Isaías 5:25 - Tupàn zeꞌeg

²⁵ A'e rupi Tupàn Tuweharupi Wiko Ma'e wikwahy wemiaihu wanupe. Upyho opo wanehe uzepyk pà. Ywytyruhu uryryryryz wà. Zauxiapekwer wezar umàno ma'e kwer wanetekwer nahu rupi heityk pyrer ài wà. Nezewe rehe we Tupàn ikwahy haw nupytu'u kwaw. Upyho opo iko wanehe uzepyk àwàm rehe rihi.

Isaías 5:25 ပူးပေါင်းရင်းမြစ်များ

1 Reis 14:11

Neànàm tawhu pe umàno ma'e ràm a'e wà nehe, zawar u'u putar wanetekwer wà nehe. Kaiwer pe ka'a pe umàno ma'e ràm a'e wà nehe, apitaw u'u putar wanetekwer wà nehe. Ihe Tupàn Tuweharupi Wiko Ma'e amume'u a'e ma'e ihe kury, i'i Tupàn ze'eg imume'u har a'e kuzà pe, Tupàn uze'eg imume'u pà izupe.

1 Reis 16:4

Neànàm tawhu pupe umàno ma'e ràm a'e wà nehe, zawar u'u putar wano'o kwer wà nehe. Kaiwer pe ka'a pe umàno ma'e ràm a'e wà nehe, apitaw u'u putar wano'o kwer wà nehe, i'i Tupàn newe, i'i Zeu Maaza pe.

1 Reis 21:24

Zawar u'u putar iànàm tawhu pe umàno ma'e ràm wanetekwer wà nehe no. Apitaw u'u putar iànàm kaiwer pe umàno ma'e ràm wanetekwer wà nehe no, i'i iko newe, i'i Eri Akaw pe.

2 Reis 13:3

A'e rupi Tupàn Tuweharupi Wiko Ma'e wikwahy Izaew wanehe kury. A'e rupi weityk kar Izaew Azaew Xir wanuwihawete pe wà, ta'yr Menanaz pe wà no.

2 Reis 9:37

Ho'o kwer ipegegwer uhàuhàz putar ma'e repuxi kwer ài nehe. — Na'aw Zezamew hetekwer xe, teko nupuner kwaw u'e haw rehe wà nehe, i'i Eri kwehe mehe, i'i Zeu uzehe we har wanupe.

2 Crônicas 36:16

Teko upuka Tupàn ze'eg imume'u har wanehe wà. Nuzekaiw kwaw waze'eg rehe wà. Uze'eg urywahyahy wanupe wà. Iahykaw rehe Tupàn wikwahy tuwe wemiaihu wanupe kury. A'e rupi naheta kwaw wapyro haw.

Jó 9:13

Tupàn nuzewyr kwaw wikwahy haw wi. Àzàg Haaw her ma'e imyrypar u'ar heityk pyrer romo ipy huwake wà.

Salmos 106:40

Na'e Tupàn Tuweharupi Wiko Ma'e wikwahy wemiaihu wanupe kury. Iroahy tuwe izupe wà.

Salmos 114:7

Eryryryryz zanezar tur mehe nehe, ywy. Eryryryryz Tupàn Zako izar henataromo nehe,

Salmos 18:7

Na'e ywy uryryryryz tuwe uzemuaiw pà a'e. Ywytyr ipy uryryryryz uwauwak pà a'e wà no, Ta'e wikwahy Tupàn a'e xe.

Salmos 68:8

Ywy uryryryryz a'e. Ywak uzakook àmàn a'e no, Ta'e ne Tupàn Xinaz rehe har ne xe, Izaew wazar ne xe, erezur a'e pe ne xe.

Salmos 77:18

Àmàn neremimuànoànogaw uhàuhàz ywy nànàn no. Àmàn iweraw paw uhyape katu ywy nànàn no. Tupàn umuryryz kar ywy. Ywy uryryryryz a'e.

Salmos 78:38

Nezewe rehe we Tupàn upuhareko wemiaihu wà. Numumaw kwaw wà. Umunàn wanemiapo kwer wanuwi uweharaz tà. Tuweharupi umuakuir wekwahy haw a'e. Umumaw wekwahy haw a'e.

