Isaías 30:19 - Tupàn zeꞌeg

¹⁹ Teko Zeruzarez pe har wà, Xiàw rehe har wà, pepytu'u putar pezai'o re nehe. Penoz putar pepytywà àwàm nehe. Tupàn Tuweharupi Wiko Ma'e pepuhareko putar nehe. Wenu putar peze'eg nehe. Pepytywà putar nehe.

Isaías 30:19 ပူးပေါင်းရင်းမြစ်များ

Salmos 50:15

Aze herenoz pe ma'erahy ipuraraw paw 'ar mehe nehe, Apupyro putar ihe nehe. A'e mehe pemume'u putar hekatu haw nehe, i'i Tupàn wemiaihu wanupe.

Isaías 10:24

A'e rupi uze'eg Zanezar Tupàn Ikàg Wera'u Ma'e teko wemiaihu Xiàw rehe har wanupe kury. — Heremiaihu wà, pekyze zo Axir wanuwi nehe. Kwehe mehe Ezit ywy rehe har uzepyk penehe ikatu 'ym ma'e iapo pà peme wà. Nezewegatete Axir uzepyk putar penehe a'e wà nehe no. Uzapo putar ikatu 'ym ma'e peme wà nehe no.

Isaías 25:8

Tupàn Tuweharupi Wiko Ma'e umumaw putar tuwe màno haw nehe. Nezewe mehe teko numàno kwaw wà nehe. Umuxinig putar teko paw wanehay kwer nehe, uzemumikahy ma'e wamurywete kar pà nehe. Umukàzym kar putar wemiaihu wamaranugar haw nehe. Tupàn Tuweharupi Wiko Ma'e umume'u ko ze'eg kwez kury.

Isaías 33:2

O Tupàn Tuweharupi Wiko Ma'e, urepuhareko pe nehe. Uruàro urepytywà àwàm ure. Eiko urerehe uzekaiw ma'e romo tuweharupi nehe. Eiko urepyro har romo 'ar zawaiw katu ma'e rehe nehe.

Isaías 35:10

Tupàn Tuweharupi Wiko Ma'e hemipyro kwer uzewyr putar weko haw pe wà nehe. Uzewyr putar Zeruzarez pe uzegar pà wà nehe. Wiko putar a'e pe tuweharupi urywete romo wà nehe. Turywete haw nehe, zemumikahy 'ymaw nehe, wainuinuromo wanuz tuweharupi wà nehe. Naheta kwaw zemumikahy haw a'e pe nehe. Teko nuzai'o kwaw a'e pe wà nehe.

Isaías 41:17

Amo 'ar mehe heremiaihu nahemetarer katu kwaw wà nehe. Nuhyk kwaw wanemi'u wanupe nehe. Wekar putar 'y oho wà nehe. Nuexak kwaw wà nehe. Wazuru uxinig putar waiwez mehe wà nehe. A'e 'ar mehe ihe Tupàn Tuweharupi Wiko Ma'e azekaiw putar wanehe ihe nehe. Ihe Tupàn Izaew wazar natyryk kwaw wanuwi ihe nehe.

Isaías 46:13

Amuhem kar putar purupyro haw heremimume'u kwer na'arewahy ihe nehe. Nan kwehe tete aityk putar heàmàtyry'ymar ihe wà nehe. Apyro putar Xiàw rehe wiko ma'e ihe wà nehe. Amuza'aza'ak hekàg wera'u haw ipehegwer imono pà teko Izaew wanupe nehe, i'i Tupàn.

