Isaías 41:2 - Tupàn zeꞌeg

² Tuwihawete kwarahy ihemaw kutyr har weityk amogwer tuwihawete paw rupi a'e wà. Mo werur a'e tuwihawete xe. Mo weityk kar ywy paw izupe wà. Mo uzuka kar tuwihawete izupe wà. Umuigo kar a'e tuwihawete ywy imuku'i pyrer romo utakihepuku pupe u'yw pupe wà. Umuzàwehem kar ka'a ruwer uxinig ma'e ywytu hemiraha ài wà.

Isaías 41:2 ပူးပေါင်းရင်းမြစ်များ

Gênesis 11:31

Ter uhem oho Ur tawhu Mawiron ywy rehe har wi a'e. Oho Kànàà ywy rehe kury. Weraha wa'yr Àmàràw uzeupi no. Weraha wemimino Iro Àrà ta'yr uzeupi no. Weraha wa'yr hemireko Xaraz uzeupi no. Uhem wà Àrà pe wà kury. Upyta a'e pe wiko pà wà.

Gênesis 17:1

Umumaw amo kwarahy. Àmàràw wereko 99 kwarahy kury. Na'e Tupàn Tuweharupi Wiko Ma'e uzexak kar wà izupe a'e kury. Uze'eg izupe, — Tupàn upuner wera'u ma'e romo aiko ihe. Eze'eg eho iko ihewe tuweharupi nehe. Ezapo heremimutar eho iko tuweharupi nehe no.

2 Samuel 22:43

Azuhazuhaw ihe wà. Uzeapo ywy ku'i kwer romo wà. Apyrog wanehe to'om pe rupi har zàwenugar rehe hepyrogaw ài ihe.

2 Reis 13:7

Xir wanuwihawete umumaw etea'i zauxiapekwer kawaru ku'az har wà. Umumaw etea'i ywyramawa wà no. Umumaw etea'i zauxiapekwer upy rehe wata ma'e wà no. Xo màràmàràn zo heta we Zeoakaz pe wà. 50 zauxiapekwer kawaru ku'az har heta we wà kury. 10 ywyramawa heta we wà no. 10 miw zauxiapekwer upy rehe wata ma'e heta we wà no. Xir wanuwihawete umu'imu'i amogwer ywyku'i kwer ài wà.

2 Crônicas 36:23

— Ihe Xiru Pezi wanuwihawete ihe, amume'u ko ma'e peme ihe. Tupàn Tuweharupi Wiko Ma'e ywak rehe har hemuigo kar ywy nànànar wanuwihawete romo a'e. Uzapo kar wàpuzuhu ràm Zeruzarez tawhu Zuta ywy rehe har ihewe a'e. Pe hemiaihu pe, peho Zeruzarez pe nehe kury. Tuwe Tupàn wiko peinuinuromo nehe, ere nehe, neze'eg imuapyk pà pape rehe nehe, i'i Tupàn Xiru pe. Upaw.

Esdras 1:2

— Ihe Xiru Pezi ywy rehe har wanuwihawete ihe, amume'u ko ma'e ihe. Tupàn Tuweharupi Wiko Ma'e ywak rehe har hemuigo kar ywy nànànar wanuwihawete romo a'e. — Ezapo kar heràpuzuhu Zeruzarez tawhu pe har Zuta ywy rehe har ihewe nehe, i'i ihewe.

Isaías 40:24

A'e tuwihaw nuzawy kwaw ma'e hezuz romo ma'e kwer wà. Pixika'i wanapo. Aze Tupàn upytuhem wanehe, uxinig wà. Ywytu weraha muite ka'a ruwer uxinig ma'e ài wà.

Isaías 41:25

Ihe ainoz amo awa kwarahy ihemaw kutyr har rehe har ihe. Uzeruzar herehe a'e. Ur putar kwarahy heixe haw awyze har wi nehe, wàmàtyry'ymar waàmàtyry'ym pà nehe. Upyrog tuwihawete wanehe a'e. Nuzawy kwaw to'om izupe wà. Zapepo iapo har upyropyrog ywy rehe upy pupe. Nezewegatete a'e awa upyrog wàmàtyry'ymar wanehe.

Isaías 41:3

Oho wanaikweromo ukyze 'ym pà. Zànetea'u a'e, a'e rupi ipy nupyrog ma'e ài kwaw ywy rehe.

