Isaías 50:2 - Tupàn zeꞌeg

² Aha pepyro pà ihe. Màràzàwe tuwe ni amo noho kwaw heruwàxi pà wà. Apuenoz ihe. Màràzàwe tuwe ni amo nuwazar kwaw heze'eg penenoz mehe ihewe wà. Aipo ko 'ar rehe napuner kwaw pepyro haw rehe ihe. Aipo hekàgaw paw uhem ihewi a'e. Nan. Aze mo amume'u pitài ze'eg, yryhu typaw mo a'e. Amumaw mo 'y. Yrykawhu uzeapo mo ywyxiguhu romo. Pira umàno mo wiwez pà wà. Uzypyrog mo inem pà wà.

Isaías 50:2 ပူးပေါင်းရင်းမြစ်များ

Gênesis 18:14

— Aipo Tupàn nupuner kwaw wyzài ma'e iapo haw rehe, i'i izupe, hehe upuranu pà. Ko ma'e amume'u kwez newe. — Kwezomo kwarahy mehe azewyr putar xe nerexak pà ihe nehe. A'e kwarahy rehe ko zahy rehe heta putar imemyr Xar pe nehe, a'e kwez newe, i'i wi izupe.

2 Crônicas 32:15

A'e rupi, tuwe Ezeki nahemu'em kwaw peme nehe. Penemu'em zo pezeupeupe nehe. Pezeruzar zo ize'eg rehe nehe. Ni pitài tupàn nupuner kwaw wemiaihu wapyro haw rehe heipy wanuwi a'e wà, ni hepuner haw wi a'e wà no. Pezar nupuner kwaw pepyro haw rehe a'e nehe no, i'i Xenakeriw iko peme, i'i a'e ze'eg herur har Zeruzarez pe har wanupe.

Salmos 106:9

Uze'eg Tupàn Tuweharupi Wiko Ma'e. A'e rupi Yryhupiràg uxinig a'e. Wahaw teko yryhu wà. Nuzawy kwaw ywy uxinig ma'e wanupe.

Salmos 107:33

Uzapo Tupàn yrykawhu ywyxiguhu romo a'e. Ytyzuzàmaw uzapo ywy uxinig ma'e romo no.

Êxodo 14:21

Na'e Moizez upyho opo yryhu 'aromo kury. Pyhaw Tupàn Tuweharupi Wiko Ma'e umuhem kar ywytuhu heruwà kwarahy ihemaw wi kury. Ywytuhu umumaw pytun gatu 'y 'yryhu pe har imunyryk pà. Umuzekwa ywy yryhu iwype har kury. Ikàg kury. Uzemuza'ak 'y mokoz pehegwer romo.

Êxodo 14:29

Izaew a'e wà, wahaw yryhu ywy ikàg ma'e rehe wata pà wà. 'Y aiha katu ma'e wahurehe hin a'e. 'Y aiha katu ma'e wawyze har rehe hin no.

Êxodo 7:18

Ipira yrykawhu pe har umàno putar wà nehe. Inem putar yrykawhu pe nehe. Ezit ywy rehe har nupuner kwaw a'e 'y pupe uwi'u haw rehe wà nehe, ere izupe nehe, i'i Tupàn Moizez pe.

Êxodo 7:21

Ipira Niru pe har umàno wà. Yrykawhu inemahy kury. A'e rupi Ezit ywy rehe har nupuner kwaw i'y pupe uwi'u haw rehe wà. Heta tetea'u ma'eruwy kwer Ezit ywy nànàn kury.

Provérbios 1:24

Apuenoz ihe. — Pezur nehe, a'e peme. Naherenu kwaw pe. Napezekaiw kwaw herehe.

Isaías 11:15

Tupàn Tuweharupi Wiko Ma'e umuwipaw putar yryhu Xuwez her ma'e nehe. Omono kar putar ywytuaiw yrykawhu Ewparat her ma'e kutyr nehe, imumaw pà nehe. Xo 7 yrykaw zo heta we putar wà nehe. Natypy kwaw wà nehe. Wyzài teko upuner putar wanahaw paw rehe wata pà wà nehe.

Isaías 19:5

'Y Niru yrykawhu rupi uwyryk ma'e typaw putar nehe. Uxinig putar tuwe yrykawhu nehe.