Salmos 83:10

Eremumaw a'e zauxiapekwer Enor ywy rehe ne wà. Wanetekwer inem ywy rehe wà.

Êxodo 7:19

Uze'eg wi Tupàn Tuweharupi Wiko Ma'e Moizez pe kury. — Eze'eg nezewe Àràw pe kury. — Epyhyk nepokokaw nepo pe kury. Epyho nepo 'y Ezit ywy rehe har kutyr kury: Yrykawete, yrykaw teko wanemiapo kwer, ypawete, ypaw teko wanemiapo kwer. A'e 'y paw uzeapo putar ma'eruwy kwer romo nehe. Heta putar ma'eruwy kwer yrykaw nànàn, yryhu nànàn no, y'a ywyra iapo pyrer nànàn, y'a ita iapo pyrer nànàn no, ere izupe nehe, i'i Tupàn Tuweharupi Wiko Ma'e Moizez pe.

Isaías 10:4

Zauxiapekwer peneraha putar wemipyhyk kwer romo wà nehe. Pezuka putar zeàmàtyry'ymawhu pe wà nehe. Nezewe rehe we nahakuir kwaw Tupàn ikwahy haw. Upir wiwi opo penehe uzepyk pà.

Isaías 10:6

Azàmàtyry'ym kar amo teko herehe uzeruzar 'ym ma'e a'e tuwihawete pe ihe wà. Aikwahy a'e teko wanupe. — Epyro wama'e paw heraha pà wanuwi nehe, a'e iteko izupe. — Epyropyrog wanehe to'om nahu rupi har ài nehe.

Isaías 14:19

Xo ne zo teko nanetym kwaw a'e wà. Ereiko kwarer izexak kar mehe umàno ma'e kwer ài. Teko uhuuhuk nerexak mehe wà: weityk neretekwer katu pe wà. A'e re upyropyrog hehe wà. Zauxiapekwer wanetekwer zeàmàtyry'ymawhu pe umàno ma'e kwer tetea'u upyk neretekwer wà. A'e zauxiapekwer uzetym oho ywykwar pupe ita tetea'u heta haw pupe wà.

Isaías 23:11

Tupàn Tuweharupi Wiko Ma'e upir opo yryhu rehe uzepyk pà: weityk tuwihawete upuner ma'e wà. — Pemumaw tawhu upuner ma'e Peni ywy rehe har pe wà nehe, i'i amo wanupe.

Isaías 25:11

Moaw upyho putar opo u'ytaw pà uzeagaw ma'e ài wà nehe. Nezewe rehe we Moaw wiko wera'u ma'e wiko putar ikàg 'ym ma'e Tupàn henataromo wà nehe.

Isaías 29:2

A'e re Tupàn uzepyk putar a'e tawhu Tupàn pe imonokatu pyrer her ma'e rehe nehe. A'e pe har uzai'o putar wà nehe. Uzemumikahy putar wà nehe no. Tawhu nuzawy kwaw Tupàn henataromo ma'ea'yr hapy haw tuwykwer tetea'u rehe har nehe.

Isaías 42:25

A'e rupi uzakook wekwahy haw zanerehe. Uzepyk zanerehe zeàmàtyry'ymawhu herur pà zanewe. Ikwahy haw ukaz tata ài ureiwyr. Nezewe rehe we ni amo nuzekaiw kwaw hehe wà. Ni amo zanerehe we har nuzemu'e kwaw ma'e rehe wà. Nukwaw kwaw ma'e wà.

Isaías 51:20

Ko 'ar rehe nepupe har iàkàzym uma'uhez tà wà. U'ar nahu rupi pe za'akaw rehe wà. Nuzawy kwaw àràpuhàràn hehaite ma'e uzepyhykaw rehe har wà. U'ar a'e wà, ta'e Tupàn Tuweharupi Wiko Ma'e wikwahy wanupe a'e xe, ta'e izepyk wer wanehe a'e no xe.

Isaías 64:3

Ikatuahy ma'e purumupytuhegatu kar haw iapo mehe, ma'e ureremiàro 'ym iapo mehe, erewezyw ywak wi ne. Ywytyruhu uryryryryz nerenataromo wà.