Isaías 58:9

Ihewe penehapukaz mehe pepytywà àwàm henoz mehe nehe, apuenu putar nehe. — Urepytywà pe nehe, peze putar ihewe nehe. — Aiko aiko xe ihe, a'e putar peme nehe. — Aze pepytu'u tuwe pemunar ire wà nehe, aze pepytu'u ikatu 'ym ma'e amo wanupe imume'u re nehe, aze pepytu'u peze'eg urywahyahy re pe nehe,

Isaías 60:20

Aiko putar kwarahy romo newe nehe, aiko putar zahy romo newe nehe no. Aiko putar kwarahy wixe pixik 'ym ma'e romo nehe, aiko putar zahy uhyape re upytu'u pixik 'ym ma'e romo nehe no. Ahyape katu putar nerehe tatainy ài tuweharupi nehe. Pezemumikahy haw i'ar upaw putar nehe.

Isaías 65:18

Penurywete nehe. Peiko hurywete ma'e romo tuweharupi heremiapo ràm hexak mehe nehe. Ta'e amynehem putar Zeruzarez tawhu turywete haw pupe ihe nehe xe. Amono putar turywete haw tetea'u ipupe har wanupe nehe no.

Isaías 65:19

Zeruzarez ikatu putar ihewe nehe. Heremiaihu hemynehem putar turywete haw pupe wà nehe. Teko nuenu pixik kwaw teko wazai'o haw a'e pe wà nehe. Ma'erahy ipuraraw paw rehe teko wanehapukaz haw nuzenu pixik kwaw a'e pe nehe.

Isaías 65:24

Herenoz 'ym mehe we ainu putar waze'eg nehe. Waze'eg imumaw 'ym mehe we awazar putar waze'eg wanupe nehe.

Isaías 65:9

Amono putar wazuapyapyr tetea'u Zako izuapyapyr wanupe ihe wà nehe, Zuta izuapyapyr wanupe ihe wà nehe no. Amuigo kar putar a'e teko heywy izar romo ihe wà nehe no. Teko heremixamixak kwer wiko putar Ywy Heremimume'u kwer izar romo wà nehe. Wiko putar hehe tuweharupi wà nehe.

Jeremias 30:12

Tupàn Tuweharupi Wiko Ma'e uze'eg Zeruzarez tawhu pe kury. — Naheta kwaw imukatu haw 'aw teko wama'eahy haw pe. Waperew nuke'e kwaw.

Jeremias 31:12

Uhem putar Xiàw ywytyr pe urywete haw rehe uzegar pà wà nehe. Hurywete putar ihewe imur pyr rehe wà nehe no: arozràn, win, uri kawer, tapi'ak, àràpuhàràn. Nuzawy kwaw ma'etymaw imuàkygatu pyrer wà nehe. Uhyk putar ma'e paw wanupe nehe no.

Jeremias 31:16

— Epytu'u nezai'o re nehe. Ezuhyw nerehaykwer nehe no. Nememyr pe neremiapo kwer paw hekuzar erepyhyk putar nehe. Uzewyr putar wàmàtyry'ymar waiwy wi wà nehe. Ihe Tupàn Tuweharupi Wiko Ma'e aiko ko ma'e imume'u har romo ihe.

Jeremias 31:6

Uhem amo 'ar iko. A'e 'ar mehe ume'egatu ma'e uhapukaz putar ywytyr Eparai ywy rehe har rehe wà nehe. — Pezur nehe. Zazeupir Xiàw pe nehe, Tupàn Tuweharupi Wiko Ma'e Zanezar henaw pe nehe, i'i putar wà nehe.

Jeremias 31:9

Wanerur mehe nehe, uzai'o putar wà waiko wà nehe. Uze'eg putar wà waiko ihewe wà nehe. Araha putar yrykaw uwyryk ma'e izywyr ihe wà nehe, pe ikatu ma'e rupi ihe wà nehe. Nuzepyapi kwaw hupi wata mehe wà nehe. Aiko Izaew wanu ài. Eparai wiko hera'yr ipy romo a'e.

Jeremias 33:3

Zeremi. Aze herenoz pe nehe, awazar putar nehe. Amume'u putar ma'e temigwaw 'ym ikatuahy ma'e newe nehe. Nerekwaw kwaw a'e ma'e.