Isaías 23:11

Tupàn Tuweharupi Wiko Ma'e upir opo yryhu rehe uzepyk pà: weityk tuwihawete upuner ma'e wà. — Pemumaw tawhu upuner ma'e Peni ywy rehe har pe wà nehe, i'i amo wanupe.

Isaías 36:20

Ma'e 'ar mehe tupàn a'e ywy paw wazar upyro umuwete har ureruwihawete wi wà. Nupuner kwaw wà. Hezar weityk wazar paw rupi a'e wà. A'e rupi apuranu penehe kury. Aipo Tupàn pezar upuner Zeruzarez ipyro haw rehe heruwihawete wi nehe. Nupuner kwaw nehe, i'i a'e tuwihaw a'e na'iruz Ezeki ze'eg herur har wanupe.

Isaías 41:28

Aekar a'e tupàn ihe wà. Ni amo nuzexak kar kwaw ihewe wà. Ni amo nupuner kwaw ma'e imume'u katu haw rehe ihewe wà. Apuranu wanehe. Nuwazar kwaw heze'eg ihewe wà.

Isaías 42:15

Amumaw putar ywytyr nehe. Amumaw putar ywytyruhu nehe no. Amuxinig putar ka'a paw wà nehe. Amuxinig putar ywyra paw wà nehe no. Azapo putar yrykawhu ywyxiguhu romo nehe. Amuypaw putar 'yzygwar paw nehe.

Isaías 43:16

Kwehe mehe Tupàn Tuweharupi Wiko Ma'e uzapo teko wanape yryhu myteromo a'e. 'Y typy a'u ma'e umunyryk a'e, pe iapo pà a'e, waho àwàm iapo pà a'e.

Isaías 44:27

Aze amume'u typaw pàwàm nehe, yryhu typaw putar nehe. Yrykawhu typaw putar wà nehe no.

Isaías 51:10

Eremuxinig yryhu. Eremumaw 'y typya'u ma'e. Erezapo pe yryhu myteromo. Eremono kar teko neremipyro kwer a'e pe rupi ne wà.

Isaías 54:6

Aze awa upuir wemireko wi, a'e hemireko kwer uzemumikahy a'e. Nezewegatete erezemumikahy ne no, Zeruzarez tawhu. Tupàn Tuweharupi Wiko Ma'e nerenoz nerereko nemuzewyr kar pà a'e. Nezar uze'eg nezewe. — Aipo amo awa upuner wemireko imono kar pà uzewi a'e, aze wereko a'e kuzà ukwàkwàmo mehe a'e.

Isaías 59:1

— Tupàn Tuweharupi Wiko Ma'e weityk ukàgaw kwehe arer a'e kury, peze ru'u peiko pezeupeupe. — Nupuner kwaw zanepyro haw rehe kury, peze peiko. — Nupuner kwaw ma'e henu haw rehe. Nupuner kwaw zanerenu haw rehe, peze peiko.

Isaías 59:16

Ipytuhegatu wemiaihu wapytywà har heta 'ymaw hexak mehe. A'e rupi ukàgaw rupi weityk waàmàtyry'ymar wà. Tupàn Ikatuahy Ma'e romo hekon a'e, a'e rupi weityk wà.

Isaías 63:13

Uwahaw kar 'y typya'u ma'e wanupe. Nuzeapo kwaw ikatu 'ym ma'e wanupe hahaw mehe. Nuzawy kwaw kawaru hehaite ma'e uzepyapi 'ym ma'e wà.

Isaías 64:6

Ure paw uruiko ikatu 'ym ma'e romo nerenataromo. Ureremiapo kwer ikatu ma'e nuzawy kwaw urekamir izipiw ma'e. Uruiko ma'e huwer uxinig ma'e kwer ài. Ureremiapo kwer ikatu 'ym ma'e urereraha muite ywytuaiw ài.

Isaías 65:12

Nezewe haw uzeapo putar peme nehe. Amo pezuka putar takihepuku pupe wà nehe. Apumuapyk kar putar pepenàràg rehe pezuka kar pà wanupe nehe. Ta'e ihe apuenoenoz ihe xe. Napewazar kwaw heze'eg ihewe. Aze'eg peme. Napezekaiw kwaw herehe. Pezapo ihewe iro ma'e. Pexaexak ma'e hemuikwahy kar haw no, i'i Tupàn.

