Isaías 43:1 - Tupàn zeꞌeg

¹ Teko Izaew wà, ko 'ar rehe Tupàn peapo arer uze'eg nezewe kury. — Pekyze zo nehe, ta'e apupyro putar ihe nehe xe. Apuenoz pener rupi ihe. Peiko heremiruze'eg romo.

Isaías 43:1 ပူးပေါင်းရင်းမြစ်များ

Gênesis 32:28

— Amo ae nerer amono putar newe ihe nehe kury. Nereiko kwaw Zako romo ko 'ar henataromo nehe kury. Ereku'apyhyk Tupàn ne. Ereku'apyhyk awa ne wà no, waneityk pà ne wà no. A'e rupi Izaew nerer pyahu romo kury, i'i izupe. (-Uku'apyhyk Tupàn a'e, i'i her zaneze'eg rupi.)

Salmos 100:3

Pema'enukwaw Tuweharupi Wiko Ma'e rehe nehe, Zanezar romo heko haw rehe nehe. Zaneapo a'e. Zanezar romo hekon. Zaiko hemiaihu romo. Zaiko àràpuhàràn hemimono'og ài. Wiko zanemono'ogar ài a'e.

Salmos 102:18

Tuwe ko ze'eg uzemuapyk pape rehe nehe. Nezewe mehe zanezuapyapyr ukwaw putar Tupàn Tuweharupi Wiko Ma'e hemiapo kwer wà nehe. Nezewe mehe uzexak kar ma'e ràm umume'u putar ikatu haw a'e wà nehe no.

Êxodo 15:13

Erezamutar katu neremiaihu ne wà. A'e rupi ereruze'eg putar neremipyro kwer ne wà nehe. Nekàgaw rupi ereraha putar a'e teko nereko haw ikatuahy ma'e pe ne wà nehe.

Êxodo 15:16

Ma'e wi wakyze haw u'ar wanehe. Wexak nepuner haw uhua'u ma'e wà. Upytu'u uzemumyz 'ym pà ita ài wà. Te neremiaihu ukwaw waneko haw rupi wà. Neremipyro kwer wahaw waiwy wà.

Êxodo 33:17

— He'e, ty. Azapo putar nereminozgwer nehe, ta'e nekatuahy ihewe ne xe, ta'e urukwaw katu ihe xe, ta'e akwaw nerer ihe xe, i'i Tupàn Tuweharupi Wiko Ma'e Moizez pe.

Isaías 27:11

Ywyràkà uxinig upeupen pà. Kuzà omono'og heraha zepe'aw romo wà. Ko teko nukwaw kwaw ma'e wà. A'e rupi Tupàn zaneapo arer nupuhareko kwaw wà nehe. Uzepyk putar tuwe wanehe nehe.

Isaías 41:14

Tupàn Tuweharupi Wiko Ma'e uze'eg wemiaihu wanupe. — Napeneta tetea'u kwaw. Napekàg kwaw. Nezewe rehe we pekyze zo nehe, ta'e ihe Tupàn Izaew wazar Ikatuahy Ma'e ihe xe, aiko pepyro har romo ihe xe. Apupyro putar ikatu 'ymaw wi nehe.

Isaías 42:6

— Ihe Tupàn Tuweharupi Wiko Ma'e ihe, urenoz ihe. Urupyhyk nepo rehe. Urumuigo kar putar teko wapyro har romo ihe nehe. Uruapo ihe. Oromono kar heremiaihu wanupe no. Nerexak mehe teko uze'eg putar nezewe wà nehe. — Azeharomoete Tupàn uzapo putar wemimume'u kwer a'e nehe, i'i putar wà nehe. Apyro putar amo teko ihe wà nehe. Ereiko putar tatainy ài wanupe nehe, wapyro àwàm hexak kar pà wanupe nehe.

Isaías 43:21

Azapo 'aw teko heremiaihu romo wamuigo kar pà ihe wà. A'e rupi umume'u putar hekatu haw a'e wà nehe, i'i Tupàn.

Isaías 43:5

Pekyze zo nehe ta'e aiko penehe we ihe xe. Kwarahy ihemaw wi amuzewyr kar putar heremiaihu waiwy pe ihe wà nehe. Arur putar kwarahy heixe haw wi wà nehe no.

Isaías 43:7

A'e paw wiko heremiaihuete romo wà. Azapo ihe wà. Amuigo kar ihe wà no. Nezewe mehe wexak kar putar hekàg wera'u haw purupe wà nehe, i'i Tupàn.