Isaías 66:15

Tupàn Tuweharupi Wiko Ma'e ur putar tata ipyteromo nehe. Hemirur ywyramawa zeàmàtyry'ymawhu pe har nuzawy kwaw ywytuhu wà. Ur putar wekwahy haw heityk pà wàmàtyry'ymar wanehe nehe. Wanehe uzepykaw nuzawy kwaw tata heny kwer nehe.

Isaías 66:24

A'e re uhem putar tawhu wi umàno ma'e kwer wanetekwer wanexak pà wà nehe. Umàno a'e teko wà, ta'e upytu'u hereruzar ire wà xe. Amirikur a'e teko wanetekwer i'u har numàno pixik kwaw wà nehe. Tata a'e teko wanapy har nuwew pixik kwaw nehe no. Wikuwe ma'e paw ihuhuk wer putar wanexak mehe wà nehe. Ihe Tupàn Tuweharupi Wiko Ma'e aze'eg kwez ihe kury. Upaw.

Isaías 9:11

A'e rupi Tupàn Tuweharupi Wiko Ma'e umur kar putar wàmàtyry'ymar a'e wà kury. — Pezàmàtyry'ym Izaew pezuwà pe wà nehe, i'i putar wanupe kury.

Isaías 9:16

Weraha tuwihaw teko pe iaiw ma'e rupi wà. A'e rupi teko wata e ukàzym ma'e ài wà.

Isaías 9:17

Zanezar nupuhareko kwaw kwàkwàmo wà nehe, nupuhareko kwaw kuzàwaza wà nehe. Nupuhareko kwaw tu 'ym ma'e wà nehe. Nupuhareko kwaw imen umàno ma'e kwer wà nehe, ta'e ni amo nuzeruzar kwaw Tupàn rehe wà xe. Na'ikatu kwaw upaw rupi wà. Uze'eg he'o ma'e ài wà. Nezewe rehe we nahakuir kwaw Tupàn ikwahy haw. Upir wiwi opo wanehe uzepyk pà.

Isaías 9:20

Te wa'yr wano'o kwer u'u wà. Pitàitàigatu u'u wyzài ma'e wemipykyk kwer wà. Nezewe rehe we ima'uhez we waiko wà.

Isaías 9:21

Manaxe izuapyapyr uzàmàtyry'ym Eparai izuapyapyr oho wà. Eparai uzàmàtyry'ym Manaxe oho wà no. Uzemono'og oho Zuta izuapyapyr wàmàtyry'ym pà wà no. Nezewe rehe we nahakuir kwaw Tupàn ikwahy haw. Upir wiwi opo wanehe uzepyk pà.

Jeremias 15:3

— Ihe Tupàn Tuweharupi Wiko Ma'e amume'u a'e iaiw ma'e uzeapo àwàm ihe. Uzeapo putar nehe. Umàno putar zeàmàtyry'ymawhu pe wà nehe. Zawar umutyk putar wanetekwer wà nehe. Wiràmiri u'u putar wà nehe no. Miar u'u putar ikurer wà nehe no.

Jeremias 16:4

Umàno putar ma'eahy haw iaiw ma'e wi wà nehe. Ni amo nuzai'o kwaw wamàno awer rehe wà nehe. Ni amo nuzutym kwaw wanetekwer wà nehe. Uhàuhàz putar tepuxi kwer ài ywy rehe wà nehe. Zauxiapekwer uzuka putar a'e teko zeàmàtyry'ymawhu pe wà nehe. Aze ru'u, umàno ma'uhez taw wi wà nehe. Wiràmiri wà nehe, miar hehaite ma'e wà nehe no, u'u putar wanetekwer wà nehe.

Jeremias 17:4

Pehem putar peho ywy peme heremimur kwer wi nehe. Apumuigo kar putar amo wanupe uma'ereko e ma'e romo ihe nehe no, ywy penemigwaw 'ym rehe ihe nehe no. Ta'e hekwahy haw nuzawy kwaw tata a'e xe. Nuwew pixik kwaw nehe, i'i Tupàn.