Isaías 66:4

A'e rupi — Apuraraw kar putar ma'erahy wanupe nehe. Ukyze hezepykaw wi wà. Amono putar a'e hezepykaw wanehe ihe nehe, ta'e ainoz ihe wà xe. Ni amo nuwazar kwaw heze'eg ihewe wà. Aze'eg wanupe. Ni amo nuzekaiw kwaw herehe wà. Nan. Uzapo iro ma'e ihewe wà. Wexaexak hemuikwahy kar haw wà, i'i.

Jeremias 14:9

Màràzàwe tuwe ereiko awa imukuhemahy kar pyrer ài. Màràzàwe tuwe ereiko zauxiapekwer ikàg 'ym ma'e ài, amogwer wapytywà har 'ym ài. Ereiko ureinuinuromo ne, o Tupàn Tuweharupi Wiko Ma'e. Uruiko neremiaihu romo ure no. Urereityk zo pe nehe, i'i hemiaihu ihewe wà.

Jeremias 35:14

Zonanaw izuapyapyr weruzar ize'eg wà. Nu'u kwaw win wà. Te kutàri ni amo nu'u kwaw wà. Ta'e paw rupi weruzar ize'eg imur pyrer wà xe. Tuweharupi aze'eg peme ihe. Naperuzar kwaw heze'eg.

Jeremias 35:15

Tuweharupi amono kar heremiruze'eg heze'eg imume'u har peme ihe wà. — Petyryk ikatu 'ym ma'e penemiapo wi nehe, i'i peme wà. — Pezapo ikatu ma'e nehe, i'i peme wà. — Pemuwete zo amo tupàn pe wà nehe. Pema'ereko zo wanupe nehe, i'i peme wà. Nezewe mehe pepuner putar ko ywy peipy wanupe heremimono kwer rehe peneko haw rehe nehe. Napepurenu wer kwaw waze'eg rehe. Napepureruzar wer kwaw waze'eg rehe.

Jeremias 5:1

Zeruzarez pe har wà. Peho nahu rupi nehe. Peme'e ma'e tawhu pupe har paw wanehe nehe. Pexak ma'e peneha pupe nehe. Pekar teko ikatu pe har wà nehe. Aipo pepuner amo ikatu ma'e iapo har hexakaw rehe. Aipo pepuner pitài ikatu ma'e iapo pà uzeagaw ma'e hexakaw rehe. Aze pexak pitài nehe, Tupàn umunàn putar Zeruzarez wanemiapo kwer wanehe uzepyk 'ym pà nehe.

Jeremias 7:13

Pezapo a'e ikatu 'ym ma'e heremimume'u kwer paw rupi pe. — Pezapo zo agwer ma'e nehe, a'e tetea'u peme. Nezewe rehe we napepurenu wer kwaw herehe. Penenoz mehe napewazar kwaw heze'eg ihewe. Ihe Tupàn Tuweharupi Wiko Ma'e aiko ko ma'e imume'u har romo ihe.

Jeremias 7:27

— Peiko teko Tupàn heruzar 'ymar romo, ere wanupe nehe. Aiko Tupàn Tuweharupi Wiko Ma'e romo. — Emume'u ureremiapo kwer ikatu 'ym ma'e urewe nehe, ni'i kwaw a'e teko ihewe kury. Hemu'em ihewe wà. Nuzeagaw kwaw ikatu ma'e iapo pà wà kury.

Jeremias 8:6

Azeapyaka katu peze'eg rehe. Napemume'u kwaw azeharomoete har. Ni amo nuzemumikahy kwaw wemiapo kwer ikatu 'ym ma'e rehe wà. — Ma'e ikatu 'ym ma'e azapo ihe, ni'i kwaw amo wà. Pitàitàigatu wata oho wape rupi wà. Nuzawy kwaw kawaru zeàmàtyry'ymawhu pe uzàn ma'e wà.

Daniel 3:15

Aipo peapyk putar pepenàràg rehe imuwete pà nehe kury, imupu pyr imupu mehe kury. Aze nan kwaw nehe, zauxiapekwer peneityk putar tatahu pupe wà nehe. Ma'enugar tupàn upuner pepyro haw rehe nehe, i'i wanupe.

