Isaías 47:1 - Tupàn zeꞌeg

¹ Tupàn Tuweharupi Wiko Ma'e uze'eg nezewe a'e. — Mawiron, ereapyk tuwihawete henaw rehe. Ewezyw a'e wi nehe. Eapyk ywy imuku'i pyrer rehe nehe. Ereiko kuzàwaza awa puhe oho 'ym ma'e ài, ipuràg eteahy ma'e ài, uma'ereko pixik 'ym ma'e ài. Ereiko heruze'eg pyr 'ym ài. Aze awa uzapo kar wazyr hemimutar paw izupe, umuaiw a'e. Peiko agwer kuzàwaza imuaiw pyrer ài kwehe mehe. Napeiko pixik kwaw nezewe nugar romo nehe kury.

Isaías 47:1 ပူးပေါင်းရင်းမြစ်များ

Jó 2:13

Na'e wapyk ywy rehe huwake wà kury. Umumaw 7 'ar a'e pe upyta pà izupe uze'eg 'ym pà wà, 'aromo wà, pyhaw wà no. Ta'e wexak ma'erahy tetea'u ipuraraw paw hehe a'e wà xe.

Jó 2:8

Wapyk Izo tanimuk tetea'u i'aromo kury. Upyhyk kawaw ikaika pyrer ipehegwer opo pe uzekàràkàràz pà ipupe kury.

Salmos 137:8

Mawiron, amo nemumaw putar wà nehe. Urereityk pe pe. Amo peneityk putar nezewegatete a'e wà nehe no. Hurywete putar peneityk àràm wà nehe.

Salmos 18:27

Erepyro ma'e hereko 'ymar ne wà. Emuigo kar amogwer wanuwi wiko wera'u ma'e ma'e hereko 'ymar romo ne wà.

Salmos 89:44

Erezo'ok ipuner haw tuwihawete wi. Ereityk henaw no.

Isaías 13:1

Tupàn uze'eg Mawiron wanehe a'e, Izai Amoz ta'yr pe ipuahu mehe a'e.

Isaías 13:13

Ihe Tupàn Tuweharupi Wiko Ma'e Ikàg Wera'u Ma'e aexak kar putar hekwahy haw hepuruzukaiw paw amo 'ar mehe nehe. A'e 'ar mehe amuryryryryz kar putar ywak ihe nehe. Amunyryk kar ywy henaw wi nehe no.

Isaías 14:1

Tupàn Tuweharupi Wiko Ma'e upuhareko wi putar Izaew a'e wà nehe. Omonokatu wi putar wemiaihu romo wà nehe no. Umuzewyr kar putar Izaew waiwy kwehe arer pe wà nehe. Amo ae ywy rehe arer wiko putar a'e pe wainuinuromo wà nehe.

Isaías 21:1

Na'aw ze'eg Mawiron kutyr har xe kury: Ywyxiguhu yryhu iwyr har, i'i teko izupe wà: Ywytuaiw upeipeir ywy kwarahy hemaw awyze har kutyr har hereko. Nezewegatete puruzuka ma'e ràm ur putar ywyxiguhu wi a'e. Teko ukyze tuwe a'e ywyxiguhu wi wà.

Isaías 23:12

Uze'eg nezewe Xitom pe. — Tawhu uzemumikahy ma'e. Tawhu ma'erahy tetea'u ipuraraw par. Epytu'u nerurywete re nehe. Aze neinuinuromo har uzàwehem oho Xip yrypypo'o pe wà nehe, nezewe rehe we nuhem kwaw hezepyk àwàm wi wà nehe, i'i Xitom tawhu pe har wanupe.

Isaías 26:5

Tupàn umuigo kar wiko wera'u ma'e hemetarer 'ym ma'e romo wà. Upyro tawhu waneko haw ikàgaw izuwi no. Weityk tawhu. Umumaw waneko haw ikaika pà no.

Isaías 3:26

Tawhu pe har uzai'o putar wà nehe. Nuzawy kwaw kuzà heityk pyrer ywy rehe wapyk ma'e wà nehe.

Isaías 37:22

Uwazar heze'eg ihewe kury. Na'aw ize'eg xe. — Zeruzarez tawhu pe har upuka waiko nerehe uze'eg urywahyahy pà wà, Xenakeriw.

Isaías 52:2

O Xiàw, tawhu ipuràg eteahy ma'e. Ipyhyk pyrer romo ereiko, ko 'ar rehe ereapyk ywy rehe. Emonohok kyhàhàm tàtà ma'e heityk pà nehe. Epu'àm nehe, emutuhutuhug ywy ywy ku'i kwer neropoz wi nehe. Eapyk nerenaw rehe nehe, tuwihawete henaw rehe nehe.

Jeremias 13:18

Tupàn umume'u ko ma'e a'e no. — Eze'eg eho tuwihawete pe nehe, ihy pe nehe no. — Pewezyw tuwihawete henaw wi nehe. Ta'e peàkàg rehe har ipuràg eteahy ma'e tuwihawete romo peneko haw hexak kar haw u'ar peàkàg wi a'e xe.

Jeremias 46:11

Teko Ezit ywy rehe har wà, peho Zireaz pe no. Pekar muhàg peho nehe. Pepuhàg paw na'ikatu kwaw. Ta'e naheta kwaw pema'eahy haw wi pemukatu haw xe.

