Isaías 52:2 - Tupàn zeꞌeg

² O Xiàw, tawhu ipuràg eteahy ma'e. Ipyhyk pyrer romo ereiko, ko 'ar rehe ereapyk ywy rehe. Emonohok kyhàhàm tàtà ma'e heityk pà nehe. Epu'àm nehe, emutuhutuhug ywy ywy ku'i kwer neropoz wi nehe. Eapyk nerenaw rehe nehe, tuwihawete henaw rehe nehe.

Isaías 52:2 ပူးပေါင်းရင်းမြစ်များ

Isaías 10:27

A'e 'ar mehe apupyro putar wapo wi ihe nehe. Axir omono putar ipuhuz katu ma'e pekupe pe nehe. Apyro putar a'e ma'e pekupe wi nehe. Apumupytu'u kar putar wanupe uma'ereko e ma'e romo peneko re nehe. Peàmàtyry'ymar ur waiko Himon wi wà.

Isaías 14:25

Amumaw putar Axir ihe wà nehe. Ko 'ar rehe Axir wiko heywy Izaew rehe wà. Apyropyrog putar wanehe ywytyruhu herenaw pe ihe wà nehe. Apyro putar heremiaihu Axir wanuwi ihe wà nehe. Axir uzàpixipixi heremiaihu kyhàhàmtàtà pupe wà. Amonohok putar a'e kyhàhàmtàtà nehe, heremiaihu wapyro pà wamuhem kar pà nehe. Aupir putar ma'e ipuhuz katu ma'e wakupe pe har ihe nehe, wanuwi ipyhyk pà ihe nehe.

Isaías 29:4

Weityk putar tàpuz paw wà nehe. A'e pe har u'ar putar ywy rehe upyta pà wà nehe. Uze'eg putar tekwe ài wà nehe. Hewowo putar wà nehe. Uze'eg putar imuhemahy 'ym pà tekwe ài wà nehe no.

Isaías 3:26

Tawhu pe har uzai'o putar wà nehe. Nuzawy kwaw kuzà heityk pyrer ywy rehe wapyk ma'e wà nehe.

Isaías 49:21

Na'e ereze'eg putar nezewe nezeupe nehe: Mo hemuigo kar ko kwarer wahy romo ko kuzàtài wahy romo a'e. Aiko kuzà imemyr haw rehe upuner 'ym ma'e romo ihe. Heityk pyrer romo aiko. Naheputar kwaw wà. Aiko zemunehew paw pe har zàwenugar romo. Mo umugakwaw ko kwarer ko kuzàtài ihewe wà. Aiko e ihe. Ma'e wi ur ko teko paw wà, ere putar nehe.

Isaías 51:14

Na'arewahy amuhem kar putar teko zemunehew paw pe har wapyhykaw wi wà nehe. Numàno kwaw wà nehe. Na'ima'uhez kwaw wà nehe.

Isaías 51:23

Amono putar ko kanek neàmàtyry'ymar wanupe nehe, ta'e uze'eg nezewe newe a'e wà xe. — E'aw ywy rehe nehe. Urupyropyrog putar nerehe ure nehe, i'i newe wà. Ere'aw. Upyropyrog nerehe wà. Ywy imuku'i pyrer pe rupi har ài nerereko wà.

Isaías 60:1

Epu'àm nehe, Zeruzarez. Tuwe neruwa heny katu nerurywete haw rehe nehe, ta'e neratainy uhem kwez kury xe. Tupàn Tuweharupi Wiko Ma'e ikàgaw ipuràg eteahy haw uhyape katu iko penehe a'e kury.

Isaías 61:1

Tupàn Tuweharupi Wiko Ma'e umur wekwe ihewe a'e. Herexak uze'eg ikatu ma'e purupe heraha kar pà ihewe. — Eraha hemetarer 'ym ma'e wanupe nehe, i'i ihewe. Hemono kar ma'erahy ipuraraw par wamurywete kar pà ihewe. — Emume'u imunehew pyrer wamuhem kar àwàm eho purupe nehe. Emume'u zemunehew paw pe har wamuhem kar àwàm wanupe nehe no, i'i ihewe.

Isaías 9:4

Wiko amo pe uma'ereko e ma'e romo wà. Eremonohok kyhàhàm tàtà ma'e wàpixipixi haw ne. Wazar unupà ywyra pupe wà. Erezuhaw a'e ywyra ne. Wàmàtyry'ymar wiko wazar romo wà. Eremumaw wazar ne wà. Nezewegatete kwehe mehe eremumaw Minià izuapyapyr wà.