Daniel 3:29

A'e rupi azapo kar ko ma'e peme ihe nehe kury. — Pekwaw Xanarak, Mezak, Amenenek pe wà kury. Pekwaw wazar Tupàn no. Aze wyzài teko uze'eg zemueteahy her rehe nehe, zauxiapekwer upei'ài'àg putar a'e teko a'e wà nehe. Weityk putar wanàpuz wà nehe no: teko wyzài hexakaw hereko har wà, wyzài ywy rehe har wà, wyzài ze'eg rupi uze'eg ma'e wà. Ta'e naheta kwaw amo tupàn purupyro ma'e izàwenugar wà xe.

Daniel 6:20

Uze'eg uzemumikahy pà. — Taniew Tupàn wikuwe ma'e hemiruze'eg, i'i izupe. — Eremuwete katu Tupàn nezar. Aipo upuner nepyro haw rehe zàwàruhu wanuwi, i'i izupe.

Daniel 6:27

Upurupytywà a'e. Upurupyro no. Ywak rehe, ywy rehe, uzapo ikatuahy ma'e purumupytuhegatu kar haw. Uzapo temixak pixik 'ym no. A'e ae upyro Taniew a'e, Ipyro pà zàwàruhu ipyàpe wi a'e, i'i tuwihawete uze'eg pape rehe imuapyk kar pà.

Oséias 11:2

Tuweharupi ainoz wiwi hezeupe. Tuweharupi utyryk wewer ihewi. Heremiaihu uzuka ma'ea'yr tupàn ua'u Ma'aw her ma'e henataromo wà. Wapy yhyk tupàn a'ua'u wamuwete katu pà wà no.

Oséias 11:7

Heremiaihu nukyze kwaw ihewi wà. Naheputar kwaw uwihawete romo wà. A'e rupi zauxiapekwer amo ae ywy rehe har weraha putar wemipyhyk kwer romo wà nehe. Ni amo nupuner kwaw wapyro haw rehe wà nehe.

Naum 1:4

Uze'egahy Tupàn yryhu pe. Na'e uxinig yryhu. Umuxinig kar Tupàn yrykaw paw wà no. Ka'api'i Màxà pe har, ka'api'i ywytyr Karamew rehe har no, uxinig wewer upaw rupi no. Ma'eputyr ywytyr Irimano ywy rehe har wanehe har ipyw a'e wà no.

Habacuque 3:8

Aipo erekwahy yrykawhu wanupe, Tupàn Tuweharupi Wiko Ma'e. Aipo erekwahy yryhu wanupe. Aipo a'e rupi erezur nereimaw kawaru waku'az wà. Aipo a'e rupi erezur neàmàtyry'ymar waneityk arer romo ywyramawa pupe.

Números 11:23

Na'e Tupàn Tuweharupi Wiko Ma'e uwazar Moizez ze'eg izupe. — Aipo aiko ikàg 'ym ma'e romo nezewe ihe. Tàrityka'i erexak putar hepuner haw nehe kury. Na'arewahy erexak putar uzeapo ma'e ràm nehe kury, i'i izupe.

Marcos 4:39

Ume'e Zezuz kury, — Epytu'u ywytu, i'i ywytu pe. — Epytu'u 'y, i'i 'y pe no. — Epytu'u nepenopenog ire 'y, i'i izupe. Upytu'u tuwe ywytu. Numyz kwaw 'y a'e kury.

João 1:11

Uzexak kar ko ywy rehe, tua'u ko ywy rehe no. Umume'u Tupàn ze'eg oho iko wànàm wanupe. Nuzeruzar kwaw hehe a'e wà. — Nereiko kwaw ureruwihawete romo, i'i izupe wà.

João 3:19

Aze xiraha ikatu 'ym ma'e tatainy huwake nehe, xixak putar ikatu 'ymaw nehe. Aiko tatainy zàwenugar romo ihe. Ahem tuwà ko ywy rehe. Nahekatu kwaw teko wanupe. Nuputar kwaw tatainy wà. Uputar ipytunaw wà, ta'e ikatu 'ym ma'e iapo har romo wanekon wà xe. A'e rupi Tupàn uzepyk putar wanehe nehe.

Josué 3:16

Tàrityka'i 'y upytu'u uwyryk ire kury. Upu'àm ywytyra'i zàwenugar romo uzeapo pà muite a'e wi wà. Tawhu Ànàw her ma'e huwake upu'àm. Zàretà ywy rehe tuz. 'Y Yryhu Umàno Ma'e Kwer her ma'e kutyr uwyryk ma'e typaw a'e. A'e rupi Izaew izuapyapyr uwahaw yrykaw Zeriko tawhu huwake wà kury.