Isaías 44:9 - Tupàn zeꞌeg

⁹ Tupàn a'ua'u wanagaw paw iapo har na'ikatu kwaw wà. Wazar wà, wanemiamutar wà, na'ikàg kwaw wà. Nuzawy kwaw ity wà. Wamuwete har iranaiw wà. Nuzawy kwaw hehàpyhà 'ym ma'e wà. A'e rupi wiko putar ikàg 'ym ma'e romo wà nehe.

Isaías 44:9 ပူးပေါင်းရင်းမြစ်များ

2 Reis 19:18

Wapy tupàn a'ua'u a'e ywy rehe har wà no. Nuiko kwaw tupànete romo wà. Xo ma'e hagaw paw romo ywyra iapo pyrer ita iapo pyrer romo wanekon wà. Teko uzapo a'e tupàn a'ua'u opo pupe wà.

Salmos 115:4

Teko amogwer ywy rehe har umupyràn parat a'e wà, or a'e wà no, uzar tupàn a'ua'u wanagapaw waapo pà wà. Awa uzapo a'e tupàn a'ua'u wà.

Salmos 115:8

Tuwe a'e tupàn a'ua'u iapo arer Wiko wemiapo kwer wazàwe wà nehe. Tuwe wanehe uzeruzar ma'e wiko wazàwe wà nehe.

Salmos 135:18

A'e tupàn a'ua'u iapo arer a'e wà nehe, Wanehe uzeruzar ma'e a'e wà nehe no, tuwe wiko wemiapo kwer zàwegatete wà nehe.

Salmos 97:7

Tupàn a'ua'u wanagapaw wamuwete har imaranugar wà. Uzar tupàn a'ua'u wanagapaw wanehe uze'egatu ma'e imaranugar wà. Amogwer tupàn paw uzeamumew Tupàn Tuweharupi Wiko Ma'e henataromo wà.

Isaías 26:11

O Tupàn Tuweharupi Wiko Ma'e, ereupir nepo teko wanehe nezepyk pà. Nezewe rehe we neàmàtyry'ymar nuzekaiw kwaw nerehe wà. Erezamutar katu neremiaihu ne wà. Amogwer teko wexak putar wamutar katu haw wà nehe. Hexak mehe imaranugar putar wà nehe. Tuwe nekwahy haw wapy a'e teko tata ài wà nehe.

Isaías 41:24

Azeharomoete napeiko kwaw ikàg ma'e romo. Napepuner kwaw ma'e iapo haw rehe. Naheakatuwawahy kwaw pemuwete har wanehe ihe.

Isaías 41:29

Nuiko kwaw wikuwe ma'e romo wà. Nupuner kwaw ma'e iapo haw rehe wà. Ko ma'eragapaw nuiko kwaw wikuwe ma'e romo wà. Ma'e iapo har 'ym romo wanekon wà, i'i Tupàn.

Isaías 42:17

Aityk putar tupàn a'ua'u wanagapaw wanehe uzeruzar ma'e paw ihe wà nehe. Amuigo kar putar ikàg 'ym ma'e romo wà nehe. — Peiko urezar romo, aze amo i'i tupàn a'ua'u wanagapaw wanupe wà nehe, azapo putar nezewegatete wanupe nehe no.

Isaías 42:18

Uze'eg Tupàn Tuweharupi Wiko Ma'e kury. — Pezeapyaka katu nehe, iapyha 'ym ma'e wà. — Peme'egatu nehe, hehàpyhà 'ym ma'e wà.

Isaías 43:8

Tupàn Tuweharupi Wiko Ma'e uze'eg kury. — Perur heremiaihu wà nehe. Amume'u putar wanemiapo kwer nehe. Heta waneha wanupe. Nuexak kwaw ma'e wà. Heta wapyakwar wanupe. Nuenu kwaw ma'e wà.

Isaías 43:9

Pezemono'og tuwihaw wanenataromo nehe, teko ywy nànànar wà. Pezemono'og nehe, teko paw wà. Aipo amo tupàn a'ua'u penemimuwete umume'u uzeapo ma'e ràm wà. Aipo amo umume'u ko 'ar rehe uzeapo ma'e ràm wà. Tuwe werur umyrypar wà nehe. Wamyrypar umume'u putar wakatu haw wà nehe. Nezewe mehe, wanenu mehe, — Azeharomoete, i'i putar teko paw wà nehe.

