Isaías 5:28 - Tupàn zeꞌeg

²⁸ Wanu'yw hakwa katu. Uhyk waywyrapar ma'ezywà àwàm rehe. Waneimaw kawaru wapyàpe tàtàahy ita ài wà. Ywyramawa iapu'a ma'e nuzawy kwaw ywytu uzewara ma'e.

Isaías 5:28 ပူးပေါင်းရင်းမြစ်များ

Salmos 120:4

Upyro putar u'yw haime ma'e amo zauxiapekwer wi nehe. Pezywà putar ipupe penehe uzepyk pà nehe. Upyhyk putar tàtàpyzgwer imono pà penehe nehe, penehe uzepyk pà nehe.

Salmos 45:5

Haime neru'yw apyr. Ukutuk neàmàtyry'ymar wazà'à. Teko ywy nànànar u'ar nepy huwake wà.

Isaías 13:18

Uzuka putar kwàkwàmo u'yw pupe wà nehe. Uzuka putar kuzàwaza u'yw pupe wà nehe no. Uzuka putar kwarearer wà nehe. Uzuka putar kuzàtàigwer wà nehe no. Uzuka putar pixika'i ma'e wà nehe no. Uzuka putar wapuhareko 'ym pà wà nehe.

Isaías 21:1

Na'aw ze'eg Mawiron kutyr har xe kury: Ywyxiguhu yryhu iwyr har, i'i teko izupe wà: Ywytuaiw upeipeir ywy kwarahy hemaw awyze har kutyr har hereko. Nezewegatete puruzuka ma'e ràm ur putar ywyxiguhu wi a'e. Teko ukyze tuwe a'e ywyxiguhu wi wà.

Isaías 66:15

Tupàn Tuweharupi Wiko Ma'e ur putar tata ipyteromo nehe. Hemirur ywyramawa zeàmàtyry'ymawhu pe har nuzawy kwaw ywytuhu wà. Ur putar wekwahy haw heityk pà wàmàtyry'ymar wanehe nehe. Wanehe uzepykaw nuzawy kwaw tata heny kwer nehe.

Jeremias 4:13

Aze'eg Zuta ywy rehe har wanupe kury. — Peme'egatu nehe. Peàmàtyry'ymar ur waiko ywàkun ài wà. Wama'e ywyramawa nuzawy kwaw ywytuaiw wà. Waneimaw kawaru iàkwen wera'u wiràhu wanuwi wà. Zanezuka putar wà nehe. Zanemumaw putar wà nehe.

Jeremias 47:3

Kawaru wapy uwànoànog putar wà nehe. A'e teko wenu putar wànoànog mehe wà nehe. Wenu putar ywyramawa zeàmàtyry'ymawhu pe har wà nehe no. Wànoànog putar wà nehe. Awa nuzewyr kwaw wa'yr wapiaromo wà nehe. Ta'e wazywa na'ikàg kwaw wà xe. U'ar putar wà nehe.

Jeremias 5:16

Zauxiapekwer a'e ywy rehe har ipuruzukaiwahy wà. Uzywà teko u'yw pupe wazuka pà wapuhareko 'ym pà wà.

Ezequiel 26:11

Kawaru ku'az har wixe putar nahu rupi wà nehe, teko nepupe har wazuka pà takihepuku pupe wà nehe. Weityk putar neyzyta ikàg ma'e ywy rehe wà nehe.

Ezequiel 38:9

A'e a'e, hemiruze'eg a'e wà no, teko amo ywy rehe har tetea'u hehe we har a'e wà no, ur putar ikutyr àmànuhu ywytuaiw inuromo har ài wà nehe. Upyk putar ywy ywàkun ài wà nehe no.

Daniel 11:40

'Ar iahykaw rehe har ihem mehe, Ezit wanuwihawete uzàmàtyry'ym putar Xir wanuwihawete wà a'e nehe. Xir wanuwihawete oho putar ikutyr upuner haw paw heraha pà nehe: ywyramawa zeàmàtyry'ymawhu pe har, wemiruze'eg zauxiapekwer kawaru iku'az har wà no, kanuhu tetea'u no. Xir hemiruze'eg zauxiapekwer wixe putar Ezit ywy rehe 'y typy ma'e uwyrykahy ma'e ài wà nehe.

Miquéias 4:13

Tupàn Tuweharupi Wiko Ma'e uze'eg kury. — Teko Zeruzarez pe har wà. Pepu'àm peàmàtyry'ymar wazuka pà nehe. Apumukàg putar ihe nehe. Peiko putar tapi'ak awa i'ak itaper iapo pyrer hereko har ài nehe, ipyàpe itamorog iapo pyrer hereko har ài nehe. Pemumaw putar teko ywy tetea'u wanehe har wà nehe. Aiko ywy nànànar wazar romo ihe. Pemur putar wama'e wakàgaw rupi wanemimono'og kwer ihewe nehe.

Naum 3:2

Peinu katu kawaru wapetekaw ipok mehe kury. Peinu katu ywyramawa iànoànog mehe. Pe pe ur kawaru waiko uzàn pà wà. Ywyramawa zeàmàtyry'ymawhu pe har ur waiko uzàn pà wà no.

Juízes 5:22

Na'e kawaru uzàuzàn a'e wà. Upyropyrog ywy a'e wà.