Isaías 43:13 - Tupàn zeꞌeg

¹³ Aiko Tupàn romo ihe. Tuweharupi aiko putar Tupàn romo ihe nehe no. Ni amo nupuner kwaw hekàgaw wi uhemaw rehe wà. Aze azapo ma'e, ni amo nupuner kwaw a'e ma'e imuzewyr kar haw rehe iapo 'ym awer pe wà, i'i Tupàn.

Isaías 43:13 ပူးပေါင်းရင်းမြစ်များ

Jó 10:7

Erekwaw ikatu 'ym ma'e iapo 'ymar romo hereko haw. Ni amo nupuner kwaw nepo wi hepyro haw rehe wà.

Jó 34:29

Nezewe rehe we, aze Tupàn nuze'eg kwaw nehe, ni amo nupuner kwaw hemiapo kwer ikatu 'ymaw imume'u haw rehe wà. Aze umim uwa nehe, naheta kwaw teko wapyro àwàm. Naheta kwaw ywy nànànar wapyro àwàm.

Jó 9:12

Aze Tupàn ipurupyhyk wer amo ma'e rehe nehe, Mo upuner ipyro haw rehe izuwi nehe. — Ma'e erezapo iko, ni'i kwaw amo izupe wà, ta'e upuner wera'u wanuwi a'e xe.

Salmos 102:28

Zanera'yr wiko putar ikatu 'ym ma'e wi ukyze 'ym pà wà nehe. Erezekaiw putar wazuapyapyr wanehe tuweharupi ne wà nehe.

Salmos 50:22

Peneharaz ihewi. Pema'enukwaw katu penemiapo kwer rehe nehe. Aze napema'enukwaw kwaw wanehe nehe, apumumaw putar ihe nehe. Ni amo nupuner kwaw pepyro haw rehe wà nehe.

Salmos 90:2

Ywytyr iapo 'ym mehe we, ywy ywak iapo pà nezypyrog 'ym mehe we, ereiko Tupàn romo tuweharupi ne. Nerezypyrog kwaw Tupàn romo nereko pà. Nupaw pixik kwaw Tupàn romo nereko haw nehe. Tuweharupi ereiko Tupàn romo.

Salmos 93:2

O hezar, 'ar izypy mehe arer henataromo ereiko tuwe tuwihawete romo. Izypy mehe ereiko. Tuweharupi ereiko putar nehe no.

Provérbios 21:30

Tupàn Tuweharupi Wiko Ma'e a'e, ikàg wera'u ma'ekwaw katu haw wi a'e, ma'e kwaw paw wi a'e no.

Provérbios 8:23

Kwehe heapo a'e, izypy mehe ywy iapo 'ym mehe we a'e.

Isaías 14:27

Tupàn Tuweharupi Wiko Ma'e Ikàg Wera'u Ma'e Uzapo putar a'e ma'e a'e nehe. Aipo amo upuner imupytu'u kar haw rehe wà nehe. Upir opo teko wanehe uzepyk pà. Aipo amo upuner ipo imuezyw kar haw rehe wà nehe.

Isaías 41:4

Mo umume'u ko ma'e uzeapo ma'e ràm paw a'e. Mo uzapo kar paw rupi a'e. Mo umuzeapo kar ma'e ywy rehe 'ar izypy henataromo. Ihe Tupàn Tuweharupi Wiko Ma'e ihe. Aiko xe izypy mehe ma'e paw iapo 'ym mehe we ihe. Aiko putar xe ma'e paw ipaw ire nehe no, i'i Tupàn.

Isaías 46:10

Izypy mehe arer we amume'u uzeapo ma'e ràm ihe. Kwehe mehe amume'u ma'e uzeapo ma'e ràm. — Uzeapo putar ma'e heze'eg rupi katete nehe, a'e purupe. Aze hepurapo wer ma'e rehe nehe, azapo putar a'e ma'e nehe, a'e purupe kwehe mehe.

Isaías 46:4

Petua'uhez mehe aiko tuwe nezewegatete nehe. Naiko kwaw amo ae romo nehe. Azekaiw putar penehe pe'aw xig mehe nehe. Apuapo ihe. Apueraha no. Apupytywà putar nehe. Apupyro putar nehe no.

Isaías 47:15

Nezewe haw uzeapo putar uzeapo ma'e ràm imume'u har pepyr har wanupe nehe. Izypy mehe arer we pepuranu wanehe. A'e paw oho putar pewi wà nehe. Pitàitàigatu oho putar wape rupi wà nehe, iapo pyràm hekar pà wà. Ni amo a'e teko nupuner kwaw pepyro haw rehe wà nehe.

Isaías 48:16

Pezur heze'eg henu pà nehe kury. — Izypy mehe arer we nazumim kwaw heze'eg. Nazumim kwaw heremiapo kàràm. Amuzeapo kar ma'e paw wazypyrog mehe arer we ihe, a'e peme. Na'e Zanezar Tupàn Tuweharupi Wiko Ma'e umur wekwe ihewe hemono kar pà a'e pe a'e kury.

Isaías 57:15

Tupàn Ikatuahy Ma'e Ywate Wera'u Ma'e a'e, Tupàn Tuweharupi Wiko Ma'e a'e, uze'eg a'e. — Hereko haw upyta ywate a'e. Ikatuahy a'e, ikatu 'ymaw wi imunyryk pyrer romo hekon a'e. Aiko ikàg 'ym ma'e wainuinuromo ihe no. Aiko ma'erahy ipuraraw par wainuinuromo ihe no. Nezewe mehe àro kar ikatu ma'e ikàg 'ym ma'e wanupe. Amono wakàgaw ipyahu ma'e ma'erahy ipuraraw par wanupe no.