Isaías 44:11

Wamuwete har paw wiko putar ikàg 'ym ma'e romo wà nehe. Tupàn a'ua'u hagapaw iapo har a'e wà, xo teko romo zo wanekon wà. Nuiko kwaw ikàg ma'e romo wà. Tuwe uzemono'og tuwihaw wanenataromo wà nehe. Ukyze wera'u putar a'e pe wà nehe. Tuwihaw umuigo kar putar ikàg 'ym ma'e romo wà nehe.

Isaías 44:18

Agwer teko nukwaw katu kwaw ma'e wà. Uzeàpumi wà. Nupuner kwaw ma'e hexakaw rehe wà. Uwàpytym uma'enukwaw paw wà no. Nukwaw kwaw ma'e wà.

Isaías 44:20

Umuwete e ma'eragapaw. Imuwete haw nuzawy kwaw tàtàpyzgwer i'u haw. Awa ma'eragapaw imuwete har na'ima'enukwaw katu kwaw a'e. Hemu'em iko uzeupe. Nupuner kwaw uzepyro haw rehe. — Ko ma'e hepo pe har nuiko kwaw tupàn romo a'e, nupuner kwaw uzeupe uze'egaw rehe.

Isaías 45:16

Tupàn a'ua'u iapo har wiko putar ikàg 'ym ma'e romo wà nehe. Imaranugar putar upaw rupi katete wà nehe.

Isaías 45:20

Nezewe uze'eg Tupàn Tuweharupi Wiko Ma'e. — Pezur pezemono'og pà nehe, teko umàno haw wi uhem ma'e kwer wà. Pepu'àm pezuwà tuwihaw wanenataromo nehe. Amo teko uze'eg tupàn a'ua'u wanupe wà. A'e tupàn nupuner kwaw wapyro haw rehe wà. A'e teko nukwaw kwaw ma'e wà. Amo teko uzemono'og wata pà tupàn a'ua'u wamuwete pà wà. Nezewegatete nukwaw kwaw ma'e wà no. Upir tupàn a'ua'u hagapaw ywyra iapo pyrer heraha pà wata mehe wà.

Isaías 57:12

Aexak kar putar penemiapo kwer teko nànàn ihe nehe. Ikatu penemiapo peme. Azeharomoete na'ikatu kwaw ihewe ihe.

Isaías 65:13

A'e rupi Zanezar Tupàn Tuweharupi Wiko Ma'e uze'eg kury. — Heta putar temi'u heremiruze'egete wanupe nehe, nezewe rehe we pe pema'uhez putar nehe. Ui'u putar wà nehe no, nezewe rehe we peiwez putar nehe no. Hurywete putar a'e wà nehe. Pemaranugar putar nehe.

Jeremias 14:22

Ni amo tupàn a'ua'u amo ywy rehe har wazar nupuner kwaw àmàn imugyr kar haw rehe wà. Ni ywak nupuner kwaw àmàn imu'ar kar haw rehe. Uruzeruzar nerehe, o Tupàn Tuweharupi Wiko Ma'e urezar. Ta'e ereiko ma'e paw iapo har romo ne xe, i'i teko Tupàn pe wà.

Jeremias 2:11

Ni amo teko nomono kwaw amo ae tupàn tupànete romo wiko 'ym ma'e wà, tupàn uzar wanekuzaromo wà. Nezewe rehe we heremiaihu omono amo ae tupàn herekuzaromo a'e wà. Aiko wazar Upuner Wera'u Ma'e Ipuràg Wera'u Ma'e romo ihe. Nezewe rehe we omono amo herekuzaromo wà. Wazar ipyahu ma'e nupuner kwaw ma'e iapo haw rehe wapytywà pà wà.

Jeremias 2:26

Tupàn Tuweharupi Wiko Ma'e uze'eg kury. — Aze teko upyhyk imunar ma'e wà, imaranugar a'e. Nezewegatete teko Izaew izuapyapyr imaranugar putar wà nehe no. Pe paw rupi nehe: Penuwihawete wà, wana'yr wà, xaxeto penekuzaromo herenataromo har wà, heze'eg imume'u har pepyr har wà.

Daniel 11:38

Umuwete katu putar tupàn tawhu tàtà ma'e wanehe uzekaiw ma'e a'e nehe. Tàmuzgwer nukwaw kwaw a'e tupàn a'e wà. A'e tuwihawete omono putar ma'e a'e tupàn pe nehe: or, parat, ita hekuzar katu ma'e, amo ma'e hekuzar katu ma'e no.