Jeremias 48:18

Pe Nimon pe wiko ma'e wà. Pewezyw tuwihaw henaw wi nehe. Peapyk ywy rehe ywyku'i rehe nehe. Moaw imumaw pàràm wiko xe. Umumaw putar wanàpuzuhu imuàtà pyrer nehe.

Jeremias 50:1

Tupàn Tuweharupi Wiko Ma'e umume'u ko uze'eg Mawiron ywy rehe a'e kury, a'e pe har wanehe a'e no.

Jeremias 50:42

Heta tetea'u ywyrapar wanupe. Heta tetea'u takihepuku wanupe no. Puruzuka haw ikatu wanupe. Nupurupuhareko kwaw wà. Ur kawaru kupe pe wà. Waànoànogaw nuzawy kwaw yryhu wikwahy ma'e iànoànogaw. Uzemuàgà'ym kwez Mawiron iàmàtyry'ym àwàm rehe wà.

Jeremias 51:1

Uze'eg Tupàn Tuweharupi Wiko Ma'e kury. — Amur kar putar ywytu puruzuka ma'e Mawiron ikutyr ihe nehe, a'e pe har wakutyr ihe nehe.

Jeremias 51:33

Nan kwehe tete waàmàtyry'ymar ukixikixi putar wà nehe. Ukamikamik putar arozràn ài wà nehe no, waiwy rehe wà nehe no. Tupàn Tuweharupi Wiko Ma'e upuner wera'u ma'e Izaew wazar uze'eg kwez kury.

Jeremias 51:51

Nezewe peze'eg ihewe. — Uremaranugar ta'e amo uze'eg zemueteahy urerehe wà xe. Amo ywy rehe har wixe katuahy haw tàpuzuhu pe har pupe wà. A'e rupi uremuigo kar ikàg 'ym ma'e romo wà, peze peiko.

Lamentações de Jeremias 2:10

Zeruzarez pe har tua'u wera'u ma'e a'e wà, wapyk ywy rehe uze'eg 'ym pà wà. Umur ywy wàkàg rehe uzemumikahy haw hexak kar pà wà. Umunehew ma'eryru pàn iànàm ma'e iapo pyrer ukamir romo wà. Kuzàwaza wapyk uzemumew pà upenàràg rehe wà. Umuhyk wàkàg ywy rehe wà no.

Lamentações de Jeremias 2:21

Heta umàno ma'e kwer heityk pyrer nahu rupi wà: kwàkwàmo wà, tua'uhez ma'e wà no. Zauxiapekwer uzuka kwàkwàmo heremiaihu takihepuku pupe a'e wà. Uzuka kuzàwaza heremiaihu a'e wà no. Nekwahy haw 'ar mehe erezuka kar wapuhareko 'ym pà ne wà.

Lamentações de Jeremias 4:5

Temi'u ikatuahy ma'e i'u arer umàno nahu rupi umai'u 'ym pà wà kury. Kamir hekuzar katu ma'e imunehew arer wiko ity i'aromo wà kury.

Ezequiel 26:16

Ywy yryhu iwyr har wanuwihawete paw wezyw putar wenaw wi wà nehe. Wenuhem putar waxi'i ipykaw wà nehe. Wenuhem putar ukamir imuma'ema'e pyrer wà nehe no. Uryryryryz putar ukyze pà ywy rehe wapyk pà wà nehe. Newe uzeapo ma'e kwer hexak mehe ukyzeahy putar wà nehe. Uryryryryz putar upytu'u 'ym pà wà nehe.

Ezequiel 28:17

— Aiko wera'u amo wanuwi ihe, ere nezeupe. Ta'e nepuràg eteahy wera'u amo wanuwi ne xe. — Erepuner katu, i'i teko ywy nànànar newe wà. A'e rupi nere'o. Na'e uruityk ywy pe. Nezewe mehe amogwer tuwihawete ima'enukwaw putar wemiapo rehe a'e wà nehe.

Jonas 3:6

Amo umume'u a'e ma'e oho Nin tawhu pe har wanuwihaw pe wà. Upu'àm tuwihawete wenawhu wi. Wenuhem ukamir puku hekuzar katu ma'e uzewi. Umunehew pàn ma'eryru iapo pyr ukamir romo uzemumikahy haw hexak kar pà. Wapyk oho tanimuk rehe no.

Ageu 2:22

Aeityk putar tuwihawete wanenaw ihe wà nehe. Amumaw putar wakàgaw ihe wà nehe no. Amuaiw putar ywyramawa zeàmàtyry'ymawhu pe har wà nehe no. Azuka putar ywyramawa wapupe har wà nehe no. Kawaru umàno putar wà nehe no. Kawaru ku'az har uzezukazuka putar wà nehe no.

Apocalipse 18:7

Umur ma'e tetea'u uzeupe a'e, hemetarer katu ma'e romo hekon a'e. Nezewegatete pepuraraw kar ma'erahy tetea'u izupe nehe no. Ta'e nezewe i'i uzeupe a'e xe, — Aiko xe ihe, aiko tuwihaw kuzà romo ihe. Naiko kwaw kuzà imen umàno ma'e kwer romo ihe. Nazemumikahy pixik kwaw ihe nehe, i'i mua'u iko uzeupe.