Daniel 4:35

Teko nuzawy kwaw heityk pyrer izupe wà. Wiko weko haw pe har paw wanuwihawete romo. Wiko ywy nànànar wanuwihawete romo no. Naheta kwaw wemimutar iapo re imupytu'u kar har wà. Ni amo nupuner kwaw hemiapo imume'u kar haw rehe izupe wà, a'e izupe.

Oséias 2:10

Amuigo kar putar a'e kuzà hopoz 'ym ma'e romo nehe kury, ipuhe uker ma'e kwer wanenataromo nehe kury. Ni amo nupyro kwaw hepuner haw wi wà nehe.

Oséias 5:14

Azàmàtyry'ym putar Izaew ihe wà nehe, Zuta ihe wà nehe no. Aiko putar zàwàruhu iriàw miar izuka mehe har ài wàmàtyry'ym mehe ihe nehe. Apei'ài'àg putar amo pehegwer romo wà nehe. A'e re aha putar a'e wi hezeupi waneraha pà nehe. Ni amo nupuner kwaw wapyro haw rehe wà nehe.

Miquéias 5:2

Tupàn Tuweharupi Wiko Ma'e uze'eg kury. — Merez-Eparat, taw Zuta ywy rehe har pixika'i wera'i ma'e romo ereiko ne. Nemyter pe Izaew wanuwihawete ràm uzexak kar putar nehe. Kwehe mehe iànàm waipy uzypyrog a'e taw pupe wiko pà wà.

Habacuque 1:12

O Tupàn Tuweharupi Wiko Ma'e. Tuweharupi ereikuwe ne. O hezar ikatuahy ma'e. Neremàno pixik kwaw nehe. Ereiko urepyro har romo. O Tupàn Tuweharupi Wiko Ma'e. Erexarexak Mawiron pe har ne wà. Eremono nekàgaw wanupe. A'e rupi upuner urerehe uzepykaw rehe wà nehe.

Números 23:20

— Emono ze'egatu Izaew wanehe nehe, i'i ihewe. Omono ze'egatu wanehe. Napuner kwaw ze'egaiw wanehe imono haw rehe kury.

João 8:58

— Azeharomoete ko heze'eg ihe. Àmàrààw izexak kar 'ym mehe we AIKO IHE, i'i wanupe.

Efésios 1:11

Izypy mehe Tupàn umume'u wemiapo ràm paw rupi katete uzeupe a'e. Uzapo a'e ma'e iko kury, wemimume'u kwer rupi katete kury. Zanerexarexak, wemiaihu romo zanemuigo kar pà, Zaneruwihawete hekwe inuromo zanemono'og pà. Ta'e uputar nezewe haw a'e xe. Izypy mehe umume'u wemiapo ràm uzeupe.

Deuteronômio 28:31

Amo uzuka putar nereimaw tapi'ak wà nehe. Erexak putar wazuka mehe ne wà nehe. Nezewe rehe we nere'u kwaw wano'o kwer nehe. Amo weraha putar nereimaw zumen newi a'e wà nehe. Erexak putar waneraha mehe ne wà nehe. Numuzewyr kwaw newe wà nehe. Neàmàtyry'ymar weraha putar nereimaw àràpuhàràn hawitu ma'e wà nehe. Naheta kwaw nepytywà har wà nehe.

Deuteronômio 32:39

Pe paw rupi nehe, pekwaw ko ma'e nehe. Xo ihe zo aiko Tupàn romo ihe. Naheta kwaw amo tupàn wà. Apuruzuka ihe. Apurumuigo kar ihe no. Apurukutuk no. Apurumukatu no. Aze hepurapo wer amo ma'e rehe nehe, ni amo nupuner kwaw hemupytu'u kar haw rehe iapo re wà nehe.

1 Timóteo 1:17

Teko paw rupi a'e wà nehe, tuwe umuwete katu Zaneruwihawete tuweharupi a'e wà nehe. Tuwe wexak ikàgaw ipuràg eteahy haw wà nehe no, tuweharupi wà nehe no. Tuwihawete romo hekon a'e. Izypy mehe hekon, ko 'ar rehe no, tuweharupi nehe no. Numàno pixik kwaw nehe. Teko nuexak kwaw wà. Xo a'e zo Tupàn romo hekon a'e. Naheta kwaw amo. Azeharomoete ko heze'eg ihe.

Hebreus 13:8

Zezuz Zanezar a'e, ikatuahy kwehe mehe a'e. Ikatuahy ko 'ar rehe no. Ikatuahy putar tuweharupi nehe no. Nuzawy pixik kwaw nehe.

Josué 2:2

Zeriko tawhu pe har ukwaw wahem awer wà. A'e rupi uze'eg oho uwihawete pe wà. — Tuwihawete, i'i izupe wà. — Amo Izaew zuapyr uhem xe kwez kutàri wà, pyhaw wà. Ume'egatu putar zaneywy rehe wà nehe.

Apocalipse 1:8

Uze'eg Tupàn iko zanewe a'e kury. Zanezar romo hekon a'e, ikàg wera'u ma'e romo hekon a'e. — Izypy mehe arer romo aiko ihe. Iahykaw rehe àràm romo aiko ihe. Aiko ko 'ar rehe kury. Izypy mehe kwehe mehe aiko ihe no, aiko putar tuweharupi ihe nehe no, i'i iko zanewe.