Jeremias 50:28

Amo teko oho uzàn pà Mawiron wi wà, Xiàw pe uhem pà wà. Apuner wanexakaw rehe ihe. — Tupàn Tuweharupi Wiko Ma'e Zanezar uzepyk Mawiron wanehe a'e, ta'e uzapo iaiw ma'e hàpuzuhu pe a'e wà xe, i'i waiko wà.

Jeremias 51:10

Tupàn Tuweharupi Wiko Ma'e uze'eg kury. — Heremiaihu uhapukaz nezewe uze'eg pà wà. Tupàn Tuweharupi Wiko Ma'e wexak kar zanekatu haw. Zaha Zeruzarez tawhu pe Tupàn Tuweharupi Wiko Ma'e Zanezar hemiapo kwer imume'u pà teko a'e pe har wanupe nehe, i'i wà.

Ezequiel 20:40

Muite Izaew ywy rehe, ywytyr ihewe imonokatu pyrer rehe, ywytyr aiha Izaew ywy rehe har rehe, pe paw rupi hemuwete katu putar pe nehe. Pekatu putar ihewe nehe. Àro putar ma'ea'yr herenataromo penemizuka ràm ihe nehe. Pema'e ikatu wera'u ma'e perur putar ihewe nehe. Ma'e ihewe imur katu pyrer perur putar ihewe nehe.

Ezequiel 36:37

Zanezar Tuweharupi Wiko Ma'e uze'eg kury. — Urepytywà pe nehe, i'i putar Izaew ihewe wà nehe, ta'e amume'u kar putar wanupe ihe nehe xe. Amueta tetea'u kar putar a'e teko àràpuhàràn tetea'u imono'og pyrer ài wà nehe.

Miquéias 4:9

Zeruzarez. Erezai'o iko kuzà imemyrahy ma'e ài. Màràzàwe tuwe erezai'o iko. Aipo neruwihawete heta 'ymaw rehe erezai'o iko. Aipo neruwihawete hehe we har wamàno awer rehe erezai'o iko.

Lucas 6:21

Pema'uhez peiko no, penurywete nehe no, ta'e amo 'ar rehe penewykàtà putar nehe xe, penurywete putar nehe xe. Pezemumikahy peiko pezai'o pà, pepuka putar nehe no.

Romanos 11:26

Nezewe Tupàn upyro putar zutew a'e wà nehe. Nezewe i'i Tupàn ze'eg pape rehe imuapyk pyrer. — Zanepyro har ur putar Xiàw wi a'e nehe. O'ok putar ikatu 'ym ma'e paw Zako izuapyapyr wanuwi nehe.

Efésios 3:20

Aze xinoz ikatu ma'e izupe nehe, upuner tuwe a'e ma'e imur haw rehe zanewe nehe. Upuner amo ae ma'e iapo haw rehe zanewe nehe no. Aze ma'e ikatu zanewe, upuner a'e ma'e imur haw rehe zanewe a'e. Upuner amo ae ma'e zaneremimume'u 'ym imur haw rehe zanewe no. Ta'e umur ukàgaw zanewe a'e xe.

Apocalipse 5:4

Na'e azai'o ihe kury, ta'e nuexak kwaw a'e pape hewàpytymawok àràm a'e xe. Ni amo nupuner kwaw a'e pape imugeta haw rehe a'e wà.

Apocalipse 7:17

— Ta'e Àràpuhàràna'yr zàwenugar a'e nehe xe, tuwihaw henaw mytepe har a'e nehe xe, wiko putar wanehe uzekaiw ma'e romo a'e nehe xe, i'i ihewe. — Weraha putar wemiaihu ytyzuzàmaw pe a'e wà nehe, wamui'u kar pà a'e pe a'e wà nehe, 'y purumuigo kar har i'u kar pà wanupe a'e wà nehe, i'i ihewe. — Na'e Tupàn uhyuhyw putar wanehay kwer wanuwi a'e nehe, i'i ihewe.