Jeremias 4:24

Ame'e ywytyruhu wanehe. Uryryryryz waiko wà. Ywytyr uzeapawypawyw kwe rupi wà, ko rupi wà.

Jeremias 4:8

A'e rupi, pemunehew ma'eryru pàn iànàm ma'e iapo pyrer nehe, pezemumikahy haw pexak kar putar nehe. Pemume'uahy pezemumikahy haw pezai'o pà nehe. Ta'e Tupàn ikwahy haw tata zàwenugar nuhem kwaw Zuta piar wi xe.

Jeremias 6:12

Amo wiko putar wanàpuz pupe wà nehe. Amo upyhyk putar waiwy wà nehe, wanemireko wà nehe no. Azepyk putar teko ko ywy rehe har wanehe ihe nehe. Ihe Tupàn Tuweharupi Wiko Ma'e aiko ko ma'e imume'u har romo ihe.

Jeremias 8:2

Umuhàmuhàz putar wàkàgwer ywy rehe kwarahy iwy pe wà nehe, zahy iwy pe wà nehe no, zahytata iwy pe wà nehe no. A'e 'ym mehe a'e umàno ma'e kwer umuwete katu a'e kwarahy, zahy, zahytata wà no. Uma'ereko wanupe wà no. Upuranu wanehe wà. Uzamutar katu tuwe wà no. Umuhàmuhàz putar wàkàgwer wà nehe. Ni amo nomono'og kwaw wà nehe. Nuzutym wi kwaw wà nehe. Upyta putar ywy rehe katu pe. Nuzawy kwaw ma'ea'yr hepuxi nehe.

Jeremias 9:22

Umàno ma'e kwer wanetekwer u'ar putar wà nehe. Nuzawy kwaw ma'ea'yr hepuxi kaiwer pe imuhàmuhàz pyrer wà nehe. Nuzawy kwaw haryw ipo'o har wapo wi u'ar ma'e kwer wà nehe no. Ni amo nomono'og kwaw a'e haryw wà. Tupàn umume'u kar a'e ze'eg ihewe a'e, a'e wanupe.

Lamentações de Jeremias 5:22

Aipo urereityk pe azeharomoete. Aipo urewe nekwahy haw nupaw pixik kwaw nehe. Upaw.

Ezequiel 15:6

A'e ma'e imume'u mehe pezar Tuweharupi Wiko Ma'e wexak kar amo ma'e peme. — Teko omonohok uwà 'yw ka'a wi heraha pà hapy pà wà. Nezewegatete Azo'ok putar teko Zeruzarez pe wiko ma'e ihe wà nehe,

Ezequiel 30:25

Azeharomoete azo'ok putar Ezit wanuwihawete ikàgaw izuwi nehe. Amukàg putar Mawiron wanuwihawete nehe. Hetakihepuku izupe imono mehe werupoe'eg Ezit ikutyr nehe. A'e 'ar mehe teko paw ukwaw putar Tupàn Tuweharupi Wiko Ma'e romo herekuwe haw wà nehe.

Ezequiel 6:14

Na'e apyho putar hepo ihe nehe. Amumaw putar waiwy ihe nehe. Azypyrog ywyxiguhu kwarahy ihemaw awyze har kutyr har rehe nehe. Aha putar Himina tawhu kwarahy heixe haw awyze har kutyr har rehe har pe nehe no. Amuhem kar putar teko paw a'e ywy wi ihe wà nehe. Napuhareko kwaw wyzài Izaew waneko haw nehe. Nezewe mehe teko paw ukwaw putar Tupàn Tuweharupi Wiko Ma'e romo herekuwe haw a'e wà nehe.

Daniel 9:16

O urezar, erepurupuhareko katu ne. Eikwahy wiwi zo nehe. Eikwahy wiwi zo Zeruzarez pe. Erezapo tawhu nereko haw romo ne. Ywytyr nezeupe neremimonokatu kwer rehe tuz. Ikatu 'ym ma'e uruzapo nerenataromo. Ureipy uzapo ikatu 'ym ma'e nerenataromo wà no. A'e rupi teko ko ywy huwake har rehe har uze'eg urywahyahy waiko Zeruzarez rehe wà, teko neremiaihu wanehe wà no.