Jeremias 51:45

Teko Izaew ywy rehe har wà, pezàn a'e wi nehe. Pitàitàigatu uzepyro putar hekwahy haw tata zàwenugar wi wà nehe.

Jeremias 51:50

Uze'eg Tupàn Tuweharupi Wiko Ma'e kury. — Heremiaihu Mawiron pe wiko ma'e wà. Pehem pemàno haw wi. Peata nehe kury. Pepyta zo ma'e hàro pà nehe. Peiko muite peneko haw wi. Nezewe rehe we pema'enukwaw herehe nehe. Aiko pezar romo ihe. Pema'enukwaw Zeruzarez rehe nehe no.

Jeremias 51:6

Pezàn Mawiron wi nehe. Aze pepuner pezepyro haw rehe nehe, pezepyro nehe. Pezezuka kar zo zauxiapekwer wanupe Mawiron wanemiapo kwer ikatu 'ym ma'e hekuzaromo nehe. Ihe azepyk putar wanehe ihe nehe kury. Hezepyk àwàm nuzawy kwaw wanemiapo kwer nehe. Uhyk putar nehe.

Ezequiel 34:27

Ma'ywa'yw i'a putar wà nehe. Ko pe arozràn i'a tetea'u putar nehe no. Teko paw wiko katu uiwy rehe wà nehe. Apyro putar heremiaihu wapyhykar wanuwi ihe wà nehe. Amonohok putar kyhàhàm tàtà waàpixi haw nehe no. A'e 'ar mehe teko paw ukwaw putar Tupàn Tuweharupi Wiko Ma'e romo herekuwe haw wà nehe.

Zacarias 2:6

Uze'eg Tupàn Tuweharupi Wiko Ma'e teko wemiaihu wanupe. — Peinu katu ko ze'eg nehe. Peinu katu ko ze'eg nehe. Pe Mawiron pe har wanemipyhyk kwer pe wà. Pezàwehem a'e wi nehe. Pezàwehem peho a'e ywy kwarahy hemaw awyze har kutyr har wi nehe. Apumuhàmuhàz ywy nànàn ihe. Nezewe rehe we uhem Zeruzarez pe pezewyr haw 'ar kwez kury, i'i Tupàn.

Lucas 21:24

Zauxiapekwer a'e wà nehe, uzuka putar amo ko ywy rehe har a'e wà nehe, weraha putar amogwer amo ae ywy rehe a'e wà nehe no, wamuhàmuhàz pà a'e wà nehe no. Na'e Tupàn rehe uzeruzar 'ym ma'e wixe putar taw pe a'e wà nehe kury. Upyropyrog putar tàpuzgwer rehe wà nehe, u'ar tàpuz paw nehe.

Lucas 4:18

Zanezar Hekwe wiko herehe a'e. Ta'e herexak a'e xe, uze'eg puràg imume'u kar pà ihewe a'e xe. — Emume'u heze'eg puràg ma'e hereko 'ymar wanupe nehe, i'i ihewe. — Ikatu 'ym ma'e iapo har a'e wà, zemunehew paw pe wiko ma'e ài wanekon a'e wà. Emume'u heze'eg puràg wanupe nehe no, a'e mehe zemunehew paw wi uhem ma'e kwer ài wanekon putar wà nehe, aze uzeruzar hehe wà nehe, i'i ihewe. — Ikatu 'ym ma'e iapo har a'e wà, hehàpyhà 'ym ma'e ài wanekon a'e wà. Emume'u heze'eg puràg wanupe nehe, a'e mehe wiko putar hehàpyhàgatu ma'e romo a'e wà nehe, i'i ihewe. — Ikatu 'ym ma'e iapo har a'e wà, uzemumikahy a'e wà. Emume'u heze'eg puràg wanupe nehe. A'e mehe hurywete putar wà nehe, i'i ihewe.

Apocalipse 18:4

Na'e ainu amo ma'e ize'eg mehe ywate ihe kury. — Pehem pezuwà nehe, heremiruze'eg wà. Pehem pezuwà izuwi nehe. Peiko zo ipyr nehe, pezapo zo ikatu 'ym ma'e izàwe nehe. Aze pepyta wi wi peiko ipyr nehe, izuwi pehem 'ym pà nehe, pepuraraw putar ma'erahy nehe, ma'erahy ihem mehe a'e pe nehe.