Isaías 44:2

Ihe Tupàn Tuweharupi Wiko Ma'e ihe, aiko peapo arer romo ihe. Apupytywà pezexak kar awer 'ar henataromo ihe. Izaew, heremiruze'eg wà. Pekyze zo nehe, ta'e apuamutar katu ihe xe. Apuexaexak heremiaihu romo ihe.

Isaías 45:11

Tupàn Tuweharupi Wiko Ma'e Izaew wazar Ikatuahy Ma'e neapo arer uze'eg nezewe a'e. — Aipo pepuranu putar herehe nezewe nehe. — Ma'e erezapo iko nera'yr wanehe nezekaiw pà, aipo peze putar ihewe nehe. Aipo hemu'e putar ma'e iapo haw rehe nehe.

Isaías 48:17

Tupàn Tuweharupi Wiko Ma'e, Izaew wazar Ikatuahy Ma'e, wapyro har, uze'eg wemiaihu wanupe kury. — Aiko Tupàn Tuweharupi Wiko Ma'e romo ihe, pezar romo ihe. Apumu'e iteko ihe, ta'e nezewe mehe peneko haw ikatu putar nehe xe. Apueruata peneraha pe ikatu ma'e peho àwàm hexak kar pà peme ihe.

Isaías 48:20

Pehem Mawiron tawhu wi nehe. Pezàwehem a'e wi nehe. Penehapukaz penurywete haw rupi ko ze'eg imume'u pà ywy nànànar wanupe nehe. — Tupàn Tuweharupi Wiko Ma'e upyro wemiruze'eg a'e wà, teko Izaew izuapyapyr her ma'e wapyro pà a'e wà, peze purupe nehe.

Isaías 49:1

Teko ywy muitea'u har wà, ihe Tupàn hemiruze'eg romo aiko ihe. Pezeapyaka katu heze'eg rehe nehe. Pezekaiw katu heze'eg rehe nehe, teko ywy nànànar wà. Aikuwe hehy hie pe ihe. A'e wi hehem 'ym mehe we Tupàn Tuweharupi Wiko Ma'e herexak a'e. Nazexak kar kwaw a'e mehe ihe rihi. Herenoz herer imume'u pà a'e mehe a'e.

Isaías 49:26

A'u kar putar wo'o kwer peàmàtyry'ymar wanupe nehe. A'u kar putar uwykwer wanupe win ài nehe no. Nezewe mehe teko paw ukwaw putar ihe Tupàn Tuweharupi Wiko Ma'e romo hereko haw wà nehe. Pepyro har romo hereko haw ukwaw putar wà nehe no. Ihe Izaew wazar upuner ma'e ihe, aiko penekuzar imono har romo. Ukwaw putar hereko haw wà nehe no.

Isaías 51:13

Ta'e heharaz Tupàn Tuweharupi Wiko Ma'e wapo arer wi wà xe. Heharaz ywak ipupirar arer wi wà, ywy imuapyk arer wi wà. Màràzàwe tuwe pekyze peàmàtyry'ymar purupe ma'erahy ipuraraw par wanuwi. Oho penaikweromo wà, ta'e ipuruzuka wer penehe wà xe. Wakwahy haw nupuner kwaw ma'e iapo haw rehe peme.

Isaías 52:9

Zeruzarez heityk pyrer, ezegar nerurywete haw rehe nehe, ta'e Tupàn Tuweharupi Wiko Ma'e upuhareko katu wemiaihu a'e wà xe. Upyro putar Zeruzarez a'e nehe.

Isaías 62:12

— Teko Tupàn pe imonokatu pyrer wà, i'i putar teko peme wà nehe. — Teko Tupàn Tuweharupi Wiko Ma'e hemipyro kwer wà, i'i putar peme wà nehe no. — Tupàn hemiamutar katu, i'i putar Zeruzarez pe wà nehe. — Tawhu Tupàn hemityk 'ym, i'i putar izupe wà nehe no.

Isaías 63:16

ta'e ereiko ureru romo ne xe. Ureipy a'e wà, Àmàrààw a'e, Zako a'e no, nuzekaiw kwaw urerehe wà. Na'ima'enukwaw kwaw urerehe wà. Ne Tupàn Tuweharupi Wiko Ma'e ne, ereiko ureru romo ne. Izypy mehe arer we, — Urepyro har, uru'e newe.

