Isaías 5:14 - Tupàn zeꞌeg

¹⁴ Umàno ma'e kwer wapyta haw nuzawy kwaw zàwàruhu ima'uhez ma'e nehe. Uzurupeka putar a'e teko wamokon pà wanuwihaw wamokon pà nehe. A'e teko wiko upynyk pà uka'u pà wà. Wiko iaiw ma'e iapo pà wà no.

Isaías 5:14 ပူးပေါင်းရင်းမြစ်များ

Salmos 49:14

Wamono'ogar weraha àràpuhàràn a'e wà. Nezewegatete teko wamàno haw weraha a'e teko a'e wà no. Weraha wà. Umàno putar àràpuhàràn izuka pyràm ài wà. Iku'em mehe ikatu ma'e weityk putar a'e teko wà. Wanetekwer inem putar umàno ma'e kwer wapyta haw pe wà nehe, muite waneko awer wi wà nehe.

Salmos 55:15

Tuwe màno haw ur na'arewahy heàmàtyry'ymar wanehe nehe. Tuwe wikuwe putar umàno ma'e kwer wapyta haw pe oho mehe wà nehe, ta'e ikatu 'ymaw upyta wanàpuz me xe. Upyta wapy'a pupe no.

Provérbios 1:12

Wanexak mehe wikuwe putar wà nehe. Na'ima'eahy kwaw wà rihi. Ximumaw putar zane wà nehe.

Provérbios 27:20

Teko wanemimutar nuzawy kwaw umàno ma'e kwer wapyta haw. Tuweharupi heta we pyta àwàm amo pe nehe. Uhyk wanupe upaw rupi.

Provérbios 30:16

Umàno ma'e kwer wapyta haw. Kuzà imemyr 'ym ma'e. Ywy uxinig ma'e kwer 'y tuweharupi iputar har. Tata tàpuz hapy har.

Isaías 14:11

— Aiko wera'u pewi, ere urewe kwehe mehe. Ma'e ere iko ko 'ar rehe. Teko umupu uwioràwiràn nerenataromo wà. Upytu'u wà kury. Imupu arer wiko xe umàno ma'e kwer wapyta haw pe wà. Ere'aw putar amirikur wa'aromo xe ne nehe kury. Merua'yr upyk putar neretekwer wà nehe.

Isaías 14:9

Ywy iwy pe har umàno ma'e kwer wapyta haw pe har, uzemuàgà'ym waiko Mawiron wanuwihawete imuixe katu kar àwàm rehe wà. Ywy rehe arer ikàg ma'e wanekwe ume'e wà kury. Tuwihawete kwehe arer upu'àm uwenaw wi wà no.

Isaías 21:4

Nakwaw kwaw ma'e. Aryryryryz hekyze pà. — Pyhaw hekatu wewer putar nehe, a'e zepe hezeupe. Pyhaw akyze wera'u.

Isaías 24:8

Teko numupu kwaw ipu ma'e wà kury. Numupu kwaw uwioràwiràn uzegar haw hurywete ma'e imuzàg pà wà. Mynykaw iapo arer upytu'u iapo re wà. Uzegar ma'e kwer upytu'u uzegar ire wà no.

Isaías 30:33

Kwehe mehe Tupàn umuàgà'ym tatahu. Wapy putar Axir wanuwihawete ipupe a'e nehe. A'e tatahu ywykwaruhu iànàm ma'e ohoete ma'e pupe hin. Uhyk zepe'aw ukaz ma'e ràm. Tupàn Tuweharupi Wiko Ma'e ipytuhemaw a'e, nuzawy kwaw ywyku'i exopere her ma'e ukaz ma'e uwyryk ma'e a'e. Umunyk putar tata zepe'aw rehe nehe.

Ezequiel 7:12

Uhem amo 'ar iko. Na'iàrew kwaw kury. A'e 'ar mehe teko ume'eg e ma'e wà nehe, ume'eg kar e ma'e wà nehe no. Ta'e Tupàn Tuweharupi Wiko Ma'e ikwahy haw u'ar wanehe paw rupi nehe xe, ikàg ma'e wanehe nehe, ikàg 'ym ma'e wanehe nehe no.

Daniel 5:30

A'e 'ar mehe we pyhaw uzuka Mewxazar Mawiron ywy rehe wanuwihawete a'e wà.

Naum 1:10

Peiko xu tyw ài pe. Peiko ka'akyr uxinig ma'e kwer ài pe no. Tupàn umunyk putar tata penehe nehe. Pekaz putar upaw rupi nehe.

Habacuque 2:5

Azeharomoete teko wanemetarer hemu'em uzar pe. Na'ikatu kwaw wiko wera'u ma'e waneko haw. Nupaw kwaw temetarer iputar haw. — Aputar we amo ihe, i'i uzeupeupe tuweharupi wà. Tuweharupi umàno ma'e kwer waneta haw uputar amo umàno ma'e kwer wà. Nezewegatete a'e teko uputar amo temetarer tuweharupi wà.

Mateus 7:13

(Uze'eg wiwi Zezuz wemimu'e wanupe.) — Aze heta mokoz uken a'e wà nehe, aze uken ipy pixika'i a'e nehe, aze inugwer uhua'u nehe, teko tetea'u wixe putar uken uhua'u ma'e rupi a'e wà nehe, ta'e zawaiw katu waneixe haw uken pixika'i ma'e rupi a'e wà nehe xe. Nezewegatete teko tetea'u oho putar tatahu pe wà nehe, ta'e zawaiw katu Tupàn ze'eg heruzar haw teko wanupe a'e xe.

Lucas 17:27

kàwiahy tetea'u i'u pà a'e wà no. Awa kwer wà, kuzàgwer wà no, uzerekoreko wà. Na'e Noe wixe kanuhu pupe a'e, (wànàm wanupi a'e). Àmàn ukyr tetea'u. Typya'u 'y. A'e rupi uzuka teko paw a'e wà. Teko wiko putar nezewegatete hezurete mehe a'e wà nehe no.

Lucas 21:34

Uze'eg wiwi teko wanupe. — Peme'egatu penemiapo ràm rehe nehe. Peiko zo umai'u e ma'e romo nehe, peiko zo kàwiahy i'u har romo nehe. Pema'enukwawahy zo ma'e ko ywy rehe har rehe nehe, penemetarer rehe nehe. Ta'e na'arewahy uhem putar a'e 'ar peme a'e nehe xe.