Isaías 45:13 - Tupàn zeꞌeg

¹³ Ihe amuzypyrog kar Xiru ma'e iapo kar pà izupe ihe. — Ereityk putar ywy tetea'u rehe har ne wà nehe, Amumew putar hape ràm henataromo ihe nehe. Uzapo wi putar Zeruzarez tawhu hereko haw romo a'e nehe no. Umuhem kar putar heremiaihu wamunehew paw wi a'e wà nehe. Nuenoz kwaw temetarer wamuhem kar haw hekuzaromo nehe. Ihe Tupàn Tuweharupi Wiko Ma'e Ikàg Wera'u ma'e amume'u ko ze'eg tekoko ihe, i'i Tupàn.

Isaías 45:13 ပူးပေါင်းရင်းမြစ်များ

Esdras 1:3

Aze peiko hemiruze'eg romo nehe, tuwe Tupàn wiko penehe we nehe. Peho Zeruzarez pe Tupàn Tuweharupi Wiko Ma'e Izaew wazar hàpuzuhu iapo wi pà. Teko Zeruzarez pe har umuwete katu a'e Tupàn a'e wà.

Salmos 65:5

O Tupàn, erewazar ureze'eg urewe ne, Uremuigo kar pà ureàmàtyry'ymar waneitykar romo ne. Erezapo ikatuahy ma'e urepyro pà ne no. Teko ywy nànànar a'e wà, Te teko yryhu muite wera'u ma'e wi ur ma'e a'e wà, uzeruzar nerehe upaw rupi katete a'e wà.

Provérbios 3:6

Wyzài ma'e iapo mehe nema'enukwaw Tupàn rehe nehe. A'e mehe wexak kar putar neho àwàm ikatu ma'e newe nehe.

Isaías 13:17

Amukyze kar putar teko Mawiron ywy rehe har Per ywy rehe har wanuwi ihe wà nehe. Per rehe har nuputar kwaw itaxig parat wà Itazu or numurywete kar kwaw a'e teko a'e wà.

Isaías 14:17

Aipo ko awa wiko ywy ywyxiguhu iapo arer romo a'e. Weityk tawhu waukauka pà. Numuzewyr kar kwaw teko wemipyhyk kwer waneko awer pe wà. Aipo ko awa wiko a'e ma'e iapo arer romo azeharomoete, i'i putar uzeupeupe wà.

Isaías 41:2

Tuwihawete kwarahy ihemaw kutyr har weityk amogwer tuwihawete paw rupi a'e wà. Mo werur a'e tuwihawete xe. Mo weityk kar ywy paw izupe wà. Mo uzuka kar tuwihawete izupe wà. Umuigo kar a'e tuwihawete ywy imuku'i pyrer romo utakihepuku pupe u'yw pupe wà. Umuzàwehem kar ka'a ruwer uxinig ma'e ywytu hemiraha ài wà.

Isaías 41:25

Ihe ainoz amo awa kwarahy ihemaw kutyr har rehe har ihe. Uzeruzar herehe a'e. Ur putar kwarahy heixe haw awyze har wi nehe, wàmàtyry'ymar waàmàtyry'ym pà nehe. Upyrog tuwihawete wanehe a'e. Nuzawy kwaw to'om izupe wà. Zapepo iapo har upyropyrog ywy rehe upy pupe. Nezewegatete a'e awa upyrog wàmàtyry'ymar wanehe.

Isaías 42:6

— Ihe Tupàn Tuweharupi Wiko Ma'e ihe, urenoz ihe. Urupyhyk nepo rehe. Urumuigo kar putar teko wapyro har romo ihe nehe. Uruapo ihe. Oromono kar heremiaihu wanupe no. Nerexak mehe teko uze'eg putar nezewe wà nehe. — Azeharomoete Tupàn uzapo putar wemimume'u kwer a'e nehe, i'i putar wà nehe. Apyro putar amo teko ihe wà nehe. Ereiko putar tatainy ài wanupe nehe, wapyro àwàm hexak kar pà wanupe nehe.

Isaías 44:28

Ihe aze'eg tuwihawete Xiru pe. — Ereiko putar tuwihawete herer rehe nehe. Erezapo putar heremiapo putar haw nehe. Erezapo wi kar putar Zeruzarez tawhu nehe, Izaew wanupe nehe. Eremono kar putar tàpuzuhu wy pe har teko wanupe nehe no, a'e izupe.

Isaías 45:2

Aha putar nerenataromo nehe. Amumew putar ywytyruhu nehe. Azukazuka putar ukenuhu itazu morog iapo pyrer ihe nehe. Azuhazuhaw putar iwàpytymaw itaper iapo pyrer nehe.

Isaías 46:11

Aenoz amo awa tekoko ihe. — Ezur kwarahy hemaw wi nehe, a'e tekoko izupe. Ur iko na'arewahy ywy muite har wi wiràhu ài. Uzapo putar ma'e heremiapo kar nehe. Azapo putar ma'e heze'eg awer rupi katete nehe. Azapo putar heremimume'u kwer nehe.

Isaías 49:25

— Amo upuner, i'i Tupàn Tuweharupi Wiko Ma'e. — Amo upyro putar a'e ma'e zauxiapekwer wanuwi a'e nehe. Amo umuhem kar putar teko tuwihawete ikatu 'y ma'e hemipyhyk kwer a'e nehe no, ta'e ihe azàmàtyry'ym putar peàmàtyry'ymar ihe wà nehe xe. Ihe ae apyro putar pena'yr ihe wà nehe no.

Isaías 52:5

Ma'e aexak ko 'ar rehe kury. Mawiron uzapo ma'e Axir wanemiapo kwer zàwenugar wà no. Weraha heremiaihu uma'ereko e ma'e romo wamuigo kar pà wà no. Nomono kwaw temetarer wanekuzaromo wà. Waneraha har uhapukaz wà, ta'e weityk heremiaihu wà. Uze'eg zemueteahy herehe upytu'u 'ym pà wà.

Miquéias 4:10

Zeruzarez. Ewaewak nerahy haw rehe. Nereiheihem kuzà imemyr zexak kar ma'e ài nehe. Ta'e nepupe wiko ma'e uhem putar newi wà nehe xe. Wiko putar kaiwer pe wà nehe. A'e re oho putar Mawiron pe wà nehe. Tupàn Tuweharupi Wiko Ma'e upyro putar wà nehe. Wenuhem wi putar wàmàtyry'ymar wanuwi wà nehe.