Isaías 63:9

A'e rupi upyro wanemipuraraw paw wi a'e wà. A'e ae wiko wapyro har romo a'e. Numur kar kwaw weko haw pe har wapyro àràm romo wà. Numur kar kwaw amo wyzài wemiruze'eg. A'e ae uzapo. Uzamutar katu a'e wà. Upuhareko wà no. A'e rupi upyro wà. Tuweharupi nehe, kwarahy nànàn nehe, upyhyk waneraha pà wà.

Jeremias 31:3

azexak kar wanupe ihe. Teko Izaew izuapyapyr wà, tuweharupi apuamutar katu ihe. Apuamutar katu putar ihe nehe no. Tuweharupi aexak kar peamutar katu haw peme ihe.

Jeremias 33:24

Zeremi, teko uze'eg oho waiko nezewe wà. — Tupàn weityk Izaew a'e wà. Weityk Zuta a'e wà no, i'i ihewe wà. — Kwehe mehe wexaexak a'e teko wà. Weityk wà kury, i'i ihewe wà. Uze'eg zemueteahy heremiaihu wanehe wà. — Nuiko kwaw teko pitài imono'og pyr romo uzemono'og ma'e wà kury, i'i wà.

Jeremias 33:26

Namumaw kwaw a'e heze'eg awer ihe. A'e rupi namumaw kwaw heze'eg Zako izuapyapyr wanehe we heremiapo katu kwer ihe nehe. Namumaw kwaw heze'eg heremiruze'eg Tawi rehe we heremiapo katu kwer ihe nehe no. Aexaexak putar amo Tawi izuapyr Àmàrààw izuapyapyr wanuwihawete romo ihe nehe, Izak izuapyapyr wanuwihawete romo ihe nehe no, Zako izuapyapyr wanuwihawete romo ihe nehe no. Amuhyk wi putar ma'e heremiaihu wanupe nehe. Apuhareko putar ihe wà nehe no.

Jeremias 50:34

Nezewe rehe we wamuhem kar àràm ikàg a'e. Tupàn Tuweharupi Wiko Ma'e upuner wera'u ma'e her romo a'e. Upyro putar a'e wà nehe, waiwy pe waneruzewyr kar pà a'e wà nehe. Xo xiroxiroahy haw werur putar teko Mawiron wanupe nehe.

Lamentações de Jeremias 3:57

Nerenoz haw 'ar mehe, erehem heruwake ihewe neze'eg pà. — Ekyze zo nehe, ere ihewe.

Ezequiel 16:8

Neruwake hekwaw wi mehe uruexak wi. — Ihya'u kury, a'e newe. — Ikatu aze amo uzamutar nehe, a'e newe. Na'e azupyk neretekwer hopoz 'ym ma'e heaxi'i ipykaw pupe kury. — Uruamutar putar ihe nehe, a'e newe. Azeharomoete. Amume'u heremireko romo nemuigo kar àwàm newe. Na'e ereiko heremireko romo. Ihe Tupàn Tuweharupi Wiko Ma'e aiko ko ma'e imume'u har romo.

Daniel 10:19

Uze'eg ihewe. — Tupàn neamutar katu a'e. A'e rupi Ekyze zo nehe. Tuwe Tupàn ikatu haw wiko nerehe nehe. Nerurywete nehe. Ekyze zo nehe, i'i ihewe. Na'e hekàg wera'u kury. Aze'eg izupe. — Eze'eg nehe, ta'e eremur hekàgaw ipyahu ma'e kwez ihewe ne xe, a'e izupe.

Zacarias 13:9

Amuata kar putar a'e umàno 'ym ma'e kwer tata pupe ihe wà nehe. Amukatu putar ihe wà nehe. Teko umukatu itaxig parat tata pupe wà. Umupyràn itazu or tata pupe wà no. Nezewegatete amukatu putar a'e wikuwe wiwi ma'e ihe wà nehe. Na'e uze'eg putar ihewe wà nehe. Aenu putar waze'eg nehe. — Peiko heremiaihu romo, a'e putar wanupe nehe. — Tupàn Tuweharupi Wiko Ma'e wiko urezar romo a'e, i'i putar ihewe wà nehe.

Malaquias 3:17

Na'e uze'eg Tupàn Ikàg Wera'u Ma'e kury. — Wiko putar heremiaihu romo wà nehe. Amuàgà'ym amo 'ar teko ihe. A'e 'ar ihem mehe wiko putar teko heremiaihu romo wà nehe. Apuhareko katu ihe wà nehe. Aze ta'yr weruzar katu u ze'eg, tu uzamutar katu wa'yr. Nezewegatete azamutar katu putar a'e teko ihe wà nehe no.