Daniel 5:23

— Apuner wera'u ywak rehe har wanuwihawete wi ihe, ere nezeupe. Ererur kar kanek Tupàn ràpuzuhu wi herur pyrer ne. — Ihe ihe, hereminoz wà nehe no, wanemireko wà nehe no, wanemirekoagaw wà nehe no, ximono putar win a'e kanek pupe i'u pà zane nehe, ere wanupe. Eremuwete netupàn a'ua'u ne wà no: parat iapo pyrer wà, or iapo pyrer wà no, morog iapo pyrer wà no, itaper iapo pyrer wà no, ywyra iapo pyrer wà no, ita iapo pyrer wà no. Nuexak kwaw ma'e wà. Nuenu kwaw ma'e wà. Nukwaw kwaw ma'e wà. Neremume'u kwaw Tupàn ikatu haw. Neremume'u kwaw ipuràg eteahy haw. A'e ae upuner a'e. Upuner teko wazuka haw rehe. Upuner wamuigo kar haw rehe. A'e ae umume'u newe uzeapo ma'e ràm a'e no.

Romanos 1:22

— Uruiko ma'e kwaw katu har romo ure, i'i mua'u waiko uzeupeupe wà. Ma'e kwaw 'ymar romo wanekon wà.

1 Coríntios 8:4

A'e rupi aze'eg putar peme temi'u rehe ihe kury, a'e temi'u tupàn a'ua'u wanupe imono pyrer rehe ihe kury. Tupàn a'e, pitài zo a'e. Teko uzapo tupàn a'ua'u hagapaw a'e wà. A'e ma'e hagapaw nuikuwe kwaw a'e. Nuiko kwaw Zanezar romo. Tupàn wikuwe a'e, Zanezar romo hekon a'e.

2 Coríntios 4:4

Tatahu pe oho ma'e ràm nuzeruzar kwaw ize'eg rehe wà, ta'e Zurupari nukwaw kar kwaw wanupe a'e xe. Zurupari a'e, ywy rehe har wazar romo hekon a'e. Nuexak kar kwaw a'e tatainy wanupe a'e. Tupàn ze'eg puràg a'e, Zaneruwihawete ikàgaw ipuràgaw imume'u haw a'e, nuzawy kwaw tatainy a'e. Zaneruwihawete nuzawy kwaw Tupàn a'e. (Nuzawy kwaw u a'e.) Tupàn hagapaw azeharomoete har romo hekon a'e.

Efésios 4:18

Pyhaw wata ma'e ài wanekon wà, ta'e na'ima'enukwaw wer kwaw ikatu ma'e rehe a'e wà xe. Umàno ma'e kwer ài wanekon wà, ta'e Tupàn numuigo kar kwaw uzepyr a'e wà nehe xe. Ikatu 'ym ma'e iapo mehe wà, nuzemumikahy kwaw wà.

Efésios 5:8

Pe kwehe mehe pe, peiko pyhaw wata ma'e ài pe, ta'e ikatu 'ym ma'e iapo har romo peiko pe xe. Ko 'ar rehe peiko Tupàn hemiruze'eg romo kury. A'e rupi peiko 'aromo wata ma'e ài kury. Ta'e ikatu ma'e iapo har romo peiko kury xe. Peiko tuweharupi 'aromo wata ma'e ài nehe ty wà, Tupàn ikatu haw rehe peneko pà nehe ty wà.

Deuteronômio 27:15

— Aze amo teko uma'e ita ma'e hagapaw iapo pà nehe, aze umuwete amo teko wanupe hexak kar 'ym pà nehe, Tupàn omono putar uze'egaiw a'e teko rehe a'e nehe. Aze amo teko uma'e ywyra ma'e hagapaw iapo pà nehe, nezewegatete nehe no. Aze amo teko uma'e itatàtà ma'e hagapaw iapo pà nehe, nezewegatete nehe no. Tupàn Tuweharupi Wiko Ma'e na'iakatuwawahy kwaw amo tupàn imuwete haw rehe a'e, i'i putar wanupe wà nehe. — Azeharomoete, i'i putar teko wanupe wà no.

Deuteronômio 4:28

A'e ywy rehe peneko mehe pemuwete putar tupàn ywyra iapo pyrer pe wà nehe. Pemuwete putar tupàn ita iapo pyrer pe wà nehe no. A'e tupàn a'ua'u nuexak kwaw ma'e wà, ni ywàkun nuexak kwaw wà. Numai'u kwaw wà. Nuwetun kwaw ma'e wà.

Juízes 10:14

Peho a'e tupàn a'ua'u wanupe kury. — Urepytywà pe nehe, peze peho wanupe kury. Tuwe pepytywà putar ma'erahy ipuraraw mehe a'e wà nehe, i'i urywahyahy Tupàn Izaew wanupe.