Isaías 42:6

— Ihe Tupàn Tuweharupi Wiko Ma'e ihe, urenoz ihe. Urupyhyk nepo rehe. Urumuigo kar putar teko wapyro har romo ihe nehe. Uruapo ihe. Oromono kar heremiaihu wanupe no. Nerexak mehe teko uze'eg putar nezewe wà nehe. — Azeharomoete Tupàn uzapo putar wemimume'u kwer a'e nehe, i'i putar wà nehe. Apyro putar amo teko ihe wà nehe. Ereiko putar tatainy ài wanupe nehe, wapyro àwàm hexak kar pà wanupe nehe.

Isaías 45:1

Tupàn Tuweharupi Wiko Ma'e umuigo kar Xiru tuwihawete romo a'e. Upyhyk ipo awyze har rehe. Omono ukàgaw izupe. A'e rupi upuner ywy tetea'u rehe har wapyhykaw rehe. Upuner tuwihawete waneitykaw rehe no. Tupàn Tuweharupi Wiko Ma'e uwàpytymawok tawhu hukenaw a'e. A'e rupi Xiru upuner tawhu pupe wixe haw rehe. Ni amo nupuner kwaw iwàpytym wi haw rehe wà nehe. Tupàn Tuweharupi Wiko Ma'e uze'eg nezewe Xiru pe:

Isaías 45:13

Ihe amuzypyrog kar Xiru ma'e iapo kar pà izupe ihe. — Ereityk putar ywy tetea'u rehe har ne wà nehe, Amumew putar hape ràm henataromo ihe nehe. Uzapo wi putar Zeruzarez tawhu hereko haw romo a'e nehe no. Umuhem kar putar heremiaihu wamunehew paw wi a'e wà nehe. Nuenoz kwaw temetarer wamuhem kar haw hekuzaromo nehe. Ihe Tupàn Tuweharupi Wiko Ma'e Ikàg Wera'u ma'e amume'u ko ze'eg tekoko ihe, i'i Tupàn.

Isaías 46:11

Aenoz amo awa tekoko ihe. — Ezur kwarahy hemaw wi nehe, a'e tekoko izupe. Ur iko na'arewahy ywy muite har wi wiràhu ài. Uzapo putar ma'e heremiapo kar nehe. Azapo putar ma'e heze'eg awer rupi katete nehe. Azapo putar heremimume'u kwer nehe.

Isaías 48:15

Ihe ae ihe, ainoz a'e awa ihe. — Ezur nehe, a'e izupe. A'e rupi ur a'e. Amukatu putar hemiapo ràm upaw rupi ihe nehe.

Lamentações de Jeremias 1:15

Urezar umumaw zauxiapekwer ureremiruze'eg na'arewahy a'e wà. Umur kar zauxiapekwer tetea'u kwàkwàmo ureremiruze'eg wazuka kar pà a'e. Ukamikamik teko tawhu pupe har ikatu ma'e wà. Teko ukamikamik ma'ywa uwà itykwer iapo pà wà. Nezewegatete zauxiapekwer umumaw teko paw rupi wà.

Hebreus 7:1

Kwehe mehe Mekizetek a'e, Xarez tawhu pe har wanuwihaw romo hekon a'e. Uze'eg Tupàn Ikàg Wera'u Ma'e pe tuweharupi, teko wanekuzaromo, uzuka ma'ea'yr wanemiapo kwer ikatu 'ym ma'e hekuzaromo. Amo 'ar mehe Àmàrààw uzàmàtyry'ym amo ae tuwihaw oho a'e wà. Àmàrààw hemiaihu uzuka a'e tuwihaw wanemiaihu tetea'u a'e wà. Uzuka a'e tuwihaw wà no. Upyhyk wama'e wanemetarer wà no. Na'e Àmàrààw uzewyr Xarez tawhu kutyr wà kury. Mekizetek uwàxi Àmàrààw oho pe rupi. Uze'eg izupe. — Tuwe Tupàn uzapo ikatu ma'e newe a'e nehe, i'i izupe.

Apocalipse 16:12

Na'e amo Tupàn heko haw pe har uzakook ukawaw por oho Ewpara yrykaw rehe a'e kury. Typaw kury. A'e rupi tuwihaw kwarahy hemaw rehe har upuner ur haw rehe a'e yrykaw typawer rupi a'e wà nehe, zauxiapekwer tetea'u wanerur pà a'e wà nehe, a'e pe har wàmàtyry'ym pà a'e wà nehe.

Apocalipse 7:2

Na'e aexak amo Tupàn heko haw pe har ihe kury. Kwarahy ihemaw wi tur a'e. Werur Tupàn her ikaikair pyràm uzeupi a'e no. Uze'eg wahyhaw rupi, a'e 4 Tupàn heko haw pe har wanupe, a'e ywy imumaw par wanupe.