahy haw wemiaihu wanupe. Ta'e upurupuhareko katu a'e xe. Upuruamutar katu a'e no.

Isaías 64:7

Naheta kwaw newe uze'eg ma'e wà. Ni amo nuekar kwaw upytywà àwàm nerehe wà. Erezeàmim urewi. Erepuir urewi, ta'e uruzapo ikatu 'ym ma'e tetea'u ure xe.

Isaías 8:17

Nuzexak kar kwaw wemiaihu wanupe a'e. Ihe azeruzar hehe ihe. Azeruzar tuwe hehe ihe.

Jeremias 31:3

azexak kar wanupe ihe. Teko Izaew izuapyapyr wà, tuweharupi apuamutar katu ihe. Apuamutar katu putar ihe nehe no. Tuweharupi aexak kar peamutar katu haw peme ihe.

Jeremias 33:26

Namumaw kwaw a'e heze'eg awer ihe. A'e rupi namumaw kwaw heze'eg Zako izuapyapyr wanehe we heremiapo katu kwer ihe nehe. Namumaw kwaw heze'eg heremiruze'eg Tawi rehe we heremiapo katu kwer ihe nehe no. Aexaexak putar amo Tawi izuapyr Àmàrààw izuapyapyr wanuwihawete romo ihe nehe, Izak izuapyapyr wanuwihawete romo ihe nehe no, Zako izuapyapyr wanuwihawete romo ihe nehe no. Amuhyk wi putar ma'e heremiaihu wanupe nehe. Apuhareko putar ihe wà nehe no.

Jeremias 51:5

Ihe Tupàn Tuweharupi Wiko Ma'e upuner wera'u ma'e napuir kwaw Izaew wanuwi ihe. Naityk kwaw Zuta ihe wà. Teko Mawiron uzapo ikatu 'ym ma'e herenataromo a'e wà. Aiko Tupàn ikatuahy ma'e Izaew wazar romo ihe.

Ezequiel 39:29

Azakook putar herekwe teko Izaew izuapyapyr wanehe nehe. Natyryk wi kwaw wanuwi nehe. Ihe nezar Tuweharupi Wiko Ma'e aze'eg kwez kury.

Habacuque 3:2

— O Tupàn Tuweharupi Wiko Ma'e. Teko umume'u neremiapo kwer ihewe wà. Akyze katu teko ihe kury. Kwehe mehe erezapo purumupytuhegatu kar haw. Ezapo wi agwer ma'e ko 'ar rehe nehe kury. Nezewe mehe urupuner putar hexakaw rehe ure nehe no. Erekwahy iko ne. Nezewe rehe we urepuhareko pe nehe.

Zacarias 1:15

Aikwahy amogwer ywy uzeàmàtyry'ym 'ym ma'e wanehe ihe. Ta'e heremiaihu wanehe hekwahy mehe teko a'e ywy rehe har upuraraw kar ma'erahy wanupe wà, i'i Tupàn.

Zacarias 1:16

Nezewe rehe we azewyr Zeruzarez pe ta'e apurupuhareko katu ihe xe. Ihe Tupàn Ikàg Wera'u Ma'e ihe, amume'u katu ko ma'e uzeapo ma'e ràm ihe kury. Heremiaihu uzapo wi putar Zeruzarez tawhu wà nehe. Uzapo wi putar heràpuzuhu wà nehe no, a'e teko ihe, i'i Tupàn.

Zacarias 10:6

Uze'eg wi Tupàn Tuweharupi Wiko Ma'e. — Amono putar hekàgaw teko Zuta ywy rehe har wanupe nehe. Apyro putar teko Izaew ywy rehe har wà nehe. Apuhareko katu ihe wà. Arur wi putar wamunehew pawer wi ihe wà nehe. Wiko putar heremityk pixik 'ym kwer ài wà nehe. Ta'e aiko Tupàn Tuweharupi Wiko Ma'e romo wazar romo ihe xe. Aenu ihewe waze'eg mehe ihe wà.

2 Tessalonicenses 2:16

Zezuz Zaneruwihawete Zanezar a'e, Tupàn zaneru a'e no, zaneraihu har romo wanekon a'e wà, zanepytywà waiko ma'erahy ipuraraw mehe a'e wà. — Peàro urepyr peneko àwàm nehe, i'i waiko zanewe. Ta'e ikatuahy zanewe a'e wà xe.

1 Timóteo 1:16

Nuzepyk kwaw herehe. Ta'e ipurexak kar wer puràrogatu haw rehe teko wanupe a'e xe, uzehe uzeruzar ma'e ràm wanupe a'e xe, uzepyr wemimuigo kar ràm wanupe a'e xe. Nuzepyk kwaw na'arewahy purehe. Wàrogatu uzehe wazeruzar àwàm.