Atos 27:20

Urumumaw 'ar tetea'u kwarahy hexak 'ym pà ure. Ni zahytata nuruexak kwaw ure. Ywytuaiw uhua'u wi wi tuweharupi. A'e rupi nuruàro kwaw urepyro àwàm kury. — Zamàno putar zane nehe, uru'e urezeupeupe kury.

Atos 27:25

A'e rupi pekyze zo nehe ty wà, pekàg nehe ty wà. Ta'e azeruzar Tupàn rehe ihe xe. Zanepyro putar uze'eg rupi katete a'e nehe.

Efésios 2:10

Tupàn zaneapo a'e. — Ikatuahy ma'e iapo har romo azapo ihe wà, i'i zanewe. Izypy mehe naxiapo kwaw a'e ikatuahy ma'e zane. A'e rupi zanemono'og Zaneruwihawete Zezuz inuromo a'e kury. A'e rupi ko 'ar rehe xiapo a'e ikatuahy ma'e zaha zaiko kury. Ta'e uzapo kar zanewe a'e xe.

Deuteronômio 32:15

Teko Tupàn hemixak kwer wiko hemetarer katu ma'e romo wà. Nezewe rehe we uzàmàtyry'ym Tupàn wà. Hemetarer katu wà. Waneko haw ikatu. Hurywete wà no. Nezewe rehe we weityk wapo arer Tupàn wà. Upuir uzehe uzekaiw ma'e omonokatu har wi wà. Weityk upyro har wà.

Deuteronômio 32:6

Teko ma'e kwaw katu 'ymar romo wanekon wà. Nukwaw kwaw ma'e wà. Nezewe a'e teko wereko Tupàn Tuweharupi Wiko Ma'e a'e wà. Wiko wanu romo a'e. Tupàn umugakwaw katu a'e teko a'e wà. A'e peapo teko tetea'u romo a'e. Pemugakwaw a'e no.

Deuteronômio 32:9

Wexaexak Izaew wemiaihu romo wà. Zako izuapyapyr wiko Tupàn Tuweharupi Wiko Ma'e hemiruze'eg romo wà.

2 Timóteo 2:19

Nan kwaw pa, aze uzeruzar ma'e ukwaw Tupàn ze'eg azeharomoete har a'e wà nehe, a'e mehe nuzekaiw kwaw agwer upurumu'e mua'u ma'e waze'eg rehe a'e wà nehe. Zanezar ukwaw katu wemiruze'eg a'e wà. Aze awa uze'eg nezewe nehe, — Tupàn hezar romo hekon a'e, aze i'i izupe nehe, a'e mehe upytu'u putar ikatu 'ym ma'e iapo re nehe.

Tito 2:14

Zezuz a'e, uzemono zanerekuzaromo a'e, uzezuka kar pà a'e. Umàno ikatu 'ym ma'e zaneremiapo kwer hekuzaromo. A'e rupi umunyryk kar ikatu 'ym ma'e zanewi. Zanemukatu uzeupe no. A'e rupi zanepurapo wer tuwe ikatuahy ma'e rehe amogwer wanupe zane kury, Tupàn pe zane no.

Apocalipse 5:9

Na'e umuzàg amo ae zegar haw ipyahu ma'e a'e pe a'e wà kury. Ne zutyka'i ne, Erepuner a'e pape ipyhykaw rehe ne, Erepuner hewàpytymawokaw rehe ne. Ta'e nezuka a'e wà xe. Nemàno haw rupi eremekuzar teko Tupàn pe ne wà, wapyro pà ne wà. Erepyro amo tenetehar ne wà. Erepyro amo àwà ne wà no, Erepyro amo karaiw ne wà no. Nezewegatete erepyro teko tetea'u ne wà no. Erepyro amo ze'egete rupi uze'eg ma'e ne wà. Erepyro amo àwà ze'eg rupi uze'eg ma'e ne wà no. Erepyro amo karaiw ze'eg rupi uze'eg ma'e ne wà no. Nezewegatete erepyro amo ae ze'eg rupi uze'eg ma'e tetea'u ne wà no. — Erepyro amo ko ywy rehe har ne wà. Erepyro amo amo ae ywy rehe har ne wà no. Nezewegatete erepyro ywy nànàgatu har tetea'u ne wà no. — Erepyro amo pàrànà ne wà. Erepyro amo izu ma'e ne wà no, Erepyro amo ipihun wewer ma'e ne wà no. Nezewegatete erepyro teko hexakaw uzuawyawy ma'e tetea'u ne wà no.