Oséias 14:4

Tupàn Tuweharupi Wiko Ma'e uze'eg nezewe. Amukatu putar heremiaihu ihe wà nehe, herehe wazeruzar 'ymaw wi ihe wà nehe. Azamutar katu putar hepy'a nànàn ihe wà nehe. Ta'e apytu'u wanehe hekwahy re ihe xe.

Amós 8:8

A'e rupi ywy uryryryryz putar nehe. Ywy rehe har paw uzai'o putar uzemumikahy haw rehe wà. Ywy uzeupir putar nehe. A'e re wezyw putar nehe. Nuzawy kwaw 'y penopenogaw yrykaw Niru rehe har.

Miquéias 1:4

Ywytyr uzekazeka ipy iwype wà. Nuzawy kwaw iraity tata pupe typyràn ma'e wà. Ywyàpyznaw uzewàpytymawok putar wà nehe. Nuzawy kwaw 'y tetea'u ywy wamyteromo uwyryk ma'e.

Naum 1:5

Ywytyruhu uryryryryz henataromo wà. Ywytyra'i uzekazeka wà. Izexak kar mehe ywy a'e, hehe har paw a'e wà no, uryryryryz a'e wà no.

Habacuque 3:10

Ywytyruhu nerexak wà. Na'e uryryryryz wà. U'ar amo 'y tyapu ma'e ywak wi. 'Y ywy iwype har okororo wà. 'Ykotok aiha katu ma'e upu'àm wà.

Sofonias 1:17

Tupàn Tuweharupi Wiko Ma'e uze'eg nezewe kury. — Amu'ar kar putar iaiw ma'e tetea'u teko wanehe ihe nehe. A'e mehe wata e putar ko rupi wà nehe, kwe rupi wà nehe no, hehàpyhà 'ym ma'e ài wà nehe. A'e teko uzapo ikatu 'ym ma'e herenataromo wà, heze'eg heruzar 'ym pà wà. A'e rupi azakook kar putar wanuwykwer 'y ài ihe nehe. Amo weityk putar wanetekwer ity imono'ogaw pe wà nehe.

Deuteronômio 31:17

A'e ma'e iapo mehe aikwahy putar wanupe nehe. Apuir putar wanuwi nehe. Napytywà kwaw ihe wà nehe, a'e rupi amo umumaw putar Izaew a'e wà nehe. Iaiw haw tetea'u ur putar wanehe nehe. Zawaiw katu haw tetea'u ur putar wanehe nehe no. A'e rupi uze'eg putar nezewe wà nehe. — Ko ma'erahy xipuraraw zaiko zane, ta'e Tupàn Zanezar nuiko kwaw zaneinuinuromo a'e xe, i'i putar wà nehe.

Deuteronômio 31:18

A'e 'ar mehe aityk putar azeharomoete ihe wà nehe. Ta'e uzapo ikatu 'ym ma'e tetea'u a'e wà xe. Umuwete amo tupàn a'e wà.

1 Tessalonicenses 2:16

Urepurumume'u wer zepe Tupàn ze'eg rehe zutew 'ygwer wanupe ure. Aze mo urumume'u wanupe, aze mo uzeruzar hehe wà, a'e mehe mo Tupàn upyro a'e zutew 'ym tatahu wi a'e wà. Nuzepyk iwer mo wanehe. Nan kwaw pa. Uremupytu'u kar imume'u re wà. A'e 'ym mehe, uzapo ikatu 'ym ma'e tetea'u oho waiko a'e wà. Uremupytu'u kar ire Tupàn wikwahy wanupe azeharomoete a'e. A'e rupi uzepyk putar wanehe nehe.

Apocalipse 20:11

Na'e aexak tuwihaw henaw uhua'u ma'e xig ma'e ihe kury. Aexak hehe wapyk ma'e ihe no. Na'e ywy a'e, ywak a'e no, ukàzym oho a'e wi izuwi a'e wà. Ni amo nuexak pixik kwaw waho haw wà. Ni amo nuexak kwaw a'e re wà.